مجمع الزوائد ومنبع الفوائد

ربعی بن خراش بیان کرتے ہیں : میں سیدنا حذیفہ رضی اللہ عنہ کے پاس مدائن آیا یہ ان دنوں کی بات ہے ، جب لوگ سیدنا عثمان رضی اللہ عنہ کے خلاف احتجاج کر رہے تھے ۔ سیدنا سلمان رضی اللہ عنہ نے فرمایا : اے ربعی تمہاری قوم کا کیا معاملہ ہے ؟ میں نے کہا: آپ کس چیز کے بارے میں دریافت کر رہے ہیں ؟ انہوں نے فرمایا : ان میں سے جو لوگ نکل کر ان صاحب کی طرف گئے ہیں ربعی کہتے ہیں : میں نے کچھ ایسے افراد کا نام لیا جو نکل کر ان کی طرف گئے ہیں ، تو سیدنا سلمان رضی اللہ عنہ نے بتایا میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص جماعت سے علیحدگی اختیار کرتا ہے ، اور امیر کو ذلیل کرنے کی کوشش کرتا ہے وہ اللہ تعالیٰ کی بارگاہ میں ایسی حالت میں حاضر ہو گا کہ اللہ تعالیٰ کے سامنے اس کا کوئی چہرہ نہیں ہو گا ( یا اسے کوئی اجر نہیں ملے گا ) “ ۔
یہ روایت امام أحمد نے نقل کی ہے ۔ اور اس کے رجال ثقہ ہیں ۔

سیدہ اسماء بنت یزید رضی اللہ عنہا بیان کرتی ہیں : سیدنا ابوذر غفاری رضی اللہ عنہ نبی اکرم صلی اللہ علیہ وسلم کی خدمت کیا کرتے تھے جب وہ نبی اکرم صلی اللہ علیہ وسلم کی خدمت کر کے فارغ ہوتے تھے ، تو مسجد میں آ جاتے تھے اور وہاں لیٹ جاتے تھے مسجد ہی ان کا گھر تھا ایک مرتبہ نبی اکرم صلی اللہ علیہ وسلم رات کے وقت مسجد میں تشریف لائے ، تو انہوں نے سیدنا ابوذر غفاری رضی اللہ عنہ کو مسجد میں سوئے ہوئے پایا ۔ نبی اکرم صلی اللہ علیہ وسلم نے اپنے پاؤں کے ذریعے انہیں ٹہوکہ دیا تو وہ سیدھے ہو کر بیٹھ گئے نبی اکرم صلی اللہ علیہ وسلم نے فرمایا : کیا میں تمہیں سویا ہوا نہیں پا رہا ہوں انہوں نے عرض کی : یا رسول اللہ ! میں کہاں سوؤں ؟ کیا میرا اس کے علاوہ کوئی اور گھر ہے ؟ نبی اکرم صلی اللہ علیہ وسلم ان کے پاس بیٹھ گئے نبی اکرم صلی اللہ علیہ وسلم نے ان سے فرمایا : اس وقت تمہارا کیا عالم ہو گا ، جب لوگ تمہیں یہاں سے نکال دیں گے ۔ انہوں نے عرض کی : ایسی صورت میں ، میں شام چلا جاؤں گا کیونکہ شام ہجرت کی سرزمین ہے ، اور محشر کی سرزمین ہے ، اور انبیاء کی سرزمین ہے وہاں کے افراد میں سے ایک ہو جاؤں گا ۔ نبی اکرم صلی اللہ علیہ وسلم نے ان سے فرمایا : اس وقت تمہارا کیا بنے گا کہ جب وہ لوگ تمہیں شام سے بھی نکال دیں گے ۔ انہوں نے عرض کی : اس صورت میں ، میں واپس آ جاؤں گا یہی میرا گھر اور ٹھکانہ ہو گا ۔ نبی اکرم صلی اللہ علیہ وسلم نے فرمایا : اس وقت تمہارا کیا بنے گا ، جب وہ یہاں سے تمہیں دوبارہ نکال دیں گے ۔ انہوں نے عرض کی : ایسی صورت میں ، میں تلوار پکڑوں گا ، اور جنگ کرنا شروع کر دوں گا یہاں تک کہ مر جاؤں گا ، تو نبی اکرم صلی اللہ علیہ وسلم نے انہیں مسکرا کے دیکھا اور ان کے ہاتھ کو تھپتھپایا ، اور فرمایا : کیا میں اس سے زیادہ بہتر چیز کی طرف تمہاری رہنمائی نہ کروں ؟ انہوں نے عرض کی : جی ہاں میرے ماں باپ آپ پر قربان ہوں یا رسول اللہ ! نبی اکرم صلی اللہ علیہ وسلم نے ان سے فرمایا : وہ تمہیں جس طرف بھیجیں گے تم ادھر چلے جانا وہ تمہیں جس طرف ہانک کر لے جائیں گے تم ادھر چلے جانا یہاں تک کہ تم مجھ سے آ ملو اور تم اسی حالت میں ہو “ ۔
یہ روایت امام أحمد نے نقل کی ہے ۔ اس کی سند میں ایک راوی شہر بن حوشب ہے ، اور وہ ضعیف ہے ویسے اس کی ، توثیق کی گئی ہے ۔

سیدنا ابوذر غفاری رضی اللہ عنہ بیان کرتے ہیں : نبی اکرم صلی اللہ علیہ وسلم نے یہ آیت تلاوت کی : ” جو شخص اللہ تعالیٰ سے ڈرے گا اللہ تعالیٰ اس کے لئے راستہ بنا دے گا ، اور اسے وہاں سے رزق عطا کرے گا ، جو اس کے گمان میں بھی نہیں ہو گا ، اور جو شخص اللہ تعالیٰ پر توکل کرے گا ، تو اللہ تعالیٰ اس کے لئے کافی ہے “ ۔ ( سیدنا ابوذر غفاری رضی اللہ عنہ بیان کرتے ہیں : ) نبی اکرم صلی اللہ علیہ وسلم نے یہ آیت میرے سامنے دہرائی یہاں تک کہ مجھے اونگھ آ گئی پھر آپ نے ارشاد فرمایا : اے ابوذر اس وقت تم کیا کرو گے ، جب تمہیں مدینہ منورہ سے نکال دیا جائے گا میں نے عرض کی : میں گنجائش اور سہولت کی طرف جاؤں گا میں چلا جاؤں گا ، اور حرم کے کبوتروں میں سے ایک کبوتر بن جاؤں گا ( یعنی مکہ میں رہائش اختیار کر لوں گا ) نبی اکرم صلی اللہ علیہ وسلم نے ارشاد فرمایا : اس وقت تم کیا کرو گے ، جب تمہیں مکہ سے نکال دیا جائے گا میں نے عرض کی : میں گنجائش اور سہولت کی طرف شام اور ارض مقدس کی طرف چلا جاؤں گا ۔ نبی اکرم صلی اللہ علیہ وسلم نے ارشاد فرمایا : اس وقت تم کیا کرو گے ، جب تمہیں وہاں سے نکال دیا جائے گا ۔ سیدنا ابوذر غفاری رضی اللہ عنہ نے عرض کی : اس صورت میں اس ذات کی قسم ! جس نے آپ کو حق کے ہمراہ مبعوث کیا ہے میں اپنی تلوار اپنی گردن پر رکھ لوں گا ۔ نبی اکرم صلی اللہ علیہ وسلم نے ان سے فرمایا : ” اس سے زیادہ بہتر یہ ہے کہ تم بات سنو اور اطاعت کرو خواہ ( حکم دینے والا حکمران ) کوئی حبشی غلام ہو “ ۔ ( علامہ ہیثمی فرماتے ہیں : ) میں یہ کہتا ہوں صحیح میں اس روایت کا آخری حصہ منقول ہے ، اور ابن ماجہ میں اس کا ابتدائی حصہ منقول ہے ۔
یہ روایت امام طبرانی نے نقل کی ہے ۔ اور اس کے رجال صحیح کے رجال ہیں ، البتہ ابوسلیل ضریب بن نفیر نے سیدنا ابوذر غفاری رضی اللہ عنہ کا زمانہ نہیں پایا ہے ۔

سیدنا عامر بن ربیعہ رضی اللہ عنہ روایت کرتے ہیں ۔ نبی اکرم صلی اللہ علیہ وسلم نے ارشاد فرمایا : ” جو شخص ایسی حالت میں مرے کہ اس پر کسی کی اطاعت نہ ہو تو وہ زمانہ جاہلیت کی موت مرے گا ، اور اگر وہ اس ( اطاعت ) کو اپنی گردن میں باندھ لینے کے بعد اسے اتار دے ، تو جب وہ اللہ تعالیٰ کی بارگاہ میں حاضر ہو گا تو اس کی کوئی حجت نہیں ہو گی خبردار کوئی شخص کسی ( اجنبی ) عورت کے ساتھ تنہائی میں نہ ہو کیونکہ ان کے ساتھ تیسرا شیطان ہو گا البتہ اگر عورت کا ) کوئی محرم ہو تو حکم مختلف ہے شیطان ایک کے ساتھ ہوتا ہے ، اور دو سے زیادہ دور ہوتا ہے جس شخص کو اپنی برائی بری لگے ، اور اچھائی اچھی لگے وہ مومن ہے “ ۔
یہ روایت امام أحمد نے امام ابویعلیٰ نے اور امام بزار نے نقل کی ہے ۔ یہ امام طبرانی نے بھی نقل کی ہے ۔ ان کی ایک روایت میں یہ الفاظ ہیں : ” اس کے اس اطاعت کو اپنی گردن باندھ لینے کے بعد ۔ ۔ ۔ ۔ ۔ ۔ ۔ ۔ “ اس روایت کی سند میں ایک راوی عاصم بن عبیداللہ ہے ، اور وہ ضعیف ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” ایک نماز اپنے سے پہلے کی نماز کے درمیان کی چیزوں کا کفارہ بن جاتی ہے البتہ تین امور کا معاملہ مختلف ہے راوی کہتے ہیں : ہمیں اندازہ ہو گیا کہ کوئی نیا حکم سامنے آیا ہے ( نبی اکرم صلی اللہ علیہ وسلم نے ارشاد فرمایا : ) ” اس چیز کا معاملہ مختلف ہے کہ کسی کو اللہ کا شریک ٹھہرایا جائے یا سودے کو ختم کر دیا جائے یا سنت کو ترک کر دیا جائے نبی اکرم صلی اللہ علیہ وسلم نے فرمایا : ( یا راوی نے کہا: ) جہاں تک سودے کو ختم کرنے کا تعلق ہے ، تو وہ یہ ہے کہ تم کسی شخص کی بیعت کرو اور پھر تلوار لے کر اس سے جنگ کرنے چل پڑو اور سنت کو ترک کرنے سے مراد یہ ہے کہ جماعت سے نکل جانا “ ۔ ( علامہ ہیثمی فرماتے ہیں : ) میں یہ کہتا ہوں صحیح میں اس کا کچھ حصہ منقول ہے ۔
یہ روایت امام أحمد نے نقل کی ہے ۔ اس کی سند میں ایک راوی ایسا ہے جس کا نام بیان نہیں کیا گیا ہے ۔

سیدنا عقبہ بن عامر رضی اللہ عنہ روایت کرتے ہیں نبی اکرم صلی اللہ علیہ وسلم نے ارشاد فرمایا : ” کیا میں تمہیں تمہارے بہترین حکمرانوں اور بدترین حکمرانوں کے بارے میں نہ بتاؤں ؟ لوگوں نے عرض کی : جی ہاں یا رسول اللہ ! نبی اکرم صلی اللہ علیہ وسلم نے فرمایا : ان میں سے بہتر وہ ہوں گے جو تمہارے لئے زیادہ بہتر ہوں گے جن سے تم محبت رکھو اور وہ تم سے محبت رکھیں تم ان کے لئے اللہ تعالیٰ سے دعا کرو اور وہ تمہارے لئے اللہ تعالیٰ سے دعا کریں اور ان میں سے برے وہ ہوں گے جو تمہارے لئے زیادہ برے ہوں جن سے تم بغض رکھو اور وہ تم سے بغض رکھیں تم ان کے لئے اللہ تعالیٰ سے دعائے ضرر کرو اور وہ تمہارے خلاف اللہ تعالیٰ سے دعا کریں “ ۔ لوگوں نے عرض کی : یا رسول اللہ ! کیا ہم ان کے ساتھ جنگ نہ کریں ؟ نبی اکرم صلی اللہ علیہ وسلم نے فرمایا : جی نہیں ۔ جب تک وہ روزے رکھتے ہیں اور نماز پڑھتے ہیں تم انہیں ایسے ہی رہنے دو “ ۔
یہ روایت امام طبرانی نے معجم کبیر میں نقل کی ہے ۔ اور معجم اوسط میں اس کی مانند نقل کی ہے ۔ اس کی سند میں ایک راوی بکر بن یونس ہے ، جسے أحمد عجلی نے ثقہ قرار دیا ہے امام بخاری رحمہ اللہ اور ابوزرعہ نے اسے ضعیف کہا: ہے اس روایت کے بقیہ رجال صحیح کے رجال ہیں ۔

زید بن وہب بیان کرتے ہیں : سیدنا حذیفہ رضی اللہ عنہ کے زمانے میں لوگوں نے اس وقت کے گورنر کی کسی چیز کا انکار کیا ایک شخص شہر کی بڑی مسجد میں لوگوں کو پھلانگتا ہوا آیا اور سیدنا حذیفہ رضی اللہ عنہ تک پہنچ گیا جو اس وقت ایک حلقے میں تشریف فرما تھے وہ ان کے سرہانے کھڑا ہوا اور بولا: اے اللہ کے رسول کے صحابی کیا آپ نیکی کا حکم نہیں دیں گے اور برائی سے منع نہیں کریں گے ؟ سیدنا حذیفہ رضی اللہ عنہ نے اپنا سر اٹھایا انہیں اس کی مراد کا اندازہ ہو گیا ۔ سیدنا حذیفہ رضی اللہ عنہ نے اس سے فرمایا : نیکی کا حکم دینا اور برائی سے منع کرنا اچھا کام ہے ، لیکن یہ سنت نہیں ہے کہ تم اپنے امیر کے خلاف ہتھیار اٹھا لو ۔
یہ روایت امام بزار نے نقل کی ہے ۔ اس کی سند میں ایک راوی حبیب بن خالد ہے ، جسے ابن حبان نے ثقہ قرار دیا ہے ۔ ابوحاتم کہتے ہیں : یہ قوی نہیں ہے ۔

سیدنا جبلہ رضی اللہ عنہ روایت کرتے ہیں ۔ نبی اکرم صلی اللہ علیہ وسلم نے ارشاد فرمایا : ” جو شخص جماعت سے بالشت بھر الگ ہو گا وہ اسلام سے الگ ہو جائے گا“ ۔
یہ روایت امام بزار نے نقل کی ہے ۔ اس کی سند میں ایک راوی محمد بن عبیداللہ عرزمی ہے ، اور وہ ضعیف ہے ۔

سیدنا عبداللہ بن عباس رضی اللہ عنہما روایت کرتے ہیں ۔ نبی اکرم صلی اللہ علیہ وسلم نے ارشاد فرمایا : ” جو شخص جماعت سے بالشت بھر الگ ہو جائے ( یہاں ایک لفظ کے بارے میں راوی کو شک ہے ) تو وہ اپنی گردن سے اسلام کا پٹہ اتار دیتا ہے ، اور جو شخص ایسی حالت میں مرے کہ اس پر کوئی امام نہ ہو تو اس کی موت جاہلیت کی موت ہوتی ہے ، اور جو شخص کسی عصبیت کے جھنڈے کے تحت مرے کہ وہ عصبیت کی طرف بلاتا ہو یا عصبیت کی مدد کرتا ہو تو اس کا قتل جاہلیت کا قتل ہو گا “ ۔
یہ روایت امام بزار نے اور امام طبرانی نے معجم اوسط میں نقل کی ہے ۔ اس کی سند میں ایک راوی خلید بن دعلج ہے ، اور وہ ضعیف ہے ۔

سیدنا عبداللہ بن عمر رضی اللہ عنہما بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا : ” جو شخص بیعت کرے اور پھر اسے توڑ دے ، تو جب وہ اللہ تعالیٰ کی بارگاہ میں حاضر ہو گا ، تو اس کے ساتھ اس کا دایاں ہاتھ نہیں ہو گا“ ۔
( علامہ ہیثمی فرماتے ہیں : ) میں یہ کہتا ہوں ان صحابی کے حوالے سے اس کے علاوہ ایک اور حدیث بھی ( اس بارے میں ) منقول ہے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی موسیٰ بن سعد ہے ، اور وہ مجہول ہے ۔

سیدنا معاویہ بن ابوسفیان رضی اللہ عنہ روایت کرتے ہیں ۔ نبی اکرم صلی اللہ علیہ وسلم نے ارشاد فرمایا : ” جو شخص مر جائے ، اور اس پر کوئی امام نہ ہو تو وہ جاہلیت کی موت مرے گا “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عباس بن حسن قنطری ہے ، اور میں اس سے واقف نہیں ہوں اس کے بقیہ رجال صحیح کے رجال ہیں ۔

اشتر بیان کرتے ہیں : سیدنا عمر بن خطاب رضی اللہ عنہ نے یہ بات ذکر کی کہ نبی اکرم صلی اللہ علیہ وسلم نے ان لوگوں سے فرمایا : ” بے شک اللہ تعالیٰ کا دست رحمت ، جماعت کے ساتھ ہوتا ہے اور علیحدہ شخص شیطان کے ساتھ ہوتا ہے اور حق کی بنیاد جنت میں ہے ، اور باطل کی بنیاد جہنم میں ہے “ ۔
( علامہ ہیثمی فرماتے ہیں : ) اس کے بعد انہوں نے پوری حدیث ذکر کی ہے ۔
یہ روایت امام طبرانی نے معجم اوسط میں نقل کی ہے ۔ اور اس کی سند میں راویوں کی ایک جماعت ایسی ہے جن سے میں واقف نہیں ہوں ۔

سیدنا عبداللہ بن عمر رضی اللہ عنہما روایت کرتے ہیں ۔ نبی اکرم صلی اللہ علیہ وسلم نے ارشاد فرمایا : ” میری وجہ سے میرے اصحاب کا دھیان رکھنا پھر ان کے بعد والے لوگ ہیں پھر ان کے بعد والے لوگ ہیں پھر جھوٹ ظاہر ہو گا پھر کسی شخص سے گواہی نہیں مانگی گئی ہو گی لیکن وہ پھر بھی گواہی دے گا ، اور کسی شخص سے حلف نہیں مانگا گیا ہو گا ، لیکن وہ پھر بھی حلف اٹھا لے گا وہ جھوٹ کے بیان کے عوض میں اپنے آپ کو خرچ کرے گا ، جو شخص جنت کے درمیان میں رہنا چاہتا ہو وہ جماعت کے ساتھ رہے ، کیونکہ اللہ تعالیٰ کا دست رحمت جماعت پر ہے ، اور شیطان ایک شخص کے ساتھ ہوتا ہے ، اور وہ دو سے زیادہ دور ہوتا ہے ، اور کوئی مرد کسی ( اجنبی ) عورت کے ساتھ تنہائی میں نہ ہو کیونکہ ان دونوں کے ساتھ تیسرا شیطان ہو گا ، اور جس شخص کو اپنی برائی بری لگے ، اور اچھائی اچھی لگے وہ مومن ہے “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عبداللہ بن خالد مصیصی ہے ، اور وہ متروک ہے اس سے پہلے والے باب میں اس نوعیت کی احادیث گزر چکی ہیں ۔