مجمع الزوائد ومنبع الفوائد

سیدہ عائشہ صدیقہ رضی اللہ عنہا کے غلام جو سیدہ عائشہ رضی اللہ عنہا کے اونٹ کو لے کر چلا کرتے تھے وہ بیان کرتے ہیں : جب سیدہ عائشہ رضی اللہ عنہا اپنے آگے گھنٹی کی آواز سنتی تھیں ، تو فرماتی تھیں : ٹھہر جاؤ ! اور وہ اس وقت تک ٹھہری رہتی تھیں جب تک وہ آواز سنائی دینا بند نہیں ہو جاتی تھی اور جب وہ اپنے پیچھے آواز سنتی تھی ، تو کہتی تھیں : مجھے تیزی سے لے کے چلو ! یہاں تک کہ میں اس کی آواز نہ سنوں سیدہ عائشہ رضی اللہ عنہا بیان کرتی ہیں ۔ نبی اکرم صلی اللہ علیہ وسلم نے ارشاد فرمایا : ” اس ( یعنی گھنٹی ) کے پیچھے تابع کے طور پر ایک جن ہوتا ہے “ ۔
یہ روایت امام أحمد نے نقل کی ہے ۔ سیدہ عائشہ رضی اللہ عنہا کے غلام سے میں واقف نہیں ہوں ۔

سیدہ عائشہ صدیقہ رضی اللہ عنہ بیان کرتی ہیں غزوہ بدر کے دن نبی اکرم صلی اللہ علیہ وسلم نے یہ حکم دیا کہ اونٹوں کی گردنوں میں موجود گھنٹیوں کو کاٹ دیا جائے ۔
یہ روایت امام أحمد نے نقل کی ہے ۔ اور اس کے رجال صحیح کے رجال ہیں ۔

سیدنا حويطب بن عبدالعزی رضی اللہ عنہ ، بعض حضرات نے ان کا نام حویط نقل کیا ہے ، لیکن صحیح لفظ حویطب ان کے بارے میں یہ بات منقول ہے کہ انہوں نے کچھ سواروں کو دیکھا جن میں گھنٹی موجود تھی ، تو یہ بات بتائی کہ نبی اکرم صلی اللہ علیہ وسلم نے ارشاد فرمایا ہے : ” فرشتے ایسے سواروں کے ساتھ نہیں رہتے جن میں گھنٹی موجود ہو “ ۔
یہ روایت امام بزار نے اور امام طبرانی نے نقل کی ہے ۔ امام بزار کے رجال صحیح کے رجال ہیں ۔

سیدنا حوط بن عبدالعزی رضی اللہ عنہ بیان کرتے ہیں : نبی اکرم صلی اللہ علیہ وسلم نے گھنٹی کاٹ دینے کا حکم دیا ہے ۔
یہ روایت امام طبرانی نے نقل کی ہے ۔ اور اس کے رجال صحیح کے رجال ہیں ۔

سیدنا جابر رضی اللہ عنہ بیان کرتے ہیں : نبی اکرم صلی اللہ علیہ وسلم نے ایک غزوہ کے دوران گھنٹیوں کے بارے میں یہ حکم دیا تھا کہ انہیں کاٹ دیا جائے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی جابر جعفی ہے ، اور وہ ضعیف ہے اس کی کمزور توثیق کی گئی ہے اس روایت کے بقیہ رجال صحیح کے رجال ہیں ۔

سیدنا انس رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کے ساتھ تھے نبی اکرم صلی اللہ علیہ وسلم نے گھنٹی کی آواز سنی ، تو ارشاد فرمایا : فرشتے ایسے سواروں کے ساتھ نہیں جاتے جن میں گھنٹی موجود ہو ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی یوسف بن میمون ہے ، اور وہ ضعیف ہے ابن حبان نے اسے ثقہ قرار دیا ہے اس روایت کے بقیہ رجال صحیح کے رجال ہیں ۔

سیدنا انس بن مالک رضی اللہ عنہ راویت کرتے ہیں ۔ نبی اکرم صلی اللہ علیہ وسلم نے ارشاد فرمایا : ” فرشتے ایسے قافلے کے قریب نہیں جاتے جس میں گھنٹی موجود ہو اور اپنے گھر کے قریب نہیں جاتے جس میں گھنٹی موجود ہو “ ۔
یہ روایت امام طبرانی نے معجم اوسط میں نقل کی ہے ۔ اور اس کے رجال ثقہ ہیں ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے گھنٹیوں کو کاٹ دینے کا حکم دیا تھا ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی جریر بن مسلم ہے میں اس سے واقف نہیں ہوں اس روایت کے بقیہ رجال ثقہ ہیں ۔ اس سے پہلے سیدنا عمر رضی اللہ عنہ سے منقول حدیث ” تماثیل “ سے متعلق باب میں گزر چکی ہے ۔