مجمع الزوائد ومنبع الفوائد

سیدنا عبداللہ بن عمرو رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” ایک دن کی پہریداری ایک مہینے کے نفلی روزوں اور نوافل سے بہتر ہے “ ۔
یہ روایت امام أحمد نے نقل کی ہے ۔ اس کی سند میں ایک راوی ابن لہیعہ ہے اور اس کی نقل کردہ حدیث حسن ہے اور اس میں ضعف پایا جاتا ہے ۔

سیدنا عقبہ بن عامر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ہر میت کے عمل پر مہر لگا دی جاتی ہے البتہ اللہ کی راہ میں پہرا دینے والے کا معاملہ مختلف ہے ، کیونکہ اس کے عمل کا اجر اس کے لئے اس وقت تک جاری رہتا ہے جب تک اللہ تعالیٰ اسے دوبارہ زندہ نہیں کرے گا “ ۔ ایک روایت میں یہ الفاظ ہیں : ” اور اس کو قبر کی آزمائش سے محفوظ رکھا جاتا ہے “ ۔
یہ روایت امام أحمد اور امام طبرانی نے نقل کی ہے ۔ اس کی سند میں ایک راوی ابن لہیعہ ہے اور اس کی نقل کردہ حدیث حسن ہے ۔

سیده ام درداء رضی اللہ عنہا مرفوع حدیث کے طور پر یہ بات نقل کرتی ہیں ( نبی اکرم صلی اللہ علیہ وسلم نے ارشاد فرمایا ہے : ) ” جو شخص مسلمانوں کی حفاظت کے لیے ایک دن پہرا دیتا ہے اس کی طرف سے ایک سال کا پہرا کفایت کر جاتا ہے ( یعنی اسے ایک سال کے پہرے کا ثواب ملتا ہے ) “ ۔
یہ روایت امام أحمد اور امام طبرانی نے اسماعیل بن عیاش کے حوالے سے اہل مدینہ سے نقل کردہ روایت کے طور پر نقل کی ہے اور اس روایت کے بقیہ رجال ثقہ ہیں ۔

سیدنا انس بن مالک رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص سمندر کے ساحل پر ایک رات پہرا دیتا ہے ، تو یہ اس شخص کے اپنے گھر میں ایک ہزار سال تک عبادت کرنے سے زیادہ فضیلت رکھتا ہے ( وہ سال ایسا ہو گا ) کہ ایک سال تین سو ساٹھ دن کا ہو اور ہر دن ایک ہزار سال کا ہو “ ۔ ( علامہ ہیثمی فرماتے ہیں : ) میں یہ کہتا ہوں :
یہ روایت امام ابن ماجہ نے نقل کی ہے تاہم انہوں نے یہ الفاظ نقل نہیں کیے ہیں : ” سمندر کے ساحل پر “ ۔
یہ روایت امام ابویعلیٰ نے نقل کی ہے ۔ اس کی سند میں ایک راوی سعید بن خالد ابوطویل قرشی ہے اور وہ ضعیف ہے اگرچہ امام ابن حبان رحمہ اللہ نے اسے ثقہ قرار دیا ہے ، لیکن انہوں نے کتاب الضعفاء میں یہ بات بیان کی ہے ۔ اس سے استدلال کرنا جائز نہیں ہے ۔

سیدنا عثمان غنی رضی اللہ عنہ اور سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص اللہ کی راہ میں پہرا دینے کے دوران مر جائے تو روزے دار کا عمل اس کے لئے جاری رہتا ہے اور اس کا رزق اس کے لئے جاری رہتا ہے اور وہ ( قبر کی ) آزمائش سے محفوظ رہتا ہے اور قیامت کے دن جب اللہ تعالیٰ اسے زندہ کرے گا ، تو وہ بڑی پریشانی ( یعنی قیامت کی ہولناکی ) سے محفوظ ہو گا“ ۔ ( علامہ ہیثمی فرماتے ہیں : ) میں یہ کہتا ہوں ۔ سیدنا ابوہریرہ رضی اللہ عنہ سے منقول حدیث کو امام ابن ماجہ نے روایت کیا ہے ۔
یہ روایت امام بزار نے نقل کی ہے ۔ اس کی سند میں ایک راوی عبداللہ بن صالح ہے جسے عبداللہ بن شعیب نے ثقہ قرار دیا ہے وہ کہتے ہیں : یہ ثقہ اور مامون ہے دیگر حضرات نے اسے ضعیف کہا: ہے ۔ اس روایت کے بقیہ رجال ثقہ ہیں ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم سے پہریداری کے اجر کے بارے میں دریافت کیا گیا : تو آپ نے ارشاد فرمایا : ” جو شخص مسلمانوں سے پرے ایک دن حفاظت کے لئے پہرا دیتا ہے اسے اپنے پیچھے موجود روزہ دار اور نماز پڑھنے والوں کی مانند اجر ملتا ہے “ ۔
یہ روایت امام طبرانی نے معجم اوسط میں نقل کی ہے اور اس کے رجال ثقہ ہیں ۔

سیدنا جابر رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے ” جو شخص اللہ کی راہ میں ایک دن پہرا دیتا ہے اللہ تعالیٰ اس شخص اور جہنم کے درمیان سات خندقیں حائل کر دے گا جن میں سے ہر ایک خندق سات آسمانوں اور سات زمینوں کی مانند ہو گی “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عیسیٰ بن سلیمان ابوطیبہ ہے اور وہ ضعیف ہے ۔

سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص اللہ کی راہ میں پہرا دیتا ہے اللہ تعالیٰ اسے قبر کی آزمائش سے محفوظ رکھتا ہے “ ۔
یہ روایت امام طبرانی نے معجم کبیر اور معجم اوسط میں نقل کی ہے ۔

سیدنا ابوسعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص اللہ کی راہ میں ایک دن روزہ رکھتا ہے اللہ تعالیٰ اسے جہنم سے ستر برس کی مسافت جتنا دور کر دیتا ہے اور جو شخص پہرا دینے کے دوران انتقال کر جاتا ہے اسے قبر کی آزمائش سے بچا لیا جاتا ہے اور اس کا رزق اس پر جاری ہوتا ہے “ ۔ ( علامہ ہیثمی فرماتے ہیں : ) میں یہ کہتا ہوں : امام نسائی رحمہ اللہ اور امام ابن ماجہ نے اس روایت میں سے صرف روزے سے متعلق حصہ نقل کیا ہے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی رشدین بن سعد ہے اور وہ ضعیف ہے
یہ روایت متابعات کے ذریعے قوی ہو جاتی ہے ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” مکمل پہریداری چالیس دن کی ہوتی ہے ، جو شخص چالیس دن پہرا دے اس دوران وہ کوئی خرید و فروخت نہ کرے اور کسی حدث کا مرتکب نہ ہو ، تو وہ اپنے گناہوں سے نکل کر یوں ہو جاتا ہے جیسے اس دن تھا ، جب اس کی والدہ نے اسے جنم دیا تھا ۔
یہ روایت امام طبرانی نے نقل کی ہے ۔ اس کی سند میں ایک راوی ایوب بن مدرک ہے اور وہ متروک ہے ۔

سیدنا ابودرداء رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” ایک مہینے کی پہریداری ہمیشہ نفلی روزہ رکھنے سے زیادہ بہتر ہے اور جو شخص اللہ کی راہ میں پہرا دینے کے دوران مر جاتا ہے وہ بڑی پریشانی سے محفوظ رہے گا اسے اس کا رزق فراہم کیا جاتا ہے اور جنت کی خوشبو ( یا ہوا ) دی جاتی ہے اور اس کے لئے مجاہد کا اجر اس وقت تک جاری رہتا ہے جب تک اللہ تعالیٰ اسے ( قیامت کے دن ) دوبارہ زندہ نہیں کرے گا “ ۔
یہ روایت امام طبرانی نے نقل کی ہے اور اس کے رجال ثقہ ہیں ۔

سیدنا عرباض بن ساریہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ہر عمل اپنے متعلقہ فرد سے منقطع ہو جاتا ہے جب وہ فرد مر جاتا ہے البتہ اللہ کی راہ میں پہرا دینے والے کا معاملہ مختلف ہے ، کیونکہ اس کا عمل اس کے لئے بڑھتا رہتا ہے اور اس کا رزق اس کے لئے جاری رہتا ہے یہ قیامت تک ہوتا ہے “ ۔
یہ روایت امام طبرانی نے دو اسناد کے ساتھ نقل کی ہے جن میں سے ایک کے رجال ثقہ ہیں ۔

شرحبیل بن سمط بیان کرتے ہیں : انہوں نے سیدنا سلمان فارسی رضی اللہ عنہ کو دیکھا کہ وہ حمص کے ساحل پر پہرا دے رہے تھے ، تو یہ کہا: آپ کیا کر رہے ہیں ؟ انہوں نے فرمایا : پہرا دے رہا ہوں ۔ سیدنا سلمان رضی اللہ عنہ نے بتایا میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اللہ کی راہ میں ایک دن پہرا دینا ایک ماہ کے نفلی روزوں اور قیام کی مانند ہے اور جو شخص پہرا دینے کے دوران مر جاتا ہے اللہ تعالیٰ اس کا عمل اس کے لئے جاری کرتا ہے ، جو عمل وہ پہلے کیا کرتا تھا ، اور وہ شخص ( قبر کی ) آزمائش سے محفوظ رہتا ہے اور وہ شخص قیامت کے دن شہید کے طور پر زندہ کیا جائے گا “ ۔
یہ روایت امام طبرانی نے نقل کی ہے ۔ اس کی سند میں ایسے راوی ہیں جن سے میں واقف نہیں ہوں ۔

سیدنا عتبہ بن ندر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب تمہارے غزوات منقطع ہو جائیں اور مال غنیمت کو حلال قرار دیدیا جائے اور تاوان زیادہ ہو جائے ، تو تمہارا سب سے بہتر جہاد پہریداری ہے “ ۔
یہ روایت امام طبرانی نے نقل کی ہے ، اس کی سند میں ایک راوی سوید بن عبدالعزیز ہے اور وہ متروک ہے ۔