مجمع الزوائد ومنبع الفوائد

سیدنا عبداللہ بن عمر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص حکمران کے پاس موجود ہو ، وہ بھلائی کی بات کرے ، ورنہ خاموش رہے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی صالح بن محمد بن زیاد ہے ، جسے امام أحمد اور ابن عدی نے ثقہ قرار دیا ہے اور ایک جماعت نے اسے ضعیف کہا: ہے ، اس روایت کے بقیہ رجال ” صحیح “ کے رجال ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اے ابوہریرہ ! تمام امراء کے پاس ہرگز نہ جانا ، اگر تم مجبور ہو جاؤ ، تو میری سنت سے تجاوز نہ کرنا ، اور حکمران کی تلوار ، یا اُس کا کوڑا ، اُس سے یوں خوفزدہ نہ ہونا کہ تم انہیں اللہ کا تقویٰ اختیار کرنے کا حکم نہ دو “ ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی عبدالرحمن بن زید بن اسلم ہے اور وہ ضعیف ہے اس سے پہلے باب گزر چکا ہے ، جس میں اس کے علاوہ احادیث موجود ہیں ۔