مجمع الزوائد ومنبع الفوائد

حمید بن عبدالرحمن بیان کرتے ہیں : جب نبی اکرم صلی اللہ علیہ وسلم کا وصال ہو گیا تو سیدنا ابوبکر رضی اللہ عنہ مدینہ منورہ کے کچھ لوگوں کے درمیان موجود تھے وہ آئے انہوں نے نبی اکرم صلی اللہ علیہ وسلم کے چہرے سے کپڑا ہٹایا نبی اکرم صلی اللہ علیہ وسلم کو بوسہ دیا اور پھر بولے : میرے ماں باپ آپ پر قربان ہوں آپ زندہ ہونے اور وصال فرمانے کے بعد کتنے پاکیزہ ہیں ! رب کعبہ کی قسم ! سیدنا محمد صلی اللہ علیہ وسلم کا انتقال ہو گیا ہے ۔ ۔ ۔ ۔ ۔ ۔ ۔ ۔ ۔ اس کے بعد راوی نے پوری حدیث ذکر کی ہے راوی بیان کرتے ہیں : سیدنا عمر رضی اللہ عنہ چلتے ہوئے گئے یہاں تک کہ انصار کے پاس آئے سیدنا ابوبکر رضی اللہ عنہ نے گفتگو شروع کی ، تو کوئی ایسی چیز ترک نہیں کی جس کے بارے میں قرآن نازل ہوا ہو یا جس کا ذکر نبی اکرم صلی اللہ علیہ وسلم نے کیا ہو جس کا تعلق ان کے معاملے سے تھا وہ ہر چیز سیدنا ابوبکر رضی اللہ عنہ نے ذکر کر دی لوگوں نے کہا: آپ یہ بات جانتے ہیں کہ نبی اکرم صلی اللہ علیہ وسلم نے ارشاد فرمایا ہے : ” اگر لوگ ایک وادی میں چلیں اور انصار دوسری وادی میں چلیں تو میں انصار کی وادی میں چلوں گا “ ۔ ( تو سیدنا ابوبکر رضی اللہ عنہ نے فرمایا : ) اے سعد ! تم یہ بات جانتے ہو جب نبی اکرم صلی اللہ علیہ وسلم نے یہ بات ارشاد فرمائی تھی ، تو تم بھی اس وقت وہاں موجود تھے ( آپ نے فرمایا تھا : ) ” قریش اس معاملے کے نگران بنیں گے لوگوں میں سے نیک لوگ ان کے نیک لوگوں کے پیروکار ہوں گے اور لوگوں میں سے برے لوگ ان کے برے لوگوں کے پیروکار ہوں گے “ ۔ راوی بیان کرتے ہیں ، تو سیدنا سعد رضی اللہ عنہ نے ان سے کہا: آپ نے سچ کہا: ہے ہم لوگ وزیر ہوں گے اور آپ لوگ امیر ہوں گے ۔
یہ روایت امام أحمد نے نقل کی ہے ۔ صحیح میں اس کا ابتدائی حصہ منقول ہے البتہ حمید بن عبدالرحمن نامی راوی نے سیدنا ابوبکر رضی اللہ عنہ کا زمانہ نہیں پایا ہے ۔

سیدنا علی بن ابوطالب رضی اللہ عنہ بیان کرتے ہیں : میرے کانوں نے یہ بات سنی ہے ، اور میرے دل نے نبی اکرم صلی اللہ علیہ وسلم کے حوالے سے اس کو محفوظ رکھا ہے ( آپ صلی اللہ علیہ وسلم نے ارشاد فرمایا ہے : ) ” لوگ قریش کے تابع ہوں گے لوگوں میں سے نیک لوگ ان کے نیک لوگوں کے اور لوگوں میں سے برے لوگ ان کے برے لوگوں کے پیروکار ہوں گے “ ۔
یہ روایت عبداللہ بن أحمد اور امام بزار نے نقل کی ہے ۔ اس کی سند میں ایک راوی محمد بن جابر یمامی ہے ، اور جمہور کے نزدیک وہ ضعیف ہے ویسے اس کی ، توثیق کی گئی ہے ۔

سیدنا علی رضی اللہ عنہ بیان کرتے ہیں : نبی اکرم صلی اللہ علیہ وسلم نے لوگوں کو خطبہ دیتے ہوئے ارشاد فرمایا : ” خبردار ! حکمران قریش میں سے ہوں گے خبردار ! حکمران قریش میں سے ہوں گے خبردار ! حکمران قریش میں سے ہوں گے ، جب تک وہ تین کام کریں گے فیصلہ دیتے ہوئے عدل سے کام لیں گے اور عہد کریں ، تو اس کو پورا کریں ، اور جب ان سے رحم مانگا جائے ، تو رحم کریں ، ان میں سے جو فرد ایسا نہیں کرے گا اس پر اللہ تعالیٰ فرشتوں اور انسانوں سب کی لعنت ہو گی “ ۔
یہ روایت امام ابویعلیٰ نے نقل کی ہے ۔ اس کی سند میں ایسے راوی ہیں ، جن سے میں واقف نہیں ہوں ۔

سیدنا علی رضی اللہ عنہ روایت کرتے ہیں ۔ نبی اکرم صلی اللہ علیہ وسلم نے ارشاد فرمایا : ” حکمران قریش میں سے ہوں گے قریش کے نیک لوگ ، لوگوں میں سے نیک لوگوں کے حکمران ہوں گے اور قریش کے برے لوگ لوگوں میں سے برے لوگوں کے حکمران ہوں گے اور ہر فرد کا حق ہوتا ہے ، تو تم ہر حق دار کو اس کا حق دو اگر تم پر ایسے حبشی غلام کو امیر بنا دیا جائے جس کے ناک کان کٹے ہوئے ہوں ، تو تم اس کی اطاعت و فرمانبرداری کرو ! جب تک وہ تم میں سے کسی ایک شخص کو اس چیز کا اختیار نہیں دیتا کہ وہ یا تو اسلام کو باقی رکھے یا پھر قتل ہو جائے ، جب وہ کسی شخص کو اسلام باقی رکھنے یا قتل ہو جانے کے درمیان اختیار دے ، تو پھر آدمی کو اپنی گردن آگے کر دینی چاہیے اس کی ماں اسے روئے ، جب اس کا دین رخصت ہو گیا تو نہ دنیا اس کے لئے فائدہ مند ہو گی نہ آخرت “ ۔
یہ روایت امام طبرانی نے معجم صغیر اور معجم اوسط میں اپنے استاد حفص بن عمر بن صباح رقی سے نقل کی ہے ۔ امام حاکم رحمہ اللہ کہتے ہیں : اس نے اس کے علاوہ ایک ایسی حدیث نقل کی ہے ۔ جس میں اس کی متابعت نہیں کی گئی ہے ۔

سیدنا عبداللہ بن مسعود رضی اللہ عنہ بیان کرتے ہیں : ایک مرتبہ ہم نبی اکرم صلی اللہ علیہ وسلم کے پاس موجود تھے ہم تقریباً اسی افراد تھے جن کا تعلق قریش سے تھا ان میں موجود ہر فرد قریشی تھا اللہ کی قسم ! میں نے اس دن ان لوگوں کے چہروں سے زیادہ خوبصورت چہرے کبھی نہیں دیکھے ان لوگوں نے خواتین کا ذکر کرتے ہوئے ان کے بارے میں بات چیت شروع کی یہاں تک کہ میں نے یہ خواہش کی کہ وہ خاموش ہو جائیں سیدنا عبداللہ کہتے ہیں : پھر میں نبی اکرم صلی اللہ علیہ وسلم کے پاس آیا آپ نے کلمہ شہادت پڑھا اور پھر ارشاد فرمایا : ” اما بعد ! اے قریش کے گروہ ! تم لوگ اس معاملے کے نگران بنو گے ، جب تک تم اللہ تعالیٰ کی نافرمانی نہیں کرتے جب تم اس کی نافرمانی کرو گے ، تو وہ تم پر ایسے لوگوں کو بھیج دے گا ، جو تمہیں اس طرح چھیل دیں گے ، جس طرح چھڑی کو چھیلا جاتا ہے “ ۔ نبی اکرم صلی اللہ علیہ وسلم نے اپنے دست مبارک میں موجود ایک چھڑی کے بارے میں یہ بات ارشاد فرمائی : پھر آپ نے اس چھڑی کو چھیلا تو وہ ملائم اور سفید ہو گئی ۔
یہ روایت امام أحمد اور امام ابویعلیٰ نے نقل کی ہے ۔ امام طبرانی نے معجم اوسط میں نقل کی ہے ۔ امام أحمد کے رجال صحیح کے رجال ہیں اور امام ابویعلیٰ کے رجال ثقہ ہیں ۔

بکیر بن وہب جزری بیان کرتے ہیں : سیدنا انس رضی اللہ عنہ نے مجھ سے فرمایا میں تمہیں ایک حدیث بیان کرنے لگا ہوں جو میں ہر ایک کو بیان نہیں کرتا ہوں نبی اکرم صلی اللہ علیہ وسلم گھر کے دروازے پر کھڑے ہوئے ہم لوگ اس گھر کے اندر موجود تھے نبی اکرم صلی اللہ علیہ وسلم نے ارشاد فرمایا : ” حکمران قریش میں سے ہوں گے میرا تم لوگوں پر حق ہے اور اُن لوگوں کا بھی تم پر اس کی مانند حق ہے ، جب تک ان سے رحم مانگا جائے ، تو وہ رحم کریں گے اور جب وہ عہد کریں ، تو وہ پورا کریں اور جب تک وہ فیصلہ کرتے ہوئے انصاف سے کام لیں گے ان میں سے جو فرد ایسا نہیں کرے گا اس پر اللہ تعالیٰ فرشتوں اور انسانوں سب کی لعنت ہو گی “ ۔
یہ روایت امام أحمد اور امام ابویعلیٰ نے اور امام طبرانی نے معجم اوسط میں نقل کی ہے ۔ جو ان دونوں سے زیادہ مکمل ہے اسے امام بزار نے بھی نقل کیا ہے تاہم اس میں یہ الفاظ ہیں : ” بادشاہی قریش میں ہو گی“ ۔ امام أحمد کے رجال ثقہ ہیں ۔

سیدنا ابوہریرہ رضی اللہ عنہ روایت کرتے ہیں ۔ نبی اکرم صلی اللہ علیہ وسلم نے ارشاد فرمایا : ” میرا قریش پر حق ہے ، اور قریش کا تم لوگوں پر حق ہے ، جب تک وہ فیصلہ کرتے ہوئے عدل سے کام لیں اور جب انہیں امین بنایا جائے ، تو وہ ادائیگی کریں اور جب ان سے رقم مانگا جائے ، تو وہ رحم کریں “ ۔
یہ روایت امام أحمد نے نقل کی ہے ۔ اور امام طبرانی نے معجم اوسط میں نقل کی ہے ۔ امام أحمد کے رجال صحیح کے رجال ہیں ۔

سیدنا ابوہریرہ رضی اللہ عنہ روایت کرتے ہیں ۔ نبی اکرم صلی اللہ علیہ وسلم نے سیدنا عباس رضی اللہ عنہ سے فرمایا : ” آپ لوگوں ( یعنی قریش ) میں نبوت اور حکمرانی ہے “ ۔
یہ روایت امام بزار نے نقل کی ہے ۔ اس کی سند میں ایک راوی محمد بن عبدالرحمن عامری ہے ، اور وہ ضعیف ہے ۔

سیار بن سلامہ ابومنہال بیان کرتے ہیں : میں اپنے والد کے ساتھ سیدنا ابوبردہ رضی اللہ عنہ کی خدمت میں حاضر ہوا میرے کان میں دو بالیاں تھیں میں لڑکا تھا انہوں نے یہ بات بیان کی کہ نبی اکرم صلی اللہ علیہ وسلم نے ارشاد فرمایا ہے ” حکمران قریش میں سے ہوں گے “ یہ بات آپ نے تین مرتبہ ارشاد فرمائی : ( اور پھر فرمایا : ) ” جب تک وہ لوگ تین کام کریں گے فیصلہ کرتے ہوئے عدل سے کام لیں گے ، جب ان سے رحم مانگا جائے ، تو رحم کریں گے اور جب عہد کریں گے ، تو اس کو پورا کریں گے ان میں سے جو شخص ایسا نہیں کرے گا اس پر اللہ تعالیٰ ، فرشتوں اور انسانوں سب کی لعنت ہو گی “ ۔
یہ روایت امام أحمد نے نقل کی ہے ۔ امام ابویعلیٰ نے اسے زیادہ مکمل روایت کے طور پر نقل کیا ہے جس میں پورا واقعہ مذکور ہے امام بزار نے بھی اسے نقل کیا ہے امام أحمد کے رجال صحیح کے رجال ہیں صرف سکین بن عبدالعزیز کا معاملہ مختلف ہے ، اور وہ ثقہ ہے ۔

سیدنا ابومسعود انصاری رضی اللہ عنہ روایت کرتے ہیں ۔ نبی اکرم صلی اللہ علیہ وسلم نے قریش سے فرمایا : ” یہ معاملہ ( یعنی حکومت ) تمہارے درمیان ہو گی اور تم اس کے نگران ہو گے یہاں تک کہ تم نئے ( منفی ) کام کرو گے ، جب تم ایسا کرو گے ، تو اللہ تعالیٰ اپنی مخلوق کے بدترین لوگ تم پر مسلط کر دے گا ، اور وہ لوگ تمہیں یوں چھیل دیں گے جس طرح چھڑی کو چھیلا جاتا ہے “ ۔
یہ روایت امام أحمد اور امام طبرانی نے نقل کی ہے ۔ امام أحمد کے رجال صحیح کے رجال ہیں صرف قاسم بن عبدالرحمن بن حارث کا معاملہ مختلف ہے ، اور وہ ثقہ ہے ۔

سیدنا ابوموسی اشعری رضی اللہ عنہ بیان کرتے ہیں : نبی اکرم صلی اللہ علیہ وسلم ایک گھر کے دروازے پر کھڑے ہوئے اس گھر میں قریش سے تعلق رکھنے والے کچھ افراد موجو تھے راوی بیان کرتے ہیں : نبی اکرم صلی اللہ علیہ وسلم نے دروازے کے کواڑوں کو پکڑا اور ارشاد فرمایا : کیا گھر میں صرف قریشی افراد موجود ہیں ؟ عرض کی گئی : یا رسول اللہ ! ہمارا ایک بھانجا ہے جو قریشی نہیں ہے ۔ نبی اکرم صلی اللہ علیہ وسلم نے فرمایا : قوم کا بھانجا ان کا ایک فرد ہوتا ہے پھر آپ نے ارشاد فرمایا : ” یہ معاملہ ( یعنی حکومت ) قریش میں رہے گی جب تک وہ اس حال میں رہیں گے ، کہ جب ان سے رحم مانگا جائے ، تو وہ رحم کریں جب فیصلہ دیں ، تو عدل سے کام لیں جب تقسیم کریں ، تو انصاف سے کام لیں ان میں سے جو فرد ایسا نہیں کرے گا اس پر اللہ تعالیٰ فرشتوں اور انسانوں سب کی لعنت ہو گی اس شخص کی کوئی فرض یا نفل عبادت قبول نہیں ہو گی “ ۔ علامہ ہیثمی فرماتے ہیں : ) میں یہ کہتا ہوں امام ابوداؤد نے اس روایت میں سے صرف یہ الفاظ نقل کیے ہیں : ” قوم کا بھانجا ان کا ایک فرد ہوتا ہے “ ۔
یہ روایت امام أحمد اور امام بزار اور امام طبرانی نے نقل کی ہے ۔ امام طبرانی کے رجال ثقہ ہیں ۔

سیدنا ذومخبر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” یہ معاملہ ( یعنی حکومت ) حمیر میں تھی ، پھر اللہ تعالیٰ نے ان لوگوں سے اسے الگ کر دیا اور اسے قریش میں رکھ دیا اور یہ عنقریب ان کی طرف لوٹ جائے گی “ ۔ عبداللہ کہتے ہیں : میری والد کی تحریر میں یہ الفاظ اسی طرح الگ الگ ذکر ہوئے ہیں لیکن جب وہ ہمیں یہ حدیث بیان کرتے تھے ، تو یہ پورا جملہ صحیح بولتے تھے ۔
یہ روایت امام أحمد نے نقل کی ہے ۔ اور امام طبرانی نے اسے حروف کے اختصار کے ساتھ نقل کیا ہے ان کے رجال ثقہ ہیں ۔

شریح بن عبید بیان کرتے ہیں : جبیر بن نفیر ، کثیر بن مرہ ، عمرو بن اسود ، سیدنا مقدام بن معدیکرب اور سیدنا ابوامامہ نے مجھے یہ بات بیان کی ہے : ایک شخص نبی اکرم صلی اللہ علیہ وسلم کی خدمت میں حاضر ہوا اس نے عرض کی : یا رسول اللہ ! کیا یہ معاملہ صرف آپ کی قوم میں رہے گا ؟ آپ نے فرمایا : جی ہاں ! اس نے عرض کی : پھر ان لوگوں کو ہمارے بارے میں وصیت کر دیں نبی اکرم صلی اللہ علیہ وسلم نے قریش سے فرمایا میں تم لوگوں کو اس بارے میں اللہ تعالیٰ سے ڈرنے کی تلقین کرتا ہوں کہ تم میرے بعد میری امت کو مشقت کا شکار کرو پھر آپ نے لوگوں سے فرمایا : عنقریب میرے بعد ایسے حکمران آئیں گے کہ تم ان کی اطاعت کرنا کیونکہ امیر کی مثال ڈھال کی طرح ہوتی ہے جس کے ذریعے بچاؤ کیا جاتا ہے اگر وہ ٹھیک رہیں اور پرہیز گاری اختیار کریں اور بھلائی کا حکم دیں ، تو ٹھیک ہے ، اور اگر وہ برائی کریں اور تمہیں برائی کا حکم دیں ، تو ان پر ( اس کا وبال ہو گا ) اور تم اس سے لاتعلق ہو گے “ اس کے بعد راوی نے پوری حدیث ذکر کی ہے ۔
یہ روایت امام طبرانی نے نقل کی ہے ۔ اس کی سند میں ایک راوی محمد بن اسماعیل بن عیاش ہے ، اور وہ ضعیف ہے ۔

سیدنا عمرو بن عوف بن یزید بن ملحہ مزنی رضی اللہ عنہ بیان کرتے ہیں : نبی اکرم صلی اللہ علیہ وسلم ان لوگوں کے ساتھ تشریف فرما تھے آپ گھر کے اندر تشریف لے گئے آپ نے ارشاد فرمایا تم لوگ میرے پاس اندر آ جاؤ لیکن صرف قریشی اندر آئیں راوی کہتے ہیں : میں وہاں سے اٹھا اور اندر آ گیا نبی اکرم صلی اللہ علیہ وسلم نے فرمایا : اے قریش کے افراد ! کیا تمہارے ساتھ کوئی ایسا فرد ہے جو تم میں سے نہ ہو ؟ لوگوں نے عرض کی : یا رسول اللہ ! ہمارے ماں باپ آپ پر قربان ہوں ہم آپ کو بتاتے ہیں ہمارے ساتھ ہمارا ایک بھانجا ہے ، اور ایک غلام ہے ۔ نبی اکرم صلی اللہ علیہ وسلم نے فرمایا : قوم کا حلیف ان میں سے ایک ہوتا ہے ، اور قوم کا بھانجا ان میں سے ایک ہوتا ہے اے قریش کے گروہ ! تم لوگ میرے بعد اس معاملے کے نگران بنو گے ، تو تم مرتے وقت مسلمان ہی رہنا اور تم اللہ کی رسی کو مضبوطی سے تھام کے رکھنا اور فرقوں میں تقسیم نہ ہونا اور تم ان لوگوں کی مانند نہ ہو جانا جو فرقوں میں تقسیم ہو گئے ، اور انہوں نے اختلاف کیا اس کے بعد کہ ان کے پاس واضح نشانیاں آ گئی تھیں اور ان لوگوں کو صرف اسی بات کا حکم دیا گیا کہ وہ دین کو اللہ تعالیٰ کے لئے خالص کرتے ہوئے ، اور صحیح راستے پر قائم رہتے ہوئے اللہ تعالیٰ کی عبادت کریں وہ نماز قائم کریں زکوۃ ادا کریں یہی مضبوط دین ہے اے قریش کے گروہ ! میرے اصحاب ان کے بیٹوں ان کے بیٹوں کے بیٹوں کے بارے میں میرا دھیان رکھنا اللہ تعالیٰ انصار پر انصار کے بیٹوں پر انصار کے بیٹوں کے بیٹوں پر رحمت فرمائے ۔
یہ روایت امام طبرانی نے نقل کی ہے ۔ اس کی سند میں ایک راوی کثیر بن عبداللہ بن عمرو مزنی ہے ، اور وہ ضعیف ہے امام ترمذی نے اس کی نقل کردہ حدیث کو حسن قرار دیا ہے اس روایت کے بقیہ رجال ثقہ ہیں ۔

سیدنا ابوسعید خدری رضی اللہ عنہ بیان کرتے ہیں : نبی اکرم صلی اللہ علیہ وسلم ایک گھر کے پاس آ کر کھڑے ہوئے جس میں قریش کے کچھ افراد موجود تھے آپ نے دروازے کے کواڑوں کو پکڑ لیا اور دریافت کیا : گھر میں صرف قریشی ہیں ؟ لوگوں نے عرض کی : جی نہیں ! ہمارا ایک بھانجا بھی ہے ۔ نبی اکرم صلی اللہ علیہ وسلم نے فرمایا : قوم کا بھانجا ان کا ایک فرد ہوتا ہے پھر آپ نے ارشاد فرمایا یہ معاملہ ( یعنی حکومت ) قریش میں رہے گا ، جب تک ان سے رحم مانگا جائے ، تو وہ رحم کریں گے اور جب تک وہ فیصلہ دیتے ہوئے عدل سے کام لیں گے اور تقسیم کرتے ہوئے انصاف سے کام لیں گے ان میں سے جو فرد ایسا نہیں کرے گا اس پر اللہ تعالیٰ فرشتوں اور انسانوں سب کی لعنت ہو گی ۔
یہ روایت امام طبرانی نے معجم صغیر اور معجم اوسط میں نقل کی ہے ۔ اور اس کے رجال ثقہ ہیں ۔

سیدنا انس بن مالک رضی اللہ عنہ بیان کرتے ہیں : ہم ایک ایسے گھر میں موجود تھے جس میں مہاجرین اور انصار سے تعلق رکھنے والے کچھ افراد موجود تھے اسی دوران نبی اکرم صلی اللہ علیہ وسلم ہمارے پاس تشریف لے آئے ہم میں سے ہر ایک شخص نے جگہ بنانی شروع کی یہ امید رکھتے ہوئے کہ شاید آپ اس کے پہلو میں تشریف فرما ہو جائیں لیکن نبی اکرم صلی اللہ علیہ وسلم دروازے کے پاس کھڑے ہوئے آپ نے اس کے کواڑوں کو پکڑا اور فرمایا حکمران قریش میں سے ہوں گے میرا تم پر بڑا حق ہے ، اور ان لوگوں کا بھی حق ہو گا ، جب تک وہ تین کام کریں گے ، جب ان سے رحم مانگا جائے ، تو رحم کریں جب وہ فیصلہ دیں ، تو عدل سے کام لیں گے ، جب عہد کریں ، تو اس کو پورا کریں گے ان میں سے جو فرد ایسا نہیں کرے گا اس پر اللہ تعالیٰ فرشتوں اور انسانوں سب کی لعنت ہو گی ۔ ایک روایت میں یہ الفاظ ہیں : جب انہیں امین بنایا جائے ، تو وہ ادائیگی کریں ( یعنی امانت واپس کر دیں ) ۔
یہ روایت امام طبرانی نے معجم اوسط اور معجم کبیر میں نقل کی ہے ۔ اس کی سند میں ایک راوی عبداللہ بن فروخ ہے ، جسے ابن حبان نے ثقہ قرار دیا ہے وہ فرماتے ہیں : یہ بعض اوقات ( دوسروں کے ) برخلاف روایت نقل کرتا ہے اس راوی کے بارے میں کلام کیا گیا ہے معجم کبیر کے بقیہ رجال ثقہ ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے ارشاد فرمایا : ” اہل زمین کے ڈوبنے سے امان ، قوس ( شاید مراد قوس قزح کا نمودار ہونا ) ہے ، اور اختلاف کے حوالے سے اہل زمین کی امان قریش کے ساتھ محبت ہے قریش اللہ والے ہیں عربوں کا کوئی قبیلہ جب ان کی مخالفت کرے گا ، تو وہ ابلیس کے گروہ میں ہو جائے گا “ ۔
یہ روایت امام طبرانی نے معجم کبیر اور معجم اوسط میں نقل کی ہے ۔ تا ہم انہوں نے یہ الفاظ نقل کیے ہیں : ” اختلاف کے حوالے سے میری امت کی امان “ ۔ ایک روایت میں یہ الفاظ ہیں : آپ نے فرمایا : ” قریش اللہ والے ہیں “ ۔ یہ بات آپ نے تین مرتبہ ارشاد فرمائی ۔ اس روایت کی سند میں ایک راوی خلید بن دعلج ہے ، اور وہ ضعیف ہے ۔

سیدنا سہل بن سعد رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بھلائی اور برائی ( ہر معاملے ) میں لوگ قریش کے پیروکار ہیں “ ۔
یہ روایت امام طبرانی نے معجم کبیر اور معجم اوسط میں نقل کی ہے ۔ اور اس کی سند حسن ہے ۔

سیدنا حارث بن حارث رضی اللہ عنہ سیدنا کثیر بن رضی اللہ عنہ سیدنا عمرو بن اسود رضی اللہ عنہ سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” قریش کے بہترین حکمران لوگوں کے بہترین حکمران ہوں گے “ ۔
یہ روایت امام طبرانی نے نقل کی ہے ۔ اور اس کی سند حسن ہے ۔

سیدنا معاویہ بن ابوسفیان رضی اللہ عنہ کے بارے یہ بات منقول ہے ۔ انہوں نے منبر پر یہ بات ارشاد فرمائی : کہ ضحاک بن قیس نے مجھے یہ حدیث بیان کی ہے ، اور یہ اپنی ذات کے حوالے سے عادل شخص ہے کہ نبی اکرم صلی اللہ علیہ وسلم نے ارشاد فرمایا ہے : ” حکمران ہمیشہ قریش سے رہے گا “ ۔
یہ روایت امام طبرانی نے نقل کی ہے ۔ اس کی سند میں ایک راوی سنید ہے ، اور وہ ثقہ ہے حجاج بن سلیمان سے اس کے روایت کرنے کے بارے میں کلام کیا گیا ہے ، اور
یہ روایت بھی ان میں سے ایک ہے باقی اللہ بہتر جانتا ہے ۔

سیدنا عبداللہ بن حنطب رضی اللہ عنہ بیان کرتے ہیں : حجفہ کے مقام پر نبی اکرم صلی اللہ علیہ وسلم نے ہمیں خطبہ دیا آپ نے ارشاد فرمایا : کیا میں تم لوگوں کے نزدیک تمہاری جانوں سے زیادہ حق نہیں رکھتا ؟ لوگوں نے عرض کی : جی ہاں ۔ یا رسول اللہ ! نبی اکرم صلی اللہ علیہ وسلم نے فرمایا : پھر میں دو چیزوں کے بارے میں تم سے ، توقع رکھتا ہوں قرآن کے بارے میں اور اپنی عترت کے بارے میں ، خبردار ! تم قریش سے آگے نہ بڑھنا ورنہ تم گمراہ ہو جاؤ گے اور ان سے پیچھے بھی نہ رہ جانا ورنہ تم ہلاک ہو جاؤ گے اور انہیں تعلیم بھی نہ دینا کیونکہ وہ تم سے زیادہ علم رکھتے ہیں قریش کے ایک فرد کی قوت ان کے علاوہ کسی اور قوم کے دو افراد کی قوت سے زیادہ ہے اگر قریش کے سرکش ہونے کا اندیشہ نہ ہوتا تو میں انہیں بتاتا کہ اللہ تعالیٰ کی بارگاہ میں انہیں کیا مرتبہ و مقام حاصل ہے قریش کے بہترین لوگ ، لوگوں میں سے بہترین ہیں “ ۔
یہ روایت امام طبرانی نے نقل کی ہے ۔ اس کی سند میں ایسا شخص ہے جس سے میں واقف نہیں ہوں ۔

سیدنا ثوبان رضی اللہ عنہ روایت کرتے ہیں ۔ نبی اکرم صلی اللہ علیہ وسلم نے ارشاد فرمایا : ” قریش کے لئے ٹھیک رہنا جب تک وہ تمہارے لئے ٹھیک رہیں گے ، جب تم ایسا نہیں کرو گے ، تو تم اپنی تلواریں اپنی گردنوں پر رکھ لینا اور ان کو فنا کر دینا ، ( شاید یہ مراد ہے کہ جو قریش کی مخالفت کریں گے ان کو فنا کر دینا ) اگر تم ایسا نہیں کرو گے ، تو ایسی صورت میں تم کھیتی باڑی کرنے والے بدنصیب ہو جاؤ گے اور اپنے ہاتھوں کی محنت کر کے کھاؤ گے “ ۔
یہ روایت امام طبرانی نے معجم صغیر اور معجم اوسط میں نقل کی ہے ۔ معجم صغیر کے رجال ثقہ ہیں سیدنا نعمان رضی اللہ عنہ کی نقل کردہ حدیث آگے آئے گی ۔

احنف بن قیس بیان کرتے ہیں : میں سیدنا عمر بن خطاب رضی اللہ عنہ کو یہ کہتے ہوئے سنتا تھا : قریش سے تعلق رکھنے والا کوئی فرد جس دروازے سے داخل ہو گا ، تو لوگ بھی اس کے ساتھ داخل ہوں گے احنف بن قیس کہتے ہیں : مجھے اس بات کی سمجھ نہیں آتی تھی کہ ان کی بات کا مطلب کیا ہے ؟ یہاں تک کہ جب سیدنا عمر رضی اللہ عنہ کو زخمی کر دیا گیا تو انہوں نے سیدنا صہیب رضی اللہ عنہ کو یہ حکم دیا کہ وہ لوگوں کو نماز پڑھائیں وہ تین دن تک ایسا کریں گے ۔ انہوں نے لوگوں کو یہ ہدایت کی کہ وہ ان تین دنوں میں کھانا تیار کریں یہاں تک کہ شوری کے اراکین کسی ایک فرد پر متفق ہو جائیں جب وہ لوگ جنازے سے واپس آئے ، تو کھانا رکھ دیا گیا تھا لوگ جس غم کا شکار تھے اس کی وجہ سے انہوں نے کھانا نہیں کھایا سیدنا عباس بن عبدالمطلب رضی اللہ عنہ تشریف لے آئے انہوں نے فرمایا : اے لوگو ! نبی اکرم صلی اللہ علیہ وسلم کا وصال ہو گیا آپ کے بعد بھی ہم کھاتے پیتے رہے ہیں سیدنا ابوبکر رضی اللہ عنہ کا انتقال ہوا پھر بھی ہم کھاتے پیتے رہے ہیں ، تو اے لوگو ! تم لوگ یہ کھانا کھاؤ پھر سیدنا عباس رضی اللہ عنہ نے اپنا ہاتھ آگے بڑھایا تو لوگوں نے بھی اپنے ہاتھ آگے بڑھائے ، اور کھانا پینا شروع کیا اس وقت مجھے سیدنا عمر رضی اللہ عنہ کی بات کا مفہوم سمجھ میں آیا ۔
یہ روایت امام طبرانی نے نقل کی ہے ۔ اس کی سند میں ایک راوی علی بن زید ہے اس کی نقل کردہ حدیث حسن ہے اس روایت کے بقیہ رجال صحیح کے رجال ہیں ۔

سیدنا عتبہ بن عبد رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” خلافت قریش میں ہو گی “ ۔ اس کے بعد راوی نے پوری حدیث ذکر کی ہے جو اس سے پہلے کتاب الاحکام کے آغاز میں گزر چکی ہے ۔
یہ روایت امام أحمد اور امام طبرانی نے نقل کی ہے ۔ امام أحمد کے رجال ثقہ ہیں سیدنا ابوہریرہ رضی اللہ عنہ سے منقول حدیث پہلے گزر چکی ہے ، اور اس کے رجال بھی ثقہ ہیں ۔