مجمع الزوائد ومنبع الفوائد

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم کا گزر سیدنا ابوقتادہ رضی اللہ عنہ کے پاس سے ہوا جو ایک ایسے فرد کے پاس موجود تھے جسے انہوں نے قتل کیا تھا ، تو نبی اکرم صلی اللہ علیہ وسلم نے فرمایا : اسے اور اس کے سامان کو چھوڑ دو ۔
یہ روایت امام ابویعلیٰ نے نقل کی ہے ۔ امام طبرانی نے معجم کبیر اور معجم اوسط میں اس مضمون کی روایت نقل کی ہے ۔ امام أحمد اور معجم کبیر کے رجال صحیح کے رجال ہیں صرف عتاب بن زیاد کا معاملہ مختلف ہے اور وہ ثقہ ہے ۔

امام شعبی بیان کرتے ہیں : سیدنا جبریر رضی اللہ عنہ نے مہران کو مقابلے کے لئے للکارا اور اسے قتل کر دیا ، تو اس کے پٹکے کی قیمت تیس ہزار تھی پہلے یہ ہوتا تھا کہ جب کوئی شخص کسی شخص کو مقابلے کے لئے للکارتا تھا ، اور اسے قتل کر دیتا تھا ، تو مقتول کا سامان اسے مل جاتا تھا لوگوں نے اس بارے میں سیدنا عمر رضی اللہ عنہ کو خط لکھا تو سیدنا عمر رضی اللہ عنہ نے فرمایا : یہ اس سامان میں سے نہیں ہے ، جو ( قتل کرنے والے مسلمان ) کو دے دیا جاتا ہے ، کیونکہ یہ چیز نہ ہتھیار میں شامل ہے نہ ” کراع “ ( یہ لفظ ہتھیاروں اور گھوڑوں دونوں کے لیے استعمال ہوتا ہے ) میں شامل ہے ، تو سیدنا عمر رضی اللہ عنہ نے انعام کے طور پر وہ انہیں نہیں دیا بلکہ اسے مال غنیمت میں شامل کیا ۔
یہ روایت امام طبرانی نے نقل کی ہے انہوں نے یہ بھی نہیں کہا: کہ یہ سیدنا جریر رضی اللہ عنہ سے منقول ہے ، تو
یہ روایت منقطع ہے ۔

جنادہ بن ابوامیہ بیان کرتے ہیں : ہم نے دابق کے مقام پر پڑاؤ کیا سیدنا ابوعبیدہ بن جراح رضی اللہ عنہ ہمارے امیر تھے حبیب بن مسلمہ کو اس بات کی اطلاع ملی کہ قبرس کا حکمران نکلا ہے اور وہ آذربائی جان کے راستے کی طرف جا رہا ہے اس کے ساتھ زمرد یاقوت موتی سونا اور ریشم ہے ، تو حبیب بن مسلمہ کچھ گھڑ سواروں کے ساتھ نکلے انہوں نے اسے قتل کر دیا اور جو کچھ اس کے ساتھ ساز و سامان تھا وہ لے آئے ۔ سیدنا ابوعبیدہ رضی اللہ عنہ نے یہ ارادہ کیا کہ انہیں خمس دیں ، تو سیدنا حبیب بن مسلمہ رضی اللہ عنہ نے کہا: کہ آپ مجھے اس رزق سے محروم نہ کریں جو اللہ تعالیٰ نے مجھے عطا کیا ہے نبی اکرم صلی اللہ علیہ وسلم نے ( مقتول کا ) ساز و سامان قاتل کو دینے کا حکم دیا ہے ، تو سیدنا معاذ رضی اللہ عنہ نے کہا: اے حبیب میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” آدمی کے لئے وہی چیز ہو گی جو اس کا حکمران خوش دلی سے اسے دے گا “ ۔
یہ روایت امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی عمرو بن واقد ہے اور وہ متروک ہے ۔

ابن سیرین بیان کرتے ہیں : سیدنا براء بن مالک رضی اللہ عنہ جو سیدنا انس بن مالک رضی اللہ عنہ کے بھائی ہیں انہوں نے مرزبان زارہ کو مقابلے کے لئے للکارا اور اسے قتل کر دیا اور اس کا سامان حاصل کر لیا ، تو اس کے سامان کی قیمت تیس ہزار تک پہنچتی تھی سیدنا عمر بن خطاب رضی اللہ عنہ کو اس بات کی اطلاع ملی تو انہوں نے سیدنا ابوطلحہ رضی اللہ عنہ سے فرمایا : ہم سلب ( یعنی مقتول کے سامان ) کو خمس میں شمار نہیں کرتے تھے براء کا حاصل کیا ہوا سامان بہت زیادہ مال تک پہنچتا ہے ، تو میں یہ سمجھتا ہوں کہ اسے پانچواں حصہ ملنا چاہیے ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

سیدنا جابر بن عبداللہ رضی اللہ عنہ بیان کرتے ہیں : جنگی موتہ کے دن سیدنا عقیل بن ابوطالب رضی اللہ عنہ نے ایک شخص کو لڑائی کے لئے للکارا اور اسے قتل کر دیا ، تو نبی اکرم صلی اللہ علیہ وسلم نے اس ( مقتول ) شخص کی انگوٹھی اور اس کا ساز و سامان سیدنا عقیل رضی اللہ عنہ کو دے دیا ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عبداللہ بن محمد بن عقیل ہے اور وہ حسن الحدیث ہے اس میں ضعف پایا جاتا ہے ۔ اس روایت کے بقیہ رجال ثقہ ہیں ۔

سیدنا عبداللہ بن عباس رضی اللہ عنہما بیان کرتے ہیں : سیدنا عبداللہ بن مسعود رضی اللہ عنہ غزوہ بدر کے دن ابوجہل کے پاس آئے وہ اس وقت زخمی حالت میں پڑا ہوا تھا ۔ سیدنا عبداللہ بن مسعود رضی اللہ عنہ نے تلوار نکالی اور اس کی گردن اڑا دی اور اس کا سر تن سے جدا کر دیا پھر انہوں نے ابوجہل کا سامان لیا اور نبی اکرم صلی اللہ علیہ وسلم کے پاس آئے آپ کو اس بارے میں بتایا کہ انہوں نے ابوجہل کو قتل کر دیا ہے نبی اکرم صلی اللہ علیہ وسلم نے ان سے اللہ کے نام پر تین مرتبہ حلف لیا انہوں نے حلف اٹھا لیا ، تو نبی اکرم صلی اللہ علیہ وسلم نے ابوجہل کا سامان انہیں دے دیا ۔
یہ روایت امام طبرانی نے نقل کی ہے ۔ اس کی سند میں ایک راوی اسماعیل بن ابواسحاق ابواسرائیل ملائی ہے اور وہ ضعیف ہے ۔ امام أحمد کہتے ہیں : اس کی نقل کردہ حدیث کو نوٹ کیا جائے گا ۔

خریم بن اوس بیان کرتے ہیں : میرے نزدیک عربوں کا ہرمز سے بڑا دشمن اور کوئی نہیں تھا ۔ جب ہم مسیلمہ اور اس کے ساتھیوں سے فارغ ہوئے تو ہم نے بصرہ کی طرف رخ کیا کاظمہ کے مقام پر ہمارا سامنا ہرمز سے ہوا جس کے ساتھ بڑا لشکر تھا ۔ سیدنا خالد بن ولید رضی اللہ عنہ آگے نکلے اور مقابلے کے لئے للکارا تو ہرمز ان کے سامنے مقابلہ کرنے کے لئے آیا سیدنا خالد بن ولید رضی اللہ عنہ نے اسے قتل کر دیا انہوں نے اس بارے میں سیدنا ابوبکر صدیق رضی اللہ عنہ کو خط لکھا تو سیدنا ابوبکر رضی اللہ عنہ نے ہرمز کا ساز و سامان سیدنا خالد رضی اللہ عنہ کو انعام کے طور پر دے دیا ہرمز کی ٹوپی کی قیمت ایک لاکھ درہم تھی ایرانیوں کا یہ معمول تھا کہ جب کوئی شخص ان کا حکمران بنتا تھا ، تو اس کی ٹوپی ایک لاکھ درہم کی بناتے تھے ۔
یہ روایت امام طبرانی نے نقل کی ہے اور اس کی سند میں ایسا راوی ہے جس سے میں واقف نہیں ہوں ۔

قیس بن ابوحازم بیان کرتے ہیں : جنگ قادسیہ کے موقع پر میں نے سیدنا عمرو بن معدیکرب رضی اللہ عنہ کو دیکھا کہ وہ لوگوں کو جنگ کے لئے ترغیب دے رہے تھے اور یہ فرما رہے تھے : اے لوگو ! ( دشمن سے ) بھڑ جانے والے زبردست شیروں کی طرح ہو جاؤ ، ایرانی شخص نر ہوتا ہے ، جب وہ اپنے چھوٹے نیزے سے ملتا ہے ۔ راوی کہتے ہیں : ابھی وہ اسی حالت میں تھے کہ ایرانیوں کے قائدین میں سے ایک قائد نے ان کے لئے اپنا ترکش نکالا ، ان سے کہا: گیا : اے ابوثور ! اس شخص نے آپ کے لئے ترکش نکال لیا ہے ۔ راوی کہتے ہیں : اس شخص نے انہیں تیر مارا ، وہ نشانے پر نہیں لگا ، بلکہ سیدنا عمرو رضی اللہ عنہ کی کمان پر لگا ، اور اسے توڑ دیا پھر سیدنا عمرو رضی اللہ عنہ نے اس پر حملہ کر کے اسے زخمی کیا اور اس کی پشت کو توڑ دیا ، پھر وہ اتر کر اس کے پاس گئے ، اور اس نے جو کنگن پہنے ہوئے تھے وہ لے لیے ، اور جو ریشمی یلمق ( یعنی قباء ) پہنا ہوا تھا ، وہ بھی لے لیا ، راوی کہتے ہیں : تو وہ چیزیں انہیں مل گئی تھیں ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔