مجمع الزوائد ومنبع الفوائد

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” مقابلہ صرف اونٹ ، یا گھوڑے ( کی دوڑ ) یا تیر اندازی میں نشانہ بازی ) میں ہو سکتا ہے “ ۔
یہ روایت امام طبرانی نے نقل کی ہے ۔ اس کی سند میں ایک راوی عبداللہ بن ہارون قروی ہے اور وہ اس حدیث کے حوالے سے اور دیگر روایات کے حوالے سے ضعیف ہے ۔

سیدنا عبداللہ بن حارث رضی اللہ عنہ بیان کرتے ہیں : نبی اکرم صلی اللہ علیہ وسلم سیدنا عباس رضی اللہ عنہ کے صاحبزادوں سیدنا عبداللہ رضی اللہ عنہ سیدنا عبیداللہ رضی اللہ عنہ اور سیدنا کثیر رضی اللہ عنہ کو صف میں کھڑا کرتے تھے اور پھر یہ فرماتے تھے : جو مجھ تک پہلے پہنچ جائے گا ، اسے یہ ، یہ ملے گا راوی کہتے ہیں : تو وہ لوگ نبی اکرم صلی اللہ علیہ وسلم کی طرف دوڑ لگا کر جاتے تھے اور آپ کی پشت اور آپ کے سینے پر گر جاتے تھے نبی اکرم صلی اللہ علیہ وسلم انہیں بوسہ دیتے تھے اور اپنے ساتھ چمٹا لیتے تھے ۔
یہ روایت امام أحمد نے نقل کی ہے ۔ اس کی سند میں ایک راوی یزید بن ابوزیاد ہے اس میں ضعف اور کمزوری پائی جاتی ہے ۔ امام ابوداؤد کہتے ہیں : میں ایسے کسی شخص کو نہیں جانتا جس نے اس کی حدیث کو متروک قرار دیا ہوتا ہم اس کے علاوہ دوسرا راوی میرے نزدیک اس سے زیادہ پسندیدہ ہو گا امام مسلم نے اس کے حوالے سے ایک مقرون روایت نقل کی ہے اور امام بخاری رحمہ اللہ نے تعلیق کے طور پر نقل کی ہے ۔ اس روایت کے بقیہ رجال ثقہ ہیں ۔

سیدنا کثیر بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم ہمیں اکٹھا کرتے تھے میں ہوتا تھا عبداللہ ، عبیداللہ اور قثم ہوتے تھے نبی اکرم صلی اللہ علیہ وسلم اپنے دونوں ہاتھ اس طرح پھیلا لیتے تھے اور پھر یہ فرماتے تھے : جو مجھ تک پہلے پہنچ جائے گا اسے یہ ، یہ ملے گا ۔
یہ روایت امام طبرانی نے نقل کی ہے ۔ اس کی سند میں ایک راوی صباح بن یحیی ہے اور وہ متروک ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم نے گھوڑوں کے درمیان دوڑ کا مقابلہ کروایا آپ نے ان کے درمیان مقابلہ کروایا اور ان میں ( دوڑ کی ) آخری حد مقرر کی ، آپ نے ارشاد فرمایا : ” مقابلہ صرف گھڑ دوڑ یا تیراندازی میں ہو سکتا ہے “ ۔ ( علامہ ہیثمی فرماتے ہیں : ) میں یہ کہتا ہوں : ” صحیح “ میں اس کا کچھ حصہ منقول ہے ۔
یہ روایت امام طبرانی نے معجم اوسط میں نقل کی ہے اور اس کے رجال صحیح کے رجال ہیں ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم نے گھوڑوں کے درمیان دوڑ کا مقابلہ کروایا تھا ۔ ( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں مذکور ہے تا ہم اس میں یہ الفاظ نہیں ہیں : وراہن “ ۔
یہ روایت امام أحمد نے دو اسناد کے ساتھ نقل کی ہے جن میں سے ایک کے رجال ثقہ ہیں ۔

ابولبید لمازه بن زیاد بیان کرتے ہیں : حجاج کے زمانہ میں گھوڑے بلوائے گئے حکم بن ایوب ان دنوں بصرہ کے گورنر تھے ہم نے کہا: اگر ہم مقابلے میں حصہ لینے کے لئے جائیں ، تو ہم وہاں جاتے ہیں پھر ہم نے سوچا ہمیں پہلے سیدنا انس بن مالک رضی اللہ عنہ کے پاس جا کر ان سے دریافت کر لینا چاہیے کہ کیا آپ لوگ نبی اکرم صلی اللہ علیہ وسلم کے زمانہ اقدس میں گھڑ دوڑ کیا کرتے تھے ۔ راوی کہتے ہیں : ہم نے ان سے دریافت کیا : تو انہوں نے فرمایا : جی ہاں نبی اکرم صلی اللہ علیہ وسلم نے ایک گھوڑے پر سوار ہو کر دوڑ میں حصہ لیا تھا ، جس کا نام سبحہ تھا وہ لوگوں سے آگے نکل گیا تو نبی اکرم صلی اللہ علیہ وسلم اس بات پر خوش ہوئے اور آپ کو یہ بات اچھی لگی ۔
یہ روایت امام أحمد نے اور امام طبرانی نے معجم اوسط میں نقل کی ہے تا ہم انہوں نے یہ لفظ نقل کیے ہیں : ہم سیدنا انس رضی اللہ عنہ کے پاس آئے وہ اس وقت زاویہ میں اپنے محل میں موجود تھے ہم نے ان سے سوال کیا اے ابوحمزہ کیا آپ لوگ نبی اکرم صلی اللہ علیہ وسلم کے زمانہ اقدس میں گھڑ دوڑ میں حصہ لیتے تھے ؟ یا کیا نبی اکرم صلی اللہ علیہ وسلم گھڑ دوڑ میں حصہ لیتے تھے ؟ تو انہوں نے جواب دیا : جی ہاں ۔ اللہ کی قسم ! نبی اکرم صلی اللہ علیہ وسلم نے ایک گھوڑے پر سوار ہو کر دوڑ میں حصہ لیا تھا ، جس کا نام ” سبحہ “ تھا آپ لوگوں سے آگے نکل گئے تو آپ کو یہ بات اچھی لگی اور پسند آئی ۔ امام أحمد کے رجال ثقہ ہیں ۔

سیدنا جابر رضی اللہ عنہ بیان کرتے ہیں : نبی اکرم صلی اللہ علیہ وسلم نے گھوڑوں کی تربیت گی اور پھر ان کے درمیان مقابلہ کروایا آپ نے مجھے ملاحظہ فرمایا : میں اونٹ پر سوار تھا ، تو آپ نے فرمایا : اے جابر ! تم مسلسل اسے مشقت کا شکار کرتے ہو نبی اکرم صلی اللہ علیہ وسلم کی مراد یہ تھی کہ تم مسلسل اسے مارتے ہو ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی محمد بن سلیمان بن مشمول ہے اور وہ ضعیف ہے ۔

سیدنا عروہ بن مضرس رضی اللہ عنہ کے بارے میں یہ بات منقول ہے کہ وہ نبی اکرم صلی اللہ علیہ وسلم کے سامنے سے اپنے گھوڑے کو ہانک کر لے جا رہے تھے ، تو نبی اکرم صلی اللہ علیہ وسلم نے ارشاد فرمایا : ” اللہ تعالیٰ کی ذات برکت والی ہے جس نے ان کے گھروں اور ان کے نیچے والے حصے کو اس طرح بنایا ہے “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی جابر جعفی ہے اور وہ ضعیف ہے ۔

سیدنا عصمہ رضی اللہ عنہ بیان کرتے ہیں : نبی اکرم صلی اللہ علیہ وسلم ایک گھوڑے پر سوار ہوئے آپ نے اسے دوڑایا جب آپ ہمارے پاس واپس تشریف لائے ، تو آپ نے ارشاد فرمایا : ” ہم نے اسے سمندر پایا ہے “ ۔
یہ روایت امام طبرانی نے نقل کی ہے ۔ اس کی سند میں ایک راوی فضل بن مختار ہے اور وہ ضعیف ہے ۔

سیدنا عبداللہ بن مغفل رضی اللہ عنہ بیان کرتے ہیں : ہم لوگ ایک دن مدینہ منورہ میں موجود تھے نبی اکرم صلی اللہ علیہ وسلم ہمارے پاس ایک گھوڑے پر سوار ہو کر تشریف لے آئے پھر آپ تشریف لے گئے ، یہاں تک کہ آپ ہماری نگاہوں سے اوجھل ہو گئے پھر آپ تشریف لائے وہ گھوڑا تیزی سے دوڑتا ہوا آ رہا تھا یا تو آپ اسے تیز چلا رہے تھے یا وہ خود تیز چل رہا تھا اس کا گزر ایک درخت کے پاس سے ہوا اس درخت سے ایک پرندہ اڑا ، تو وہ گھوڑا لڑکھڑا گیا اور نبی اکرم صلی اللہ علیہ وسلم اس سے سخت زمین پر گر گئے ہم تیزی سے آپ کی خدمت میں حاضر ہوئے آپ تشریف فرما تھے ، آپ کے دونوں گھٹنوں ، زانوں کی دونوں ہڈیوں کے سروں ، کندھوں اور چہرے پر چوٹ لگی تھی ، اور چہرے سے جلد اتر گئی تھی ، ہم آپ کے گرد بیٹھ کر رونے لگے ۔
یہ روایت امام طبرانی نے نقل کی ہے ۔ اس کی سند میں ایک راوی عباس بن فضل انصاری ہے اور وہ ضعیف ہے ۔

سیدنا بریدہ رضی اللہ عنہ بیان کرتے ہیں : نبی اکرم صلی اللہ علیہ وسلم نے گھوڑوں کی تربیت کروائی اور ان کی تربیت کے لئے مخصوص وقت مقرر کیا پھر یہ فرمایا : فلاں فلاں دن فلاں فلاں علاقے میں ( ان کا مقابلہ ہو گا ) اور جن گھوڑوں کی تربیت نہیں کی گئی تھی ان کے مقابلے کی حد اس سے کم تھی ۔
یہ روایت امام بزار نے نقل کی ہے اس کی سند میں ایک راوی صالح بن حبان ہے اور وہ ضعیف ہے ۔

سیدنا عیاض اشعری رضی اللہ عنہ روایت کرتے ہیں : سیدنا ابوعبیدہ رضی اللہ عنہ نے فرمایا : کون میرے ساتھ دوڑ کا مقابلہ کرے گا ؟ ایک نوجوان نے جواب دیا : میں ، اگر آپ غصہ نہ کریں ۔ راوی کہتے ہیں : پھر وہ ان سے سبقت لے گیا ۔ راوی کہتے ہیں : میں نے سیدنا ابوعبیدہ رضی اللہ عنہ کے بالوں کو دیکھا کہ وہ اُڑ رہے تھے اور وہ ایک گھوڑے کی برہنہ پشت پر اس کے پیچھے تھے ۔
یہ روایت امام طبرانی نے نقل کی ہے اور اس کے رجال ثقہ ہیں ۔

ابوبلج بیان کرتے ہیں : میں نے سیدنا لبی بن لبا اسدی رضی اللہ عنہ کو دیکھا ، جو نبی اکرم صلی اللہ علیہ وسلم کے اصحاب میں سے تھے ، انہوں نے نبی اکرم صلی اللہ علیہ وسلم کا زمانہ پایا تھا ، ان کا گھوڑا سبقت لے گیا ، انہوں نے اس پر اونی چادر ڈالی ہوئی تھی اور میں نے ان صاحب کو دیکھا کہ ان کے جسم پر اونی اور نشان والا کپڑا تھا ۔
یہ روایت امام طبرانی نے نقل کی ہے اور اس کے رجال ثقہ ہیں ۔