مجمع الزوائد ومنبع الفوائد

سیدنا عباس رضی اللہ عنہ بیان کرتے ہیں : ایک رات میں نبی اکرم صلی اللہ علیہ وسلم کے پاس موجود تھا آپ نے ارشاد فرمایا : آپ دیکھیں کہ آپ کو آسمان میں کوئی ستارہ نظر آ رہا ہے ؟ میں نے جواب دیا : جی ہاں ! نبی اکرم صلی اللہ علیہ وسلم نے دریافت کیا : آپ نے کیا دیکھا ہے میں نے جواب دیا : ثریا ، نبی اکرم صلی اللہ علیہ وسلم نے ارشاد فرمایا : ” عنقریب اتنی ہی تعداد میں ، آپ کی اولاد میں سے لوگ اس امت کے حکمران بنیں گے ، جو ایک آزمائش ( کے بعد حکمران بنیں گے ) “ ۔
یہ روایت امام أحمد اور امام طبرانی نے نقل کی ہے ۔ اس کی سند میں ایک راوی ابومیسرہ ہے جو سیدنا عباس رضی اللہ عنہ کا غلام ہے میں اس سے واقف نہیں ہوں البتہ ابوقبیل کے ترجمہ میں اس کا تذکرہ ہے امام أحمد کے بقیہ رجال ثقہ ہیں ۔

ابومعاویہ کے بارے میں یہ بات منقول ہے وہ یہ فرماتے ہیں : میرے پاس ایک حدیث موجود ہے اگر میں چاہوں ، تو اس کے ذریعے دنیا حاصل کر سکتا ہوں ، لیکن اللہ تعالیٰ مجھ سے ایسی حدیث کے بارے میں نہیں دریافت کرے گا ، جو میں حکمران تک لے کے جاؤں ، میرے والد نے کہا: وہ روایت کون سی ہے ؟ انہوں نے بتایا جب امام زید نے خروج کیا ، تو اگلے دن صبح میں اپنی خالہ کے پاس آیا میں نے ان سے کہا: اے امی جان ! امام زید نے خروج کر لیا ہے ۔ انہوں نے فرمایا : یہ مسکین قتل ہو گا جس طرح اس کے باپ دادا قتل ہوئے تھے میں نے ان سے کہا: ان کے ساتھ صاحب حیثیت لوگوں نے بھی خروج کیا ہے ، تو انہوں نے فرمایا : میں سیدہ ام سلمہ رضی اللہ عنہا کے پاس موجود تھی ، جو نبی اکرم صلی اللہ علیہ وسلم کی زوجہ محترمہ ہیں لوگوں نے خلافت کا تذکرہ کیا ، تو سیدہ اُم سلمہ رضی اللہ عنہا نے فرمایا : ایک مرتبہ ہم لوگ نبی اکرم صلی اللہ علیہ وسلم کے پاس موجود تھے ۔ لوگوں نے آپ کے بعد خلافت کا تذکرہ کیا اور عرض کی : سیدہ فاطمہ رضی اللہ عنہا کی اولاد کو ( خلافت ملے گی ) تو نبی اکرم صلی اللہ علیہ وسلم نے ارشاد فرمایا وہ اس تک کبھی نہیں پہنچیں گے بلکہ خلافت میرے چچا کی اولاد میں سے ہو گی جو میرے والد کے سگے ہیں یہاں تک کہ وہ لوگ اسے ( یعنی حکومت کو ) دجال کے حوالے کریں گے ۔
یہ روایت امام طبرانی نے نقل کی ہے ۔ اور اس کی سند میں راویوں کی ایک جماعت ایسی ہے جن سے میں واقف نہیں ہوں ۔

سیدنا انس بن مالک رضی اللہ عنہ فرماتے ہیں : بنوامیہ میں سے اگر کوئی شخص ایک سال حکمران رہے گا ، تو سیدنا عباس رضی اللہ عنہ کی اولاد کا فرد دو سال ( یا چند سال ) حکمران رہے گا ۔ سیدنا انس رضی اللہ عنہ کے پاس بیٹھے ہوئے ایک شخص نے کہا: اے ابوحمزہ کیا یہ بات نبی اکرم صلی اللہ علیہ وسلم نے ارشاد فرمائی ہے ؟ سیدنا انس رضی اللہ عنہ نے فرمایا : جی ہاں ! جس طرح تم یہاں ہو ( اسی طرح یہ حقیقت ہے کہ یہ بات نبی اکرم صلی اللہ علیہ وسلم نے ارشاد فرمائی ہے ) ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی بکر بن یونس ہے ، اور وہ ضعیف ہے ۔

سیده ام فضل رضی اللہ عنہا بیان کرتی ہیں : ایک مرتبہ میں نبی اکرم صلی اللہ علیہ وسلم کے پاس سے گزری آپ اس وقت حطیم میں تشریف فرما تھے آپ نے ارشاد فرمایا : اے ام فضل ! میں نے عرض کی : یا رسول اللہ ! میں حاضر ہوں نبی اکرم صلی اللہ علیہ وسلم نے فرمایا : تمہیں ایک لڑکے کا حمل ہے میں نے عرض کی : یہ کیسے ہو سکتا ہے ، جبکہ قریش نے یہ طے کر رکھا ہے کہ وہ خواتین کے پاس نہیں جائیں گے نبی اکرم صلی اللہ علیہ وسلم نے ارشاد فرمایا ویسا ہی ہو گا جیسے میں نے کہا: ہے ، جب تم اس بچے کو جنم دو تو اسے میرے پاس لے کے آنا سیدہ ام فضل رضی اللہ عنہا بیان کرتی ہیں جب میں نے اس بچے کو جنم دیا تو میں اس کو لے کے نبی اکرم صلی اللہ علیہ وسلم کے پاس آئی نبی اکرم صلی اللہ علیہ وسلم نے اس کے دائیں کان میں اذان دی اور بائیں کان میں اقامت کہی اور آپ نے اپنا لعاب دہن اس کے منہ میں ڈالا اور اس کا نام عبداللہ رکھا پھر آپ نے ارشاد فرمایا : خلفاء کے باپ کو لے جاؤ سیدہ ام فضل رضی اللہ عنہا کہتی ہیں : میں سیدنا عباس رضی اللہ عنہ کے پاس آئی اور انہیں اس بارے میں بتایا وہ ایک خوش لباس ، وجیہ و شکیل ، لمبی قامت کے شخص تھے ، انہوں نے ( باہر جانے کا ) لباس پہنا پھر نبی اکرم صلی اللہ علیہ وسلم کی خدمت میں حاضر ہوئے نبی اکرم صلی اللہ علیہ وسلم نے جب انہیں ملاحظہ فرمایا : تو آپ اٹھ کر ان کی طرف بڑھے اور ان کی دونوں آنکھوں کے درمیان بوسہ دیا اور پھر انہیں دائیں طرف بٹھا لیا پھر ارشاد فرمایا یہ میرے چچا ہیں جو شخص چاہے وہ اپنے چچا کے ساتھ مقابلہ کر لے سیدنا عباس رضی اللہ عنہ کہتے ہیں : یا رسول اللہ ! ایک بات ہے ۔ نبی اکرم صلی اللہ علیہ وسلم نے فرمایا : میں یہ بات کیوں نہ کہوں کہ یہ چچا ہیں جبکہ آپ میرے چچا ہیں اور میرے آباء و اجداد کے باقی رہ جانے والے فرد ہیں اور میرے وارث ہیں اور ان سب میں بہتر ہوں گے جنہیں میں اپنے خاندان کے افراد میں سے پیچھے چھوڑ کے جاؤں گا میں نے عرض کی : یا رسول اللہ ! ام فضل نے یہ ، یہ بات کہی ہے ۔ نبی اکرم صلی اللہ علیہ وسلم نے ارشاد فرمایا : ایسا ہی ہو گا اے سیدنا عباس ! یہ ایک سو بتیس کے بعد ہو گا پھر آپ لوگوں کی اولاد میں سفاح ہو گا منصور ہو گا مہدی ہو گا ، اور یہ حکومت ان کی اولاد میں باقی رہے گی یہاں تک کہ ان کا آخری فرد سیدنا عیسیٰ بن مریم علیہ السلام کے ساتھ نماز ادا کرے گا ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی أحمد بن راشد ہلالی ہے اس حدیث کے حوالے سے اس پر تہمت عائد کی گئی ہے ۔

سیدنا عقبہ بن عامر رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو دیکھا آپ نے اپنے چچا سیدنا عباس رضی اللہ عنہ کا ہاتھ پکڑا اور پھر ارشاد فرمایا : اے سیدنا عباس ! جب بھی نبوت ہو تو اس کے بعد خلافت ہوتی ہے آخری زمانے میں آپ کی اولاد کے لوگ حکمران بنیں گے وہ سترہ افراد ہوں گے ان میں سے ایک سفاح ہو گا ان میں سے ایک منصور ہو گا ان میں سے ایک مہدی ہو گا ، جو مہدی نہیں ہو گا ان میں سے ایک جموح ہو گا ان میں سے ایک عاقب ہو گا ان میں سے ایک واہن ہو گا ، جو آپ کی اولاد میں سے ہو گا ، اور اس کے حوالے سے میری امت کے لئے بربادی ہے کہ وہ کیسے انہیں بانجھ کر دے گا انہیں ہلاکت کا شکار کر دے گا ان کے اموال ضائع کر دے گا وہ اور اس کے پیرو کار لوگ دین اسلام پر نہیں ہوں گے اور جب اس کے سگے بیٹے کی بیعت کی جائے گی ، تو اٹھارویں فرد کے وقت ان کی حکومت ختم ہو جائے گی اور اہل مغرب اپنے گھروں سے نکل آئیں گے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عبدالاول بن عبداللہ معلم ہے میں اس سے واقف نہیں ہوں اس روایت کے بقیہ رجال ثقہ ہیں ۔

سیدنا عبداللہ بن مسعود رضی اللہ عنہ روایت کرتے ہیں ۔ نبی اکرم صلی اللہ علیہ وسلم نے سیدنا عباس رضی اللہ عنہ سے فرمایا : ” اے چچا ! دنیا اس وقت تک ختم نہیں ہو گی جب تک آپ کی اولاد میں سے آخری زمانے میں کچھ افراد حکمران نہیں بنیں گے اور پھر ان کی حکومت ختم ہو جائے گی اور وہ اٹھارواں فرد ہو گا جس کے ساتھ ایک ایسا فتنہ ہو گا ، جو گونگا ، اور بہرا کر دے گا ، اور اس کے دوران ہر دس ہزار افراد میں سے نو ہزار نو سو افراد قتل ہو جائیں گے صرف معمولی سے لوگ اس سے بچیں گے اور ان کی لڑائی عراق نامی جگہ پر ہو گی راوی کہتے ہیں : ، تو سیدنا عباس رضی اللہ عنہ رو پڑے نبی اکرم صلی اللہ علیہ وسلم نے ان سے دریافت کیا : آپ کیوں رو رہے ہیں ؟ یہ میری امت کے بدترین لوگ ہوں گے جو دین سے یوں نکل جائیں گے جس طرح تیر نشانے کے پار ہو جاتا ہے یہ لوگ دنیا کے طلبگار ہوں گے اور انہیں آخرت کی کوئی فکر نہیں ہو گی ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی میناء ہے ، اور وہ کذاب اور خبیث ہے ۔

سیدنا نفیر بن مالک رضی اللہ عنہ روایت کرتے ہیں ۔ نبی اکرم صلی اللہ علیہ وسلم نے ارشاد فرمایا : ” سیدنا عباس رضی اللہ عنہ کی اولاد اس وقت تک ختم نہیں ہو گی جب تک عرب کے قبیلے ان کے خلاف اٹھ کھڑے نہیں ہوں گے اور اس وقت کی صورت حال ان کے لئے سب سے زیادہ سخت ہو گی ، جب نہ تو آسمان میں ان کا کوئی مددگار ہو گا ، اور نہ زمین میں کوئی ان کا عذر پیش کرنے والا ہو گا میں گویا اس وقت بھی انہیں دیکھ رہا ہوں کہ وہ کوفہ کے درمیان اپنے خچروں پر سوار ہوں گے اور اس وقت کوئی پردہ نشین عورت پردے میں یہ کہے گی : ان لوگوں کو قتل کر دو ! اللہ تعالیٰ انہیں قتل کرے تم ان پر رحم نہ کرنا اللہ تعالیٰ ان پر رحم نہ کرے ، انہوں نے ایک طویل عرصہ تک ہم پر رحم نہیں کیا تھا ۔
یہ روایت امام طبرانی نے نقل کی ہے ۔ اس کی سند میں ایسے راوی ہیں جن سے میں واقف نہیں ہوں ۔ اس نوعیت کی کچھ احادیث آگے چل کر ظلم و ستم کرنے والے حکمرانوں سے متعلق باب میں آئیں گی اگر اللہ نے چاہا ۔