مجمع الزوائد ومنبع الفوائد

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم سقایہ کے پاس موجود تھے ایک خاتون اپنے بیٹے کو ساتھ لے کر آپ کی خدمت میں حاضر ہوئی اس نے عرض کی : میرا یہ بیٹا جنگ میں حصہ لینا چاہتا ہے اور میں اسے روک رہی ہوں نبی اکرم صلی اللہ علیہ وسلم نے ( اس لڑکے سے ) فرمایا تم اپنی ماں کے ساتھ رہو جب تک وہ تمہیں اجازت نہیں دیتی یا جب تک اسے موت نہیں آ جاتی ، کیونکہ یہ تمہارے لئے زیادہ اجر کا باعث ہو گا ۔
یہ روایت امام طبرانی نے نقل کی ہے ۔ اس کی سند میں ایک راوی رشدین بن کریب ہے اور وہ ضعیف ہے ۔

سیدنا عبداللہ بن عباس رضی اللہ عنہما بیان کرتے ہیں : ایک شخص اور اس کی والدہ نبی اکرم صلی اللہ علیہ وسلم کی خدمت میں حاضر ہوئے وہ شخص جہاد میں حصہ لینا چاہتا تھا ، اور اس کی والدہ اسے روک رہی تھی نبی اکرم صلی اللہ علیہ وسلم نے فرمایا : تم اپنی ماں کے پاس ٹھہرے رہو کیونکہ تمہیں اس کے پاس ٹھہرنے پر وہی اجر ملے گا جو تمہیں جہاد میں حصہ لینے پر ملنا تھا ۔
یہ روایت امام طبرانی نے نقل کی ہے ۔ اس کی سند میں ایک راوی رشدین بن کریب ہے اور وہ ضعیف ہے ۔ ( علامہ ہیثمی فرماتے ہیں : ) میں یہ کہتا ہوں : کتاب البروالصلہ میں اس نوعیت کی کچھ احادیث آئیں گی ۔

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” اگر جنگ گھر کے دروازے کے پاس ہو رہی ہو ، تو تم اپنے ماں باپ کی اجازت کے بغیر نہ جانا “ ۔
یہ روایت امام طبرانی نے معجم صغیر میں نقل کی ہے اور اس کے رجال صحیح کے رجال ہیں صرف امام طبرانی کے استاد اسامہ بن علی بن سعید بن بشیر کا معاملہ مختلف ہے وہ ثقہ اور ثبت ہے جیسے تاریخ مصر میں یہ بات مذکور ہے ۔

سیدنا عبداللہ بن عمر رضی اللہ عنہما بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا اس نے عرض کی : یا رسول اللہ ! میں جہاد پر آپ کی بیعت کرنا چاہتا ہوں نبی اکرم صلی اللہ علیہ وسلم نے فرمایا : کیا تمہارے ماں باپ زندہ ہیں ؟ اس نے عرض کی : جی ہاں ۔ نبی اکرم صلی اللہ علیہ وسلم نے فرمایا : پھر تم ان کی بھر پور خدمت کرو ۔
یہ روایت امام طبرانی نے معجم کبیر اور معجم اوسط میں اپنے استاد محمد بن أحمد جیلی کے حوالے سے أحمد بن ابراہیم حارثی سے نقل کی ہے اور میں ان دونوں سے واقف نہیں ہوں اس روایت کے بقیہ رجال ثقہ ہیں ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم اس بستی کی طرف جانے کی تیاری کرو ، جس کے رہنے والے ظالم ہیں ، کیونکہ اگر اللہ نے چاہا ، تو اللہ تعالیٰ اسے تمہارے لئے فتح کروا دے گا ۔ نبی اکرم صلی اللہ علیہ وسلم کی مراد خیبر تھی ( نبی اکرم صلی اللہ علیہ وسلم نے یہ بھی فرمایا ) میرے ساتھ کوئی ایسا شخص نہ روانہ ہو جس کا سواری کا جانور دشوار ہو ( یعنی ق ابومیں نہ آتا ہو ، ) یا وہ ( جانور ) کمزور ہو ، راوی کہتے ہیں : سیدنا ابوہریرہ رضی اللہ عنہ اپنی والدہ کے پاس گئے ، اور بولے : آپ مجھے سامان فراہم کریں ، کیونکہ نبی اکرم صلی اللہ علیہ وسلم نے ہمیں جنگ میں حصہ لینے کا حکم دیا ہے اس خاتون نے کہا: تم چلے جاؤ گے جبکہ تم یہ بات جانتے ہو کہ میں جب بھی سہولت کی جگہ میں داخل ہوتی ہوں ، تو تم میرے ساتھ ہوتے ہو ، سیدنا ابوہریرہ رضی اللہ عنہ نے کہا: میں اللہ کے رسول سے پیچھے نہیں رہوں گا ، تو اس خاتون نے اپنی چھاتی کی طرف اشارہ کر کے انہیں اس چیز کا واسطہ دیا کہ جو اس خاتون نے انہیں دودھ پلایا تھا پھر وہ خاتون نبی اکرم صلی اللہ علیہ وسلم کی خدمت میں حاضر ہوئیں اور آپ کو اس بارے میں بتایا تو نبی اکرم صلی اللہ علیہ وسلم نے فرمایا : تم واپس چلی جاؤ تمہارا معاملہ حل ہو جائے گا جب سیدنا ابوہریرہ رضی اللہ عنہ آئے تو نبی اکرم صلی اللہ علیہ وسلم نے ان سے منہ پھیر لیا انہوں نے عرض کی : یا رسول اللہ ! میں دیکھ رہا ہوں کہ آپ نے مجھ سے منہ پھیر لیا ہے اور میں یہ سمجھتا ہوں کہ آپ تک کوئی بات پہنچی ہے جس کی وجہ سے ایسا ہوا ہے نبی اکرم صلی اللہ علیہ وسلم نے فرمایا : تم ہی وہ شخص ہو کہ جسے تمہاری والدہ واسطے دے رہی تھی اور اس نے تمہیں ، جو دودھ پلایا ہے اس کا حوالہ دے رہی تھی ؟ کیا تم میں سے کوئی ایک شخص یہ گمان کرتا ہے کہ جب اس کے ماں باپ موجود ہوں یا ان دونوں میں سے کوئی ایک موجود ہو ، تو ایسی صورت میں وہ شخص اللہ کی راہ میں نہیں ہوتا ؟ ایسا شخص اللہ کی راہ میں ہوتا ہے جب وہ ان دونوں کے ساتھ اچھا سلوک کرے اور ان کا حق ادا کرے سیدنا ابوہریرہ رضی اللہ عنہ کہتے ہیں : اس کے بعد میں دو سال تک اس حال میں رہا کہ میں نے کسی جنگ میں حصہ نہیں لیا یہاں تک کہ میری والدہ کا انتقال ہو گیا ۔ اس کے بعد راوی نے پوری حدیث ذکر کی ہے یہ پوری حدیث غزوہ خیبر سے متعلق باب میں آگے آئے گی ۔
یہ روایت امام طبرانی نے نقل کی ہے ۔ اس کی سند میں ایک راوی علی بن یزید الہانی ہے اور وہ ضعیف ہے ۔