مجمع الزوائد ومنبع الفوائد

عمرو بن عبدالرحمن بن جرہد بیان کرتے ہیں : میں نے ایک شخص کو سیدنا جابر بن عبداللہ رضی اللہ عنہ سے یہ کہتے ہوئے سنا آپ کے ہمراہ اللہ کے رسول کے اصحاب میں سے کتنے لوگ باقی رہ گئے ہیں ؟ انہوں نے جواب دیا : سیدنا انس بن مالک رضی اللہ عنہ اور سیدنا سلمہ بن اکوع رضی اللہ عنہ اس شخص نے کہا: جہاں تک سیدنا سلمہ رضی اللہ عنہ کا تعلق ہے ، تو وہ ہجرت کرنے کے بعد واپس چلے گئے تو سیدنا جابر رضی اللہ عنہ نے فرمایا : تم یہ بات نہ کہو کیونکہ میں نے نبی اکرم صلی اللہ علیہ وسلم کو اسلم قبیلے کے افراد کو یہ کہتے ہوئے سنا ہے : اے اسلم قبیلے کے لوگو ! کیا تم بدوی زندگی اختیار کرو گے انہوں نے عرض کی : یا رسول اللہ ! ہمیں یہ اندیشہ ہے کہ اگر ہم نے ہجرت کر لی تو اس کے بعد واپس نہ چلے جائیں نبی اکرم صلی اللہ علیہ وسلم نے فرمایا : تم ( یعنی عمرو بن عبدالرحمن ) جہاں کہیں بھی ہوں گے تم مہاجر شمار ہو گے “ ۔
یہ روایت امام أحمد نے نقل کی ہے عمر نامی راوی سے میں واقف نہیں ہوں اس روایت کے بقیہ رجال صحیح کے رجال ہیں ۔

ایاس بن سلمہ بن اکوع بیان کرتے ہیں : ان کے والد نے انہیں یہ بات بتائی ہے کہ سیدنا سلمہ رضی اللہ عنہ مدینہ منورہ آئے ان کی ملاقات سیدنا بریدہ بن حصیب رضی اللہ عنہ سے ہوئی تو سیدنا بریدہ رضی اللہ عنہ نے کہا: اے سلمہ کیا تم ہجرت کرنے کے بعد واپس چلے گئے ہو ؟ تو انہوں نے کہا: اس بات سے اللہ کی پناہ ہے مجھے نبی اکرم صلی اللہ علیہ وسلم کی طرف سے اجازت ملی ہوئی ہے میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اے اسلم قبیلے کے لوگو ! کیا تم لوگ بدوی زندگی اختیار کر لو گے کہ جہاں پر تم ہواؤں میں رہو اور گھاٹیوں میں رہائش اختیار کرو انہوں نے عرض کی : یا رسول اللہ ! ہمیں اس بات کا اندیشہ ہے کہ ہماری ہجرت کے حوالے سے ہمیں یہ چیز نقصان پہنچائے گی نبی اکرم صلی اللہ علیہ وسلم نے فرمایا : تم جہاں کہیں بھی ہو گے تم مہاجر ہو گے “ ۔ ( علامہ ہیثمی فرماتے ہیں : ) میں یہ کہتا ہوں ۔ سیدنا سلمہ رضی اللہ عنہ سے منقول حدیث ” صحیح “ میں اس سیاق کے بغیر مذکور ہے ۔
یہ روایت امام أحمد اور امام طبرانی نے نقل کی ہے ۔ اس کی سند میں ایک راوی سعید بن ایاس بن سلمہ ہے اور میں اس سے واقف نہیں ہوں اس روایت کے بقیہ رجال ثقہ ہیں ۔

سیدنا سلمہ بن اکوع رضی اللہ عنہ بیان کرتے ہیں : میں نبی اکرم صلی اللہ علیہ وسلم کی خدمت میں حاضر ہوا آپ نے ارشاد فرمایا : ” تم ہمارے دیہاتی ہو اور ہم تمہارے شہری ہیں “ ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔

مسلم بن جرہد بیان کرتے ہیں : سیدنا عبداللہ بن عمر رضی اللہ عنہ بیمار ہو گئے ایک صاحب نے کہا: اے ابوعبدالرحمن ! خالی جگہیں گھاس پھوس والی ہو گئی ہیں ، اگر آپ بکریاں خرید لیں ، اور آبادی سے باہر چلے جائیں ، تو آپ ٹھیک ہو جائیں گے انہوں نے فرمایا : اسلم قبیلے کے افراد کے علاوہ ، ہم میں سے اور کسی کو ، بدوی زندگی اختیار کرنے کی اجازت نہیں دی گئی ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی ابومریم عبدالغفار بن قاسم ہے اور وہ متروک ہے ۔

سیدنا شداد رضی اللہ عنہ کے بارے میں یہ بات منقول ہے وہ نبی اکرم صلی اللہ علیہ وسلم کی خدمت میں حاضر ہوئے انہوں نے ہجرت کی بیعت کر لی پھر وہ بیمار ہو گئے ۔ نبی اکرم صلی اللہ علیہ وسلم نے فرمایا : اے شداد تمہیں کیا ہوا ہے ؟ راوی کہتے ہیں : میں نے عرض کی : یا رسول اللہ ! میں بیمار ہو گیا ہوں اگر میں بطحان کا پانی پی لوں گا ، تو ٹھیک ہو جاؤں گا ۔ نبی اکرم صلی اللہ علیہ وسلم نے فرمایا : تو تم ایسا کرتے کیوں نہیں ہو ؟ میں نے عرض کی : اپنی ہجرت کی وجہ سے نبی اکرم صلی اللہ علیہ وسلم نے فرمایا : تم جاؤ ! تم جہاں بھی ہو گے تم مہاجر شمار ہو گے ۔
یہ روایت امام طبرانی نے نقل کی ہے اس کی سند میں راویوں کی ایک جماعت ایسی ہے جن سے میں واقف نہیں ہوں ۔

عبدالله بن سعد بن اطول بیان کرتے ہیں : سیدنا عبدالله رضی اللہ عنہ ” تستر “ میں اپنے ساتھیوں کے پاس تشریف لے جاتے تھے ۔ وہ ان سے ملنے کے لئے جاتے تھے ، تو جس دن وہ آتے تھے اس دن مقیم رہتے تھے اگلے دن مقیم رہتے تھے اور تیسرے دن نکل آتے تھے لوگ ان سے کہتے تھے : اگر آپ اور مقیم رہتے تو یہ مناسب تھا ، تو وہ یہ بیان کرتے تھے میں نے اپنے والد کو یہ بیان کرتے ہوئے سنا ہے نبی اکرم صلی اللہ علیہ وسلم نے مجھے اس بات سے منع کیا ہے ، آپ نے آبادی سے باہر رہائش اختیار کرنے سے منع کیا ہے کہ جو شخص خراج والے علاقے میں مقیم ہو گا ، وہ آبادی سے باہر رہائش اختیار کرنے والا ہو گا ، تو مجھے یہاں مقیم رہنا ناپسند ہے ۔
یہ روایت امام ابویعلیٰ نے اور امام طبرانی نے نقل کی ہے ۔ اس کی سند میں راویوں کی ایک جماعت ایسی ہے جن سے میں واقف نہیں ہوں ۔

سیدنا براء رضی اللہ عنہ روایت کرتے ہیں نبی اکرم صلی اللہ علیہ وسلم نے ارشاد فرمایا : ” جو شخص بدوی زندگی اختیار کرتا ہے اس میں سختی آ جاتی ہے “ ۔
یہ روایت امام ابویعلیٰ نے نقل کی ہے اور اس کے رجال ثقہ ہیں ۔

سیدنا جابر بن سمرہ رضی اللہ عنہ روایت کرتے ہیں نبی اکرم صلی اللہ علیہ وسلم نے ارشاد فرمایا : ” اللہ تعالیٰ اس شخص پر لعنت کرے جو ہجرت کے بعد بدوی زندگی اختیار کر لیتا ہے اللہ تعالیٰ اس شخص پر لعنت کرے جو ہجرت کے بعد بدوی زندگی اختیار کر لیتا ہے اللہ تعالیٰ اس شخص پر لعنت کرے جو ہجرت کے بعد بدوی زندگی اختیار کر لیتا ہے البتہ فتنہ کا معاملہ مختلف ہے ، کیونکہ فتنے کی جگہ ٹھہرے رہنے کے مقابلے میں بدوی زندگی اختیار کر لینا زیادہ بہتر ہے ۔
یہ روایت امام طبرانی نے نقل کی ہے اور اس کی سند میں ایسے راوی ہیں جن سے میں واقف نہیں ہوں ۔