مجمع الزوائد ومنبع الفوائد

ابوعامر ہوزنی بیان کرتے ہیں : سیدنا ابوکبشہ انماری رضی اللہ عنہ ان کے پاس آئے اور بولے : اپنا گھوڑا مجھے جفتی کے لئے دے دو کیونکہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص اسے جفتی کے لئے دے اور اس کے نتیجے میں اور گھوڑا پیدا ہو ، تو اس دینے والے کو ستر گھوڑوں جتنا اجر ملتا ہے ، جو اس نے اللہ کی راہ میں سواری کے لئے دیے ہوں “ ۔
یہ روایت امام أحمد اور امام طبرانی نے نقل کی ہے تاہم انہوں نے یہ الفاظ نقل کیے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا : ” جو شخص اپنا گھوڑا جفتی کے لئے کسی مسلمان کو دیتا ہے اور اس کے نتیجے میں ایک اور گھوڑا پیدا ہوتا ہے ، تو اس شخص کو ستر گھوڑوں کے جتنا اجر ملتا ہے جنہیں اس نے اللہ کی راہ میں سواری کے لئے دیا ہو اور اگر اس کے نتیجے میں ۔ گھوڑا پیدا نہیں ہوتا ، تو اس شخص کو ایک گھوڑا اللہ کی راہ میں سواری کے لئے دینے کا اجر ملتا ہے “ ۔ ان دونوں روایات کے رجال ثقہ ہیں ۔

سیدنا عبداللہ بن عمر رضی اللہ عنہما بیان کرتے ہیں : لوگ آپس میں ایک دوسرے کے ساتھ جو مہربانی کرتے ہیں اس میں کوئی بھی چیز جفتی کے لئے جانور دینے سے زیادہ فضیلت نہیں رکھتی آدمی اپنا گھوڑا جفتی کے لئے دیتا ہے ، تو اس کا اجر اس کے لئے جاری ہو جاتا ہے آدمی اپنا نر جانور جفتی کے لئے دیتا ہے ، تو اس کا اجر اس کے لئے جاری ہو جاتا ہے آدمی اپنا مینڈھا جفتی کے لئے دیتا ہے ، تو اس کا اجر اس شخص کے لئے جاری ہو جاتا ہے “ ۔
یہ روایت امام طبرانی نے نقل کی ہے اور اس کے رجال ثقہ ہیں ۔