مجمع الزوائد ومنبع الفوائد

سیدنا نعمان بن بشیر رضی اللہ عنہ بیان کرتے ہیں : ہم لوگ مسجد میں بیٹھے ہوئے تھے سیدنا بشیر رضی اللہ عنہ ایسے شخص تھے جو زیادہ بات نہیں کرتے تھے ۔ سیدنا ابوثعلبہ خشنی رضی اللہ عنہ آئے ، اور بولے : اے بشیر بن سعد کیا آپ کو نبی اکرم صلی اللہ علیہ وسلم کی حکمرانوں کے بارے میں حدیث یاد ہے ، سیدنا حذیفہ رضی اللہ عنہ نے جواب دیا : مجھے نبی اکرم صلی اللہ علیہ وسلم کا خطبہ یاد ہے پھر سیدنا ابوثعلبہ رضی اللہ عنہ بیٹھ گئے ، تو سیدنا حذیفہ رضی اللہ عنہ نے بتایا : نبی اکرم صلی اللہ علیہ وسلم نے ارشاد فرمایا تھا : ” جب تک اللہ کو منظور ہو گا نبوت تمہارے درمیان رہے گی ( یعنی نبی تمہارے درمیان زندہ رہیں گے ) پھر اللہ تعالیٰ جب چاہے گا اسے اٹھا لے گا پھر نبوت کی منہاج پر خلافت ہو گی جب تک اللہ کو منظور ہو گا وہ رہے گی پھر جب اللہ تعالیٰ اسے اٹھانا چاہے گا ، تو اسے اٹھا لے گا پھر مضبوطی والی بادشاہی ہو گی جب تک اللہ تعالیٰ کو منظور ہو گا وہ رہے گی پھر جب اللہ تعالیٰ اسے اٹھانا چاہے گا ، تو اسے اٹھا لے گا پھر آمریت والی بادشاہی ہو گی جب تک اللہ تعالیٰ کو منظور ہو گا وہ رہے گی پھر جب اللہ تعالیٰ اسے اٹھانا چاہے گا اسے اٹھا لے گا پھر نبوت کی منہاج پر خلافت آئے گی ۔ ۔ ۔ ۔ ۔ ۔ ۔ ۔ ۔ “ اس کے بعد وہ خاموش ہو گئے ۔ حبیب نامی راوی کہتے ہیں : جب سیدنا عمر بن عبدالعزیز خلیفہ بنے اور یزید بن نعمان بن بشیر ان کے ساتھیوں میں شامل ہوئے ، تو میں نے انہیں یہ حدیث لکھ کر دی اور میں نے انہیں یہ بات یاد کروائی میں نے کہا: مجھے یہ امید ہے کہ اس سے مراد امیرالمؤمنین یعنی سیدنا عمر بن عبدالعزیز ہی ہوں گے کیونکہ وہ مضبوطی والی اور آمریت والی بادشاہی کے بعد آئے ہیں انہوں نے میرا مکتوب سیدنا عمر بن عبدالعزیز کے سامنے پڑھ کر سنایا تو وہ اس پر خوش ہوئے ، اور انہیں یہ اچھا لگا ۔
یہ روایت امام أحمد نے سیدنا نعمان بن بشیر رضی اللہ عنہ سے منقول روایات کے ضمن میں نقل کی ہے ۔ امام بزار نے اسے زیادہ مکمل روایت کے طور پر نقل کیا ہے امام طبرانی نے معجم اوسط میں اس کا کچھ حصہ نقل کیا ہے اور اس کے رجال ثقہ ہیں ۔

سیدنا ابوثعلبہ خشنی رضی اللہ عنہ بیان کرتے ہیں : سیدنا معاذ بن جبل رضی اللہ عنہ اور سیدنا ابوعبیدہ رضی اللہ عنہ ایک حدیث کے بارے میں سرگوشی میں بات کر رہے تھے میں نے ان دونوں سے کہا: کیا آپ نے نبی اکرم صلی اللہ علیہ وسلم کی وصیت کو یاد نہیں رکھا نبی اکرم صلی اللہ علیہ وسلم نے ان دونوں صاحبان کو میرے بارے میں وصیت کی تھی ان دونوں نے کہا: ہم نے یہ ارادہ نہیں کیا کہ ہم آپ کو چھوڑ کر سرگوشی میں کوئی بات چیت کریں ہم ، تو ایک حدیث کا ذکر کر رہے تھے جو نبی اکرم صلی اللہ علیہ وسلم نے ہمیں ارشاد فرمائی تھی پھر ان دونوں نے حدیث کا ذکر کرتے ہوئے یہ بات کہی ( کہ نبی اکرم صلی اللہ علیہ وسلم نے ارشاد فرمایا تھا ) ” اس معاملے ( یعنی حکومت ) کا آغاز نبوت اور رحمت سے ہو گا پھر خلافت اور رحمت ہو گی پھر مضبوطی والی بادشاہی ہو گی پھر سرکشی اور آمریت ہو گی اور اس امت میں فساد ہو گا کہ وہ لوگ ریشم اور شراب اور شرمگاہوں کو حلال قرار دیں گے اور اس امت میں فساد ہو گا کہ اس بارے میں ان کی مدد کی جائے گی اور انہیں ہمیشہ رزق دیا جائے گا یہاں تک کہ وہ لوگ اللہ تعالیٰ کی بارگاہ میں حاضر ہو جائیں گے ۔
یہ روایت امام ابویعلیٰ نے نقل کی ہے ۔ امام بزار نے اسے صرف سیدنا ابوعبیدہ رضی اللہ عنہ کے حوالے سے نقل کیا ہے وہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” تمہارے دین کا آغاز نبوت اور رحمت کے ساتھ ہوا ہے اس کے بعد راوی نے حسب سابق حدیث ذکر کی ہے ۔

یہ روایت امام طبرانی نے سیدنا معاذ رضی اللہ عنہ اور سیدنا ابوعبیدہ رضی اللہ عنہ کے حوالے سے نقل کی ہے ۔ وہ دونوں بیان کرتے ہیں : نبی اکرم صلی اللہ علیہ وسلم نے ارشاد فرمایا : اس کے بعد راوی نے امام ابویعلیٰ کی نقل کردہ حدیث کی مانند روایت نقل کی ہے ۔ تا ہم انہوں نے یہ الفاظ نقل کیے ہیں ” وہ لوگ ریشم ، شرمگاہوں ، اور شراب کو حرام قرار دیدیں گے “ ۔
اس روایت کی سند میں ایک راوی بن ابوسلیم ہے ، اور وہ ثقہ ہے ، لیکن وہ مدلس ہے اس روایت کے بقیہ رجال ثقہ ہیں ۔

سیدنا ابوثعلبہ خشنی رضی اللہ عنہ بیان کرتے ہیں : میری ملاقات نبی اکرم صلی اللہ علیہ وسلم سے ہوئی میں نے عرض کی : یا رسول اللہ ! مجھے کسی ایسے شخص کے سپرد کیجئے جو اچھی طرح تعلیم دیتا ہو ، تو نبی اکرم صلی اللہ علیہ وسلم نے مجھے سیدنا ابوعبیدہ بن جراح رضی اللہ عنہ کے حوالے کر دیا اور پھر ارشاد فرمایا : میں نے تمہیں ایک ایسے شخص کے حوالے کیا ہے جو تمہیں اچھے طریقے سے تعلیم دے گا ، اور تمہاری اچھی تربیت کرے گا ۔ سیدنا ابوثعلبہ خشنی رضی اللہ عنہ بیان کرتے ہیں : میں آیا تو اس وقت سیدنا ابوعبیدہ رضی اللہ عنہ ، سیدنا ابونعمان بشیر بن سعد رضی اللہ عنہ کے ساتھ بات چیت کر رہے تھے جب ان دونوں نے مجھے دیکھا تو وہ دونوں خاموش ہو گئے میں نے کہا: اے سیدنا ابوعبیدہ ! اللہ کی قسم ! نبی اکرم صلی اللہ علیہ وسلم نے ، تو مجھے اس طرح بیان نہیں کیا تھا انہوں نے فرمایا : تم بیٹھ جاؤ ! ہم تمہیں بیان کرتے ہیں : پھر انہوں نے بتایا نبی اکرم صلی اللہ علیہ وسلم نے ارشاد فرمایا ہے : ” تمہارے درمیان نبوت ہو گی پھر نبوت کی منہاج پر خلافت ہو گی اور پھر بادشاہت اور آمریت ہو گی “ ۔
یہ روایت امام طبرانی نے نقل کی ہے ۔ اس کی سند میں ایک راوی ایسا ہے جس کا نام بیان نہیں کیا گیا اور ایک راوی مجہول بھی ہے ۔

سیدنا عبداللہ بن عباس رضی اللہ عنہما روایت کرتے ہیں ۔ نبی اکرم صلی اللہ علیہ وسلم نے ارشاد فرمایا : ” اس معاملے کا آغاز نبوت اور رحمت سے ہو گا پھر خلافت اور رحمت ہو گی پھر بادشاہی اور رحمت ہو گی پھر حکمرانی اور رحمت ہو گی اور پھر لوگ اس کے حوالے سے یوں ایک دوسرے کو کاٹیں گے جس طرح گدھے ایک دوسرے کو کاٹتے ہیں ، تو تم پر جہاد کرنا لازم ہے ، اور تمہارے جہاد میں سب سے زیادہ فضیلت پہریداری کو حاصل ہے ، اور تمہاری سب سے زیادہ فضیلت والی پہریداری عسقلان میں ہو گی “ ۔
یہ روایت امام طبرانی نے نقل کی ہے ۔ اور اس کے رجال ثقہ ہیں ۔

قیس بن جابر صدفی ، اپنے والد کے حوالے سے اپنے دادا کے حوالے سے نبی اکرم صلی اللہ علیہ وسلم کا یہ فرمان نقل کرتے ہیں : ” تقریب میرے بعد خلفاء ہوں گے اور خلفاء کے بعد امراء ہوں گے اور امراء کے بعد بادشاہ ہوں گے اور بادشاہوں کے بعد ظالم حکمران ہوں گے پھر میرے اہل بیت کا ایک شخص نکلے گا ، جو زمین کو عدل سے یوں بھر دے گا جیسے وہ پہلے ظلم سے بھری ہوئی تھی پھر ایک قحطانی کو امیر بنایا جائے گا اس ذات کی قسم ! جس نے مجھے حق کے ہمراہ مبعوث کیا ہے وہ اس سے کم نہیں ہو گا“ ۔
یہ روایت امام طبرانی نے نقل کی ہے ۔ اس کی سند میں راویوں کی ایک جماعت ایسی ہے جن سے میں واقف نہیں ہوں ۔

سیدنا معاذ بن جبل رضی اللہ عنہ روایت کرتے ہیں ۔ نبی اکرم صلی اللہ علیہ وسلم نے ارشاد فرمایا : ” تیس ( سال ) نبوت ہو گی تیس سال بادشاہی اور جبر کی حکومت ہو گی اور پھر اس کے بعد جو ہو گا اس میں بھلائی نہیں ہو گی “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی مطر بن علاء رملی ہے ، اور میں اس سے واقف نہیں ہوں اس روایت کے بقیہ رجال ثقہ ہیں ۔