مجمع الزوائد ومنبع الفوائد

سیدنا عبادہ بن صامت رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص اللہ تعالیٰ کی عبادت کرے کسی کو اس کا شریک نہ ٹھہرائے نماز قائم کرے زکوۃ ادا کرے اطاعت و فرمانبرداری سے کام لے ، تو اللہ تعالیٰ اسے جنت کے جس بھی دروازے سے وہ چاہے گا اسے داخل کر دے گا ، اور جنت کے آٹھ دروازے ہیں اور جو شخص اللہ تعالیٰ کی عبادت کرے اور کسی کو اس کا شریک نہ ٹھہرائے نماز قائم کرے زکوۃ ادا کرے لیکن نافرمانی کرے ، تو اللہ تعالیٰ کو اس کے بارے میں اختیار ہو گا ، اگر وہ چاہے گا ، تو اس پر رحم کر دے گا ، اور اگر چاہے گا ، تو اسے عذاب دے گا “ ۔
یہ روایت امام أحمد اور امام طبرانی نے نقل کی ہے ۔ امام أحمد کے رجال ثقہ ہیں ۔

ایک صاحب بیان کرتے ہیں : ہم سیدنا ابوذر غفاری رضی اللہ عنہ کے لئے کچھ سامان لاد کر گئے ہمارا یہ ارادہ تھا کہ یہ انہیں دیں گے ، جب ہم ربذہ آئے ، اور ان کے بارے میں دریافت کیا : ، تو وہ ہمیں نہیں ملے اور ہمیں یہ بتایا گیا کہ وہ حج کے لئے تشریف لے گئے ہیں ہم شہر آ گئے یعنی منی آ گئے ، ایک مرتبہ ہم ان کے پاس موجود تھے انہیں بتایا گیا : سیدنا عثمان رضی اللہ عنہ نے چار رکعت ادا کر لیں ہیں ، تو انہوں نے شدید ناگواری کا اظہار کیا اور اس بارے میں انہوں نے سخت کلمات کہے ، اور یہ بات بیان کی میں نے نبی اکرم صلی اللہ علیہ وسلم کی اقتداء میں نماز ادا کی ہے ۔ نبی اکرم صلی اللہ علیہ وسلم نے دو رکعت ادا کی تھیں اور میں نے سیدنا ابوبکر رضی اللہ عنہ اور سیدنا عمر رضی اللہ عنہ کی اقتداء میں نماز ادا کی ہے ( انہوں نے بھی دو رکعت ہی ادا کی تھیں ) پھر سیدنا ابوذر غفاری رضی اللہ عنہ کھڑے ہوئے ، اور انہوں نے چار رکعت ادا کر لیں ان سے کہا: گیا آپ نے پہلے امیرالمؤمنین پر اس حوالے سے اعتراض کیا تھا ، اور پھر خود وہی کام کر لیا ہے ، تو انہوں نے فرمایا : ( حاکم وقت سے ) اختلاف کرنا زیادہ شدت والا کام ہے ۔ نبی اکرم صلی اللہ علیہ وسلم نے ہمیں خطبہ دیتے ہوئے ارشاد فرمایا : ” میرے بعد حکمران ہوں گے ، تم انہیں ذلت کا شکار نہ کرنا جو شخص انہیں ذلت کا شکار کرنے کا ارادہ کرے گا وہ اپنی گردن سے اسلام کا پٹہ اتار دے گا ایسے شخص کی ، توبہ قبول نہیں ہو گی جب تک وہ اپنے بنائے ہوئے شگاف کو پر نہیں کرتا اور وہ ایسا نہیں کر سکے گا اور پھر وہ شخص واپس آئے ، اور ان لوگوں میں شامل ہو جائے جو اس حکمران کا ساتھ دیتے ہیں “ نبی اکرم صلی اللہ علیہ وسلم نے ہمیں یہ حکم دیا تھا کہ ہم تین چیزوں کے حوالے سے مغلوب نہ ہوں ہم نیکی کا حکم دیں ہم برائی سے منع کریں اور لوگوں کو سنتوں کی تعلیم دیں “ ۔
یہ روایت امام أحمد نے نقل کی ہے ۔ اس کی سند میں ایک راوی ایسا ہے جس کا نام بیان نہیں کیا گیا اس روایت کے بقیہ رجال ثقہ ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص جماعت میں رہتے ہوئے اللہ تعالیٰ کے لئے عمل کرتا ہے ، اور وہ درست کام کرتا ہے ، تو اللہ تعالیٰ اس کا عمل قبول کرے گا ، اور اگر اس نے غلطی کی ہو گی ، تو اس کی مغفرت کر دے گا ، اور جو شخص ( مسلمانوں میں ) علیحدگی پیدا کرنے کے لئے کوئی کام کرتا ہے اگرچہ وہ کام ٹھیک ہو پھر بھی اللہ تعالیٰ اسے قبول نہیں کرے گا ، اور اگر اس نے غلطی کی ہو گی ، تو اسے جہنم میں اپنے مخصوص ٹھکانے تک پہنچنے کے لئے تیار رہنا چاہیے “ ۔
یہ روایت امام طبرانی نے نقل کی ہے ۔ اس کی سند میں ایک راوی محمد بن خلید حنفی ہے ، اور وہ ضعیف ہے
یہ روایت امام بزار نے ضعیف سند کے ساتھ نقل کی ہے ۔

سیدنا معاویہ رضی اللہ عنہ نے نبی اکرم صلی اللہ علیہ وسلم کا یہ فرمان نقل کیا ہے : ” سننے والا اور اطاعت کرنے والا ، اس کے خلاف کوئی حجت نہیں ہو گی اور سننے والا اور نافرمانی کرنے والا اس کے حق میں کوئی حجت نہیں ہو گی “ ۔
یہ روایت امام طبرانی نے اور امام أحمد نے ایک طویل حدیث کے ضمن میں نقل کی ہے ۔ عبداللہ کہتے ہیں : میرے والد نے اس اضافے پر لکیر لگا دی تھی مجھے نہیں معلوم کہ انہوں نے میرے سامنے اس کو پڑھا تھا یا نہیں پڑھا تھا ان دونوں روایات کے رجال صحیح کے رجال ہیں ، البتہ جبلہ بن عطیہ کا معاملہ مختلف ہے ، اور وہ ثقہ ہے ۔

ابوسلام ممطور ایک صحابی کا یہ بیان نقل کرتے ہیں میرا خیال ہے وہ سیدنا ابومالک اشعری رضی اللہ عنہ ہیں وہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” میں تمہیں پانچ چیزوں کا حکم دیتا ہوں میں تمہیں اطاعت و فرمانبرداری کرنے جماعت کے ساتھ رہنے ہجرت کرنے اللہ کی راہ میں جہاد کرنے کا حکم دیتا ہوں جو شخص جماعت سے ایک بالشت نکل جائے گا وہ اپنے سر سے اسلام کا پٹہ الگ کر دے گا ، اور جو شخص زمانہ جاہلیت کی طرح پکارے گا ، تو وہ جہنم میں جائے گا لوگوں نے عرض کی : یا رسول اللہ ! اگرچہ وہ روزہ رکھتا ہو اور نماز پڑھتا ہو ؟ نبی اکرم صلی اللہ علیہ وسلم نے فرمایا : اگرچہ وہ روزہ رکھتا ہو اور نماز پڑھتا ہو لیکن تم اپنے آپ کو اس نام سے پکارو جو اللہ تعالیٰ نے تمہارا نام رکھا ہے اس نے تمہیں اللہ کے بندوں ، مسلمانوں اور مؤمنوں کا نام دیا ہے “ ۔
یہ روایت امام أحمد نے نقل کی ہے ۔ اور اس کے رجال ثقہ ہیں اور صبح کے رجال ہیں صرف علی بن اسحاق سلمی کا معاملہ مختلف ہے ، اور وہ ثقہ ہے
یہ روایت امام طبرانی نے اختصار کے ساتھ نقل کی ہے ۔ تاہم انہوں نے یہ الفاظ نقل کیے ہیں : ” جو شخص جماعت سے ایک کمان جتنا الگ ہو گا اس کی کوئی نماز یا روزہ قبول نہیں ہو گا ، اور یہی لوگ جہنم کا ایندھن ہوں گے “ ۔

سیدنا عمر بن مالک رضی اللہ عنہ روایت کرتے ہیں ۔ نبی اکرم صلی اللہ علیہ وسلم نے ارشاد فرمایا : ” میں تمہیں تین چیزوں کا حکم دیتا ہوں ، اور میں تمہیں تین چیزوں سے منع کرتا ہوں میں تمہیں یہ حکم دیتا ہوں کہ تم کسی کو اللہ کا شریک قرار نہ دو اور تم سب اطاعت کو مضبوطی سے تھام لو ! یہاں تک کہ تمہارے پاس اللہ کا حکم آ جائے ، اور تم اسی حالت میں ہو اور تم حکمرانوں کی خیرخواہی کرو ان لوگوں کی جو تمہیں اللہ کے حکم کے مطابق حکم دیتے ہیں اور میں تمہیں قیل و قال کرنے بکثرت ( غیر ضروری ) سوالات کرنے اور مال ضائع کرنے سے منع کرتا ہوں “ ۔
یہ روایت امام طبرانی نے اپنے استاد بکر بن سہل دمیاطی سے نقل کی ہے ۔ امام ذہبی کہتے ہیں : یہ مقارب الحال ہے امام نسائی رحمہ اللہ نے اسے ضعیف قرار دیا ہے اس روایت کے بقیہ رجال کی نقل کردہ حدیث حسن ہے ۔

ایک صاحب بیان کرتے ہیں : میں نبی اکرم صلی اللہ علیہ وسلم کی خدمت میں حاضر ہوا آپ یہ فرما رہے تھے : ” اے لوگو ! تم پر جماعت کے ساتھ رہنا لازم ہے ، اور تم پر علیحدگی سے بچنا لازم ہے “ ۔ یہ بات آپ صلی اللہ علیہ وسلم نے تین مرتبہ ارشاد فرمائی ۔
یہ روایت امام أحمد نے نقل کی ہے ۔ اس کی سند میں یہ بات مذکور ہے زکریا بن سلام نے اپنے والد کے حوالے سے اسے نقل کیا ہے میں ان دونوں سے واقف نہیں ہوں ۔

سیدنا نعمان بن بشیر رضی اللہ عنہ بیان کرتے ہیں : نبی اکرم صلی اللہ علیہ وسلم نے ان لکڑیوں پر ( راوی کو شک ہے شاید یہ الفاظ ہیں : ) اس منبر پر یہ بات ارشاد فرمائی : ” جو شخص تھوڑے کا شکر ادا نہیں کرتا وہ زیادہ کا شکر بھی ادا نہیں کرتا جو شخص لوگوں کا شکریہ ادا نہیں کرتا وہ اللہ تعالیٰ کا شکر بھی ادا نہیں کرتا اللہ تعالیٰ کی نعمتوں کے بارے میں بات چیت کرنا شکر ہے ، اور اس ( نعمت کے اظہار و اعتراف ) کو ترک کرنا کفر ہے ، اور جماعت رحمت ہے ، اور فرقہ بندی عذاب ہے “ ۔ راوی کہتے ہیں : تو سیدنا ابوامامہ باہلی رضی اللہ عنہ نے فرمایا : تم لوگوں پر سواد اعظم کے ساتھ رہنا لازم ہے ایک صاحب نے دریافت کیا : سواد اعظم سے مراد کیا ہے ؟ تو سیدنا ابوامامہ رضی اللہ عنہ نے بلند آواز میں یہ آیت تلاوت کی جو سورہ نور میں ہے : ” اگر وہ لوگ منہ موڑ لیتے ہیں ، تو اس ( رسول ) کے ذمہ وہ ہے جو اس پر لازم کیا گیا اور تمہارے ذمہ وہ ہے جو تم پر لازم کیا گیا ہے “ ۔
یہ روایت عبداللہ بن أحمد نے اور امام بزار نے اور امام طبرانی نے نقل کی ہے ۔ اور ان دونوں کے رجال ثقہ ہیں ۔

سیدنا ابوسعید خدری رضی اللہ عنہ روایت کرتے ہیں ۔ نبی اکرم صلی اللہ علیہ وسلم نے ارشاد فرمایا : ” عنقریب تم پر ایسے حکمران آئیں گے جن سے تمہارے دل مطمئن ہوں گے اور تمہاری کھالیں ان کے لئے نرم ہوں گی پھر ایسے حکمران آئیں گے کہ جن سے تمہارے دل غیر مطمئن ہوں گے اور تمہاری کھالیں ان سے لرزاں ہوں گی ایک صاحب نے عرض کی : یا رسول اللہ ! کیا ہم ان کے ساتھ جنگ کریں ؟ نبی اکرم صلی اللہ علیہ وسلم نے فرمایا : جی نہیں ! جب تک وہ نماز قائم کرتے ہیں ( تم ان کے ساتھ جنگ نہ کرو ) “ ۔
یہ روایت امام أحمد نے اور امام ابویعلیٰ نے نقل کی ہے ۔ اس کی سند میں ایک راوی ابوولید ہے جو عبداللہ بہی کا شاگرد ہے میں اس سے واقف نہیں ہوں اس روایت کے بقیہ رجال ثقہ ہیں ۔

سیدنا ابوذر غفاری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” دو ، ایک سے بہتر ہوتے ہیں اور تین ، دو سے بہتر ہوتے ہیں اور چار ، تین سے بہتر ہوتے ہیں ، تو تم پر جماعت کے ساتھ رہنا لازم ہے ، کیونکہ اللہ تعالیٰ میری امت کو صرف ہدایت پر ہی اکٹھا رکھے گا “ ۔
یہ روایت امام أحمد نے نقل کی ہے ۔ اس کی سند میں ایک راوی بختری بن عبید ہے ، اور وہ ضعیف ہے ۔

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کے حوالے سے یہ بات نقل کرتے ہیں : ( آپ صلی اللہ علیہ وسلم نے ارشاد فرمایا : ) ” میری امت گمراہی پر اکٹھی نہیں ہو گی تم پر جماعت کے ساتھ رہنا لازم ہے بے شک اللہ تعالیٰ کا دست رحمت جماعت پر ہے “ ۔
یہ روایت امام طبرانی نے دو اسناد کے ساتھ نقل کی ہے ۔ ان دو میں سے ایک کے رجال ثقہ ہیں اور صحیح کے رجال ہیں صرف مرزوق کا معاملہ مختلف ہے جو آل طلحہ کا غلام ہے ، اور وہ ثقہ ہے ۔

سیدنا اسامہ بن شریک رضی اللہ عنہ روایت کرتے ہیں ۔ نبی اکرم صلی اللہ علیہ وسلم نے ارشاد فرمایا : ” اللہ تعالیٰ کا دست رحمت جماعت پر ہوتا ہے ، اور جب ان میں سے کوئی الگ ہونے والا الگ ہوتا ہے ، تو شیطان اسے اچک لیتا ہے جیسے بھیڑیا ، ریوڑ سے الگ ہونے والی بکری کو اچک لیتا ہے “ ۔
یہ روایت امام طبرانی نے نقل کی ہے ۔ اس کی سند میں ایک راوی عبدالاعلیٰ بن ابومساور ہے ، اور وہ ضعیف ہے ۔

سیدنا معاویہ رضی اللہ عنہ روایت کرتے ہیں ۔ نبی اکرم صلی اللہ علیہ وسلم نے ارشاد فرمایا : ” جو شخص امام کے بغیر مر جائے ( یعنی ایسی حالت میں مرے کہ وہ کسی امام کا پیروکار نہ ہو ) تو وہ زمانہ جاہلیت کی موت مرے گا “ ۔

ایک روایت میں یہ الفاظ ہیں : ” جو شخص ایسی حالت میں مرے کہ اس کی گردن میں بیعت نہ ہو ، تو وہ زمانہ جاہلیت کی موت مرے گا “ ۔
یہ روایت امام طبرانی نے نقل کی ہے ۔ اور ان دونوں کی سند ضعیف ہے ۔

ابواسحاق بیان کرتے ہیں : میں نے سیدنا حجر بن عدی رضی اللہ عنہ کو دیکھا کہ جب سیدنا معاویہ رضی اللہ عنہ نے انہیں پکڑا تو وہ یہ کہہ رہے تھے : یہ میری بیعت ہے نہ ، تو میں اسے واپس کر رہا ہوں اور نہ ہی میں اس کی واپسی کا مطالبہ کر رہا ہوں ، اور یہ بات اللہ تعالیٰ بھی سن رہا ہے ، اور لوگ بھی سن رہے ہیں ۔
یہ روایت امام طبرانی نے نقل کی ہے ۔ اور اس کے رجال ثقہ ہیں ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” عنقریب میرے بعد کچھ لوگ تمہارے حکمران بنیں گے نیک شخص اپنی نیکی کے ہمراہ اور گناہ گار شخص اپنے گناہ کے ہمراہ تمہارا نگران بنے گا ، تو تم لوگ ان کی اطاعت و فرمانبرداری کرنا ہر اس چیز کے بارے میں ، جو حق کے مطابق ہو اور ان کے پیچھے نماز ادا کرنا اگر وہ اچھائی کریں گے ، تو تمہیں اس کا بدلہ ملے گا ، اور انہیں بھی اس کا اجر ملے گا ، اور اگر وہ برائی کریں گے ، تو تمہیں اجر مل جائے گا ، اور ان پر و بال ہو گا“ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عبداللہ بن محمد بن یحیی بن عروہ ہے ، اور وہ انتہائی ضعیف ہے ۔

یسیر بن عمرو بیان کرتے ہیں : جب سیدنا عثمان رضی اللہ عنہ کو شہید کر دیا گیا تو سیدنا ابومسعود رضی اللہ عنہ اپنے گھر میں بیٹھ گئے میں ان کی خدمت میں حاضر ہوا میں نے ان سے لوگوں کی صورتحال کے بارے میں دریافت کیا : ، تو انہوں نے فرمایا : تم پر جماعت کے ساتھ رہنا لازم ہے ، کیونکہ اللہ تعالیٰ سیدنا محمد صلی اللہ علیہ وسلم کی امت کو گمراہی پر جمع نہیں کرے گا تم صبر سے کام لو یہاں تک کہ نیک شخص راحت حاصل کرے یا برے شخص سے راحت حاصل ہو جائے ۔

ایک روایت میں یسیر کے حوالے سے یہ بات منقول ہے وہ بیان کرتے ہیں : جب سیدنا علی رضی اللہ عنہ کو شہید کر دیا گیا تو میری ملاقات سیدنا ابومسعود رضی اللہ عنہ سے ہوئی میں ان کے پیچھے آیا میں نے ان سے دریافت کیا : میں نے کہا: میں آپ کو اللہ کا واسطہ دے کر یہ دریافت کرتا ہوں کہ فتنوں کے بارے میں آپ نے نبی اکرم صلی اللہ علیہ وسلم سے کیا سنا ہے ؟ تو انہوں نے فرمایا : ہم کوئی چیز نہیں چھپائیں گے تم پر اللہ تعالیٰ کا تقویٰ اختیار کرنا اور جماعت کے ساتھ رہنا لازم ہے ، اور تم پر فرقہ بندی سے بچ کے رہنا لازم ہے ، کیونکہ یہ گمراہی ہے اللہ تعالیٰ سیدنا محمد صلی اللہ علیہ وسلم کی امت کو گمراہی پر جمع نہیں کرے گا ۔ یہ تمام روایات امام طبرانی نے نقل کی ہیں اور اس دوسرے طریق کے رجال ثقہ ہیں ۔

سیدنا معاذ بن جبل رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” شیطان آدمی کے لئے بھیڑیے کی مانند ہے جس طرح بکریوں کے لیے بھیٹریا ہوتا ہے کہ وہ الگ ہونے والی اور کونے پر موجود بکری کو پکڑ لیتا ہے ، اور تم پر گھاٹیوں میں رہنا لازم ہے ، اور تم پر مختلف گروہوں میں تقسیم ہونے سے بچنا لازم ہے ، اور تم پر جماعت کے ساتھ رہنا عام افراد کے ساتھ رہنا اور مسجد میں آنا لازم ہے “ ۔
یہ روایت امام أحمد اور امام طبرانی نے نقل کی ہے ۔ امام أحمد کے رجال ثقہ ہیں ، البتہ علاء بن زیاد کے بارے میں یہ کہا: گیا ہے کہ اس نے سیدنا معاذ رضی اللہ عنہ سے سماع نہیں کیا ہے ۔

سیدنا معاذ بن جبل رضی اللہ عنہ روایت کرتے ہیں ۔ نبی اکرم صلی اللہ علیہ وسلم نے ارشاد فرمایا : ” بے شک جنت کسی گناہ گار کے لئے حلال نہیں ہے ، اور جو شخص اللہ تعالیٰ کی بارگاہ میں ایسی حالت میں حاضر ہو کہ اس نے اپنی بیعت ، توڑ دی ہو تو وہ اللہ تعالیٰ کی بارگاہ میں ایسی حالت میں حاضر ہو گا کہ وہ جذام زدہ ہو گا ، اور جو شخص بالشت بھر جماعت سے نکلے گا ، جب کہ وہ جان بوجھ کر ایسا کرنے والا ہو تو وہ اپنی گردن سے اسلام کا پٹہ الگ کر دے گا ، اور جو شخص ایسی حالت میں مرے کہ وہ کسی امام کا پیروکار نہ ہو جو ( امام ) جماعت ( یعنی مسلمانوں کی جماعت ) کا حکمران ہو تو ایسا شخص زمانہ جاہلیت کی موت مرے گا “ ۔
یہ روایت امام طبرانی نے نقل کی ہے ۔ اس کی سند میں ایک راوی عمرو بن واقد ہے ، اور وہ متروک ہے ۔

سیدنا ابودرداء رضی اللہ عنہ بیان کرتے ہیں : نبی اکرم صلی اللہ علیہ وسلم ہمارے درمیان کھڑے ہوئے آپ نے ارشاد فرمایا : ” خبردار جنت کسی گناہ گار کے لئے حلال نہیں ہے ، اور جو شخص ایسی حالت میں اللہ تعالیٰ کی بارگاہ میں حاضر ہو کہ اس نے اپنی بیعت کو توڑ دیا ہو تو جب قیامت کے دن وہ اللہ کی بارگاہ میں حاضر ہو گا ، تو وہ جذام زدہ ہو گا ، اور جو شخص بالشت بھر اطاعت سے نکلے گا ، تو وہ اپنی گردن سے اسلام کے پٹے کو اتار دے گا ، اور جو شخص ایسی حالت میں صبح کرے کہ اس پر ( مسلمانوں کی ) جماعت کے امیر کی فرمانبرداری نہ ہو تو جب قیامت کے دن اللہ تعالیٰ اسے اٹھائے گا ، تو اسے ایسی حالت میں اٹھائے گا کہ جیسے وہ زمانہ جاہلیت کی موت مرا تھا ، اور قیامت کے دن اس کا عہد شکنی کا جھنڈا اس کی پشت پر ہو گا “ ۔
یہ روایت امام طبرانی نے نقل کی ہے ۔ اس کی سند میں ایک راوی عمر بن رویبہ ہے ، اور وہ متروک ہے ۔

بشر بن حرب بیان کرتے ہیں : سیدنا عبداللہ بن عمر رضی اللہ عنہما سیدنا ابوسعید خدری رضی اللہ عنہ کے پاس آئے ، اور بولے : اے ابوسعید ! مجھے یہ بات بتائی گئی ہے کہ آپ نے لوگوں کے کسی ایک امیر پر اکٹھا ہونے سے پہلے ہی دو امیروں کی بیعت کر لی ہے ۔ انہوں نے فرمایا : جی ہاں ! میں نے پہلے ابن زبیر کی بیعت کی تھی پھر اہل شام آئے ، اور مجھے ہانک کر حبیش بن دلجہ کے پاس لے گئے ، تو میں نے اس کی بھی بیعت کر لی ، تو سیدنا عبداللہ بن عمر رضی اللہ عنہما نے فرمایا : مجھے اسی بات کا اندیشہ تھا مجھے اسی بات کا اندیشہ تھا دوسری مرتبہ میں حماد نے بلند آواز کر کے یہ بات نقل کی سیدنا ابوسعید رضی اللہ عنہ نے فرمایا : اے ابوعبدالرحمن کیا آپ نے نبی اکرم صلی اللہ علیہ وسلم کو یہ ارشاد فرماتے ہوئے نہیں سنا ہے : ” جو شخص یہ استطاعت رکھتا ہو کہ وہ دن کے وقت نہ سوئے ، اور ایسی حالت میں صبح نہ کرے یا شام نہ کرے مگر یہ کہ کوئی اس پر امیر ہونا چاہیے “ ۔ سیدنا عبداللہ بن عمر رضی اللہ عنہما نے جواب دیا : جی ہاں ! لیکن میں اس بات کو ناپسند کرتا ہوں کہ کسی ایک امیر پر لوگوں کے اکٹھا ہونے سے پہلے میں دو امیروں کی بیعت کر لوں ۔
یہ روایت امام أحمد نے نقل کی ہے ۔ بشر بن حرب نامی راوی ضعیف ہے ۔

سیدنا مقدام بن معدیکرب رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اپنے امراء کی اطاعت کرو خواہ وہ جو بھی ہیں اگر وہ تمہیں کسی ایسی چیز کے بارے میں حکم دیں جو میں تمہارے پاس لے کے آیا ہوں تو انہیں اس کا اجر ملے گا ، اور تمہیں ان کی فرمانبرداری کا اجر ملے گا ، اور اگر وہ تمہیں کسی ایسی چیز کے بارے میں حکم دیں ، جو میں تمہارے پاس نہیں لے کے آیا تو اس کا وبال ان لوگوں پر ہو گا اور تم لوگ لاتعلق ہو گے ۔ اس کی وجہ یہ ہے کہ جب تم اللہ تعالیٰ کی بارگاہ میں حاضر ہو گے ، تو تم لوگ یہ کہو گے اے ہمارے پروردگار کوئی ظلم نہیں ہو گا وہ کہیں گے کوئی ظلم نہیں ہو گا ، تو تم کہو گے اے ہمارے پروردگار ! تو نے ہماری طرف رسول بھیجے ، تو ہم نے تیرے اذن کے تحت ان کی اطاعت کی پھر تو نے ہم پر ان کے جانشین مقرر کیے ہم نے تیرے اذن کے تحت ان کی اطاعت کی پھر تو نے ہم پر امراء مقرر کیے ہم نے تیرے اذن کے تحت ان کی اطاعت کی ، تو پروردگار فرمائے گا : تم لوگوں نے سچ کہا: ہے اس کا وبال ان لوگوں پر ہو گا اور تم لوگ لاتعلق ہو “ ۔
یہ روایت امام طبرانی نے نقل کی ہے ۔ اس کی سند میں ایک راوی اسحاق بن ابراہیم بن زبریق ہے ، جسے ابوحاتم نے ثقہ قرار دیا ہے ، اور امام نسائی رحمہ اللہ نے اسے ضعیف قرار دیا ہے اس روایت کے بقیہ رجال ثقہ ہیں ۔

سیدنا مقدام بن معدیکرب رضی اللہ عنہ اور سیدنا ابوامامہ باہلی رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا اس نے عرض کی : یا رسول اللہ ! اگر یہ معاملہ ( یعنی حکومت ) آپ کی قوم میں رہے گی ، تو آپ ہمارے بارے میں انہیں تلقین کر دیں نبی اکرم صلی اللہ علیہ وسلم نے فرمایا : میں اپنی امت کے بارے میں تم لوگوں کو اللہ سے ڈرنے کی تلقین کرتا ہوں تم میرے بعد میری امت کے خلاف سرکشی نہ کرنا پھر آپ نے لوگوں سے ارشاد فرمایا عنقریب میرے بعد کچھ ایسے حکمران آئیں گے کہ تم ان کی اطاعت انہیں ادا کرنا کیونکہ امیر کی مثال ڈھال کی طرح ہوتی ہے جس کے ذریعے بچا جاتا ہے اگر وہ بھلائی کے ساتھ تمہارے معاملات ٹھیک رکھیں گے ، تو تمہیں بھی اجر ملے گا ، اور انہیں بھی اجر ملے گا ، اور اگر وہ اس چیز کے بارے میں برائی کریں گے جس کا انہوں نے تمہیں حکم دیا ہے ، تو اس کا وبال ان لوگوں پر ہو گا ، اور تم لوگ بری الذمہ ہو گے “ ۔ اس کے بعد راوی نے پوری حدیث ذکر کی ہے ۔
یہ روایت امام طبرانی نے نقل کی ہے ۔ اس کی سند میں ایک راوی محمد بن اسماعیل بن عیاش ہے ، اور وہ ضعیف ہے ۔

سیدنا یزید بن سلمہ جعفی رضی اللہ عنہ کے بارے میں یہ بات منقول ہے ۔ انہوں نے عرض کی : یا رسول اللہ ! اس بارے میں آپ کی کیا رائے ہے کہ اگر آپ کے بعد ہم پر ایسے حکمران مسلط ہوتے ہیں جو ہم سے وہ حق وصول کر لیتے ہیں جو ہمارے ذمہ ہے ، اور ہمیں وہ حق نہیں دیتے ہیں جو اللہ تعالیٰ نے ہمارا حصہ مقرر کیا ہے ، تو کیا ہم ان حکمرانوں کے ساتھ جنگ کریں اور ان کی نافرمانی کریں ؟ نبی اکرم صلی اللہ علیہ وسلم نے فرمایا : انہوں نے جو کیا ہو گا ۔ اس کا وبال ان پر ہو گا ، اور تم نے جو کیا ہو گا اس کا ذمہ تم پر ہو گا “ ۔
یہ روایت امام طبرانی نے نقل کی ہے ۔ اس کی سند میں ایک راوی عبید بن عبیدہ ہے ، اور میں اس سے واقف نہیں ہوں اس روایت کے بقیہ رجال ثقہ ہیں ۔

سیدنا ابولیلیٰ اشعری رضی اللہ عنہ جو نبی اکرم صلی اللہ علیہ وسلم کے صحابی ہیں وہ نبی اکرم صلی اللہ علیہ وسلم کے حوالے سے یہ بات نقل کرتے ہیں آپ نے ارشاد فرمایا : ” اپنے حکمرانوں کی اطاعت کو مضبوطی سے تھام کے رکھو ان کی مخالفت نہ کرو کیونکہ ان کی فرمانبرداری اللہ تعالیٰ کی فرمانبرداری ہے ، اور ان کی نافرمانی اللہ تعالیٰ کی نافرمانی ہے بے شک اللہ تعالیٰ نے مجھے مبعوث کیا ہے تاکہ میں حکمت اور اچھے وعظ کے ذریعے اس کے راستے کی طرف دعوت دوں جو شخص میرے بعد میرا جانشین ہو گا وہ میرا ولی ہو گا ، اور جو شخص تمہارے کسی معاملے کا نگران بنے گا ، اور اس کے علاوہ عمل کرے گا ، تو اس پر اللہ تعالیٰ فرشتوں اور انسانوں سب کی لعنت ہو گی اور عنقریب ایسے حکمران آئیں گے کہ اگر ان سے رحم مانگا جائے گا ، تو وہ رحم نہیں کریں گے اگر ان سے حق مانگا جائے گا ، تو وہ نہیں دیں گے اگر انہیں نیکی کا حکم دیا جائے گا ، تو وہ انکار کریں گے اور عنقریب تم ان سے ڈرو گے اور تمہارا اجتماعی شیرازہ منتشر ہو جائے گا یہاں تک کہ وہ جب تمہیں کسی بات کا پابند کریں گے ، تو تمہیں چاہتے ہوئے یا نہ چاہتے ہوئے ویسا کرنا پڑے گا ، اور زیادہ مناسب یہ ہے ، کہ تم ان سے تنخواہ نہ وصول کرو اور نہ ہی ان کی محفل میں حاضر ہو ۔
یہ روایت امام طبرانی نے نقل کی ہے ۔ اس کی سند میں راویوں کی ایک جماعت ایسی ہے جن سے میں واقف نہیں ہوں ۔

سیدنا عبداللہ بن عمر رضی اللہ عنہما بیان کرتے ہیں : میں نے نبی اکرم صلی اللہ علیہ وسلم کو دیکھا آپ اپنے دست مبارک کے ذریعے اس طرح اشارہ کر کے یہ بات ارشاد فرما رہے تھے : ” جو شخص مسلمانوں کی جماعت سے بالشت بھر الگ ہو گا وہ اپنی گردن سے اسلام کا پٹہ اتار دے گا ، اور جو لوگ اپنے جھنڈوں کی بنیاد پر مخالفت کرنے والے ہوں گے وہ قیامت کے دن اپنے ان جھنڈوں کو اپنی پشت پر رکھیں گے “ اس کے بعد راوی نے پوری حدیث ذکر کی ہے جس کا بعض حصہ صحیح میں مذکور ہے ۔
یہ روایت امام طبرانی نے نقل کی ہے ۔ اس کی سند میں ایک راوی حسین بن قیس ہے ، اور وہ ضعیف ہے ۔

سیدنا سعد بن جنادہ رضی اللہ عنہ روایت کرتے ہیں ۔ نبی اکرم صلی اللہ علیہ وسلم نے ارشاد فرمایا : ” جو شخص جماعت سے علیحدگی اختیار کرے گا وہ چہرے کے بل جہنم میں جائے گا اللہ تعالیٰ ارشاد فرماتا ہے : ” پریشان حال شخص کی دعا کون سنتا ہے ، جب وہ اسے پکارتا ہے ، اور اس سے تکلیف کو دور کرتا ہے اس نے تمہیں زمین میں خلیفہ بنایا ہے “ ۔ تو خلافت اللہ تعالیٰ کی طرف سے ہے اگر وہ بہتر ہو گا ، تو اسے لے جائے گا ، اور اگر وہ برا ہو گا ، تو اس کے حوالے سے اس کی گرفت ہو گی تم پر اطاعت کرنا لازم ہے اس چیز کے بارے میں ، جس چیز کے بارے میں اللہ تعالیٰ نے تمہیں حکم دیا ہے ۔
یہ روایت امام طبرانی نے نقل کی ہے ۔ اس کی سند میں راویوں کی ایک جماعت ایسی ہے جن سے میں واقف نہیں ہوں ۔

سیدنا فضالہ بن عبید رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تین قسم کے لوگ ہیں جن سے سوال نہیں کیا جائے گا ایک وہ شخص جو جماعت سے الگ ہو جائے ، اور حکمران کی نافرمانی کرے اور نافرمان ہونے کے عالم میں مر جائے ایک وہ غلام یا کنیز جو اپنے آقا کو چھوڑ کر بھاگ جائے ، اور ایک وہ عورت جس کا شوہر موجود نہ ہو اور اس کے شوہر نے اسے تمام ضروریات کی چیزیں فراہم کی ہوئی ہوں ، اور اس کے بعد وہ اپنی زینت کو ظاہر کر دے ، تو ان سے سوال نہیں کیا جائے گا “ ۔
یہ روایت امام طبرانی نے نقل کی ہے ۔ اور اس کے رجال ثقہ ہیں ۔

سیدنا زبرقان بن بدر رضی اللہ عنہ بیان کرتے ہیں : وہ نبی اکرم صلی اللہ علیہ وسلم کی خدمت میں حاضر ہوئے انہوں نے کچھ چیزوں کے بارے میں ذکر کیا سیدنا زبرقان رضی اللہ عنہ نے عرض کی : یا رسول اللہ ! ہم گواہی دیں نبی اکرم صلی اللہ علیہ وسلم نے فرمایا : جی نہیں اسے زبرقان تم اللہ اور اس کے رسول کی بات سنو اور اس کی اطاعت کرو انہوں نے عرض کی : اللہ اور اس کے رسول کی اطاعت و فرمانبرداری کی جاتی ہے ۔
( علامہ ہیثمی فرماتے ہیں : ) میں نے اصل مسموع میں اس کو اسی طرح پایا ہے
یہ روایت امام طبرانی نے نقل کی ہے ۔

سیدنا عمرو بکالی رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جب تم پر ایسے حکمران آئیں جو تمہیں نماز جہاد اور زکوۃ کا حکم دیں ، تو تم پر انہیں برا کہنا حرام ہے ، اور ان کے پیچھے نماز ادا کرنا تمہارے لئے حلال ہے “ ۔
یہ روایت امام طبرانی نے نقل کی ہے ۔

ان کی نقل کردہ ایک روایت میں یہ الفاظ ہیں : ابوتمیمہ بیان کرتے ہیں : میں شام آیا میں فریضہ تلاش کر رہا تھا وہاں ایک صاحب موجود تھے جن کے گرد لوگ چکر لگا رہے تھے میں نے دریافت کیا : یہ کون صاحب ہیں ؟ لوگوں نے بتایا یہ سیدنا عمرو بکالی رضی اللہ عنہ ہیں جن کا ہاتھ جنگ یرموک میں ضائع ہو گیا تھا یہ اس موقع کی بات ہے کہ جب رومیوں کو شام سے جلاوطن کر دیا گیا تھا ۔ راوی کہتے ہیں : میں نے ان کو یہ بیان کرتے ہوئے سنا نبی اکرم صلی اللہ علیہ وسلم نے ارشاد فرمایا ہے : اس کے بعد راوی نے حسب سابق روایت ذکر کی ہے ۔ اس روایت کی سند میں ایک راوی مجاعہ بن زبیر عتکی ہے ، جسے امام أحمد نے ثقہ قرار دیا ہے ، اور دیگر حضرات نے اسے ضعیف کہا ہے اس روایت کے بقیہ رجال ثقہ ہیں ۔

سیدنا عدی بن حاتم رضی اللہ عنہ بیان کرتے ہیں : ہم نے عرض کی : یا رسول اللہ ! کیا ہم آپ سے اس شخص کی اطاعت کے بارے میں نہ پوچھیں جو پرہیزگاری اختیار کرتا ہے ، اور اصلاح کرتا ہے ، لیکن جو شخص ایسا ایسا کرے انہوں نے شر کا ذکر کیا ( تو اس کے بارے میں کیا کرنا ہے ؟ ) نبی اکرم صلی اللہ علیہ وسلم نے ارشاد فرمایا : ” تم اللہ تعالیٰ سے ڈرو اور اطاعت و فرمانبرداری سے کام لو “ ۔
یہ روایت امام طبرانی نے نقل کی ہے ۔ اس کی سند میں ایک راوی عثمان بن قیس ہے ، اور وہ ضعیف ہے ۔

سیدنا عرفجہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا : ” اللہ تعالیٰ کا دست رحمت جماعت کے ساتھ ہوتا ہے ، اور شیطان اس شخص کے ساتھ ہوتا ہے جو ان سے علیحدگی اختیار کرتا ہے ، اور وہ ٹھونگا مارتا ہے “ ۔
یہ روایت امام طبرانی نے نقل کی ہے ۔ اور اس کے رجال ثقہ ہیں ۔

زربن حبیش بیان کرتے ہیں : جب لوگوں نے ولید بن عقبہ بن ابومعیط کے طرز عمل کو منکر قرار دیا ، تو لوگ گھبرا کر سیدنا عبداللہ بن مسعود رضی اللہ عنہ کے پاس آئے ، تو سیدنا عبداللہ بن مسعود رضی اللہ عنہ نے فرمایا : تم لوگ صبر سے کام لو کیونکہ تمہارے حکمران کا پچاس سال تک ظلم کرنا اس سے زیادہ بہتر ہے کہ ایک ماہ کی قتل و غارت گری ہو اس کی وجہ یہ ہے کہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” لوگوں کے لئے کسی امیر کا ہونا ضروری ہے خواہ وہ نیک ہو یا گناہگار ہو اگر وہ نیک ہو اور تقسیم کرتے ہوئے عدل سے کام لے اور تمہارا مال فئے تمہارے درمیان برابری کے طور پر تقسیم کرے ، تو ٹھیک ہے ، اور اگر وہ گناہگار ہو تو پھر اس کی حکومت میں مومن شخص کو آزمائش کا شکار کیا جائے گا ، اور بری حکمرانی ، حرج سے بہتر ہے عرض کی گئی : یا رسول اللہ ! حرج سے مراد کیا ہے ؟ آپ نے فرمایا : قتل و غارت گری اور جھوٹ“ ۔
یہ روایت امام طبرانی نے نقل کی ہے ۔ اس کی سند میں ایک راوی وہب اللہ بن رزق ہے ، اور میں اس سے واقف نہیں ہوں اس روایت کے بقیہ رجال ثقہ ہیں ۔

سیدنا عبداللہ بن عمر رضی اللہ عنہما کے بارے میں یہ بات منقول ہے کہ ایک مرتبہ وہ کچھ اصحاب کے درمیان موجود تھے اسی دوران نبی اکرم صلی اللہ علیہ وسلم ان لوگوں کے پاس تشریف لائے آپ نے فرمایا : کیا تم لوگ یہ بات نہیں جانتے ہو کہ میں تمہاری طرف اللہ کا رسول ہوں ؟ ہم نے عرض کی : جی ہاں آپ اللہ کے رسول ہیں ۔ نبی اکرم صلی اللہ علیہ وسلم نے فرمایا : کیا تم لوگ یہ بات نہیں جانتے ہو کہ جو شخص میری اطاعت کرتا ہے وہ اللہ تعالیٰ کی اطاعت کرتا ہے ، کیونکہ اللہ تعالیٰ کی اطاعت میں میری اطاعت کرنا بھی شامل ہے ؟ لوگوں نے عرض کی : جی ہاں ہم اس بات کی گواہی دیتے ہیں کہ جو شخص اللہ تعالیٰ کی اطاعت کرتا ہے وہ آپ کی بھی اطاعت کرے گا ، اور اللہ تعالیٰ کی اطاعت میں آپ کی اطاعت بھی شامل ہے ۔ نبی اکرم صلی اللہ علیہ وسلم نے فرمایا : اللہ تعالیٰ کی اطاعت میں یہ بات بھی شامل ہے کہ تم میری اطاعت کرو اور میری اطاعت میں یہ بات بھی شامل ہے کہ تم اپنے امراء کی اطاعت کرو ، تم لوگ اپنے امراء کی اطاعت کرو اگر وہ بیٹھ کر نماز ادا کریں ، تو تم لوگ بھی بیٹھ کر نماز ادا کرو “ ۔
یہ روایت امام ابویعلیٰ نے نقل کی ہے ۔ امام أحمد نے اس کی مانند روایت اختصار کے ساتھ نقل کی ہے ۔ تا ہم انہوں نے لفظ ” امراء “ کی جگہ لفظ ” آئمہ “ نقل کیا ہے ۔

سیدنا عبداللہ بن مسعود رضی اللہ عنہ کے بارے میں یہ بات منقول ہے ۔ انہوں نے فرمایا : ” اے لوگو تم پر اطاعت اختیار کرنا اور جماعت کے ساتھ رہنا لازم ہے ، کیونکہ یہ اللہ تعالیٰ کی وہ رسی ہے جس کے بارے میں اللہ تعالیٰ نے حکم دیا ہے جماعت کی صورت میں تم جس چیز کو ناپسند کرتے ہو وہ اس سے زیادہ بہتر ہو گی جو علیحدگی کی صورت میں تم پسند کرتے ہو“ ۔
یہ روایت امام طبرانی نے ایک طویل حدیث میں ذکر کی ہے جو فتنوں سے متعلق کتاب میں آگے آئے گی اگر اللہ نے چاہا اس کی سند میں ایک راوی ثابت بن قطبہ ہے میں اس سے واقف نہیں ہوں اس روایت کے بقیہ رجال ثقہ ہیں ۔

حارث بن قیس بیان کرتے ہیں : سیدنا عبداللہ بن مسعود رضی اللہ عنہ نے مجھ سے فرمایا : اے حارث بن قیس ! تمہیں یہ بات پسند نہیں ہے کہ تم جنت کے درمیان میں رہو ؟ حارث نے جواب دیا : جی ہاں ، تو سیدنا عبداللہ رضی اللہ عنہ نے فرمایا : تم لوگوں کی جماعت کے ساتھ رہو ۔
یہ روایت امام طبرانی نے نقل کی ہے ۔ اور اس کے رجال ثقہ ہیں ۔