مجمع الزوائد ومنبع الفوائد

سیدنا عبداللہ بن عباس رضی اللہ عنہما بیان کرتے ہیں : ایک مرتبہ نبی اکرم صلی اللہ علیہ وسلم اپنی ایک زوجہ محترمہ کے گھر میں موجود تھے ۔ آپ نے سر رکھا اور سو گئے سونے کے دوران آپ مسکراتے رہے جب آپ بیدار ہوئے تو آپ کی زوجہ محترمہ نے آپ کی خدمت میں عرض کی : آپ سونے کے دوران مسکرا رہے تھے کسی چیز نے آپ کو مسکرانے پر مجبور کیا ؟ نبی اکرم صلی اللہ علیہ وسلم نے فرمایا : مجھے اپنی امت کے کچھ لوگ پسند آئے جو اس سمندر پر سوار ہو کر دشمن کے گرد جائیں گے وہ اللہ کی راہ میں جہاد کریں گے “ راوی کہتے ہیں : اس کے بعد نبی اکرم صلی اللہ علیہ وسلم نے ان لوگوں کے لئے بہت سی بھلائی کا ذکر کیا ۔
یہ روایت امام أحمد نے نقل کی ہے ۔ اس کی سند میں ایک راوی محمد بن ثابت عبدی ہے ایک روایت کے مطابق یحیی بن معین نے اسے ثقہ قرار دیا ہے ۔ امام نسائی رحمہ اللہ نے بھی ایسا ہی کیا ہے ۔ اس روایت کے بقیہ رجال ثقہ ہیں ۔

سیدنا عبداللہ بن عمرو بن العاص رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جس شخص نے حج نہ کیا ہو اس کے لئے حج کرنا دس غزوات میں حصہ لینے سے زیادہ بہتر ہے اور جو شخص حج کر چکا ہو اس کے لئے غزوہ میں شرکت کرنا دس مرتبہ حج کرنے سے زیادہ بہتر ہے اور سمندر کے غزوہ میں شرکت کرنا خشکی کے دس غزوات میں شرکت کرنے سے زیادہ بہتر ہے ، جو شخص سمندر پار کرتا ہے وہ گویا تمام وادیاں پار کرتا ہے اور ( سمندری سفر میں ) جس شخص کا سر چکراتا ہے وہ ایسے شخص کی مانند ہے ، جو ( خشکی کی جنگ میں ) اپنے خون میں لت پت ہو جاتا ہے “ ۔
یہ روایت امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی عبداللہ بن صالح ہے ، جو لیث کا کاتب ہے عبدالملک بن شعیب بن لیث کہتے ہیں : یہ ثقہ اور مامون ہے ان کے علاوہ دیگر حضرات نے اسے ضعیف قرار دیا ہے ۔

سیدنا عمران بن حصین رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص اللہ کی راہ میں ایک سمندری جنگ میں حصہ لیتا ہے اور اللہ زیادہ بہتر جانتا ہے کہ کون اس کی راہ میں جنگ میں حصہ لے رہا ہے ؟ تو ایسا شخص اپنی پوری اطاعت اللہ تعالیٰ کی بارگاہ میں ادا کر دیتا ہے اور جنت کو ہر طریقے سے طلب کرتا ہے اور جہنم سے ہر طریقے سے بھاگتا ہے “ ۔
یہ روایت امام طبرانی نے تینوں کتابوں میں نقل کی ہے ۔ اس کی سند میں ایک راوی عمر بن صبح ہے اور وہ متروک ہے ۔

سیدنا واثلہ بن اسقع رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص میرے ساتھ جنگ میں حصہ نہ لے سکا ہو اسے سمندری جنگ میں حصہ لینا چاہیے “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عمرو بن حصین ہے اور وہ ضعیف ہے ۔

سیدنا ابوہریرہ رضی اللہ عنہ نے مرفوع حدیث کے طور پر یہ بات نقل کی ہے ( نبی اکرم صلی اللہ علیہ وسلم نے ارشاد فرمایا ہے : ) ” اللہ تعالیٰ نے مغربی سمندر سے کلام کیا اور مشرقی سمندر سے کلام کیا اس نے مغربی سمندر سے فرمایا میں اپنے بندوں میں سے کچھ بندے تم پر سوار کرواؤں گا تم ان کے ساتھ کیا کرو گے ؟ اس نے جواب دیا : میں انہیں ڈبو دوں گا ، تو اللہ تعالیٰ نے فرمایا : تمہاری خرابی تمہارے نواحی علاقوں میں ہو گی ، تو اللہ تعالیٰ نے اسے زیور اور شکار سے محروم کر دیا پھر اللہ تعالیٰ نے مشرقی سمندر سے کلام کیا اور فرمایا : میں اپنے بندوں میں سے کچھ بندے تمہارے اوپر سوار کرواؤں گا تم ان کے ساتھ کیا کرو گے اس نے جواب دیا : میں اسے انہیں جسم پر سوار کرواؤں گا ؟ اور ان کے لئے یوں ہو جاؤں گا ، جس طرح ماں اپنے بچوں کے لئے ہوتی ہے ، تو اللہ تعالیٰ نے اسے بدلے میں زیور اور شکار عطا فرمایا “ ۔
یہ روایت امام بزار نے ’ وجادہ “ کے طور پر نقل کی ہے اس کی سند میں ایک راوی عبدالرحمن بن عبداللہ بن عمر عمری ہے اور وہ متروک ہے ۔

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” صرف حج کے لئے جانے کے لئے یا جنگ میں حصہ لینے کے لئے سمندر پر سوار ہونا “ ۔
یہ روایت امام بزار نے نقل کی ہے ۔ اس کی سند میں ایک راوی لیٹ بن ابوسلیم ہے اور وہ مدلس ہے ۔ اس روایت کے بقیہ رجال ثقہ ہیں ۔