مجمع الزوائد ومنبع الفوائد

سیدنا عبداللہ بن عمرو رضی اللہ عنہ روایت کرتے ہیں ۔ نبی اکرم صلی اللہ علیہ وسلم نے ارشاد فرمایا : ” جنت میں ایک محل ہے جس کا نام عدن ہے اس کے اردگرد برج اور صروح ہیں ، اس کے پانچ ہزار دروازے ہیں اور ہر ہر دروازے کے پاس پانچ ہزار پانچ ہزار منتخب خواتین ہونگی ، اس محل میں صرف کوئی نبی یا صدیق یا شہید یا عادل حکمران داخل ہوں گے ، اور رہائش اختیار کریں گے “ ۔
یہ روایت امام بزار نے نقل کی ہے ۔ اس کی سند میں ایک راوی عبداللہ بن مسلم بن ہرمز ہے ، اور وہ ضعیف ہے ۔

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” سلطان زمین میں اللہ کا سایہ ہوتا ہے جس کی طرف اللہ کے بندوں میں سے ہر مظلوم شخص پناہ کے لئے آتا ہے اگر وہ ( حکمران ) عدل سے کام لے گا ، تو اسے اجر ملے گا ، اور وہ ہو گا ( راوی کہتے ہیں : یعنی رعایا پر ) شکر لازم ہو گا ، اور اگر وہ ستم کرے یا زیادتی کرے یا ظلم کرے ، تو اس کا وبال اس پر ہو گا ، اور رعایا پر صبر کرنا لازم ہو گا ، اور جب حکمرانوں کے ساتھ جنگ کی جائے ، تو آسمان سے قحط نازل ہوتا ہے ، جب زکوۃ ادا نہ کی جائے ، تو مویشی ہلاک ہو جاتے ہیں جب زنا ظاہر ہوتا ہے ، تو غربت اور مسکینی ظاہر ہوتی ہے ، اور جب ذمہ کی خلاف ورزی کی جاتی ہے ، تو کفار کو غلبہ عطا کر دیا جاتا ہے ۔ ( راوی کہتے ہیں : یا اس کی مانند کوئی اور کلمہ ہے ) “ ۔
یہ روایت امام بزار نے نقل کی ہے ۔ اس کی سند میں ایک راوی سعید بن سنان ابومہدی ہے ، اور وہ متروک ہے ۔

سیدنا معقل بن یسار رضی اللہ عنہ روایت کرتے ہیں ۔ نبی اکرم صلی اللہ علیہ وسلم نے ارشاد فرمایا : ” میرے بعد تھوڑا عرصہ گزرنے کے بعد ظلم آ جائے گا ، اور جب بھی ظلم سامنے آئے گا ، تو اتنا ہی عدل رخصت ہو جائے گا یہاں تک کہ ظلم کے زمانے میں کوئی بچہ پیدا ہو گا اسے ظلم کے علاوہ کسی اور چیز کا پتہ ہی نہیں ہو گا پھر اللہ تعالیٰ عدل لے آئے گا پھر جیسے جیسے عدل آئے گا اسی حساب سے ظلم رخصت ہوتا جائے گا یہاں تک کہ عدل کے زمانے میں کوئی بچہ پیدا ہو گا اسے اس کے علاوہ کسی چیز ( یعنی ظلم ) کا پتہ ہی نہیں ہو گا“ ۔
یہ روایت امام أحمد نے نقل کی ہے ۔ اس کی سند میں ایک راوی خالد بن طہمان ہے ، جسے ابوحاتم رازی اور ابن حبان نے ثقہ قرار دیا ہے ابن حبان کہتے ہیں : یہ غلطی کر جاتا ہے اور وہم کا شکار ہو جاتا ہے اس روایت کے بقیہ رجال ثقہ ہیں ۔

سیدنا انس بن مالک رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” یہ امت مسلسل بھلائی پر گامزن رہے گی جب تک یہ بات کرتے ہوئے سچ بولیں گے فیصلہ کرتے ہوئے عدل سے کام لیں گے اور جب ان سے رحم مانگا جائے گا ، تو رحم کریں گے “ ۔
یہ روایت امام ابویعلیٰ نے نقل کی ہے ۔ اور امام طبرانی نے معجم اوسط میں نقل کی ہے ۔ اس کی سند میں ایک راوی اسحاق بن یحیی بن طلحہ ہے ، اور وہ ضعیف ہے ۔

سیدنا انس رضی اللہ عنہ روایت کرتے ہیں ۔ نبی اکرم صلی اللہ علیہ وسلم نے ارشاد فرمایا : ” جب تم فیصلہ کرو تو عدل سے کام لو اور جب تم ( سزا دیتے ہوئے یا جنگ میں کسی کو ) قتل کرو تو اچھے طریقے سے کرو کیونکہ اللہ تعالیٰ اچھائی فرمانے والا ہے ، اور اچھائی کرنے والے کو پسند کرتا ہے “ ۔
یہ روایت امام طبرانی نے معجم اوسط میں نقل کی ہے اور اس کے رجال ثقہ ہیں ۔

سیدنا عبداللہ بن عباس رضی اللہ عنہما روایت کرتے ہیں ۔ نبی اکرم صلی اللہ علیہ وسلم نے ارشاد فرمایا : ” عادل حکمران کی طرف سے ایک دن ساٹھ سال کی عبادت سے زیادہ فضیلت رکھتا ہے ، اور زمین میں کسی حق کی بنیاد پر کسی حد کا قائم کیا جانا ( یعنی سزا کا جاری ہونا ) زمین کے لئے چالیس سال بارش ہونے سے زیادہ پاکیزہ ہے “ ۔
یہ روایت امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی سعد ابوغیلان شیبانی ہے میں اس سے واقف نہیں ہوں اس روایت کے بقیہ رجال ثقہ ہیں ۔

ابوقذم بیان کرتے ہیں : زیاد کے زمانے میں ایک تھیلی پائی گئی جس میں گٹھلیوں جتنی چیزیں تھیں اور ان پر یہ تحریر تھا : یہ اس زمانے کی پیداوار ہے کہ جس میں عدل پر عمل ہوتا تھا ۔
یہ روایت امام أحمد نے نقل کی ہے ۔ اور ابوقحذم نامی شخص ضعیف ہے ۔

سیدنا ابوسعید خدری رضی اللہ عنہ روایت کرتے ہیں ۔ نبی اکرم صلی اللہ علیہ وسلم نے ارشاد فرمایا : ” قیامت کے دن سب سے زیادہ سخت عذاب ظالم حکمران کو ہو گا “ ۔
یہ روایت امام طبرانی نے نقل کی ہے ۔ اس کی سند میں ایک راوی عطیہ ہے ، اور وہ ضعیف ہے ۔

سیدنا ابوموسیٰ اشعری رضی اللہ عنہ روایت کرتے ہیں ۔ نبی اکرم صلی اللہ علیہ وسلم نے ارشاد فرمایا : ” جہنم میں ایک وادی ہے اس وادی میں ایک کنواں ہے جس کا نام ” ہبہب “ ہے اللہ تعالیٰ کے ذمہ یہ بات لازم ہے کہ وہ ہر ظالم سرکش ( حکمران ) کو اس میں ٹھہرائے “ ۔
یہ روایت امام طبرانی نے معجم اوسط میں نقل کی ہے ۔ اور اس کی سند حسن ہے ۔

سیدنا عمر بن خطاب رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت کے دن اللہ تعالیٰ کی بارگاہ میں قدر و منزلت کے اعتبار سے سب سے زیادہ فضیلت اس حکمران کو حاصل ہو گی جو انصاف کرنے والا اور مہربان ہو اور قیامت کے دن قدر و منزلت کے اعتبار سے اللہ تعالیٰ کی بارگاہ میں اللہ کے بندوں میں سب سے برا شخص ظالم اور سرکش حکمران ہو گا“ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی ابن لہیعہ ہے اس کی نقل کردہ حدیث حسن ہے اس میں ضعف پایا جاتا ہے ۔