مجمع الزوائد ومنبع الفوائد

سیدنا ابوعبیدہ رضی اللہ عنہ بیان کرتے ہیں : نبی اکرم صلی اللہ علیہ وسلم نے جو آخری کلام ارشاد فرمایا تھا وہ یہ تھا : ” حجاز کے یہودیوں اور اہل نجران کو جزیرہ نما عرب سے نکال دینا تم لوگ یہ بات جان لو کہ لوگوں میں بدترین لوگ وہ ہیں ، جو اپنے انبیاء کی قبروں کو سجدہ گاہ بنا لیتے ہیں“ ۔
یہ روایت امام أحمد نے دو اسناد کے ساتھ نقل کی ہے ان کے دو طریقوں میں سے ایک کی سند کے رجال ثقہ ہیں اور اس کی سند متصل ہے
یہ روایت امام ابویعلیٰ نے بھی نقل کی ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے جو آخری تلقین کی تھی وہ یہ تھی کہ آپ نے ارشاد فرمایا : ” جزیرہ نما عرب میں دو دین باقی نہیں رہیں گے “ ۔
یہ روایت امام أحمد نے اور امام طبرانی نے معجم اوسط میں نقل کی ہے ۔ امام أحمد کے رجال صحیح کے رجال ہیں صرف ابن اسحاق کا معاملہ مختلف ہے اور اس نے بھی سماع کی صراحت کی ہے ۔ خلافت کے بارے میں سیدنا علی رضی اللہ عنہ سے منقول حدیث پہلے گزر چکی ہے جسے امام أحمد نے روایت کیا ہے ۔

سیدنا ابورافع رضی اللہ عنہ بیان کرتے ہیں : نبی اکرم صلی اللہ علیہ وسلم نے یہ حکم دیا کہ مدینہ میں اسلام کے علاوہ کوئی اور دین ہم باقی نہ رہنے دیں ( اگر کسی اور دین کا پیروکار کوئی شخص موجود ہو ) تو اسے نکال دیا جائے ۔
یہ روایت امام طبرانی نے نقل کی ہے ۔ اس کی سند میں ایک راوی شریک اور ایک راوی عبداللہ بن محمد بن عقیل ہے اور ان دونوں میں ضعف پایا جاتا ہے ان دونوں کی نقل کردہ حدیث حسن ہے اس روایت کے بقیہ رجال ثقہ ہیں ۔

سیدہ ام سلمہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” یہودیوں کو جزیرہ نما عرب سے نکال دو “ ۔
یہ روایت امام طبرانی نے دو طریقوں سے نقل کی ہے جن میں سے ایک کے رجال صحیح کے رجال ہیں ۔

سیدنا معاویہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” تم لوگ عنقریب ” شیخ “ ( نامی گھاس ) کے اُگنے کی جگہ کو فتح کر لو گے “ ۔
یہ روایت امام طبرانی نے نقل کی ہے ۔ اس کی سند میں ایک راوی ابن لہیعہ ہے اور اس میں ضعف پایا جاتا ہے اور اس کی نقل کردہ حدیث حسن ہے ۔