مجمع الزوائد ومنبع الفوائد

سیدنا راشد بن حبیش رضی اللہ عنہ بیان کرتے ہیں : نبی اکرم صلی اللہ علیہ وسلم سیدنا عبادہ بن صامت رضی اللہ عنہ کی عیادت کرنے کے لئے تشریف لائے یہ ان کی بیماری کے دوران کی بات ہے نبی اکرم صلی اللہ علیہ وسلم نے دریافت کیا : کیا تم لوگ یہ بات جانتے ہو میری امت میں سے شہید کون ہیں ؟ تو لوگ خاموش رہے سیدنا عبادہ رضی اللہ عنہ نے فرمایا : تم لوگ مجھے سہارا دو لوگوں نے انہیں سہارا دے کر بٹھایا انہوں نے عرض کی : یا رسول اللہ ! صبر کرتے ہوئے ثواب کی امید رکھتے ہوئے ( قتل ہونے والا شخص شہید ہے ) نبی اکرم صلی اللہ علیہ وسلم نے فرمایا : اس صورت میں میری امت کے شہداء کم ہوں گے اللہ کی راہ میں قتل ہونا شہادت ہے طاعون ( کی وجہ سے مرنا ) شہادت ہے ڈوب ( کر مرنا ) شہادت ہے پیٹ ( کی بیماری کی وجہ سے مرنا ) شہادت ہے نفاس ( کے دوران مرنے والی عورت کو ) اس کا بچہ اپنی نال کے ذریعے کھینچ کر جنت کی طرف لے جائے گا “ ۔ راوی بیان کرتے ہیں : ابوعوام نامی راوی نے یہ الفاظ نقل کیے ہیں : ” بیت المقدس کا خادم ( ہونے کے طور پر مرنا ) اور جل کر یا ، سیلاب ( میں مرنا ) ۔
یہ روایت امام أحمد نے نقل کی ہے اور اس کے رجال ثقہ ہیں ۔

انہوں نے سیدنا عبادہ رضی اللہ عنہ تک اپنی سند کے ساتھ
یہ روایت نقل کی ہے ، جس میں انہوں نے اس بات کا ذکر کیا ہے اور اس کی سند میں ایک راوی ایسا ہے جس کا نام بیان نہیں کیا گیا ہے ۔

سیدنا عبادہ بن صامت رضی اللہ عنہ بیان کرتے ہیں : نبی اکرم صلی اللہ علیہ وسلم میری عیادت کرنے کے لئے میرے پاس تشریف لائے میں اس وقت بیمار تھا انصار کے کچھ افراد موجود تھے ( یا انصار کے کچھ افراد نبی اکرم صلی اللہ علیہ وسلم کے ساتھ آئے ) نبی اکرم صلی اللہ علیہ وسلم نے دریافت کیا : کیا تم لوگ جانتے ہو شہید کون ہے ؟ تو لوگ خاموش رہے نبی اکرم صلی اللہ علیہ وسلم نے دریافت کیا : کیا تم لوگ جانتے ہو شہید کون ہے ؟ میں نے اپنی بیوی سے کہا: تم مجھے ٹیک دو اس نے مجھے ٹیک دی میں نے کہا: جو اسلام قبول کرے پھر ہجرت کرے اور پھر اللہ کی راہ میں قتل ہو جائے وہ شہید ہے ۔ ۔ ۔ ۔ ۔ ۔ ۔ ۔ ۔ ۔ اس کے بعد راوی نے حسب سابق حدیث ذکر کی ہے ۔
یہ روایت امام أحمد امام بزار اور امام طبرانی نے معجم اوسط میں نقل کی ہے تاہم انہوں نے یہ الفاظ نقل کیے ہیں : اگر میری امت کے شہداء صرف یہی ہوں ، تو ایسی صورت میں وہ لوگ کم ہوں گے اللہ کی راہ میں قتل ہونے والا شہید ہے ڈوب کر مرنے والا شہید ہے پیٹ کی بیماری میں مرنے والا شہید ہے طاعون میں مرنے والا شہید ہے نفاس ( کے دوران مرنے والی عورت ) کو اس کا بچہ اپنی نال کے ذریعے کھینچ کر جنت کی طرف لے جائے گا “ ۔ اس روایت کی سند میں ایک راوی مغیرہ بن زیادہ ہے جسے ایک جماعت نے ثقہ قرار دیا ہے اور دوسرے لوگوں نے ضعیف کہا: ہے ۔ اس روایت کے بقیہ رجال ثقہ ہیں ۔

سیدنا عبادہ بن صامت رضی اللہ عنہ بیان کرتے ہیں : ہم سیدنا عبداللہ بن رواحہ صلی اللہ علیہ وسلم کی عیادت کرنے کے لئے ان کے پاس آئے ان پر بیہوشی طاری ہوئی ہم نے کہا: اللہ تعالیٰ آپ پر رحم کرے ہمیں یہ توقع تھی آپ اس صورت کے علاوہ انتقال کریں گے ہمیں تو آپ کے لئے شہادت کی توقع تھی جب نبی اکرم صلی اللہ علیہ وسلم تشریف لائے ہم یہی بات چیت کر رہے تھے ۔ آپ نے فرمایا : تم لوگ کسے شہادت شمار کرتے ہو ؟ تو لوگ خاموش رہے سیدنا عبداللہ رضی اللہ عنہ نے حرکت کی انہوں نے فرمایا : تم لوگ اللہ کے رسول کو جواب کیوں نہیں دیتے ہو ؟ پھر انہوں نے خود نبی اکرم صلی اللہ علیہ وسلم کو جواب دیتے ہوئے عرض کی : ہم قتل ہونے کو شہادت شمار کرتے ہیں نبی اکرم صلی اللہ علیہ وسلم نے ارشاد فرمایا : اس صورت میں میری امت کے شہداء کم ہوں گے قتل میں شہادت ہے طاعون میں شہادت ہے پیٹ کی بیماری میں شہادت ہے ڈوب کر مرنے میں شہادت ہے نفاس والی عورتیں جن کا بچہ ان کی موت کا سبب بن جاتا ہے ( ان کی موت ) شہادت ہے ۔
یہ روایت امام طبرانی نے نقل کی ہے ۔ امام أحمد نے اس کی مانند نقل کی ہے اور ان دونوں کے رجال ثقہ ہیں ۔

سیدنا ربیع انصاری رضی اللہ عنہ بیان کرتے ہیں : نبی اکرم صلی اللہ علیہ وسلم میرے بھتیجے جبر انصاری کی عیادت کرنے کے لئے تشریف لائے اس کے اہل خانہ نے اس پر رونا شروع کر دیا جبر نے ان سے کہا: تم لوگ اللہ کے رسول کو اپنی آوازوں کے ذریعے اذیت نہ پہنچاؤ نبی اکرم صلی اللہ علیہ وسلم نے فرمایا : ان عورتوں کو رونے دو جب تک یہ شخص زندہ ہے جب موت واقع ہو جائے گی تو عورتیں خاموش ہو جائیں حاضرین میں سے کسی نے کہا: ہمیں یہ توقع نہیں تھی کہ تمہاری موت اس طرح بستر پر ہو گی ہم تو یہ سمجھتے تھے کہ تم اللہ کے رسول کے ساتھ جنگ میں شریک ہوتے ہوئے اللہ کی راہ میں شہید ہو گے نبی اکرم صلی اللہ علیہ وسلم نے فرمایا : کیا شہادت صرف اللہ کی راہ میں قتل ہونے کی صورت میں ہوتی ہے ؟ ایسی صورت میں میری امت کے شہداء کم ہوں گے زخم لگنے سے شہادت ہوتی ہے پیٹ کی بیماری سے شہادت ہوتی ہے طاعون کی وجہ سے شہادت ہوتی ہے نفاس والی عورت کا بچے کی پیدائش کے وقت مر جانا شہادت ہے ڈوب کر مرنا ملبے کے نیچے آ کر مرنا شہادت ہے اور ذات الجنب کی بیماری کی وجہ سے مرنا شہادت ہے ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

سیدنا عبداللہ بن عمر رضی اللہ عنہ بیان کرتے ہیں : نبی اکرم صلی اللہ علیہ وسلم ہمارے پاس تشریف لائے آپ نے دریافت کیا : تم لوگ اپنے درمیان کے شہید شمار کرتے ہو ؟ ہم نے عرض کی : جو اللہ کی راہ میں قتل ہو جائے نبی اکرم صلی اللہ علیہ وسلم نے فرمایا : جو اللہ کی راہ میں قتل ہو جائے وہ شہید ہے ، جو اللہ کی راہ میں ڈوب کر مر جائے وہ شہید ہے جسے پیٹ کی بیماری موت کا شکار کر دے وہ شہید ہے وہ عورت جو نفاس کے دوران مر جاتی ہے وہ شہیدہ ہے ۔
یہ روایت امام طبرانی نے نقل کی ہے ۔ اس کی سند میں ایک راوی عبدالرحمن بن زیاد بن انعم ہے اور وہ ضعیف ہے ۔

سیدنا عبداللہ بن عباس رضی اللہ عنہما بیان کرتے ہیں : ایک مرتبہ نبی اکرم صلی اللہ علیہ وسلم نے اپنے اصحاب سے فرمایا : تم لوگ اپنے درمیان کسے شہید شمار کرتے ہو ؟ لوگوں نے عرض کی : جو اللہ کی راہ میں صبر کرتے ہوئے ثواب کی امید رکھتے ہوئے دشمن کی طرف رخ کرتے ہوئے پیٹھ نہ پھیرتے ہوئے قتل ہو جائے وہ شہید ہے نبی اکرم صلی اللہ علیہ وسلم نے فرمایا : ایسی صورت میں میری امت کے شہداء کم ہوں گے اللہ کی راہ میں قتل ہونے والا شہید ہے وہ آدمی جو اللہ کی راہ میں اپنے بستر پر مر جاتا ہے وہ شہید ہے پیٹ کی بیماری سے مرنے والا شہید ہے جانور کے ڈسنے سے مرنے والا شخص شہید ہے ڈوب کر مرنے والا شخص شہید ہے ، شریق ( شاید یہاں مراد وہ ہے شخص ہے جس کو اچھو لگ جاتا ہے ، ) شہید ہے ، جسے درندے چیر پھاڑ دیں ، وہ شہید ہے ، اپنے جانور سے گر کر مر جانے والا شہید ہے ، ملبے کے نیچے آ کر مرنے والا شہید ہے ، ذات الجنب کی بیماری سے مرنے والا شہید ہے اور نفاس والی عورت ( شہید ہے ) جس کا بچہ اس کی موت کا سبب بن جاتا ہے ، وہ بچہ اس ( عورت کو ) اپنی نال کے ذریعے کھینچ کر ، جنت میں لے جائے گا “ ۔
یہ روایت امام طبرانی نے نقل کی ہے ۔ اس کی سند میں ایک راوی عمرو بن عطیہ بن حارث وادعی ہے اور وہ ضعیف ہے ۔

سیدنا سعد بن ابی وقاص رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم لوگ قتل ہونے کی صورت میں طاعون کی وجہ سے ڈوب کر مرنے کی وجہ سے پیٹ کی بیماری کی وجہ سے عورت کے دردزہ کے دوران مرنے کی وجہ سے جب اس کی موت نفاس کے دوران ہو ، اسے شہادت شمار کرو “ ۔
یہ روایت امام بزار نے نقل کی ہے اور اس کے رجال صحیح کے رجال ہیں ۔

سیدنا عبداللہ بن بسر رضی اللہ عنہ بیان کرتے ہیں : نبی اکرم صلی اللہ علیہ وسلم سیدنا سعد بن عبادہ رضی اللہ عنہ کی عیادت کرنے کے لئے تشریف لائے آپ نے فرمایا : تم لوگ میری امت میں سے کسے شہید شمار کرتے ہو ؟ آپ نے یہ بات تین مرتبہ ارشاد فرمائی لوگوں نے عرض کی : یہ بات اللہ اور اس کا رسول زیادہ بہتر جانتے ہیں سیدنا سعد بن عبادہ رضی اللہ عنہ نے فرمایا : اگر اللہ کے رسول چاہیں ، تو مجھے اجازت دیں میں آپ کو یہ بتاؤں گا کہ آپ کی امت میں سے شہید کون ہیں ؟ نبی اکرم صلی اللہ علیہ وسلم نے فرمایا : تم مجھے بتاؤ کہ میری امت میں سے شہید کون ہیں ؟ سیدنا سعد رضی اللہ عنہ نے کہا: تم لوگ مجھے سہارا دو لوگوں نے انہیں سہارا دیا ، تو انہوں نے کہا: جو شخص اللہ تعالیٰ پر ایمان رکھے اللہ کی راہ میں جہاد کرے جنگ میں حصہ لے ، یہاں تک کہ وہ شہید ہو جائے ۔ نبی اکرم صلی اللہ علیہ وسلم نے فرمایا : اس صورت میں میری امت کے شہید کم ہوں گے اللہ کی راہ میں قتل ہونے والا شہید ہے پیٹ کی بیماری سے مرنے والا شہید ہے زخم لگنے سے مرنے والا شہید ہے ڈوب کے مرنے والا شہید ہے نفاس والی عورت شہید ہے ۔
یہ روایت امام طبرانی نے نقل کی ہے اور اس کے رجال صحیح کے رجال ہیں البتہ ابوصالح فراء کا معاملہ مختلف ہے اور وہ ثقہ ہے ۔

عبدالملک بن ہارون بن عنترہ اپنے والد کے حوالے سے اپنے دادا کا یہ بیان نقل کرتے ہیں : ایک دن نبی اکرم صلی اللہ علیہ وسلم نے ارشاد فرمایا : تم لوگ اپنے درمیان کسے شہید شمار کرتے ہو ؟ ہم نے عرض کی : یا رسول اللہ ! جو اللہ کی راہ میں قتل ہو جائے نبی اکرم صلی اللہ علیہ وسلم نے فرمایا : اس صورت میں میری امت کے شہداء کم ہوں گے ، جو اللہ کی راہ میں قتل ہو جائے وہ شہید ہے پیٹ کی بیماری سے مرنے والا شہید ہے گر کر مرنے والا شہید ہے نفاس میں مرنے والی عورت شہید ہے ڈوب کر مرنے والا شخص شہید ہے ۔ حلوانی نے یہ الفاظ زائد نقل کیے ہیں : سل کی بیماری میں مرنے والا شہید ہے جل کر مرنے والا شہید ہے اجنبی ہونے کے عالم میں مرنے والا شہید ہے ۔
یہ روایت امام طبرانی نے نقل کی ہے اور عبدالملک نامی راوی متروک ہے ۔

سیدنا سلمان فارسی رضی اللہ عنہ بیان کرتے ہیں : میں زکوۃ لے کر تین مرتبہ نبی اکرم صلی اللہ علیہ وسلم کی خدمت میں حاضر ہوا آپ نے دریافت کیا : تم لوگ شہید کسے شمار کرتے ہو ؟ لوگوں نے عرض کی : جو اللہ کی راہ میں قتل ہو جائے نبی اکرم صلی اللہ علیہ وسلم نے فرمایا : اس صورت میں میری امت کے شہداء کم ہوں گے اللہ کی راہ میں قتل ہونا شہادت ہے طاعون کی وجہ سے مرنا شہادت ہے نفاس کے دوران عورت کا مرنا شہادت ہے جل کر مرنا شہادت ہے ڈوب کر مرنا شہادت ہے سل کی بیماری کی وجہ سے مرنا شہادت ہے اور پیٹ کی بیماری کی وجہ سے مرنا شہادت ہے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی مندل بن علی ہے اور وہ ضعیف ہے اس کی توثیق کی گئی ہے
یہ روایت امام بزار نے نقل کی ہے ۔

سیدنا ابوہریرہ رضی اللہ عنہ مرفوع حدیث کے طور پر یہ بات نقل کرتے ہیں : ( نبی اکرم صلی اللہ علیہ وسلم نے ارشاد فرمایا ہے : ) ” پیٹ کی بیماری کی وجہ سے اور ڈوب کر مرنا شہادت ہے “ ۔
یہ روایت امام طبرانی نے معجم اوسط میں نقل کی ہے اور اس کے رجال صحیح کے رجال ہیں ۔

سیدہ عائشہ صدیقہ رضی اللہ عنہ بیان کرتی ہیں : میں نے عرض کی : یا رسول اللہ ! کیا شہید صرف وہ ہوتا ہے ، جو اللہ کی راہ میں قتل ہو جائے ؟ نبی اکرم صلی اللہ علیہ وسلم نے ارشاد فرمایا : اس صورت میں میری امت کے شہداء کم ہوں گے جو شخص روزانہ پچیس مرتبہ یہ کلمات پڑھ لے : ” اے اللہ ! تو موت میں اور موت کے بعد والی زندگی میں برکت نصیب فرما “ ۔ پھر وہ اپنے بستر پر بھی مر جائے تو اللہ تعالیٰ اسے شہید کا اجر عطا کرے گا ۔
یہ روایت امام طبرانی نے معجم اوسط میں نقل کی ہے اور اس کی سند میں ایسے راوی ہیں جن سے میں واقف نہیں ہوں ۔ اس سے پہلے جہاد کی فضیلت کے بارے میں ایسی احادیث گزر چکی ہیں کہ جو شخص اللہ کی راہ میں اپنے گھر سے نکلتا ہے ، تو پھر وہ جس وجہ سے بھی مرے وہ شہید شمار ہوتا ہے ۔

سیدنا عقبہ بن عامر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص اپنی سواری سے گر کر مر جائے وہ شہید ہے “ ۔
یہ روایت امام طبرانی نے نقل کی ہے اور اس کے رجال ثقہ ہیں ۔

سیدنا عبداللہ بن مسعود رضی اللہ عنہ فرماتے ہیں : جو شخص پہاڑ کے سرے سے گر کے مر جائے یا جسے درندے کھا جائیں یا جو سمندر میں ڈوب جائے وہ اللہ کے نزدیک شہید شمار ہو گا ۔
یہ روایت امام طبرانی نے نقل کی ہے اور اس کے رجال صحیح کے رجال ہیں اس سے پہلے جنائز سے متعلق باب میں طاعون سے متعلق احادیث گزر چکی ہیں ۔

محمد بن زیاد الہانی بیان کرتے ہیں : ابوعنبہ خولانی کے سامنے یہ بات ذکر کی گئی کہ شہداء میں طاعون کی وجہ سے مرنے والا پیٹ کی بیماری کی وجہ سے مرنے والا اور نفاس کے دوران مرنے والی خاتون بھی شامل ہیں ، تو ابوعنبہ غصہ میں آ گئے اور بولے : ہمارے نبی کے اصحاب نے ہمیں یہ حدیث ہمارے نبی کے حوالے سے بیان کی ہے ۔ کہ آپ نے ارشاد فرمایا ہے : ” زمین میں اللہ کے شہداء اس کی مخلوق کے بارے میں اللہ کے امین ہیں ، خواہ وہ قتل ہو کے مریں یا طبعی موت مر جائیں “ ۔
یہ روایت امام أحمد نے نقل کی ہے اور اس کے رجال ثقہ ہیں ۔