مجمع الزوائد ومنبع الفوائد

سیدنا معاذ بن جبل رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اُن کے لئے مبارک باد ہے ، جو اللہ کی راہ میں جہاد کرنے کے دوران اللہ کا ذکر کثرت سے کرتے ہیں ، کیونکہ ہر ایک کلمہ کے عوض میں انہیں ستر ہزار نیکیاں ملیں گی جن میں سے ہر ایک نیکی اس سے دس گنا ہو گی اور جو اس کے ہمراہ اللہ تعالیٰ کی بارگاہ سے ( مزید اجر و ثواب ) حاصل ہو گا وہ اس کے علاوہ ہے عرض کی گئی یا رسول اللہ ! خرچ کرنے کا کیا حکم ہو گا ؟ نبی اکرم صلی اللہ علیہ وسلم نے فرمایا : خرچ کا حکم بھی اسی طرح ہو گا “ عبدالرحمن نامی راوی کہتے ہیں میں نے سیدنا معاذ رضی اللہ عنہ سے دریافت کیا : کیا خرچ کا اجر بھی سات سو گنا ہو گا ؟ سیدنا معاذ بن جبل رضی اللہ عنہ نے فرمایا : تمہاری فہم کم ہے یہ اجر تو اس صورت میں ہو گا کہ جب وہ لوگ خرچ فراہم کریں گے اور خود اپنے گھر والوں میں مقیم رہیں اور جنگ میں حصہ نہ لیں ، جب وہ جنگ میں بھی حصہ لیں اور خرچ بھی کریں ، تو اللہ تعالیٰ نے اپنی رحمت کے خزانوں میں سے ان کے لئے وہ کچھ چھپا کے رکھا ہوا ہے کہ جو وہ بندوں کے علم اور بیان سے ماور اء ہے ، یہ لوگ اللہ کا گروہ ہیں اور اللہ کا گروہ ہی غالب ہوتا ہے ۔
یہ روایت امام طبرانی نے نقل کی ہے ۔ اس کی سند میں ایک راوی ایسا ہے جس کا نام بیان نہیں کیا گیا ۔

سیدنا انس بن مالک رضی اللہ عنہ فرماتے ہیں : اللہ کی راہ میں خرچ کرنے کا اجر سات سو گنا ہوتا ہے ۔
یہ روایت امام بزار نے نقل کی ہے ۔ اس کی سند میں ایک راوی محمد بن ابواسماعیل ہے اور میں اس سے واقف نہیں ہوں اس روایت کے بقیہ رجال ثقہ ہیں ۔