مجمع الزوائد ومنبع الفوائد

سیدنا عبداللہ بن عباس رضی اللہ عنہما اور سیدنا بریدہ رضی اللہ عنہ بیان کرتے ہیں : نبی اکرم صلی اللہ علیہ وسلم کا چھوٹا جھنڈا سیاہ رنگ کا اور بڑا جھنڈا سفید رنگ کا ہوا تھا ۔
یہ روایت امام ابویعلیٰ اور امام طبرانی نے نقل کی ہے ۔ اس کی سند میں ایک راوی حیان بن عبیداللہ ہے ۔ امام ذہبی کہتے ہیں : امام ابن ابوحاتم نے اس کے حالات بیان کیے ہیں ویسے یہ مجہول ہے ۔ امام ابویعلیٰ کے بقیہ رجال ثقہ ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم کا چھوٹا جھنڈا سیاہ رنگ کا اور بڑا جھنڈا سفید رنگ کا ہوتا تھا ، جس پر لا الہ الا الله محمد رسول اللہ لکھا ہوتا تھا ۔ ( علامہ ہیثمی فرماتے ہیں : ) میں یہ کہتا ہوں :
یہ روایت امام ترمذی اور امام ابن ماجہ نے نقل کی ہے تاہم انہوں نے اس میں تحریر کے الفاظ نقل نہیں کیے ہیں ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی حیان ہے جس پر کلام پہلے گزر چکا ہے جسے آپ اس سے پہلے ملاحظہ فرما چکے ہیں اس روایت کے بقیہ رجال صحیح کے رجال ہیں ۔

سیدنا جابر رضی اللہ عنہ بیان کرتے ہیں : نبی اکرم صلی اللہ علیہ وسلم کا چھوٹا جھنڈا سیاہ رنگ کا ہوتا تھا ۔ ( علامہ ہیثمی فرماتے ہیں : ) میں یہ کہتا ہوں ۔ سیدنا جابر رضی اللہ عنہ کے حوالے سے سنن میں
یہ روایت منقول ہے کہ وہ سفید رنگ کا ہوتا تھا ۔
یہ روایت امام طبرانی نے تینوں کتابوں میں نقل کی ہے معجم کبیر کی سند میں ایک راوی شریک نخعی ہے جسے امام نسائی رحمہ اللہ اور دیگر حضرات نے ثقہ قرار دیا ہے اس میں ضعف پایا جاتا ہے ۔ اس روایت کے بقیہ رجال ثقہ ہیں ۔

سیدنا مزیدہ عبدی رضی اللہ عنہ بیان کرتے ہیں : نبی اکرم صلی اللہ علیہ وسلم نے انصار کے چھوٹے جھنڈے بنوائے تھے اور انہیں زرد رنگ کا بنوایا تھا ۔
یہ روایت امام طبرانی نے نقل کی ہے ۔ اس کی سند میں ایک راوی محمد بن لیث ہدادی ہے اور میں اس سے واقف نہیں ہوں اس روایت کے بقیہ رجال ثقہ ہیں ۔

سیدنا کریز بن سامہ رضی اللہ عنہ بیان کرتے ہیں : نبی اکرم صلی اللہ علیہ وسلم نے بنوسلیم کے لئے سرخ رنگ کا چھوٹا جھنڈا بندھوایا تھا ۔
یہ روایت امام طبرانی نے نقل کی ہے ۔ اس کی سند میں ایسے راوی ہیں جن سے میں واقف نہیں ہوں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم کا مخصوص جھنڈا سیدنا علی بن ابوطالب رضی اللہ عنہ کے پاس ہوتا تھا انصار کا جھنڈا سیدنا سعد بن عبادہ رضی اللہ عنہ کے پاس ہوتا تھا ، اور جب جنگ شدید ہو جاتی تھی تو نبی اکرم صلی اللہ علیہ وسلم ان افراد کے ساتھ ہوتے تھے جو انصار کے جھنڈے کے نیچے ہوتے تھے ۔
یہ روایت امام أحمد نے نقل کی ہے اور اس کے رجال صحیح کے رجال ہیں صرف عثمان بن زفر شامی کا معاملہ مختلف ہے اور وہ ثقہ ہے ۔

سیدنا عبداللہ بن عباس رضی اللہ عنہما بیان کرتے ہیں : غزوہ بدر کے موقع پر سیدنا علی رضی اللہ عنہ نبی اکرم صلی اللہ علیہ وسلم کے جھنڈا بردار تھے اور سیدنا قیس بن سعد رضی اللہ عنہ سیدنا علی رضی اللہ عنہ کے جھنڈا بردار تھے ( مطبوعہ نسخے میں یہ جملہ اسی طرح ہے لیکن شاید اصل جملہ یہ ہو گا : اور سیدنا قیس بن سعد رضی اللہ عنہ انصار کے جھنڈا بردار تھے ) اور ہر موقعہ پر مہاجرین کے جھنڈا بردار سیدنا علی رضی اللہ عنہ تھے ۔
یہ روایت امام طبرانی نے معجم اوسط اور معجم کبیر میں نقل کی ہے ۔ اس کی سند میں ایک راوی ابوشیبہ ابراہیم ہے اور وہ ضعیف ہے ۔

محارب بیان کرتے ہیں : سیدنا معاویہ رضی اللہ عنہ نے زیاد کو خط لکھا کہ نبی اکرم صلی اللہ علیہ وسلم نے ارشاد فرمایا ہے : ” دشمن ایسی کسی قوم پر غالب نہیں آئے گا جن کا چھوٹا جھنڈا ( راوی کو شک ہے شاید یہ الفاظ ہیں : ) بڑا جھنڈا بنوبکر بن وائل سے تعلق رکھنے والے کسی فرد کے پاس ہو “ ۔
یہ روایت امام طبرانی نے نقل کی ہے اور اس کے رجال ثقہ ہیں ۔