مجمع الزوائد ومنبع الفوائد

صالح بن بشیر بن فدیک بیان کرتے ہیں سیدنا فدیک رضی اللہ عنہ نبی اکرم صلی اللہ علیہ وسلم کی خدمت میں حاضر ہوئے انہوں نے عرض کی : یا رسول اللہ ! لوگ یہ کہتے ہیں : جو شخص ہجرت نہیں کرتا وہ ہلاکت کا شکار ہو گیا ۔ نبی اکرم صلی اللہ علیہ وسلم نے فرمایا : ” تم نماز قائم کرو زکوۃ ادا کرو برائی سے لاتعلق رہو اور اپنی قوم کے علاقے میں رہائش پذیر رہو جہاں تم چاہو “ ۔
یہ روایت امام طبرانی نے معجم اوسط میں نقل کی ہے اور معجم کبیر میں اختصار کے ساتھ نقل کی ہے ۔ اس کے رجال ثقہ ہیں البتہ صالح بن بشیر نے اسے ” مرسل “ روایت کے طور پر نقل کیا ہے انہوں نے یہ نہیں کہا: کہ یہ سیدنا فدیک رضی اللہ عنہ سے منقول ہے ۔

سیدنا زبیر بن عوام رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” ساری زمین اللہ کی زمین ہے اور سارے بندے اللہ کے بندے ہیں ، تم میں سے جو شخص جہاں بھلائی پائے وہ اللہ تعالیٰ سے ڈرتے ہوئے وہاں مقیم ہو جائے “ ۔
یہ روایت امام طبرانی نے نقل کی ہے ۔ اس کی سند میں ایسا راوی ہے جس سے میں واقف نہیں ہوں ۔