مجمع الزوائد ومنبع الفوائد

سیدنا عبادہ بن صامت رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ کی راہ میں جہاد کرو ، کیونکہ اللہ کی راہ میں جہاد کرنا اللہ کے دروازوں میں سے ایک دروازہ ہے اللہ تعالیٰ اس کے ذریعے پریشانی اور غم سے نجات دیتا ہے “ ۔
یہ روایت امام أحمد نے نقل کی ہے ۔ امام طبرانی نے معجم کبیر اور معجم اوسط میں اس سے زیادہ طویل روایت کے طور پر اسے نقل کیا ہے ۔ امام أحمد اور دیگر حضرات کی مختلف اسانید میں سے ایک سند کے راوی ثقہ ہیں ۔

سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تم پر اللہ کی راہ میں جہاد کرنا لازم ہے ، کیونکہ یہ جنت کے دروازوں سے ایک دروازہ ہے اس کے ذریعے اللہ تعالیٰ پریشانی اور غم رخصت کر دیتا ہے “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عمرو بن حصین ہے اور وہ متروک ہے ۔

سیدنا معاذ بن جبل رضی اللہ عنہ بیان کرتے ہیں : غزوہ تبوک سے پہلے نبی اکرم صلی اللہ علیہ وسلم لوگوں کے ساتھ روانہ ہوئے صبح کے وقت آپ نے لوگوں کو صبح کی نماز پڑھائی لوگ روانہ ہوئے جب سورج طلوع ہونے والا تھا ، تو رات کے جاگنے کی وجہ سے لوگ اونگھنے لگے سیدنا معاذ رضی اللہ عنہ نبی اکرم صلی اللہ علیہ وسلم کے ساتھ آپ کے پیچھے چلنے لگ گئے ۔ لوگوں کی سواریاں عام راستے سے ہٹ کر ادھر اُدھر بکھر گئیں وہ سواریاں کھا بھی رہی تھیں اور چل بھی رہی تھیں سیدنا معاذ رضی اللہ عنہ نبی اکرم صلی اللہ علیہ وسلم کے پیچھے تھے ان کی اونٹنی کبھی کھا لیتی تھی کبھی چل پڑتی تھی سیدنا بلال رضی اللہ عنہ کی اونٹنی کو ٹھوکر لگی ، انہوں نے اسے لگام کے ذریعے کھینچا تو وہ تیز ہوئی ، یہاں تک کہ نبی اکرم صلی اللہ علیہ وسلم کی اونٹنی کے قریب پہنچ گئی نبی اکرم صلی اللہ علیہ وسلم نے کپڑا ہٹا کے دیکھا تو لشکر کا کوئی بھی فرد آپ کے پاس موجود نہیں تھا صرف سیدنا معاذ رضی اللہ عنہ آپ کے قریب تھے نبی اکرم صلی اللہ علیہ وسلم نے سیدنا معاذ رضی اللہ عنہ کو بلند آواز میں پکار کر فرمایا : اے معاذ انہوں نے عرض کی : یا رسول اللہ ! میں حاضر ہوں نبی اکرم صلی اللہ علیہ وسلم نے فرمایا : اور قریب ہو جاؤ وہ نبی اکرم صلی اللہ علیہ وسلم کے اور قریب ہو گئے ، یہاں تک کہ ان دونوں کی اونٹنیاں ایک دوسرے کے پاس ہو گئیں ، تو نبی اکرم صلی اللہ علیہ وسلم نے فرمایا : میرا یہ خیال نہیں تھا کہ لوگ مجھ سے اتنی دور ہوں گے جتنے ہیں سیدنا معاذ رضی اللہ عنہ نے عرض کی : یا رسول اللہ ! لوگ اونگھنے لگ پڑے تھے ، تو سواریاں ادھر اُدھر بکھر گئیں وہ چل بھی رہی ہیں اور چر بھی رہی ہیں نبی اکرم صلی اللہ علیہ وسلم نے فرمایا : میں بھی اونگھنے لگ گیا تھا ۔ جب سیدنا معاذ رضی اللہ عنہ نے نبی اکرم صلی اللہ علیہ وسلم کے مزاج کی خوشگواری دیکھی اور نبی اکرم صلی اللہ علیہ وسلم کو تنہا پایا تو عرض کی : یا رسول اللہ ! آپ مجھے اجازت دیجئے کہ میں آپ سے ایک ایسی چیز کے بارے میں دریافت کروں جس نے مجھے مریض کر دیا ہے بیمار کر دیا ہے غمگین کر دیا ہے نبی اکرم صلی اللہ علیہ وسلم نے فرمایا : تم جس چیز کے بارے میں چاہو دریافت کر لو انہوں نے عرض کی : یا رسول اللہ ! آپ مجھے ایسے عمل کے بارے میں بتائیے جو مجھے جنت میں داخل کر دے میں نے اس کے علاوہ کسی اور چیز کے بارے میں آپ سے نہیں پوچھنا نبی اکرم صلی اللہ علیہ وسلم نے فرمایا : بہت اچھے بہت اچھے بہت اچھے تم نے ایک بڑی چیز کے بارے میں دریافت کیا ہے : تم نے ایک بڑی چیز کے بارے میں دریافت کیا ہے : تم نے ایک بڑی چیز کے بارے میں دریافت کیا ہے : یہ بات آپ نے تین مرتبہ ارشاد فرمائی ( اور پھر فرمایا ) یہ اس شخص کے لئے آسان ہے جس کے لئے اللہ تعالیٰ بھلائی کا ارادہ کر لے یہ اس شخص کے لئے آسان ہے جس کے لئے اللہ تعالیٰ بھلائی کا ارادہ کر لے یہ اس شخص کے لئے آسان ہے جس کے لئے اللہ تعالیٰ بھلائی کا ارادہ کر لے نبی اکرم صلی اللہ علیہ وسلم اپنی بات کو تین مرتبہ دہرا رہے تھے یہ خواہش رکھتے ہوئے کہ سیدنا معاذ رضی اللہ عنہ اسے اہتمام کے ساتھ محفوظ کریں پھر نبی اکرم صلی اللہ علیہ وسلم نے ارشاد فرمایا : تم اللہ تعالیٰ اور آخرت کے دن پر ایمان رکھو تم نماز قائم کرو زکوۃ ادا کرو صرف اللہ تعالیٰ کی عبادت کرو کسی کو اس کا شریک نہ ٹھہراؤ یہاں تک کہ جب تم مرو تو اسی عالم ، میں ہو سیدنا معاذ رضی اللہ عنہ نے عرض کی : یا رسول اللہ ! آپ میرے لئے اسی بات کو دہرا دیں نبی اکرم صلی اللہ علیہ وسلم نے تین مرتبہ اس بات کو دہرایا پھر نبی اکرم صلی اللہ علیہ وسلم نے فرمایا : اے معاذ اگر تم چاہو ، تو میں تمہیں اس معاملے کے سرے اور اس معاملے کی مضبوط چیز اور اس کی کوہان کی چوٹی کے بارے میں بتاتا ہوں ۔ سیدنا معاذ رضی اللہ عنہ نے عرض کی : جی ہاں ! آپ مجھے بتائیے میرے ماں باپ آپ پر قربان ہوں نبی اکرم صلی اللہ علیہ وسلم نے فرمایا : اس معاملے کا سرا یہ ہے کہ تم اس بات کی گواہی دو کہ اللہ تعالیٰ کے علاوہ اور کوئی معبود نہیں ہے اس کا کوئی شریک نہیں ہے اور سیدنا محمد صلی اللہ علیہ وسلم اس کے بندے اور اس کے رسول ہیں اس معاملے کی چوٹی ( یعنی اہم ترین چیز ) نماز قائم کرنا زکوۃ ادا کرنا ہے اور اس کی کوہان کی چوٹی اللہ کی راہ میں جہاد کرنا ہے مجھے یہ حکم دیا گیا ہے کہ میں لوگوں کے ساتھ جنگ کروں یہاں تک کہ وہ نماز قائم کریں اور زکوۃ ادا کریں اور اس بات کی گواہی دیں کہ اللہ تعالیٰ کے علاوہ اور کوئی معبود نہیں ہے وہی ایک معبود ہے اس کا کوئی شریک نہیں ہے اور سیدنا محمد صلی اللہ علیہ وسلم اس کے بندے اور اس کے رسول ہیں جب وہ لوگ ایسا کر لیں گے تو وہ مضبوطی سے تھام لیں گے اور وہ اپنی جانوں اور اپنے مالوں کو محفوظ کر لیں گے البتہ ان کے حق کا معاملہ مختلف ہے اور ان لوگوں کا حساب اللہ تعالیٰ کے ذمہ ہو گا “ نبی اکرم صلی اللہ علیہ وسلم نے ارشاد فرمایا : ” اس ذات کی قسم ! جس کے دست قدرت میں میری جان ہے ، کسی بھی چہرے کی رنگت تبدیل نہیں ہوتی اور کوئی بھی قدم کسی عمل کے حوالے سے غبار آلود نہیں ہوتا ، جس کے ذریعے تم جنت کے درجات تلاش کرنا چاہو ، تو فرض نماز کے بعد کوئی ایسا عمل نہیں ہے ، جو اللہ کی راہ میں جہاد کرنے کی مانند ہو اور کوئی بھی عمل بندے کے میزان کو اس طرح وزنی نہیں کرتا جو اس جانور کی مانند ہو ، جس پر تم اللہ کی راہ میں خرچ کرتے ہو ، یا جسے تم اللہ کی راہ میں سواری کے لئے دے دو “ ۔
یہ روایت امام أحمد نے اور امام بزار نے نقل کی ہے ۔ امام طبرانی نے اختصار کے ساتھ نقل کی ہے ۔ اس کی سند میں ایک راوی شہر بن حوشب ہے اور وہ ضعیف ہے اس کی نقل کردہ حدیث کو حسن قرار دیا گیا ہے ۔

سیدنا فضالہ بن عبید رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اسلام کے تین درجہ ہیں زیریں ، بالائی اور بالاخانہ جہاں تک زیریں علاقے کا تعلق ہے ، تو وہ اسلام ہے ، جس میں عام مسلمان داخل ہوتے ہیں ان میں سے جس کسی سے بھی سوال کیا جائے گا ، تو وہ کہے گا میں مسلمان ہوں جہاں تک بالائی درجہ کا تعلق ہے ، تو اس سے مراد ان کے اعمال میں تفاضل ہے بعض مسلمان دوسروں سے فضیلت رکھتے ہیں جہاں تک بالائی بالا خانے کا تعلق ہے ، تو وہ اللہ کی راہ میں جہاد کرنا ہے اس مقام تک صرف ان میں سے زیادہ فضیلت رکھنے والے لوگ پہنچتے ہیں“ ۔
یہ روایت امام طبرانی نے ابوعبدالملک کی قاسم کے حوالے سے نقل کردہ روایت کے طور پر نقل کی ہے اور ابوعبدالملک سے میں واقف نہیں ہوں اس روایت کے بقیہ رجال ثقہ ہیں ۔

سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اسلام کی کوہان کی چوٹی جہاد ہے اس تک ان میں سے زیادہ فضیلت رکھنے والے لوگ ہی پہنچ سکتے ہیں “ ۔
یہ روایت امام طبرانی نے نقل کی ہے ۔ اس کی سند میں ایک راوی علی بن یزید ہے اور وہ ضعیف ہے ۔

سیدنا معاذ بن انس رضی اللہ عنہ نبی اکرم صلی اللہ علیہ وسلم کے بارے میں یہ بات نقل کرتے ہیں : ایک خاتون آپ کی خدمت میں حاضر ہوئی اس نے عرض کی : یا رسول اللہ ! میرا شوہر جنگ میں حصہ لینے کے لئے چلا گیا ہے میں اس کی اقتداء میں نماز ادا کیا کرتی تھی جب وہ نماز ادا کیا کرتا تھا ، اور ہر کام میں اس کی اقتداء کیا کرتی تھی اب آپ مجھے ایسے عمل کے بارے میں بتائیے کہ جو مجھے اس کے عمل تک پہنچا دے جب تک وہ واپس نہیں آتا نبی اکرم صلی اللہ علیہ وسلم نے اس عورت سے ارشاد فرمایا کیا تم یہ استطاعت رکھتی ہو کہ جب تک وہ واپس نہیں آتا اس وقت تک تم مسلسل نفل پڑھتی رہو بیٹھو نہیں مسلسل نفلی روزہ رکھو کوئی روزہ چھوڑو نہیں اور مسلسل اللہ کا ذکر کرتی رہو اس میں وقفہ نہ ہو اس خاتون نے عرض کی : یا رسول اللہ ! میں اس کی طاقت نہیں رکھتی ہوں نبی اکرم صلی اللہ علیہ وسلم نے ارشاد فرمایا : اس ذات کی قسم جس کے دست قدرت میں میری جان ہے اگر تم اس عمل کی طاقت رکھتی بھی ہوتی تو بھی تم اس کے عمل کے دسویں حصے تک بھی نہ پہنچتی ۔
یہ روایت امام أحمد نے نقل کی ہے اور امام طبرانی نے نقل کی ہے ۔ اس کی سند میں ایک راوی رشدین بن سعد ہے جسے امام أحمد نے ثقہ قرار دیا ہے اور ایک جماعت نے اسے ضعیف کہا: ہے ۔

عبداللہ بن محمد ، عمر اور عمار جو حفص کے صاحبزادے ہیں انہوں نے اپنے آباؤ اجداد کے حوالے سے یہ بات نقل کی ہے کہ انہوں نے یہ بات بیان کی ہے ۔ سیدنا بلال رضی اللہ عنہ سیدنا ابوبکر رضی اللہ عنہ کے پاس آئے اور بولے : اے اللہ کے رسول کے خلیفہ ! میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اہل ایمان کے عمل میں سب سے زیادہ فضیلت والا عمل ، اللہ کی راہ میں جہاد کرنا ہے “ ۔ تو میں نے یہ ارادہ کیا ہے میں اپنے آپ کو اللہ کی راہ میں مخصوص کر دیتا ہوں ، یہاں تک کہ میں مر جاؤں تو سیدنا ابوبکر رضی اللہ عنہ نے فرمایا : اے بلال ! میں آپ کو اللہ کا واسطہ دے کر اور اپنی حرمت اور اپنے حق کا واسطہ دے کر یہ کہتا ہوں کہ میری عمر زیادہ ہو گئی ہے میری قوت کمزور ہو گئی ہے میری موت کا وقت قریب آ چکا ہے ) آپ مجھے چھوڑ کر نہ جائیں ) تو سیدنا بلال رضی اللہ عنہ ان کے ساتھ ٹھہرے رہے جب سیدنا ابوبکر رضی اللہ عنہ کا انتقال ہو گیا تو سیدنا عمر رضی اللہ عنہ آئے تو انہوں نے بھی سیدنا بلال رضی اللہ عنہ سے وہی بات کہی جو سیدنا ابوبکر رضی اللہ عنہ نے کہی تھی لیکن سیدنا بلال رضی اللہ عنہ نے ان کی بات نہیں مانی تو سیدنا عمر رضی اللہ عنہ نے کہا: اے بلال ! پھر کون ؟ ( اذان دے گا ؟ ) انہوں نے جواب دیا : سیدنا سعد رضی اللہ عنہ کیونکہ وہ نبی اکرم صلی اللہ علیہ وسلم کے زمانہ اقدس میں قباء میں اذان دیا کرتے تھے ، تو سیدنا عمر رضی اللہ عنہ نے اذان دینے کی ذمہ داری سیدنا عقبہ رضی اللہ عنہ اور سیدنا سعد رضی اللہ عنہ کو دے دی ۔
یہ روایت امام طبرانی نے نقل کی ہے ۔ اس کی سند میں ایک راوی عبدالرحمن بن سہل بن عمار ہے اور وہ ضعیف ہے ۔

سیدنا جدار رضی اللہ عنہ جو نبی اکرم صلی اللہ علیہ وسلم کے اصحاب میں سے ایک ہیں وہ بیان کرتے ہیں : ہم نے نبی اکرم صلی اللہ علیہ وسلم کے ساتھ ایک جنگ میں حصہ لیا جب ہم دشمن کے مد مقابل آئے تو نبی اکرم صلی اللہ علیہ وسلم کھڑے ہوئے آپ نے اللہ تعالیٰ کی حمد و ثناء بیان کرنے کے بعد ارشاد فرمایا : ” اے لوگو ! تم لوگ سبز ، زرد اور سرخ کے درمیان ہو اور رہائشی جگہوں کے درمیان ہو جب تم دشمن کا سامنا کرو گے تو پیش قدمی کرنا ، کیونکہ جو شخص اللہ کی راہ میں آگے بڑھتا ہے ، تو حورعین سے تعلق رکھنے والی دو حوریں لپک کر اس کی طرف آتی ہیں ، جب وہ جام شہادت نوش کرتا ہے ، تو اس کے خون کا پہلا قطرہ زمین پر گرنے سے پہلے اللہ تعالیٰ اس کے ہر گناہ کو ختم کر دیتا ہے وہ دونوں حوریں اس شخص کے چہرے سے غبار کو پونچھتی ہیں اور یہ کہتی ہیں : تمہارا وقت ہو گیا ہے ، تو وہ شخص یہ کہتا ہے ، تمہارا بھی وقت آ گیا ہے “ ۔
یہ روایت امام طبرانی نے اور امام بزار نے نقل کی ہے ۔ اس کی سند میں ایک راوی عباس بن فضل انصاری ہے اور وہ ضعیف ہے ۔ شہادت کی فضیلت کے بارے میں اس کی مانند ایک روایت یزید بن شجرہ سے منقول ہے ، جو آگے آئے گی ۔

سیدنا ابومالک اشعری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص نماز قائم کرے زکوۃ ادا کرے اور ایسی حالت میں مر جائے کہ وہ اللہ تعالیٰ کی عبادت کرتا ہو کسی کو اس کا شریک نہ ٹھہراتا ہو ، تو اللہ تعالیٰ کے ذمہ یہ بات لازم ہے کہ وہ اس کو جنت میں داخل کرے ، خواہ اس نے ہجرت کی ہو یا اپنی پیدائش والی جگہ پر بیٹھا رہا ہو ایک صاحب نے عرض کی : یا رسول اللہ ! اگر میں نے لوگوں کو یہ بات بیان کر دی تو وہ اسی بات پر مطمئن ہو جائیں گے نبی اکرم صلی اللہ علیہ وسلم نے ارشاد فرمایا : اللہ تعالیٰ نے اپنی راہ میں جہاد کرنے والے لوگوں کے لئے ایک سو درجات بنائے ہیں جن میں سے دو درجوں کے درمیان اتنا فاصلہ ہے جتنا آسمان اور زمین کے درمیان فاصلہ ہے اگر میرے پاس وہ چیز ہو جسے میں خرچ کر سکوں اور مسلمانوں کو قوت دے سکوں یا ان لوگوں کے پاس وہ چیز ہو جسے وہ خرچ کر سکیں ، تو جو بھی جنگی مہم جائے میں اس میں ضرور شریک ہوں لیکن نہ میرے پاس اس کی گنجائش ہے نہ لوگوں کے پاس اس کی گنجائش ہے اگر میں نکل کھڑا ہوتا ہوں ، تو ان میں سے ہر ایک شخص میرے ساتھ نکلے گا ، اور یہ بات میرے لئے بھی مشکل کا باعث ہو گی اور ان کے لئے بھی مشکل کا باعث ہو گی میری یہ خواہش ہے کہ میں جنگ میں حصہ لوں اور پھر مجھے قتل کر دیا جائے پھر مجھے زندہ کیا جائے اور پھر میں جنگ میں حصہ لوں پھر مجھے قتل کر دیا جائے پھر مجھے زندہ کیا جائے پھر قتل کر دیا جائے “ ۔
یہ روایت امام طبرانی نے نقل کی ہے ۔ اس کی سند میں ایک راوی سعید بن یوسف ہے جسے ابن حبان اور دیگر حضرات نے ثقہ قرار دیا ہے ۔ امام أحمد اور دیگر حضرات نے اسے ضعیف کہا: ہے ۔ اس روایت کے بقیہ رجال ثقہ ہیں ۔

سیدنا نعمان بن بشیر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : اللہ کی راہ میں جہاد کرنے والے کی مثال دن کے وقت روزہ رکھنے اور رات کے وقت نوافل پڑھنے والے شخص کی مانند ہے جب تک وہ ( مجاہد ) واپس نہیں آ جاتا خواہ وہ جب بھی واپس آئے “ ۔
یہ روایت امام أحمد امام بزار اور امام طبرانی نے نقل کی ہے ۔ امام أحمد کے رجال صحیح کے رجال ہیں ۔

سیدنا ابوہند رضی اللہ عنہ جو نبی اکرم صلی اللہ علیہ وسلم کے اصحاب میں سے ایک ہیں وہ بیان کرتے ہیں : نبی اکرم صلی اللہ علیہ وسلم نے ارشاد فرمایا : اللہ کی راہ میں جہاد کرنے والے شخص کی مثال اس روزہ دار کی مانند ہے ، جو نوافل پڑھتا ہے اور اپنے روزے اور نماز اور صدقے میں کوئی وقفہ نہیں کرتا“ ۔
یہ روایت امام بزار نے نقل کی ہے ۔ اس کی سند میں ایک راوی عبدالرحمن بن ابوزناد ہے اور وہ ضعیف ہے ۔

سیدنا عمرو بن عبسہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص اونٹنی کا دودھ دوہنے جتنے وقت کے لئے اللہ کی راہ میں جنگ میں حصہ لیتا ہے اللہ تعالیٰ اس پر جہنم کو حرام کر دے گا “ ۔
یہ روایت امام أحمد نے نقل کی ہے ۔ اس کی سند میں ایک راوی عبدالعزیز بن عبیداللہ ہے اور وہ ضعیف ہے ۔

سیدہ عائشہ صدیقہ رضی اللہ عنہا کے بارے میں یہ بات منقول ہے کہ ایک مرتبہ ان کا مکاتب غلام کتابت کی بقیہ رقم لے کر ان کے پاس آیا تو سیدہ عائشہ رضی اللہ عنہا نے اس سے فرمایا : اب اس مرتبہ کے بعد تم میرے ہاں نہیں آ سکو گے تم پر لازم ہے کہ اللہ کی راہ میں جہاد میں حصہ لو کیونکہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : جس بھی مسلمان کے دل میں اللہ کی راہ میں غبار آ جاتا ہے ، اللہ تعالیٰ اس شخص پر جہنم کو حرام کر دیتا ہے “ ۔
یہ روایت امام أحمد اور امام طبرانی نے معجم اوسط میں نقل کی ہے ۔ امام أحمد کے رجال ثقہ ہیں ۔

سیدنا سلمان فارسی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب اللہ کی راہ میں مومن کا دل خوف کا شکار ہوتا ہے ، تو اس شخص کے گناہ یوں جھڑتے ہیں ، جس طرح کھجور کی شاخیں جھڑتی ہیں “ ۔
یہ روایت امام طبرانی نے معجم اوسط اور معجم کبیر میں نقل کی ہے ۔ اس کی سند میں ایک راوی عمرو بن حصین ہے اور وہ ضعیف ہے ۔

سیدنا ابومنذر رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا اس نے عرض کی : یا رسول اللہ ! فلاں شخص فوت ہو گیا ہے آپ اس کی نماز جنازہ ادا کریں سیدنا عمر رضی اللہ عنہ نے عرض کی : وہ فاجر شخص تھا آپ اس کی نماز جنازہ ادا نہ کریں اس شخص نے عرض کی : یا رسول اللہ ! کیا آپ نے اس شخص کو ، اس رات کو ملاحظہ نہیں فرمایا تھا ، جس میں آپ نے حفاظت کرتے ہوئے صبح کی تھی تو حفاظت کرنے والوں میں وہ فرد بھی شامل تھا ( یعنی جب پہرا دینے کی ضرورت پیش آئی تھی تو وہ بھی پہریداروں میں سے ایک تھا ) نبی اکرم صلی اللہ علیہ وسلم کھڑے ہوئے آپ نے اس کی نماز جنازہ ادا کی پھر آپ میت کے ساتھ گئے ، یہاں تک کہ اس کی قبر کے پاس تشریف لائے آپ وہاں تشریف فرما ہوئے جب اسے دفن کر دیا گیا تو آپ نے اس پر تین مرتبہ اپنے ہاتھوں کے ذریعے مٹی ڈالی اور پھر ارشاد فرمایا : لوگ تمہارے بارے میں بری تعریف کرتے ہیں میں تمہاری بھلائی کے ساتھ تعریف کرتا ہوں ۔ سیدنا عمر رضی اللہ عنہ نے عرض کی : یا رسول اللہ ! اس کی وجہ کیا ہے نبی اکرم صلی اللہ علیہ وسلم نے ارشاد فرمایا : اے خطاب کے بیٹے ! تم ہمیں رہنے دو ! جو شخص اللہ کی راہ میں جہاد کرتا ہے اس کے لئے جنت واجب ہو جاتی ہے ۔
یہ روایت امام طبرانی نے نقل کی ہے ۔ اس کی سند میں ایک راوی یزید بن ثعلب ہے اور میں اس سے واقف نہیں ہوں اس روایت کے بقیہ رجال ثقہ ہیں ۔

سیدنا ابوہریرہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جب اللہ کی راہ میں غازی نکلتا ہے ، تو اس کے گناہوں کو اس کے گھر کے دروازے پر رکھ دیا جاتا ہے جب وہ دروازہ چھوڑ کر آگے جاتا ہے ، تو وہ اپنے تمام گناہ پیچھے چھوڑ جاتا ہے اور ان گناہوں میں سے مکھی کے پر جتنا کوئی گناہ بھی باقی نہیں رہتا اللہ تعالیٰ اس شخص کے لئے چار چیزوں کا کفیل بن جاتا ہے ایک یہ کہ وہ اپنے اہل خانہ اور مال میں سے جو کچھ چھوڑ کے جا رہا ہے اللہ تعالیٰ اس کی نگہبانی کرے گا ، اور وہ شخص جس حالت میں بھی مرا اللہ تعالیٰ اسے جنت میں داخل کرے گا ، اور وہ شخص جس بھی حالت میں واپس آیا ، تو اللہ تعالیٰ اسے سلامتی کے ساتھ واپس لائے گا ، اور اسے اجر بھی حاصل ہو گا ، اور غنیمت بھی حاصل ہو گی ، اور جب سورج غروب ہوتا ، تو اس کے گناہوں سمیت غروب ہو جاتا ہے “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی بکر بن خنیس ہے اور وہ ضعیف ہے ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ایک جنگی مہم کی روانگی کا حکم دیا ، تو لوگوں نے عرض کی : یا رسول اللہ ! ہم رات کے وقت نکل جائیں یا ظہر جائیں ، یہاں تک کہ صبح نکلیں ؟ نبی اکرم صلی اللہ علیہ وسلم نے ارشاد فرمایا : کیا تم اس بات کو پسند نہیں کرتے ہو کہ تم جنت میں میرے چنتے ہوئے رات بسر کرو ۔
یہ روایت امام طبرانی نے معجم اوسط میں اپنے استاد بکر بن سہل دمیاطی کے حوالے سے نقل کی ہے ۔ امام ذہبی کہتے ہیں : یہ مقارب الحدیث ہے ۔ امام نسائی رحمہ اللہ کہتے ہیں : یہ ضعیف ہے ۔ اس روایت کی سند میں ایک راوی ابن لہیعہ بھی ہے ۔

سیدنا عبداللہ بن عتیک رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص اللہ کی راہ میں جہاد میں حصہ لینے کے لئے اپنے گھر سے نکلتا ہے پھر نبی اکرم صلی اللہ علیہ وسلم نے اپنی تین انگلیوں کے ذریعے اشارہ کیا درمیانی انگلی شہادت کی انگلی اور انگوٹھا ، آپ نے انہیں اکٹھا کیا اور فرمایا : جہاد کرنے والے لوگ کہاں ہیں ( پھر آپ نے یہ ارشاد فرمایا : ) ” اگر وہ شخص اپنی سواری سے گر کے مر جائے تو اس کا اجر اللہ تعالیٰ کے ذمہ لازم ہو جاتا ہے اگر کوئی جانور اسے ڈنک مار لے اور وہ مر جائے تو اس کا اجر اللہ کے ذمہ لازم ہو جاتا ہے اگر وہ طبعی موت مر جائے تو اس کا اجر اللہ کے ذمہ لازم ہو جاتا ہے ۔ راوی کہتے ہیں : اللہ کی قسم ! یہ کلمہ میں نے نبی اکرم صلی اللہ علیہ وسلم سے پہلے عربوں میں سے کسی کی زبانی نہیں سنا ( نبی اکرم صلی اللہ علیہ وسلم نے فرمایا : ) اگر وہ شخص مر جائے تو اس کا اجر اللہ کے ذمہ لازم ہو جاتا ہے اور جو شخص شہید ہو اور وہ اپنے ذمہ لازم فرض کو ادا کر دے تو وہ اس چیز کو واجب کروا لیتا ہے ، جو ( بہتر ) انجام ہے “ ۔
یہ روایت امام أحمد نے اور امام طبرانی نے نقل کی ہے ۔ اس کی سند میں ایک راوی محمد بن اسحاق ہے ، جو مدلس ہے ۔ امام أحمد کے بقیہ رجال ثقہ ہیں ۔

سیدنا معاذ بن جبل رضی اللہ عنہ بیان کرتے ہیں : نبی اکرم صلی اللہ علیہ وسلم نے ہم سے پانچ چیزوں کے بارے میں عہد لیا تھا کہ جو شخص ان میں سے کوئی ایک کام بھی کرے گا ، تو وہ اللہ تعالیٰ کے ذمہ میں ہو گا جو شخص بیمار کی عیادت کرے یا جنازے کے ساتھ جائے یا اللہ کی راہ میں جنگ میں حصہ لینے کے لئے نکلے یا کسی حکمران کے پاس جائے اور اس کا مقصد اس کی مدد کرنا اور اس کی تعظیم کرنا ہو یا اپنے گھر میں بیٹھا رہے اور سلامت رہے اور لوگ اس کے حوالے سے سلامت رہیں “ ۔ ( علامہ ہیثمی فرماتے ہیں : ) میں یہ کہتا ہوں :
یہ روایت امام ابوداؤد نے اختصار کے ساتھ نقل کی ہے ۔
یہ روایت امام أحمد اور امام بزار نے نقل کی ہے ۔ امام طبرانی نے معجم اوسط اور معجم کبیر میں نقل کی ہے ۔ امام أحمد کے رجال صحیح کے رجال ہیں صرف ابن لہیعہ کا معاملہ مختلف ہے اس کی نقل کردہ حدیث حسن ہے اور اس میں ضعف پایا جاتا ہے ۔

حمید بن ہلال بیان کرتے ہیں : طفادہ سے تعلق رکھنے والے ایک صاحب کا راستہ ہمارے پاس سے گزرتا تھا وہ قبیلے میں تشریف لا کر ان لوگوں کو حدیث بیان کیا کرتے تھے ۔ وہ بیان کرتے ہیں : ایک مرتبہ میں ایک قافلے کے ساتھ مدینہ منورہ آیا ہم لوگوں نے اپنا سامان فروخت کر دیا پھر میں نے سوچا کہ مجھے ان صاحب کے پاس جانا چاہیے میں ان کے پاس جا کر ان کے حالات معلوم کرتا ہوں وہ کہتے ہیں : میں نبی اکرم صلی اللہ علیہ وسلم کے پاس آیا نبی اکرم صلی اللہ علیہ وسلم نے مجھے ایک گھر دکھایا اور فرمایا : اس گھر میں ایک عورت ہوتی تھی وہ مسلمانوں کے ساتھ ایک جنگی مہم کے لئے نکلی اس نے اپنے پیچھے بارہ بکریاں چھوڑیں اور اپنا کپڑا بننے کا آلہ چھوڑا ، جس کے ذریعے وہ بنتی تھی ، ( جب وہ واپس آئی ) تو اس نے اپنی بکریوں میں سے ایک بکری کو غیر موجود پایا ، اور اپنے کپڑا بننے کے آلے کو غیر موجود پایا ، تو عرض کی : اے میرے پروردگار ! جو تیری راہ میں نکلتا ہے ، تو نے اسے یہ ضمانت دی ہے کہ تو اس کی حفاظت کرتا ہے ، تو میں نے اپنی بکریوں میں سے ایک بکری کو اور اپنے کپڑا بننے کے آلے کو غیر موجود پایا ہے ، تو میں اپنی بکری اور اپنے کپڑا بننے کے آلے کے بارے میں تجھے واسطہ دیتی ہوں ۔ راوی کہتے ہیں : نبی اکرم صلی اللہ علیہ وسلم نے اس عورت کے اپنے پروردگار کی بارگاہ میں مناجات کی شدت کا ذکر کیا ، نبی اکرم صلی اللہ علیہ وسلم نے فرمایا : تو اس کے پاس ایک بکری اور اس کی مانند ایک مزید بکری بھی اور ایک کپڑا بننے کا آلہ اور اس کی مانند ایک مزید آلہ بھی تھا ۔ نبی اکرم صلی اللہ علیہ وسلم نے فرمایا : تم اس عورت کے پاس جا کر اُس سے اس بارے میں دریافت کر سکتے ہو ، اگر تم چاہو ، راوی کہتے ہیں : تو میں نے عرض کی : بلکہ میں آپ کی بات کی تصدیق کرتا ہوں ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔

سیدہ عائشہ صدیقہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں : ” چھ کام ہیں ، جو بھی مسلمان ان میں سے جو بھی پورا کر دے تو وہ اللہ تعالیٰ کے ذمہ میں ہو گا کہ اللہ تعالیٰ اسے جنت میں داخل کرے وہ شخص جو جہاد کرنے کے لئے نکلے اگر وہ اس دوران مر جائے تو وہ اللہ تعالیٰ کے ذمہ میں ہو گا وہ شخص جو جنازے کے ساتھ جائے اگر وہ اس دوران مر جائے تو وہ اللہ تعالیٰ کے ذمہ میں ہو گا وہ شخص جو وضو کرتے ہوئے اچھی طرح وضو کرے اور نماز کی ادائیگی کے لئے مسجد کی طرف چل کے جائے اگر وہ اس دوران مر جائے تو وہ اللہ تعالیٰ کے ذمہ میں ہو گا ، اور وہ شخص جو اپنے گھر میں رہے اور مسلمانوں کی غیبت نہ کرے اور ان کی طرف ناراضگی نہ لے کر جائے اور ان کی طرف انتقام نہ لے کر جائے اور اگر وہ اس دوران مر جاتا ہے ، تو وہ اللہ تعالیٰ کے ذمہ میں ہو گا “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عیسیٰ بن عبدالرحمن بن ابوفروہ ہے اور وہ متروک ہے ۔

سیدنا محمد بن حاطب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : جب کوئی شخص بیوی اور اولاد سے محروم ہو ، تو اس پر جہاد کرنا لازم ہے “ ۔
یہ روایت امام طبرانی نے نقل کی ہے ۔ اس کی سند میں ایک راوی موسیٰ بن محمد بن حاطب ہے میں اس سے واقف نہیں ہوں اس روایت کے بقیہ رجال ثقہ ہیں ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ہر امت کی مخصوص رہبانیت ہوتی ہے اور اس امت کی رہبانیت اللہ کی راہ میں جہاد کرنا ہے “ ۔
یہ روایت امام ابویعلیٰ نے نقل کی ہے اور امام أحمد نے بھی نقل کی ہے تا ہم انہوں نے یہ الفاظ نقل کیے ہیں : ” ہر نبی کی مخصوص رہبانیت ہوتی ہے اور اس امت کی رہبانیت جہاد ہے “ ۔ اس روایت کی سند میں ایک راوی زید العمی ہے جسے امام أحمد اور دیگر حضرات نے ثقہ قرار دیا ہے ۔ امام ابوزرعہ اور دیگر حضرات نے اسے ضعیف کہا: ہے ۔ اس روایت کے بقیہ رجال صحیح کے رجال ہیں ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ہر امت کی مخصوص سیاحت ہوتی ہے اور میری امت کی سیاحت اللہ کی راہ میں جہاد کرنا ہے ہر امت کی مخصوص رہبانیت ہوتی ہے اور میری امت کی رہبانیت دشمن کے مدمقابل پہرا دینا ہے “ ۔
یہ روایت امام طبرانی نے نقل کی ہے ۔ اس کی سند میں ایک راوی عفیر بن معدان ہے اور وہ ضعیف ہے ۔

سیدنا عمار بن یاسر رضی اللہ عنہ کے بارے میں یہ بات منقول ہے جنگ صفین کے دن انہوں نے ارشاد فرمایا : جنت کنووں کے نیچے ہے تم لوگ پیاسے کھڑے رہو ! پانی اپنے گھاٹ تک پہنچ جائے گا ۔
یہ روایت امام طبرانی نے نقل کی ہے اور اس کے رجال ثقہ ہیں ۔

سیدنا عبداللہ بن سلام رضی اللہ عنہ بیان کرتے ہیں : ایک مرتبہ ہم نبی اکرم صلی اللہ علیہ وسلم کے ساتھ چلتے ہوئے جا رہے تھے ۔ آپ نے کچھ لوگوں کو سنا ، جو یہ کہہ رہے تھے یا رسول اللہ ! اعمال میں کون سا عمل زیادہ فضیلت رکھتا ہے ؟ نبی اکرم صلی اللہ علیہ وسلم نے ارشاد فرمایا : اللہ اور اس کے رسول پر ایمان رکھنا اللہ کی راہ میں جہاد کرنا اور مبرور حج پھر آپ نے نشیبی حصے میں ایک آواز سنی وہ شخص یہ کہہ رہا تھا میں یہ گواہی دیتا ہوں کہ اللہ تعالیٰ کے علاوہ کوئی معبود نہیں ہے اور سیدنا محمد اللہ کے رسول ہیں نبی اکرم صلی اللہ علیہ وسلم نے فرمایا : میں بھی اس بات کی گواہی دیتا ہوں اور میں اس بات کی بھی گواہی دیتا ہوں کہ جو شخص بھی اس ( بات ) کی گواہی دے گا وہ شرک سے لا تعلق ہو گا “ ۔
یہ روایت امام أحمد نے نقل کی ہے اور امام طبرانی نے معجم اوسط میں نقل کی ہے اور ان دونوں کے رجال ثقہ ہیں ۔

سیدہ شفاء رضی اللہ عنہا عبداللہ رضی اللہ عنہ جو مہاجر خواتین میں سے ایک ہیں وہ بیان کرتی ہیں : نبی اکرم صلی اللہ علیہ وسلم سے سب سے زیادہ فضیلت والے عمل کے بارے میں دریافت کیا گیا : تو آپ نے ارشاد فرمایا : ” اللہ پر ایمان رکھنا اللہ کی راہ جہاد کرنا اور مبرور حج “ ۔
یہ روایت امام أحمد نے نقل کی ہے ۔ اس کی سند میں ایک راوی ایسا ہے جس کا نام بیان نہیں کیا گیا ہے ۔

سیدنا عبادہ بن صامت رضی اللہ عنہ بیان کرتے ہیں : ایک مرتبہ میں نبی اکرم صلی اللہ علیہ وسلم کے پاس موجود تھا اسی دوران ایک شخص آپ کے پاس آیا اور بولا: یا رسول اللہ کون سا عمل زیادہ فضیلت رکھتا ہے ؟ نبی اکرم صلی اللہ علیہ وسلم نے ارشاد فرمایا : اللہ پر ایمان رکھنا اس کی راہ میں جہاد کرنا اور مبرور حج جب وہ شخص مڑ کر جانے لگا ، تو نبی اکرم صلی اللہ علیہ وسلم نے فرمایا : اس سے بھی زیادہ تمہارے لئے آسان یہ ہے کہ کھانا کھلانا نرم گفتگو کرنا اور اچھے اخلاق جب وہ شخص جانے لگا ، تو آپ نے فرمایا : اس سے بھی زیادہ تمہارے لئے آسان یہ ہے کہ تم اللہ سے کسی ایسی چیز کے بارے میں شکوہ نہ کرو کہ جو فیصلہ اس نے تمہارے خلاف دیا ہو ( یعنی جو تمہیں ناپسند ہو ) ۔

ایک روایت میں یہ الفاظ ہیں : اس شخص نے عرض کی : یا رسول اللہ ! میں اس سے بھی زیادہ آسان چیز کے بارے میں جاننا چاہتا ہوں نبی اکرم صلی اللہ علیہ وسلم نے فرمایا : نرمی اور صبر ۔
یہ روایت امام طبرانی نے دو اسناد کے ساتھ نقل کی ہے جن میں سے ایک سند میں ایک راوی ابن لہیعہ ہے اس کی نقل کردہ حدیث حسن ہے اور اس راوی میں ضعف پایا جاتا ہے دوسری روایت کی سند میں ایک راوی سوید بن ابراہیم ہے جسے دو روایات کے مطابق یحیی بن معین نے ثقہ قرار دیا ہے اور امام نسائی رحمہ اللہ نے اسے ضعیف کہا: ہے ان دونوں روایات کے بقیہ رجال ثقہ ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے فرمایا : کیا میں تم لوگوں کو مخلوق میں سب سے بہتر شخص کے بارے میں نہ بتاؤں ؟ لوگوں نے عرض کی : جی ہاں ۔ یا رسول اللہ ! نبی اکرم صلی اللہ علیہ وسلم نے ارشاد فرمایا : وہ شخص جو اللہ کی راہ میں اپنے گھوڑے کی لگام پکڑ لیتا ہے اور جب بھی وہ کوئی خوف زدہ کرنے والی بات سنتا ہے ، تو اس پر سوار ہو جاتا ہے کیا میں تمہیں اس کے بعد والے شخص کے بارے میں بتاؤں ؟ لوگوں نے عرض کی : جی ہاں ۔ نبی اکرم صلی اللہ علیہ وسلم نے فرمایا : وہ شخص جو بکریوں کے ریوڑ میں ہوتا ہے اور نماز قائم کرتا ہے اور زکوۃ ادا کرتا ہے اور کیا میں تمہیں مخلوق کے سب سے برے شخص کے بارے میں نہ بتاؤں ؟ لوگوں نے عرض کی جی ہاں ۔ یا رسول اللہ ! نبی اکرم صلی اللہ علیہ وسلم نے فرمایا : وہ شخص جس سے اللہ کے نام پر مانگا جائے اور وہ اس کے نام پر نہ دے ۔ ( علامہ ہیثمی فرماتے ہیں : ) میں یہ کہتا ہوں ۔ سیدنا ابوہریرہ رضی اللہ عنہ کے حوالے سے منقول حدیث ” صحیح “ میں منقول ہے ، لیکن وہ اس سیاق کے بغیر ہے ۔
یہ روایت امام أحمد نے نقل کی ہے ابومعشر نجیح نامی راوی ضعیف ہے اور ابومعشر جو سیدنا ابوہریرہ رضی اللہ عنہ کا غلام ہے میں اس سے واقف نہیں ہوں ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم سے سوال کیا گیا : کون سا عمل زیادہ فضیلت رکھتا ہے ؟ نبی اکرم صلی اللہ علیہ وسلم نے ارشاد فرمایا : ” اللہ پر ایمان رکھنا ، اللہ کی راہ میں جہاد کرنا اور مبرور حج “ ۔
یہ روایت امام بزار نے نقل کی ہے ۔ اس کی سند میں ایک راوی ولید بن عبداللہ بن ابوثور ہے جسے جمہور نے ضعیف قرار دیا ہے اور انہوں نے اور شریک نے اسے پاکیزہ قرار دیا ہے ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” ایک حج چالیس غزوات سے زیادہ بہتر ہوتا ہے اور ایک غزوہ چالیس حج سے زیادہ بہتر ہوتا ہے آپ نے ارشاد فرمایا : جب کوئی شخص فرض حج کر چکا ہو ، تو ایک غزوہ اس کے لئے چالیس مرتبہ حج کرنے سے زیادہ بہتر ہے اور فرض حج چالیس مرتبہ غزوہ میں شرکت کرنے سے زیادہ بہتر ہے “ ۔
یہ روایت امام بزار نے نقل کی ہے اور اس کے رجال ثقہ ہیں عنبسہ بن ہبیرہ نامی راوی کو ابن حبان نے ثقہ قرار دیا ہے اور امام ذہبی نے اسے مجہول کہا: ہے ۔

سیدنا ابوامامہ رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کے ساتھ ایک جنگی مہم میں حصہ لینے کے لئے نکلے ۔ راوی کہتے ہیں : ایک شخص کا گزر ایک غار کے پاس سے ہوا جس میں تھوڑا سا پانی موجود تھا اس شخص نے یہ سوچا کہ وہ اس غار میں مقیم ہو جاتا ہے وہاں اللہ تعالیٰ اس پانی کے ذریعے اسے خوراک فراہم کرتا رہے گا وہ آس پاس کی سبزیاں حاصل کر لے گا ، اور وہ دنیا سے لاتعلق ہو جائے گا پھر اس نے سوچا کہ مجھے نبی اکرم صلی اللہ علیہ وسلم کے پاس جا کر آپ کے سامنے یہ بات ذکر کرنی چاہیے اگر آپ نے مجھے اجازت دے دی تو میں ایسا کر لوں گا ، اور اگر اجازت نہ دی تو میں ایسا نہیں کروں گا وہ نبی اکرم صلی اللہ علیہ وسلم کے پاس آیا اس نے عرض کی : اے اللہ کے نبی ! میرا گزر ایک غار کے پاس سے ہوا جس میں پانی اور سبزیوں کے حوالے سے میری خوراک کا بندوبست موجود تھا میں نے یہ سوچا کہ میں اس میں مقیم ہو جاتا ہوں اور دنیا سے لاتعلق ہو جاتا ہوں ؟ نبی اکرم صلی اللہ علیہ وسلم نے ارشاد فرمایا : مجھے یہودیت یا عیسائیت کے ہمراہ مبعوث نہیں کیا گیا بلکہ مجھے آسان حنفیت کے ہمراہ مبعوث کیا گیا ہے ، اس ذات کی قسم ! جس کے دست قدرت میں محمد ( صلی اللہ علیہ وسلم ) کی جان ہے اللہ کی راہ میں صبح کے وقت جانا یا شام کے وقت جانا دنیا اور اس میں موجود سب چیزوں سے زیادہ بہتر ہے اور تم میں سے کسی ایک شخص کا صف میں کھڑا ہونا اس کے ساٹھ سال تک ( نفل ) نمازیں ادا کرنے سے زیادہ بہتر ہے “ ۔
یہ روایت امام أحمد اور امام طبرانی نے نقل کی ہے ۔ اس کی سند میں ایک راوی علی بن یزید الہانی ہے اور وہ ضعیف ہے ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم کے اصحاب میں سے ایک صاحب کا گزر ایک گھاٹی کے پاس سے ہوا جس میں پانی موجود تھا انہیں وہاں کی پاکیزگی اچھی لگی تو انہوں نے یہ سوچا کہ اگر میں لوگوں سے الگ تھلگ ہو جاؤں اور اس گھاٹی میں مقیم ہو جاؤں ( تو یہ مناسب ہو گا ) لیکن میں ایسا اس وقت تک نہیں کروں گا جب تک اللہ کے رسول سے اجازت نہیں لے لیتا انہوں نے نبی اکرم صلی اللہ علیہ وسلم کے سامنے اس بات کا ذکر کیا تو نبی اکرم صلی اللہ علیہ وسلم نے ارشاد فرمایا : ” تم ایسا نہ کرو ، کیونکہ تم میں سے کسی ایک شخص کا اللہ کی راہ میں کھڑے ہونا اس کے لئے اس کے اپنے گھر میں ساٹھ سال تک کھڑے ہونے ( یا نوافل ادا کرنے ) سے زیادہ بہتر ہے ( یہاں پر ایک لفظ کے بارے میں راوی کو شک ہے ) جو شخص اونٹنی کا دودھ دوہنے کے جتنے وقت کے لئے اللہ کی راہ میں جنگ میں حصہ لیتا ہے اس کے لئے جنت واجب ہو جاتی ہے “ ۔
یہ روایت امام بزار نے نقل کی ہے اور اس کے رجال ثقہ ہیں ۔ آدمی کے جنگ کے لئے صف میں کھڑے ہونے کی فضیلت کے بارے میں سیدنا عمران بن حصین رضی اللہ عنہ منقول حدیث آگے آئے گی ۔