مجمع الزوائد ومنبع الفوائد

سیدنا ابوبکرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بے شک اللہ تعالیٰ اس دین کی تائید ایسے لوگوں کے ذریعے بھی کرے گا جن کا ( آخرت میں ) کوئی حصہ نہیں ہو گا“ ۔
یہ روایت امام أحمد اور امام طبرانی نے نقل کی ہے اور ان دونوں کے رجال ثقہ ہیں ۔

سیدنا میمون بن سنباد رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میری اُمت کے نگران ( یعنی حکمران ) اُس کے بدترین لوگ ہوں گے “ ۔
یہ روایت عبداللہ بن أحمد اور امام بزار نے امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی ہارون بن دینار ہے اور وہ ضعیف ہے ۔

سیدنا انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بے شک اللہ تعالیٰ اس دین کی تائید ایسے لوگوں کے ذریعے بھی فرمائے گا جن کا ( آخرت میں ) کوئی حصہ نہیں ہو گا ۔
یہ روایت امام بزار نے اور امام طبرانی نے معجم اوسط میں نقل کی ہے ۔ امام بزار کی مختلف اسانید میں سے ایک کے رجال ثقہ ہیں ۔

سیدنا عمر بن خطاب رضی اللہ عنہ فرماتے ہیں : اگر میں نے نبی اکرم صلی اللہ علیہ وسلم کو یہ ارشاد فرماتے ہوئے نہیں سنا ہوتا : ” بے شک اللہ تعالیٰ فرات کے کنارے پر ربیعہ سے تعلق رکھنے والے عیسائیوں کے ذریعے بھی اس دین کو فائدہ پہنچائے گا “ ۔ تو میں نے ہر دیہاتی کو یا تو قتل کروا دینا تھا یا وہ اسلام قبول کر لیتا ۔
یہ روایت امام بزار نے نقل کی ہے اور اس کے رجال صحیح کے رجال ہیں صرف عبداللہ بن عمر قرشی کا معاملہ مختلف ہے اور وہ ثقہ ہے ۔

سیدنا ابوموسی اشعری رضی اللہ عنہ بیان کرتے ہیں : سورت توبہ جتنی ایک سورت نازل ہوئی پھر اسے اٹھا لیا گیا مجھے اس میں سے یہ بات یاد رہ گئی : ” بے شک اللہ تعالیٰ ایسے لوگوں کے ذریعے اس دین کی تائید کرے گا جن کا ( آخرت میں ) کوئی حصہ نہیں ہو گا “ ۔ ۔ ۔ ۔ ۔ ۔ ۔ ۔ ۔ ۔ ۔ اس کے بعد راوی نے پوری حدیث ذکر کی ہے ۔
یہ روایت امام طبرانی نے نقل کی ہے اور اس کے رجال صحیح کے رجال ہیں صرف علی بن زید کا معاملہ مختلف ہے اور وہ ضعیف ہے ان شواہد کی وجہ سے اس کی نقل کردہ حدیث کو حسن قرار دیا گیا ہے ۔

سیدنا عبداللہ بن عمرو رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ اس دین کی تائید ایسے افراد کے ذریعے کرے گا جو اس کے ماننے والوں میں سے نہیں ہوں گے “ ۔
یہ روایت امام طبرانی نے نقل کی ہے ۔ اس کی سند میں ایک راوی عبدالرحمن بن زیاد بن انعم ہے اور وہ ضعیف ہے البتہ اس میں جھوٹ نہیں پایا جاتا ہے ۔

سیدنا نعمان بن عمرو بن مقرن رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ کسی گنہگار شخص کے ذریعے اس دین کی تائید کرے گا “ ۔
یہ روایت امام طبرانی نے سیدنا عمرو بن نعمان بن مقرن رضی اللہ عنہ کے حالات میں نقل کی ہے اور اس پر تنقید کی ہے ، حالانکہ وہ تنقید کی مستحق نہیں ہے ، کیونکہ یہ درست ہے ، امام مزی نے ابوخالد والبی کے حالات میں یہ بات ذکر کی ہے کہ عمرو نے سیدنا عمرو بن نعمان بن مقرن رضی اللہ عنہ اور سیدنا نعمان بن مقرن رضی اللہ عنہ سے روایات نقل کی ہیں ، میں یہ کہتا ہوں : اس کے رجال ثقہ ہیں ۔

سیدنا عبداللہ بن مسعود رضی اللہ عنہ فرماتے ہیں : بے شک اللہ تعالیٰ کسی گنہگار شخص کے ذریعے اس دین کی تائید کرے گا ۔
یہ روایت امام طبرانی نے نقل کی ہے ۔ اس کی سند میں ایک راوی عاصم بن ابونجود ہے اور وہ ثقہ ہے اور اس کے بارے میں کلام پایا جاتا ہے ۔