مجمع الزوائد ومنبع الفوائد

سیدنا عتبہ بن عبد سلمی رضی اللہ عنہ ، جو نبی اکرم صلی اللہ علیہ وسلم کے اصحاب میں سے ایک ہیں وہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” مقتول تین قسم کے ہوتے ہیں ایک وہ مومن شخص جو اپنی جان اور مال کے ہمراہ اللہ کی راہ میں جہاد میں حصہ لیتا ہے ، یہاں تک کہ جب وہ دشمن کا سامنا کرتا ہے ، تو ان کے ساتھ لڑتے ہوئے قتل ہو جاتا ہے یہ وہ شہید ہے ، جو اللہ کے عرش کے نیچے اس کے خیمے میں موجود ہونے پر فخر کرنے والا ہو گا ، اور انبیاء کو صرف نبوت کے مرتبے کے حوالے سے اس پر فضیلت حاصل ہو گی ایک وہ مومن شخص جو گناہوں اور خطاؤں کے حوالے سے اپنے ساتھ زیادتی کرتا ہے پھر وہ اپنی جان اور مال کے ہمراہ اللہ کی راہ میں جہاد میں حصہ لیتا ہے ، یہاں تک کہ جب وہ دشمن کا سامنا کرتا ہے ، تو اس سے جنگ کرتا ہے ، یہاں تک کہ وہ قتل ہو جاتا ہے ، تو دہشت اس کے گناہوں اور خطاؤں کو مٹا دے گی ، کیونکہ تلوار خطاؤں کو مٹانے والی ہوتی ہے ، وہ جس دروازے سے چاہے گا ، اُسے جنت میں داخل کر دیا جائے گا جنت کے آٹھ دروازے ہیں اور جہنم کے سات دروازے ہیں اور ان میں سے بعض ، دوسروں سے زیادہ فضیلت رکھتے ہیں اور ایک وہ منافق شخص ہے ، جو اپنی جان اور مال کے ہمراہ جہاد میں حصہ لیتا ہے ، یہاں تک کہ جب وہ دشمن کا سامنا کرتا ہے ، تو اللہ کی راہ میں جنگ میں حصہ لیتا ہے ، یہاں تک کہ قتل ہو جاتا ہے وہ جہنم میں جائے گا ، کیونکہ تلوار منافقت کو نہیں مٹاتی ہے “ ۔
یہ روایت امام أحمد اور امام طبرانی نے نقل کی ہے تاہم انہوں نے یہ الفاظ نقل کیے ہیں : ” وہ جنت کے دروازوں میں سے جس سے چاہے گا داخل ہو جائے گا اس کے آٹھ دروازے ہیں جن میں سے بعض ، بعض سے افضل ہیں ۔ امام أحمد کے رجال صحیح کے رجال ہیں صرف مثنی املوکی کا معاملہ مختلف ہے اور وہ ثقہ ہے ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” شہید تین قسم کے ہوتے ہیں ایک وہ شخص جو اپنی جان اور مال کے ہمراہ ثواب کی امید رکھتے ہوئے اللہ کی راہ میں نکلتا ہے وہ جنگ کرنے کا یا قتل ہونے کا ارادہ نہیں رکھتا وہ مسلمانوں کی تعداد میں اضافے کا ارادہ رکھتا ہے اگر وہ مر جاتا ہے یا قل ہو جاتا ہے ، تو اس کے تمام گناہوں کی مغفرت ہو جائے گی اسے قبر کے عذاب سے محفوظ رکھا جائے گا ، اور گھبراہٹ سے امان میں رکھا جائے گا حورعین کے ساتھ اس کی شادی ہو جائے گی اور کرامت کا حلہ اسے پہنایا جائے گا اس کے سر پر وقار کا اور خلد کا تاج رکھا جائے گا“ ۔ دوسرا وہ شخص ہے ، جو ثواب کی امید رکھتے ہوئے اپنی جان اور مال کے ہمراہ نکلتا ہے وہ قتل ہونے کا ارادہ رکھتا ہے قتل کرنے کا ارادہ نہیں رکھتا اگر وہ مر جاتا ہے یا قتل ہو جاتا ہے ، تو اس کا گھٹنا ، سیدنا ابراہیم خلیل الرحمن علیہ السلام کے ساتھ ، اللہ تعالیٰ کی بارگاہ میں ہو گا ، جو اقتدار رکھنے والے بادشاہ کے نزدیک سچائی کا ٹھکانہ ہو گا ۔ تیسرا وہ شخص ہے ، جو ثواب کی امید رکھتے ہوئے اپنی جان اور مال کے ہمراہ نکلتا ہے وہ یہ ارادہ رکھتا ہے کہ وہ قتل کرے گا ، اور قتل ہو گا ، اور اگر وہ مر جاتا ہے یا قتل ہو جاتا ہے ، تو وہ قیامت کے دن اپنی تلوار لہراتے ہوئے اسے اپنے کندھے پر رکھ کر آئے گا لوگ اس وقت اپنے گھٹنوں کے بل جھکے ہوئے ہوں گے اور یہ ( شہداء ) کہہ رہے ہوں گے : ہمارے لئے راستہ دو کیونکہ ہم نے اپنے خون اللہ کے لئے خرچ کیے ہیں ۔ نبی اکرم صلی اللہ علیہ وسلم ارشاد فرماتے ہیں : اس ذات کی قسم ! جس کے دست قدرت میں میری جان ہے اگر وہ شخص یہ بات سیدنا ابراہیم خلیل الرحمن علیہ السلام یا اللہ تعالیٰ کے نبیوں میں سے کسی اور نبی سے بھی کہے گا ، تو وہ بھی اس کے لئے راستہ چھوڑ دیں گے ، کیونکہ وہ اس کے حق سے واجب ہونے والی چیز کو دیکھیں گے ، یہاں تک کہ وہ شہداء عرش کے نیچے نور کے منبروں کے پاس آ جائیں گے اور ان پر بیٹھ کر یہ دیکھیں گے کہ لوگوں کے درمیان کیسے فیصلہ ہو رہا ہے انہیں موت کا غم محسوس نہیں ہو گا وہ برزخ میں کھڑے نہیں ہوں گے چیخ چنگھاڑ انہیں خوف زدہ نہیں کرے گی حساب انہیں پریشان نہیں کرے گا میزان اور صراط انہیں پریشان نہیں کریں گے وہ اس بات کا جائزہ لیں گے کہ لوگوں کے درمیان کیسے فیصلہ ہو رہا ہے وہ جو چیز مانگیں گے وہ انہیں دی جائے گی وہ جس کے بارے میں شفاعت کریں گے ان کی شفاعت قبول ہو گی جنت میں سے جو وہ پسند کریں گے وہ انہیں دیا جائے گا ، اور جنت میں جہاں وہ چاہیں گے وہاں ٹھکانہ بنا لیں گے “ ۔
یہ روایت امام بزار نے نقل کی ہے انہوں نے اپنے استاد محمد بن معاویہ کے حوالے سے اسے ضعیف قرار دیا ہے اگر تو یہ نیشا پوری ہے ، تو پھر یہ متروک ہے اس کی سند میں ایک راوی مسلم بن خالد زنگی ہے اور وہ بھی ضعیف ہے ویسے اس کی توثیق کی گئی ہے ۔

سیدنا نعیم بن ہمار رضی اللہ عنہ بیان کرتے ہیں : ایک شخص نے نبی اکرم صلی اللہ علیہ وسلم سے سوال کیا : شہداء میں سے کون زیادہ فضیلت رکھتا ہے ؟ نبی اکرم صلی اللہ علیہ وسلم نے ارشاد فرمایا : وہ لوگ کہ جب وہ صف میں کھڑے ہوں ، تو ان کے چہرے مڑیں نہیں ، یہاں تک کہ وہ قتل ہو جائیں یہ لوگ جنت کے بالائی بالا خانوں میں چلیں گے اور ان کا پروردگار ان کی طرف دیکھ کر مسکرائے گا ، اور جب پروردگار دنیا میں کسی بندے کی طرف دیکھ کر مسکرا دے تو اس بندے سے حساب نہیں لیا جائے گا“ ۔
یہ روایت امام أحمد اور امام ابویعلیٰ نے نقل کی ہے وہ یہ کہتے ہیں : سیدنا نعیم بن ہمار رضی اللہ عنہ کے حوالے سے یہ بات منقول ہے انہوں نے نبی اکرم صلی اللہ علیہ وسلم کو سنا ایک شخص آپ کے پاس آیا اور بولا: شہداء میں کون زیادہ فضیلت رکھتا ہے ؟ نبی اکرم صلی اللہ علیہ وسلم نے فرمایا : وہ لوگ جو پہلی صف میں شامل ہوتے ہیں : باقی روایت حسب سابق ہے
یہ روایت امام طبرانی نے معجم کبیر اور معجم اوسط میں اس کی مانند نقل کی ہے ۔ امام أحمد اور امام ابویعلیٰ کے رجال ثقہ ہیں ۔

سیدنا ابوسعید خدری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت کے دن اللہ تعالیٰ کی بارگاہ میں سب سے زیادہ فضیلت والا جہاد ان لوگوں کا ہو گا جو پہلی صف میں دشمن کا سامنا کرتے ہیں اور پھر ان کے چہرے مڑتے نہیں ہیں ، یہاں تک کہ وہ شہید ہو جاتے ہیں یہ لوگ جنت کے بالائی بالا خانوں میں رہیں گے ان کا پروردگار ان کی طرف دیکھتا ہے اور جب وہ کسی قوم کی طرف دیکھ کر مسکرا دیتا ہے ، تو ان لوگوں پر حساب دینا لازم نہیں ہو گا “ ۔
یہ روایت امام طبرانی نے معجم اوسط میں عنبسہ بن سعید بن ابان کے حوالے سے نقل کی ہے جسے امام دارقطنی رحمہ اللہ نے ثقہ قرار دیا ہے جیسا کہ امام ذہبی نے یہ بات نقل کی ہے کسی نے اسے ضعیف نہیں کہا: ہے ۔ اس روایت کے بقیہ رجال صحیح کے رجال ہیں ۔

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اللہ کی راہ میں قتل ہونا تمام گناہوں کا کفارہ بن جاتا ہے راوی کو شک ہے شاید یہ الفاظ ہیں : ہر شے کا کفارہ بن جاتا ہے البتہ امانت کا معاملہ مختلف ہے اور امانت کا تعلق نماز سے بھی ہے اور امانت کا تعلق روزے سے بھی ہے امانت کا تعلق بات چیت سے بھی ہے اور سب سے زیادہ سخت ( امانت ) ودیعت کے طور پر رکھوائی گئی چیزوں کے بارے میں ہوتی ہے “ ۔
یہ روایت امام طبرانی نے نقل کی ہے اور اس کے رجال ثقہ ہیں ۔

سیدنا عبادہ بن صامت رضی اللہ عنہ نبی اکرم صلی اللہ علیہ وسلم کے حوالے سے اس کی مانند حدیث نقل کرتے ہیں ، جو حدیث اس سے پہلے گزری ہے وہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” شہید کو اللہ تعالیٰ کی بارگاہ میں چھ خصوصیات حاصل ہوں گی یہ کہ پہلی مرتبہ اس کے خون کے گرنے کے ساتھ ہی اس کی مغفرت ہو جائے گی اور وہ جنت میں اپنا ٹھکانہ دیکھ لے گا ، اور اسے ایمان کا حلہ پہنا دیا جائے گا ، اور حورعین کے ساتھ اس کی شادی کر دی جائے گی اسے قبر کے عذاب سے محفوظ رکھا جائے گا بڑی گھبراہٹ سے وہ محفوظ ہو گا اس کے سر پر وقار کا تاج رکھا جائے گا ، جس کا ایک یاقوت دنیا اور اس میں موجود تمام چیزوں سے زیادہ بہتر ہو گا اس کی شادی حورعین سے تعلق رکھنے والی بہتر بیویوں سے کی جائے گی اور اس کے قریبی رشتہ داروں میں سے ستر افراد کے بارے میں اس کی شفاعت قبول ہو گی“ ۔
یہ روایت امام أحمد نے اسی طرح اس کی مانند نقل کی ہے یہ امام بزار اور امام طبرانی نے بھی نقل کی ہے تاہم انہوں نے یہ الفاظ نقل کیے ہیں : ” سات خصوصیات حاصل ہوتی ہیں ۔ ۔ ۔ ۔ ۔ ۔ ۔ ۔ “ اور یہ روایت اسی طرح نقل کی ہے ۔ امام أحمد اور امام طبرانی کے رجال ثقہ ہیں ۔

سیدنا قیس جذامی رضی اللہ عنہ جو ایک ایسے فرد ہیں ، جنہیں صحابی ہونے کا شرف حاصل ہے وہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” شہید کو اس کے خون کے پہلے قطرے کے ساتھ چھ خصوصیات عطا کر دی جاتی ہیں اس کے ہر گناہ کا کفارہ ہو جاتا ہے وہ جنت میں اپنے ٹھکانے کو دیکھ لیتا ہے حورعین کے ساتھ اس کی شادی ہو جاتی ہے وہ بڑی گھبراہٹ سے محفوظ ہو جاتا ہے قبر کے عذاب سے محفوظ ہو جاتا ہے اسے ایمان کا حلہ پہنا دیا جاتا ہے “ ۔
یہ روایت امام أحمد نے نقل کی ہے ۔ اس کی سند میں ایک راوی عبدالرحمن بن ثابت بن ثوبان ہے جسے ابوحاتم اور ایک جماعت نے ثقہ قرار دیا ہے اور ایک جماعت نے اسے ضعیف کہا: ہے ۔

سیدنا عبداللہ بن عمرو رضی الله عنہ نبی اکرم صلی اللہ علیہ وسلم کا یہ فرمان نقل کرتے ہیں : ” شہید کو چھ خصوصیات حاصل ہوتی ہیں اس کے خون کے پہلی مرتبہ ( گرنے ) کے ساتھ ہی اس کی مغفرت ہو جاتی ہے اسے گھبراہٹ سے محفوظ رکھا جاتا ہے وہ جنت میں اپنا ٹھکانہ دیکھ لیتا ہے حورعین کے ساتھ اس کی شادی ہو جاتی ہے اور اسے قبر کے عذاب سے بچا لیا جاتا ہے “ ۔
یہ روایت امام طبرانی نے نقل کی ہے ۔ اس کی سند میں ایک راوی عبدالرحمن بن زیاد بن انعم ہے اور وہ ضعیف ہے ۔

سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” شہید کے خون کا جب پہلا قطرہ گرتا ہے اس کے ذریعے اس کے گناہوں کا کفارہ ہو جاتا ہے دوسرے ( قطرے کے ساتھ یا دوسری خصوصیت یہ حاصل ہوتی ہے ) کہ اسے ایمان کا حلہ پہنایا جائے گا تیسری یہ کہ حورعین کے ساتھ اس کی شادی کرائی جائے گی “ ۔
یہ روایت امام طبرانی نے نقل کی ہے ۔ اس کی سند میں ایک راوی جعفر بن زبیر ہے اور وہ کذاب ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اس کے خون کے پہلی مرتبہ ( گرنے کے ساتھ ) شہید کی مغفرت ہو جاتی ہے اور دو حوروں کے ساتھ اس کی شادی ہو جاتی ہے اور وہ اپنے اہلِ خانہ میں سے ستر افراد کی شفاعت کرے گا ، اور پہرا دینے والا شخص جب پہرے کے دوران مر جاتا ہے ، تو قیامت تک اس کے عمل کا اجر اس کے لئے نوٹ کیا جاتا ہے اس کا رزق صبح و شام اسے دیا جاتا ہے ستر حوروں کے ساتھ اس کی شادی ہو جاتی ہے اس سے کہا: جائے گا : تم ٹھہرو اور شفاعت کرو جب تک حساب ختم نہیں ہوتا “ ۔ ( علامہ ہیثمی فرماتے ہیں : ) میں یہ کہتا ہوں : امام ابن ماجہ نے اس روایت کا کچھ حصہ نقل کیا ہے ۔
یہ روایت امام طبرانی نے معجم اوسط میں اپنے استاد بکر بن سہل دمیاطی کے حوالے سے نقل کی ہے ۔ امام ذہبی کہتے ہیں : یہ مقارب الحدیث ہے ۔ امام نسائی رحمہ اللہ نے اسے ضعیف قرار دیا ہے ۔

سیدنا یزید بن شجرہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” تم لوگ سرخ سبز اور زرد کے درمیان ہوتے ہو جب تم دشمن کا سامنا کرو تو پیش قدمی کرو پیش قدمی کرو ، کیونکہ جب بھی کوئی شخص اللہ کی راہ میں سوار ہوتا ہے ، تو حورعین سے تعلق رکھنے والی دو حوریں لپک کر اس کے پاس آتی ہیں جب وہ شخص جام شہادت نوش کر لیتا ہے ، تو اس کے خون کا پہلا قطرہ گرنے کے ساتھ ہی اللہ تعالیٰ اس کے ہر ایک گناہ کو ختم کر دیتا ہے وہ دونوں حوریں اس کے چہرے سے غبار پونچھتی ہیں اور یہ کہتی ہیں : تمہارا وقت آ گیا ہے ، تو وہ کہتا ہے : اب تمہارا بھی وقت آ گیا ہے “ ۔
یہ روایت امام بزار اور امام طبرانی نے نقل کی ہے ۔ امام بزار کی سند میں ایک راوی اسماعیل بن ابراہیم تیمی ہے اور دوسری کی سند میں ایک راوی فہد بن عوف ہے اور یہ دونوں انتہائی ضعیف ہیں ۔ اس سے پہلے جدار کی حدیث گزر چکی ہے جو جہاد کی فضیلت کے بارے میں اس سے زیادہ مکمل ہے ۔

مجاہد اور یزید بن شجرہ کے حوالے سے یہ بات منقول ہے یزید بن شجرہ ان افراد میں سے ایک ہیں جن کا قول ان کے فعل کی تصدیق کرتا تھا وہ بیان کرتے ہیں : ( راوی کہتے ہیں : یزید بن شجرہ نے ) ہمیں خطبہ دیتے ہوئے ارشاد فرمایا : ” اے لوگو ! اپنے اوپر اللہ کی نعمتوں کو یاد کرو اللہ تعالیٰ نے تم پر کتنا عمدہ نعمتیں کی ہیں ہم سرخ سبز اور زرد کو دیکھتے ہیں اور لوگوں میں ایسے افراد ہیں ، جو ان میں ہیں وہ یہ فرمایا کرتے تھے : جب نماز کے لئے صف قائم ہوتی ہے اور جب جنگ کے لئے صف بنائی جاتی ہے ، تو آسمان کے دروازے کھول دیے جاتے ہیں جنت کے دروازے کھول دیے جاتے ہیں جہنم کے دروازے کھول دیے جاتے ہیں حورعین آراستہ ہوتی ہیں اور جھانکتی ہیں جب کوئی شخص آگے بڑھتا ہے ، تو وہ یہ کہتی ہیں اے اللہ ! اس کی مدد فرما اور جب کوئی شخص پیچھے مڑ جاتا ہے ، تو وہ اس سے پردہ کر لیتی ہیں اور کہتی ہیں اے اللہ ! تو اس کی مغفرت کر دے تو تم دشمن کو پسپا کرو میرے ماں باپ تم لوگوں پر قربان ہوں تم لوگ حورعین کو رسوائی کا شکار نہ کرو ، کیونکہ جب ( شہید کا ) پہلا قطرہ گرتا ہے ، تو اس کے کیے ہوئے عمل کی ہر چیز کا کفارہ بن جاتا ہے حوروں سے تعلق رکھنے والی دو بیویاں نیچے اتر کر اس کے پاس آتی ہیں اور اس کے چہرے کو پونچھتی ہیں اور یہ کہتی ہیں : تمہارا وقت آ گیا ہے تو وہ یہ کہتا ہے : تمہارا بھی وقت آ گیا ہے ، پھر اسے ایک سو حلے پہنائے جاتے ہیں ، جو انسانوں کے بنے ہوئے نہیں ہوتے بلکہ جنت میں پیدا ہوئے ہوتے ہیں اگر انہیں دو انگلیوں کے درمیان رکھا جائے تو وہ ان میں سما جائیں وہ یہ کہا: کرتے تھے : مجھے یہ بات بتائی گئی ہے تلواریں جنت کی کنجیاں ہیں “ ۔
یہ روایت امام طبرانی نے دو حوالوں سے نقل کی ہے ، جن میں سے ایک کے رجال صحیح کے رجال ہیں ۔

سیدنا ابوقتادہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” شہید کو قتل ہونے کی اتنی تکلیف محسوس ہوتی ہے جس طرح کسی شخص کو چیونٹی کے کاٹنے سے ہوتی ہے “ ۔
یہ روایت امام طبرانی نے نقل کی ہے ۔ اس کی سند میں ایک راوی رشدین بن سعد ہے اور وہ ضعیف ہے ۔

سیدنا عبداللہ بن عباس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” شہداء جنت کے دروازے پر موجود نہر بارق کے کنارے سبز قبے میں ہوں گے جنت میں سے ان کا رزق نکل کر صبح و شام ان کے پاس آئے گا “ ۔
یہ روایت امام أحمد نے نقل کی ہے اور اس کے رجال ثقہ ہیں
یہ روایت امام طبرانی نے معجم کبیر اور معجم اوسط میں نقل کی ہے ۔

سیدنا سعد بن ابی وقاص رضی اللہ عنہ بیان کرتے ہیں : ایک شخص نماز ادا کرنے کے لئے آیا نبی اکرم صلی اللہ علیہ وسلم نماز ادا کر رہے تھے جب وہ شخص صف تک پہنچا تو اس نے یہ کہا: اے اللہ ! تو مجھے وہ چیز عطا فرما جو تو اپنے نیک بندوں کو عطا کرتا ہے ۔ راوی کہتے ہیں : جب نبی اکرم صلی اللہ علیہ وسلم نے نماز مکمل کی تو آپ نے دریافت کیا : ابھی کلام کرنے والا شخص کون ہے ؟ اس شخص نے عرض کی : یا رسول اللہ ! میں ہوں نبی اکرم صلی اللہ علیہ وسلم نے فرمایا : ایسی صورت میں تمہارے گھوڑے کے پاؤں کاٹ دیے جائیں گے اور تم جام شہادت نوش کر لو گے “ ۔
یہ روایت امام ابویعلیٰ اور امام بزار نے دو اسناد کے ساتھ نقل کی ہے ۔ امام بزار کی دو اسناد میں سے ایک کے رجال صحیح کے رجال ہیں صرف محمد بن مسلم بن عائذ کا معاملہ مختلف ہے اور وہ ثقہ ہے ۔

سیدنا سمرہ بن جندب رضی اللہ عنہ بیان کرتے ہیں : نبی اکرم صلی اللہ علیہ وسلم ہم سے یہ فرماتے تھے : ” تم میں سے جو شخص صبر کرتے ہوئے دشمن کی طرف رخ کر کے اللہ کی راہ میں قتل ہو جاتا ہے ، تو وہ جنت میں ہو گا “ ۔
یہ روایت امام طبرانی نے اور امام بزار نے نقل کی ہے ۔ امام طبرانی کی سند میں مستور راوی ہیں اس کے بقیہ رجال ثقہ ہیں امام بزار کی سند ضعیف ہے ۔

سیدنا کعب بن عجرہ رضی اللہ عنہ روایت کرتے ہیں : ایک دن نبی اکرم صلی اللہ علیہ وسلم نے اپنے اصحاب سے فرمایا : ایسے شخص کے بارے میں تم کیا رائے رکھتے ہو ؟ جو اللہ کی راہ میں قتل ہو جاتا ہے لوگوں نے عرض کی : وہ جنت میں جائے گا ۔ نبی اکرم صلی اللہ علیہ وسلم نے فرمایا : اگر اللہ نے چاہا ، تو جنت میں جائے گا ۔ نبی اکرم صلی اللہ علیہ وسلم نے فرمایا : ایسے شخص کے بارے میں تم کیا رائے رکھتے ہو جو مر جاتا ہے اور پھر دو عادل افراد کھڑے ہو کر یہ کہتے ہیں : ہمیں صرف بھلائی کا علم ہے لوگوں نے عرض کی : اللہ اور اس کا رسول زیادہ بہتر جانتے ہیں نبی اکرم صلی اللہ علیہ وسلم نے ارشاد فرمایا : اگر اللہ نے چاہا ، تو یہ بھی جنت جائے گا ۔ نبی اکرم صلی اللہ علیہ وسلم نے دریافت کیا : ایسے شخص کے بارے میں تم کیا رائے رکھتے ہو ؟ جو مر جاتا ہے پھر دو عادل افراد اٹھ کر یہ کہتے ہیں ہمیں کی بھلائی کا علم نہیں ہے لوگوں نے عرض کی : وہ جہنم میں جائے گا ۔ نبی اکرم صلی اللہ علیہ وسلم نے فرمایا : وہ گنہگار ہے اور اللہ تعالیٰ غفور و رحیم ہے ۔
یہ روایت امام طبرانی نے نقل کی ہے ۔ اس کی سند میں ایک راوی اسحاق بن نسطاس ہے اور وہ ضعیف ہے ۔

سیدنا ابوقتاده رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” شہید کو قتل ہونے پر صرف اتنی تکلیف محسوس ہوتی ہے جس طرح کسی شخص کو چیونٹی کے کاٹے پر محسوس ہوتی ہے “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی رشدین بن سعد ہے اور وہ ضعیف ہے ۔

سیدنا جابر رضی اللہ عنہ کے بارے میں یہ بات منقول ہے ان تک یہ روایت پہنچی ہے نبی اکرم صلی اللہ علیہ وسلم نے یہ ارشاد فرمایا ہے : ” جو شخص اللہ کی رضا کے حصول کے لئے قتل ہو جائے اللہ تعالیٰ اسے عذاب نہیں دے گا “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عبداللہ بن بکیر غنوی ہے اور وہ ضعیف ہے ۔

سیدنا انس بن مالک رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جب بندہ حساب کے لئے رکے گا ، تو کچھ لوگ آئیں گے جنہوں نے اپنی تلواریں اپنی گردنوں پر رکھی ہوئی ہوں گی ان کے خون کے قطرے ٹپک رہے ہوں گے وہ جنت کے دروازے پر ہجوم کریں گے دریافت کیا جائے گا : یہ کون لوگ ہیں ؟ کہا: جائے گا : یہ شہداء ہیں یہ زندہ تھے اور انہیں رزق دیا جاتا تھا “ ۔
یہ روایت امام طبرانی نے معجم اوسط میں ایک طویل حدیث میں ذکر کی ہے ، جو آگے چل کر اگر اللہ نے چاہا ، تو دوبارہ زندہ کیے جانے سے متعلق باب میں آئے گی اس کی سند میں ایک راوی فضل بن یسار ہے عقیلی کہتے ہیں : اس کی حدیث کی متابعت نہیں کی گئی ہے ۔ اس روایت کے بقیہ رجال ثقہ ہیں ۔

سیدنا ابوموسی رضی اللہ عنہ بیان کرتے ہیں : نبی اکرم صلی اللہ علیہ وسلم ایک غزوہ میں شریک ہوئے مشرکین سے تعلق رکھنے والے ایک شخص نے مسلمانوں سے تعلق رکھنے والے ایک شخص کو مقابلے کے لئے للکارا پھر مشرک نے اس مسلمان کو قتل کر دیا مسلمانوں میں سے ایک اور شخص اس کے سامنے آیا مشرک نے اسے بھی قتل کر دیا پھر وہ شخص آیا اور نبی اکرم صلی اللہ علیہ وسلم کے پاس آ کر ٹھہر گیا اور بولا: آپ لوگ کس بات پر جنگ کر رہے ہیں ؟ نبی اکرم صلی اللہ علیہ وسلم نے فرمایا : ہمارا دین یہ ہے کہ ہم لوگوں کے ساتھ اس وقت تک جنگ کریں گے جب تک وہ اس بات کی گواہی نہیں دیتے کہ اللہ تعالیٰ کے علاوہ اور کوئی معبود نہیں ہے اور سیدنا محمد صلی اللہ علیہ وسلم اس کے بندے اور اس کے رسول ہیں اور ہم اللہ تعالیٰ کا حق پوری طرح ادا نہیں کرتے اس شخص نے کہا: اللہ کی قسم ! یہ بات تو اچھی ہے میں اس پر ایمان لاتا ہوں پھر وہ مڑ کر مسلمانوں کی طرف چلا گیا پھر اس نے مشرکین پر حملہ کیا اور جنگ کرتا رہا یہاں تک کہ قتل ہو گیا تو اس کی میت کو لا کر اس کے ان دو ساتھیوں کے ساتھ رکھ دیا گیا جنہیں اس سے پہلے وہ قتل کر چکا تھا ، تو نبی اکرم صلی اللہ علیہ وسلم نے ارشاد فرمایا : اہل جنت میں سے یہ لوگ آپس میں سب سے زیادہ محبت رکھنے والے ہیں ۔
یہ روایت امام طبرانی نے معجم کبیر اور معجم اوسط میں نقل کی ہے ابن مبارک کا مسعودی سے سماع صحیح ہے ، تو اگر اللہ نے چاہا ، تو یہ حدیث ” صحیح “ ہے اس کے رجال ثقہ ہیں ۔