مجمع الزوائد ومنبع الفوائد

سیدنا علی رضی اللہ عنہ کے بارے میں یہ بات منقول ہے کہ جنگ جمل کے موقع پر انہوں نے یہ ارشاد فرمایا نبی اکرم صلی اللہ علیہ وسلم نے ہم سے حکومت کے بارے میں کوئی ایسا عہد نہیں لیا تھا جسے ہم اختیار کریں بلکہ یہ ایک ایسی چیز ہے جو ہماری اپنی رائے تھی ( نبی اکرم صلی اللہ علیہ وسلم کے وصال کے بعد ) سیدنا ابوبکر رضی اللہ عنہ کو خلیفہ مقرر کیا گیا اللہ تعالیٰ سیدنا ابوبکر رضی اللہ عنہ پر رحم کرے ، تو انہوں نے ( احکام کو ) قائم کیا اور وہ سیدھے رہے پھر سیدنا عمر رضی اللہ عنہ کو خلیفہ مقرر کیا گیا ، انہوں نے ( احکام کو ) قائم کیا اور سیدھے رہے یہاں تک کہ دین مضبوط ہو گیا ۔
یہ روایت امام أحمد نے نقل کی ہے ۔ اس کی سند میں ایک راوی ایسا ہے جس کا نام بیان نہیں کیا گیا ہے اس روایت کے بقیہ رجال صحیح کے رجال ہیں ۔

عبدخیر بیان کرتے ہیں : سیدنا علی بن ابوطالب رضی اللہ عنہ منبر پر کھڑے ہوئے انہوں نے نبی اکرم صلی اللہ علیہ وسلم کا ذکر کرتے ہوئے یہ بات ارشاد فرمائی : کہ جب نبی اکرم صلی اللہ علیہ وسلم کا وصال ہو گیا تو سیدنا ابوبکر رضی اللہ عنہ کو خلیفہ مقرر کیا گیا انہوں نے نبی اکرم صلی اللہ علیہ وسلم کے عمل کے مطابق عمل کیا اور آپ کے طریقے کے مطابق طریقہ اختیار کیا یہاں تک کہ اللہ تعالیٰ نے اسی حالت میں انہیں وفات دی پھر سیدنا عمر رضی اللہ عنہ کو خلیفہ مقرر کیا گیا تو انہوں نے ان دونوں صاحبان کے طریقے کے مطابق عمل کیا اور ان دونوں کے طریقوں کے مطابق چلے یہاں تک کہ اللہ تعالیٰ نے ان کو بھی وفات دیدی ۔
یہ روایت امام أحمد نے نقل کی ہے ۔ اور اس کے رجال ثقہ ہیں ۔

سیدنا علی رضی اللہ عنہ کے بارے میں یہ بات منقول ہے وہ بیان کرتے ہیں : عرض کی گئی ہے : یا رسول اللہ ! آپ کے بعد ہم کسے امیر بنائیں ؟ نبی اکرم صلی اللہ علیہ وسلم نے فرمایا : اگر تم ابوبکر کو امیر بناتے ہو تو تم اسے امین پاؤ گے ، جو دنیا سے بے رغبت ہو گا ، اور آخرت میں رغبت رکھنے والا ہو گا ، اور اگر تم عمر کو امیر بناتے ہو تو تم اسے قوی اور امین پاؤ گے اللہ تعالیٰ کے بارے میں کسی ملامت کرنے والے کی ملامت اس کو اپنی گرفت میں نہیں لے گی اور اگر تم علی کو امیر بناؤ گے اور میرا نہیں خیال کہ تم ایسا کرو گے ، تو تم اسے ہدایت دینے والا اور ہدایت کا مرکز پاؤ گے وہ تمہیں سیدھے راستے پر لے کے چلے گا ۔
یہ روایت امام أحمد نے امام بزار نے اور امام طبرانی نے معجم اوسط میں نقل کی ہے ۔ امام بزار کے رجال ثقہ ہیں ۔

سیدنا حذیفہ بن یمان رضی اللہ عنہ بیان کرتے ہیں : لوگوں نے عرض کی : یا رسول اللہ ! آپ ہم پر کسی کو خلیفہ مقرر نہیں کرتے ؟ نبی اکرم صلی اللہ علیہ وسلم نے فرمایا : اگر میں نے تم پر کسی کو خلیفہ مقرر کیا اور تم نے میرے خلیفہ کی نافرمانی کی ، تو تم پر عذاب نازل ہو گا لوگوں نے عرض کی : ہم سیدنا ابوبکر رضی اللہ عنہ کو خلیفہ نہ بنا لیں ؟ نبی اکرم صلی اللہ علیہ وسلم نے فرمایا : اگر تم اسے خلیفہ بناتے ہو تو تم اسے جسمانی طور پر کمزور لیکن اللہ کے معاملے میں قوی پاؤ گے لوگوں نے عرض کی : کیا ہم سیدنا عمر رضی اللہ عنہ کو خلیفہ نہ بنا لیں ؟ نبی اکرم صلی اللہ علیہ وسلم نے فرمایا : اگر تم اسے خلیفہ بناتے ہو ، تو تم اسے جسمانی طور پر قوی اور اللہ کے معاملے میں بھی قوی پاؤ گے لوگوں نے عرض کی : کیا ہم سیدنا علی رضی اللہ عنہ کو خلیفہ نہ بنا لیں ؟ نبی اکرم صلی اللہ علیہ وسلم نے فرمایا : اگر تم اسے خلیفہ بناتے ہو ، ویسے تم ایسا کرو گے ، تو نہیں ، تو وہ تمہیں سیدھے راستے پر لے کے چلے گا ، اور تم اسے ہدایت دینے والا اور ہدایت کا مرکز پاؤ گے ۔
یہ روایت امام بزار نے نقل کی ہے ۔ اس کی سند میں ایک راوی ابویقظان عثمان بن عمیر ہے ، اور وہ ضعیف ہے ۔

سیدہ عائشہ صدیقہ رضی اللہ عنہا بیان کرتی ہیں ۔ نبی اکرم صلی اللہ علیہ وسلم نے جب مسجد نبوی کی بنیاد رکھی ، تو آپ ایک پتھر لے کے آئے ، اور آپ نے اسے رکھ دیا پھر سیدنا ابوبکر رضی اللہ عنہ ایک پتھر لے کے آئے ، اور انہوں نے اسے رکھ دیا پھر سیدنا عمر رضی اللہ عنہ پتھر لے کے آئے انہوں نے اسے رکھ دیا پھر سیدنا عثمان رضی اللہ عنہ ایک پتھر لے کے آئے انہوں نے اسے رکھ دیا سیدہ عائشہ رضی اللہ عنہا بیان کرتی ہیں ۔ نبی اکرم صلی اللہ علیہ وسلم سے اس بارے میں دریافت کیا گیا : تو آپ نے ارشاد فرمایا میرے بعد خلافت کا معاملہ یہ ہو گا ۔
یہ روایت امام ابویعلیٰ نے عوام بن حوشب کے حوالے سے ایک شخص کے حوالے سے سیدہ عائشہ رضی اللہ عنہ سے نقل کی ہے ۔ اس کے رجال صحیح کے رجال ہیں صرف تابعی کا معاملہ مختلف ہے ، کیونکہ اس کا نام بیان نہیں کیا گیا ہے اس کے بعد سیدنا جریر رضی اللہ عنہ سے منقول حدیث آگے آئے گی ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم تشریف لائے آپ ایک باغ میں تشریف لے آئے ایک صاحب آئے انہوں نے دروازہ کھٹکھٹایا نبی اکرم صلی اللہ علیہ وسلم نے فرمایا : اے انس اٹھ کر دروازہ کھول دو اور اسے جنت کی خوشخبری دو اور میرے بعد خلافت کی خوشخبری دو میں نے عرض کی : یا رسول اللہ ! کیا میں انہیں بتا دوں نبی اکرم صلی اللہ علیہ وسلم نے فرمایا : تم اسے بتا دو وہ سیدنا ابوبکر رضی اللہ عنہ تھے میں نے ان سے کہا: آپ کو جنت کی خوشخبری ہو اور نبی اکرم صلی اللہ علیہ وسلم کے بعد خلافت کی خوشخبری ہو پھر ایک اور صاحب آئے انہوں نے دروازہ کھٹکھٹایا نبی اکرم صلی اللہ علیہ وسلم نے فرمایا : اے انس اٹھ کر اس کے لئے دروازہ کھول دو اور اسے جنت کی خوشخبری دو اور اسے ابوبکر کے بعد خلافت کی خوشخبری دو سیدنا انس رضی اللہ عنہ کہتے ہیں : میں نے عرض کی : یا رسول اللہ ! کیا میں انہیں بتا دوں نبی اکرم صلی اللہ علیہ وسلم نے فرمایا : تم اسے بتا دو میں نکلا تو وہ سیدنا عمر رضی اللہ عنہ تھے میں نے انہیں کہا: آپ کو جنت کی خوشخبری ہو اور سیدنا ابوبکر رضی اللہ عنہ کے بعد خلافت کی خوشخبری ہو ۔ سیدنا انس رضی اللہ عنہ بیان کرتے ہیں : پھر ایک اور صاحب آئے انہوں نے دروازہ کھٹکھٹایا نبی اکرم صلی اللہ علیہ وسلم نے فرمایا : اے انس اٹھ کر اس کے لئے دروازہ کھولو اور اسے جنت کی خوشخبری دو اور عمر کے بعد خلافت کی خوشخبری دو اور یہ بتا دو کہ وہ مقتول ہو گا ۔ سیدنا انس رضی اللہ عنہ کہتے ہیں : میں باہر نکلا تو وہ سیدنا عثمان رضی اللہ عنہ تھے میں نے ان سے کہا: آپ کو جنت کی اور سیدنا عمر رضی اللہ عنہ کے بعد خلافت کی خوشخبری ہو اور یہ بات جان لیں کہ آپ شہید ہوں گے سیدنا انس رضی اللہ عنہ بیان کرتے ہیں : سیدنا عثمان رضی اللہ عنہ نبی اکرم صلی اللہ علیہ وسلم کی خدمت میں حاضر ہوئے ، اور انہوں نے عرض کی : یا رسول اللہ ! وہ کیوں ؟ اللہ کی قسم ! نہ ، تو میں نے کبھی کوئی سرکشی کی ہے ، اور نہ ہی میں نے کبھی اس کی آرزو کی ہے ، جب سے میں نے آپ کی بیعت کی ہے میں نے ، تو اپنی شرمگاہ کو بھی نہیں چھوا نبی اکرم صلی اللہ علیہ وسلم نے فرمایا : اے عثمان ایسا ہی ہو گا ۔
یہ روایت امام ابویعلیٰ اور امام بزار نے نقل کی ہے ۔ تاہم انہوں نے یہ الفاظ نقل کیے ہیں : ” عنقریب ابوبکر اور عمر کے بعد میری امت کے معاملے کا نگران وہ بنے گا ، اور عنقریب وہ رعایا کی طرف سے شدت کا سامنا کرے گا راوی کہتے ہیں : نبی اکرم صلی اللہ علیہ وسلم نے اس وقت سیدنا عثمان رضی اللہ عنہ کو یہ ہدایت کی کہ وہ خود کو روک کے رکھیں “ ۔ اس روایت کی سند میں ایک راوی صقر بن عبدالرحمن ہے ، اور وہ کذاب ہے امام بزار کی سند میں ایک راوی عتبہ ابوعمرو ہے ، جسے امام نسائی رحمہ اللہ اور دیگر حضرات نے ضعیف قرار دیا ہے ابن حبان نے اسے ثقہ کہا: ہے اس روایت کے بقیہ رجال ثقہ ہیں
یہ روایت امام طبرانی نے معجم اوسط میں دو اسناد کے ساتھ نقل کی ہے ۔ جن میں سے ایک کے رجال بزار کے رجال ہیں ، البتہ سیدنا عثمان رضی اللہ عنہ کے بارے میں انہوں نے یہ الفاظ نقل کیے ہیں : انہوں نے انا للہ وانا الیہ راجعون پڑھا اور اندر آ گئے ۔ ۔ ۔ ۔ ۔ ۔ ۔ ۔ ۔ ۔ باقی کی روایت حسب سابق ہے ۔

سیدنا عبداللہ بن عمر رضی اللہ عنہما بیان کرتے ہیں ۔ نبی اکرم صلی اللہ علیہ وسلم کے زمانہ اقدس میں ہم یہ کہا: کرتے تھے : سیدنا ابوبکر رضی اللہ عنہ ، سیدنا عمر رضی اللہ عنہ سیدنا عثمان ( راوی کہتے ہیں : ( یعنی خلافت کے بارے میں ہم یہ کہا: کرتے تھے ۔
( علامہ ہیثمی فرماتے ہیں : ) میں یہ کہتا ہوں : یہ روایت صحیح میں مذکور ہے تاہم اس میں یہ الفاظ نہیں ہیں : ” خلافت کے بارے میں “ ۔
یہ روایت امام بزار نے اور امام طبرانی نے نقل کی ہے ۔ امام بزار کے رجال صحیح کے رجال ہیں ۔

سیدنا عبداللہ بن عمر رضی اللہ عنہما بیان کرتے ہیں نبی اکرم صلی اللہ علیہ وسلم کے زمانہ اقدس میں ہم یہ کہا: کرتے تھے کہ اس معاملہ ( یعنی خلافت ) کا سب سے زیادہ حق دار کون ہو گا ؟ ہم کہا: کرتے تھے سیدنا ابوبکر رضی اللہ عنہ پھر ہم یہ کہتے تھے کہ اس بارے میں تم لوگوں کی کیا رائے ہے کہ اگر سیدنا ابوبکر رضی اللہ عنہ کا انتقال ہو جائے ، تو اس معاملے ( یعنی حکومت ) کا سب سے زیادہ حق دار کون ہو گا ، تو ہم یہ کہتے تھے ۔ سیدنا عمر بن خطاب رضی اللہ عنہ پھر ہم یہ کہتے تھے کہ اس بارے میں تمہاری کیا رائے ہے ؟ کہ اگر سیدنا عمر رضی اللہ عنہ کا انتقال ہو جاتا ہے ، تو اس معاملے کا سب سے زیادہ حق دار کون ہو گا ؟ تو ہم یہ کہتے تھے : سیدنا عثمان رضی اللہ عنہ ۔
یہ روایت امام طبرانی نے نقل کی ہے ۔ اس کی سند میں ایک راوی یوسف بن خالد سمتی ہے ، اور وہ کذاب ہے ۔

سیدنا ابوخداش بن امیہ رضی اللہ عنہ بیان کرتے ہیں : میں کسی کام کے سلسلے میں نبی اکرم صلی اللہ علیہ وسلم کی خدمت میں حاضر ہوا تو میں نے عرض کی : اگر میں آپ کو نہ پاؤں نبی اکرم صلی اللہ علیہ وسلم نے فرمایا : تو تم ابوبکر کے پاس آ جانا میں نے عرض کی : اگر میں سیدنا ابوبکر رضی اللہ عنہ کو بھی نہ پاؤں ؟ نبی اکرم صلی اللہ علیہ وسلم نے فرمایا : تم عمر کے پاس آ جانا میں نے عرض کی : اگر میں سیدنا عمر رضی اللہ عنہ کو بھی نہ پاؤں ؟ نبی اکرم صلی اللہ علیہ وسلم نے فرمایا : پھر عثمان ؟ میں نے عرض کی : اگر میں سیدنا عثمان کو بھی نہ پاؤں ، تو نبی اکرم صلی اللہ علیہ وسلم خاموش رہے میں نے دو یا تین مرتبہ اپنی بات دہرائی پھر میں نے بعد میں یہ سوچا کہ یہ اللہ تعالیٰ کا فضل ہے ، جسے وہ چاہتا ہے اسے عطا کر دیتا ہے ۔
یہ روایت امام بزار نے نقل کی ہے ۔ اس کی سند میں ایک راوی واقدی ہے ، اور ایسا راوی ہے جس سے میں واقف نہیں ہوں ۔

سیدنا جریر رضی اللہ عنہ بیان کرتے ہیں : جب نبی اکرم صلی اللہ علیہ وسلم مدینہ منورہ تشریف لائے ، تو آپ نے اپنے اصحاب سے فرمایا تم ہمارے ساتھ اہل قباء کی طرف چلو تاکہ ہم انہیں سلام کر لیں نبی اکرم صلی اللہ علیہ وسلم ان لوگوں کے پاس تشریف لائے ان لوگوں نے نبی اکرم صلی اللہ علیہ وسلم کو سلام کیا اور آپ کو خوش آمدید کہا: پھر نبی اکرم صلی اللہ علیہ وسلم نے ارشاد فرمایا : اے اہل قباء میرے پاس پتھریلی زمین سے پتھر لے کے آؤ جب وہاں بہت سے پتھر اکٹھے ہو گئے ، تو نبی اکرم صلی اللہ علیہ وسلم کے پاس ایک نیزہ تھا آپ نے ان لوگوں کے قبلہ کی طرف لکیر لگائی پھر نبی اکرم صلی اللہ علیہ وسلم نے ایک پتھر لیا اور آپ نے اسے رکھ دیا پھر آپ نے فرمایا : اے ابوبکر تم ایک پتھر لو اور میرے پتھر کے ساتھ رکھ دو پھر آپ نے فرمایا : اے عمر تم ایک پتھر لو اور ابوبکر کے پتھر کے پہلو میں اسے رکھ دو پھر آپ نے فرمایا : اے عثمان تم ایک پتھر لو اور اسے عمر کے پتھر کے پہلو میں رکھ دو پھر آپ پیچھے موجود لوگوں کی طرف متوجہ ہوئے ، اور ارشاد فرمایا : ہر شخص جہاں چاہے اس لکیر کے مطابق پتھر رکھ دے ۔
یہ روایت امام طبرانی نے نقل کی ہے ۔ اور اس کی سند میں ایسا راوی ہے جس سے میں واقف نہیں ہوں ۔

سیدنا سفینہ رضی اللہ عنہ بیان کرتے ہیں : ایک صاحب نے عرض کی : یا رسول اللہ ! میں نے خواب میں دیکھا کہ جیسے آسمان سے ایک ترازو اترا ہے آپ کا وزن سیدنا ابوبکر رضی اللہ عنہ سے کیا گیا تو آپ کا پلڑا سیدنا ابوبکر رضی اللہ عنہ کے مقابلے میں بھاری تھا پھر سیدنا ابوبکر رضی اللہ عنہ کا وزن سیدنا عمر رضی اللہ عنہ کے ساتھ کیا گیا تو سیدنا عمر رضی اللہ عنہ کے مقابلے میں سیدنا ابوبکر رضی اللہ عنہ کا پلڑا بھاری تھا پھر سیدنا عمر رضی اللہ عنہ کا وزن سیدنا عثمان رضی اللہ عنہ کے ساتھ کیا گیا تو سیدنا عمر رضی اللہ عنہ کا پلڑا بھاری تھا پھر اس ترازو کو اوپر لے جایا گیا تو نبی اکرم صلی اللہ علیہ وسلم نے اس کی یہ تعبیر کی کہ اس سے مراد خلافت نبوت ہے پھر اللہ تعالیٰ جسے چاہیے گا حکومت عطا کر دے گا ۔
یہ روایت امام بزار نے نقل کی ہے ۔ اس کی سند میں ایک راوی مؤمل بن اسماعیل ہے ، جسے یحیی بن معین اور ابن حبان نے ثقہ قرار دیا ہے امام بخاری رحمہ اللہ اور دیگر حضرات نے اسے ضعیف کہا: ہے اس روایت کے بقیہ رجال ثقہ ہیں ۔

سیدنا عبداللہ بن عمرو رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا : ” میرے بعد بارہ خلفاء ہوں گے جن میں سے ایک ابوبکر صدیق ہیں وہ میرے بعد تھوڑا عرصہ رہے گا ، اور ایک ( خلیفہ ) عربوں کی چکی کو گھمانے والا شخص ہے جو قابل تعریف زندگی گزارے گا ، اور شہید ہونے کے عالم میں مرے گا ، ایک صاحب نے عرض کی : وہ کون ہے ؟ نبی اکرم صلی اللہ علیہ وسلم نے فرمایا : وہ عمر ہے پھر آپ سیدنا عثمان رضی اللہ عنہ کی طرف متوجہ ہوئے ، اور فرمایا : اے عثمان ! اگر اللہ تعالیٰ تمہیں ایک قمیص پہنائے ، اور لوگ اسے اتارنے کا ارادہ کریں ، تو تم اسے نہ اتارنا اللہ کی قسم ! اگر تم نے اسے اتار دیا تو تم جنت کو اس وقت تک نہیں دیکھو گے ، جب تک اونٹ سوئی کے نا کہ میں داخل نہیں ہو جاتا“ ۔
یہ روایت امام طبرانی نے معجم اوسط اور معجم کبیر میں نقل کی ہے ۔ اس کی سند میں ایک راوی مطلب بن شعیب ہے ابن عدی کہتے ہیں : میں نے اس کے حوالے سے کوئی منکر حدیث نہیں دیکھی صرف ایک حدیث کا معاملہ مختلف ہے ، اور وہ اس کے علاوہ ہے اس روایت کے بقیہ رجال کی ، توثیق کی گئی ہے ۔

سیدنا عبداللہ بن عباس رضی اللہ عنہما اللہ تعالیٰ کے اس فرمان کے بارے میں نقل کرتے ہیں ( ارشاد باری تعالیٰ ہے : ) ” اور جب نبی نے اپنی ایک زوجہ کے ساتھ سرگوشی میں ایک بات کی ۔ ۔ ۔ ۔ ۔ ۔ “ سیدنا عبداللہ بن عباس رضی اللہ عنہما بیان کرتے ہیں : سیدہ حفصہ رضی اللہ عنہا نبی اکرم صلی اللہ علیہ وسلم کے پاس اپنے گھر میں آئیں اس وقت نبی اکرم صلی اللہ علیہ وسلم نے ( سیدہ حفصہ رضی اللہ عنہا کے گھر میں ) سیدہ ماریہ رضی اللہ عنہا کے ساتھ وظیفہ زوجیت ادا کیا تھا نبی اکرم صلی اللہ علیہ وسلم نے سیدہ حفصہ رضی اللہ عنہا کو فرمایا تم یہ بات عائشہ کو نہ بتانا ، میں تمہیں خوشخبری دوں گا وہ یہ کہ ابوبکر کے بعد تمہارا والد حکمران بنے گا ، جب میں مر جاؤں گا سیدہ حفصہ رضی اللہ عنہا گئیں اور انہوں نے سیدہ عائشہ رضی اللہ عنہا کو اس بارے میں بتا دیا کہ انہوں نے نبی اکرم صلی اللہ علیہ وسلم کو دیکھا کہ نبی اکرم صلی اللہ علیہ وسلم نے سیدہ ماریہ رضی اللہ عنہا کے ساتھ وظیفہ زوجیت ادا کیا ہے سیدہ حفصہ رضی اللہ عنہا نے سیدہ عائشہ رضی اللہ عنہا کو یہ بھی بتایا کہ نبی اکرم صلی اللہ علیہ وسلم نے انہیں یہ بات بتائی ہے کہ سیدنا ابوبکر رضی اللہ عنہ نبی اکرم صلی اللہ علیہ وسلم کے بعد حکمران بنیں گے اور سیدنا عمر رضی اللہ عنہ ان کے بعد حکمران بنیں گے ، تو سیدہ عائشہ رضی اللہ عنہا نے نبی اکرم صلی اللہ علیہ وسلم سے کہا: آپ کو یہ بات کس نے بتائی ہے ۔ نبی اکرم صلی اللہ علیہ وسلم نے فرمایا : مجھے علم رکھنے والی اور خبر رکھنے والی ذات نے یہ بات بتائی ہے سیدہ عائشہ رضی اللہ عنہا نے کہا: میں آپ کی طرف اس وقت تک نہیں دیکھوں گی جب تک آپ ماریہ کو ( اپنے اوپر ) حرام قرار نہیں دیتے نبی اکرم صلی اللہ علیہ وسلم نے انہیں حرام قرار دیدیا تو اللہ تعالیٰ نے یہ آیت نازل کی : ” اے نبی تم اس چیز کو کیوں حرام قرار دیتے ہو جو اللہ تعالیٰ نے تمہارے لئے حلال قرار دی ہے “ ۔
یہ روایت امام طبرانی نے نقل کی ہے ۔ اس کی سند میں ایک راوی عمرو بجلی ہے ، اور وہ ضعیف ہے ابن حبان نے اسے ثقہ قرار دیا ہے ایک راوی ضحاک بن مزاحم ہے اس نے سیدنا عبداللہ بن عباس رضی اللہ عنہما سے سماع نہیں کیا ہے ۔

سیدنا عصمہ رضی اللہ عنہ بیان کرتے ہیں : خزاعہ قبیلے کا ایک شخص آیا سیدنا علی رضی اللہ عنہ سے اس کی ملاقات ہوئی انہوں نے دریافت کیا : تم کس سلسلے میں آئے ہو ؟ اس نے جواب دیا : میں نبی اکرم صلی اللہ علیہ وسلم سے یہ پوچھنے کے لئے آیا ہوں کہ جب اللہ تعالیٰ آپ کو وفات دیدے گا ، تو ہم اپنے اموال کی زکوۃ کسے ادا کریں گے ؟ نبی اکرم صلی اللہ علیہ وسلم نے ارشاد فرمایا : ابوبکر کو اس نے دریافت کیا : جب سیدنا ابوبکر رضی اللہ عنہ کا انتقال ہو جائے ، تو پھر کس کو ؟ نبی اکرم صلی اللہ علیہ وسلم نے فرمایا : عمر کو اس نے دریافت کیا : جب سیدنا عمر رضی اللہ عنہ کا انتقال ہو جائے ، تو پھر کس کو ؟ نبی اکرم صلی اللہ علیہ وسلم نے فرمایا : عثمان کو ، اس نے دریافت کیا : اگر سیدنا عثمان رضی اللہ عنہ کا انتقال ہو جائے ، تو پھر کس کو ؟ نبی اکرم صلی اللہ علیہ وسلم نے فرمایا : تم خود دیکھ لینا ۔
یہ روایت امام طبرانی نے نقل کی ہے ۔ اس کی سند میں ایک راوی فضل بن مختار ہے ، اور وہ انتہائی ضعیف ہے ۔

سیدنا عصمہ رضی اللہ عنہ بیان کرتے ہیں : دیہاتی علاقے کا ایک فرد اپنا اونٹ لے کے آیا نبی اکرم صلی اللہ علیہ وسلم کی اس سے ملاقات ہوئی نبی اکرم صلی اللہ علیہ وسلم نے اس سے اس کا اونٹ خرید لیا سیدنا علی رضی اللہ عنہ کی اس شخص سے ملاقات ہوئی سیدنا علی رضی اللہ عنہ نے دریافت کیا : تم کس سلسلے میں آئے ہو ؟ اس نے کہا: میں ایک اونٹ لے کے آیا تھا جسے نبی اکرم صلی اللہ علیہ وسلم نے خرید لیا ہے سیدنا علی رضی اللہ عنہ نے دریافت کیا : کیا نبی اکرم صلی اللہ علیہ وسلم نے تمہیں نقد ادائیگی کر دی ہے ؟ اس نے جواب دیا : جی نہیں میں نے انہیں اس شرط پر فروخت کیا ہے کہ ادائیگی بعد میں ہو گی سیدنا علی رضی اللہ عنہ نے اس سے کہا: تم واپس نبی اکرم صلی اللہ علیہ وسلم کی خدمت میں جاؤ اور نبی اکرم صلی اللہ علیہ وسلم کی خدمت میں عرض کرو : یا رسول اللہ ! اگر آپ کے ساتھ کوئی معاملہ پیش آ جاتا ہے ، تو مجھے میرے مال کی ادائیگی کون کرے گا ؟ پھر تم اس بات کا جائزہ لینا کہ نبی اکرم صلی اللہ علیہ وسلم تمہیں کیا جواب دیتے ہیں اور مجھے اس کے بارے میں بتانا اس شخص نے عرض کی : یا رسول اللہ اگر آپ کے ساتھ کوئی حادثہ پیش آ جاتا ہے ، تو مجھے کون ادائیگی کرے گا ؟ نبی اکرم صلی اللہ علیہ وسلم نے ارشاد فرمایا : ابوبکر ! اس شخص نے اس بارے میں سیدنا علی رضی اللہ عنہ کو بتایا سیدنا علی رضی اللہ عنہ نے اس سے فرمایا تم واپس جاؤ اور ۔ نبی اکرم صلی اللہ علیہ وسلم سے دریافت کرو کہ اگر سیدنا ابوبکر رضی اللہ عنہ کے ساتھ کوئی حادثہ پیش آ جاتا ہے ، تو پھر کون ادائیگی کرے گا : اس شخص نے نبی اکرم صلی اللہ علیہ وسلم سے یہ سوال کیا ، تو نبی اکرم صلی اللہ علیہ وسلم نے ارشاد فرمایا : عمرو ، وہ شخص آیا اس نے سیدنا علی رضی اللہ عنہ کو بتایا تو سیدنا علی رضی اللہ عنہ نے اس سے فرمایا تم واپس جاؤ اور نبی اکرم صلی اللہ علیہ وسلم سے یہ سوال کرو کہ اگر سیدنا عمر رضی اللہ عنہ کا انتقال ہو جائے گا ، تو پھر کون ادائیگی کرے گا ؟ وہ شخص نبی اکرم صلی اللہ علیہ وسلم کے پاس آیا آپ سے اس بارے میں دریافت کیا : تو نبی اکرم صلی اللہ علیہ وسلم نے فرمایا : تمہارا ستیاناس ہو جب عمر مر جائے گا ، تو اگر تم سے ہو سکے ، تو اس وقت تم بھی مر جانا ۔
یہ روایت امام طبرانی نے نقل کی ہے ۔ اس کی سند میں ایک راوی فضل بن مختار ہے ، اور وہ ضعیف ہے ۔

سیدنا حذیفہ رضی اللہ عنہ بیان کرتے ہیں : جب نبی اکرم صلی اللہ علیہ وسلم کا وصال ہو گیا تو اللہ تعالیٰ نے سیدنا ابوبکر رضی اللہ عنہ کو خلیفہ بنا دیا پھر جب سیدنا ابوبکر رضی اللہ عنہ کا انتقال ہو گیا تو اللہ تعالیٰ نے سیدنا عمر رضی اللہ عنہ کو خلیفہ بنا دیا پھر جب سیدنا عمر رضی اللہ عنہ کا انتقال ہو گیا تو اللہ تعالیٰ نے سیدنا عثمان رضی اللہ عنہ کو خلیفہ بنا دیا ۔
یہ روایت امام طبرانی نے معجم اوسط میں نقل کی ہے ۔ اور اس کے رجال ثقہ ہیں ۔

سیدنا عبداللہ بن عمر رضی اللہ عنہما بیان کرتے ہیں : جب نبی اکرم صلی اللہ علیہ وسلم کا وصال ہوا تو مسلمانوں نے اپنے سب سے بہتر شخص کا جائزہ لیا اور انہیں خلیفہ بنا دیا اور وہ سیدنا ابوبکر رضی اللہ عنہ تھے پھر جب ان کا انتقال ہوا تو مسلمانوں نے اپنے سب سے بہتر شخص کا جائزہ لیا اور اسے اپنا خلیفہ بنا دیا اور وہ سیدنا عمر رضی اللہ عنہ تھے جب سیدنا عمر رضی اللہ عنہ کا انتقال ہوا ( راوی کو شک ہے شاید یہ الفاظ ہیں : ) جب سیدنا عمر رضی اللہ عنہ کو شہید کر دیا گیا تو مسلمانوں نے اپنے سب سے بہتر شخص کا جائزہ لیا اور انہیں خلیفہ بنا دیا اور وہ سیدنا عثمان رضی اللہ عنہ تھے اگر تم انہیں قتل کر دو گے ، تو تم میرے پاس ایسے فرد کو لے آؤ جو ان سے زیادہ بہتر ہو اللہ کی قسم ! میں یہ نہیں سمجھتا کہ تم ایسا کر پاؤ گے ۔
یہ روایت امام طبرانی نے نقل کی ہے ۔ اس کی سند میں ایک راوی علی بن حسان عطار ہے ، اور میں اس سے واقف نہیں ہوں اس روایت کے بقیہ رجال ثقہ ہیں ۔

سیدنا ابوذر غفاری رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کے پاس موجود تھے آپ نے کچھ کنکریاں پکڑیں ان کنکریوں نے آپ کے ہاتھ میں تسبیح پڑھی پھر نبی اکرم صلی اللہ علیہ وسلم نے انہیں رکھ دیا تو وہ خاموش ہو گئیں ، پھر نبی اکرم صلی اللہ علیہ وسلم نے انہیں پکڑ لیا تو انہوں نے آپ کے ہاتھ میں تسبیح پڑھی پھر نبی اکرم صلی اللہ علیہ وسلم نے وہ سیدنا ابوبکر رضی اللہ عنہ کو دیدیں انہوں نے سیدنا ابوبکر رضی اللہ عنہ کے ہاتھ میں تسبیح پڑھی پھر انہوں نے انہیں رکھ دیا تو وہ خاموش ہو گئیں ، پھر نبی اکرم صلی اللہ علیہ وسلم نے انہیں لیا تو انہوں نے نبی اکرم صلی اللہ علیہ وسلم کے ہاتھ میں تسبیح پڑھی پھر نبی اکرم صلی اللہ علیہ وسلم نے انہیں رکھ دیا تو وہ خاموش ہو گئیں ، پھر نبی اکرم صلی اللہ علیہ وسلم نے وہ سیدنا عمر رضی اللہ عنہ کو دیدیں ، تو انہوں نے سیدنا عمر رضی اللہ عنہ کے ہاتھ میں تسبیح پڑھی پھر نبی اکرم صلی اللہ علیہ وسلم نے انہیں لیا تو انہوں نے نبی اکرم صلی اللہ علیہ وسلم کے ہاتھ میں تسبیح پڑھی پھر نبی اکرم صلی اللہ علیہ وسلم نے انہیں رکھ دیا تو وہ خاموش ہو گئیں ، پھر نبی اکرم صلی اللہ علیہ وسلم نے وہ سیدنا عثمان رضی اللہ عنہ کو دیں ، تو انہوں نے سیدنا عثمان رضی اللہ عنہ کے ہاتھ میں تسبیح پڑھی پھر نبی اکرم صلی اللہ علیہ وسلم نے وہ سیدنا علی رضی اللہ عنہ کو دیں انہوں نے انہیں رکھ دیا تو وہ خاموش ہو گئیں ۔ زہری کہتے ہیں : یہ وہ خلافت تھی ، جو اللہ تعالیٰ نے سیدنا ابوبکر رضی اللہ عنہ اور سیدنا عمر رضی اللہ عنہ اور سیدنا عثمان رضی اللہ عنہ کو عطا کی تھی ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی محمد بن ابوحمید ہے ، اور وہ ضعیف ہے اس روایت کا ایک اس سے زیادہ عمدہ حوالہ ہے جو ” علامات نبوت “ سے متعلق باب میں آئے گا اس کی سند صحیح ہے ، اور اس میں خلافت کے بارے میں زہری کا قول نہیں ہے ۔

سیدنا نعمان بن بشیر رضی اللہ عنہ بیان کرتے ہیں : ایک مرتبہ زید بن خارجہ مدینہ کے کسی راستے سے چلتے ہوئے جا رہے تھے کہ ظہری اور عصر کے درمیان وہ گر کر مر گئے ان کی میت ان کے گھر منتقل کی گئی انہیں دو کپڑوں اور ایک چادر میں ڈھانپ دیا گیا جب مغرب اور عشاء کے درمیان کا وقت ہوا اور انصار کی خواتین اکٹھے ہو کر ان کے اردگرد رونے لگیں ، تو لوگوں نے چادر کے نیچے سے ایک آواز سنی کوئی شخص یہ کہہ رہا تھا اے لوگو تم خاموش ہو جاؤ یہ بات دو مرتبہ کہی گئی ان کے چہرے اور سینے سے چادر ہٹا دی گئی ، تو انہوں نے کہا: سیدنا محمد اللہ کے رسول ہیں جو امی نبی ہیں اور انبیاء کے سلسلے کو ختم کرنے والے ہیں اور یہ بات کتاب میں موجود ہے پھر ان کی زبانی یہ بات کہی گئی کہ انہوں نے سچ کہا: ابوبکر صدیق اللہ کے رسول کے خلیفہ ہیں جو قوی اور امین ہیں جسمانی طور پر کمزور ہیں اور اللہ کے معاملے میں قوی ہیں اور یہ بات پہلے کی کتاب ( یا تحریر ) میں موجود ہے پھر ان کی زبانی یہ بات کہی گئی انہوں نے سچ کہا: یہ بات تین مرتبہ کہی گئی درمیان والے عبداللہ ( یعنی سیدنا عمر رضی اللہ عنہ ) امیر المؤمنین ہیں جو اللہ تعالیٰ کے بارے میں کسی ملامت کرنے والے کی ملامت سے خوف زدہ نہیں ہوں گے اور وہ لوگوں کو اس بات سے روکیں گے کہ ان کا طاقتور شخص ان کے کمزور شخص کا حق ( کھائے ) یہ بات پہلی کتاب میں مذکور ہے پھر ان کی زبانی یہ بات کہی گئی انہوں نے سچ کہا: ہے ۔ انہوں نے سچ کہا: ہے پھر انہوں نے کہا: سیدنا عثمان رضی اللہ عنہ امیر المؤمنین ہیں جو اہل ایمان کے لئے رحم والے ہیں دو گزر چکے ہیں اور چار باقی رہ گئے ہیں لوگوں نے اختلاف شروع کیا اور ان کا کوئی نظام نہیں ہے ، اور حرمتیں پامال کی جانے لگی ہیں قیامت قریب آ گئی ہے ، اور لوگوں نے ایک دوسرے ( کے حقوق ) کو کھانا شروع کر دیا ہے ۔

ایک روایت میں سیدنا نعمان بن بشیر رضی اللہ عنہ کے حوالے سے یہ بات منقول ہے وہ بیان کرتے ہیں : جب سیدنا زید بن خارجہ رضی اللہ عنہ کا انتقال ہوا تو میں سیدنا عثمان رضی اللہ عنہ کے نکلنے کا انتظار کرتا رہا میں نے سوچا وہ دو رکعت ادا کر رہے ہوں گے زید بن خارجہ کے چہرے سے کپڑا ہٹایا گیا تو انہوں نے کہا: السلام علیکم السلام علیکم گھر والے لوگ بات چیت کر رہے تھے راوی کہتے ہیں : میں اس وقت نماز پڑھ رہا تھا میں نے کہا: سبحان اللہ سبحان اللہ ، تو انہوں نے کہا: تم خاموش رہو تم خاموش رہو ۔ ۔ ۔ ۔ ۔ ۔ ۔ ۔ باقی روایت حسب سابق ہے یہ تمام روایات امام طبرانی نے معجم کبیر میں نقل کی ہیں اور معجم اوسط میں زیادہ اختصار کے ساتھ نقل کی ہیں جو دو اسناد کے ساتھ منقول ہیں ۔ معجم کبیر میں ان دو میں سے ایک کے رجال ثقہ ہیں ۔

سیدنا ابوطفیل رضی اللہ عنہ روایت کرتے ہیں ۔ نبی اکرم صلی اللہ علیہ وسلم نے ارشاد فرمایا : ” میں نے خواب میں دیکھا کہ جیسے میں زمین سے پانی نکال رہا ہوں ، میرے پاس سیاہ رنگ کی بکریاں آئی ہیں اور خاکستری رنگ کی بکریاں آئی ہیں پھر ابوبکر آیا اس نے ایک یا دو ڈول نکالے اس کے نکالنے میں کمزوری تھی اللہ تعالیٰ اس کی مغفرت کرے پھر عمر آیا اس نے پانی نکالنا شروع کیا ، تو وہ ڈول بڑا ڈول بن گیا اس نے حوض کو بھر دیا اور آنے والوں کو سیراب کر دیا میں نے اس جیسا طاقتور شخص نہیں دیکھا جس نے عمر سے زیادہ اچھے طریقے سے پانی نکالا ہو تو میں نے اس کی یہ تعبیر کی ہے کہ سیاہ بکریوں سے مراد عرب ہیں اور خاکستری بکریوں سے مراد عجمی ہیں “ ۔
یہ روایت امام أحمد نے نقل کی ہے ۔ اس کی سند میں ایک راوی علی بن یزید ہے جس میں ضعف پایا جاتا ہے اس روایت کے بقیہ رجال ثقہ ہیں ۔

سیدنا حذیفہ رضی اللہ عنہ بیان کرتے ہیں : نبی اکرم صلی اللہ علیہ وسلم کو جزیرہ عرب کی طرف بھیجا گیا تھا ، آپ نے اسے عدل و انصاف سے بھر دیا ۔ پھر سیدنا ابوبکر رضی اللہ عنہ ان کو لے کر چلے ، اور اچھے طریقے سے لے کر چلے ، پھر سیدنا عمر رضی اللہ عنہ ان کو لے کر چلے ، اور اچھے طریقے سے لے کر چلے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی سعد بن حذیفہ ہے ، اور میں اس سے واقف نہیں ہوں ۔

سعید بن یحیی بن قیس بن عیسیٰ ، اپنے والد کے حوالے سے یہ بات نقل کرتے ہیں : سیدہ حفصہ رضی اللہ عنہا نے عرض کی : یا رسول اللہ ! جب آپ بیمار ہوئے ، تو آپ نے سیدنا ابوبکر رضی اللہ عنہ کو آگے کر دیا نبی اکرم صلی اللہ علیہ وسلم نے فرمایا : میں نے اسے آگے نہیں کیا بلکہ اللہ تعالیٰ نے اسے آگے کیا ہے ۔
یہ روایت امام طبرانی نے معجم اوسط میں نقل کی ہے ۔ اور اس کی سند میں ایسا راوی ہے جس سے میں واقف نہیں ہوں ۔

سیدنا عبدالرحمن بن ابوبکر رضی اللہ عنہ روایت کرتے ہیں ۔ نبی اکرم صلی اللہ علیہ وسلم نے ارشاد فرمایا : ” میرے پاس دوات اور ( جانور کے ) کندھے کی ( ہڈی ) لے کے آؤ تاکہ میں تمہیں ایسی تحریر لکھ دوں جس کے بعد تم گمراہ نہیں ہو گے راوی کہتے ہیں : پھر ہم نے آپ کو کروٹ دلائی پھر آپ ہماری طرف متوجہ ہوئے ، اور آپ نے ارشاد فرمایا : اللہ تعالیٰ اور اہل ایمان صرف ابوبکر کو ہی مانیں گے “ ۔
یہ روایت امام طبرانی نے نقل کی ہے ۔ اس کی سند میں ایسا راوی ہے جس سے میں واقف نہیں ہوں ۔

سیدنا عباس رضی اللہ عنہ بیان کرتے ہیں : میں نبی اکرم صلی اللہ علیہ وسلم کی خدمت میں حاضر ہوا آپ کے پاس آپ کی ازواج موجود تھیں ان سب نے مجھ سے پردہ لیا صرف میمونہ رضی اللہ عنہا نے نہیں کیا نبی اکرم صلی اللہ علیہ وسلم نے ارشاد فرمایا گھر میں موجود ہر وہ شخص جو ( مجھے ) دوائی پلانے کے وقت موجود تھا اسے بھی دوائی پلائی جائے البتہ اس حکم میں سیدنا عباس شامل نہیں ہوں گے پھر نبی اکرم صلی اللہ علیہ وسلم نے فرمایا : ابوبکر سے کہو کہ لوگوں کو نماز پڑھائے سیدہ عائشہ رضی اللہ عنہا نے سیدہ حفصہ رضی اللہ عنہا سے کہا: تم نبی اکرم صلی اللہ علیہ وسلم کی خدمت میں یہ گزارش کرو کہ سیدنا ابوبکر رضی اللہ عنہ ایک ایسے فرد ہیں کہ جب وہ آپ کی جگہ کھڑے ہوں گے ، تو رونے لگیں گے نبی اکرم صلی اللہ علیہ وسلم نے فرمایا : ابوبکر سے کہو کہ وہ لوگوں کو نماز پڑھائے سیدنا ابوبکر رضی اللہ عنہ کھڑے ہوئے انہوں نے نماز پڑھانی شروع کی نبی اکرم صلی اللہ علیہ وسلم کو اپنی طبیعت میں بہتری محسوس ہوئی آپ صلی اللہ علیہ وسلم تشریف لے آئے ، سیدنا ابوبکر رضی اللہ عنہ پیچھے ہٹنے لگے ، نبی اکرم صلی اللہ علیہ وسلم ان کے پہلو میں تشریف فرما ہوئے ، اور پھر آپ نے تلاوت کی ۔
یہ روایت امام أحمد اور امام طبرانی نے نقل کی ہے ۔ اور امام بزار نے بہت زیادہ اختصار کے ساتھ نقل کی ہے ۔ امام ابویعلیٰ نے ان کے مقابلے میں زیادہ مکمل روایت کے طور پر نقل کی ہے ۔ اس کی سند میں ایک راوی قیس بن ربیع ہے ، جسے شعبہ اور ثوری نے ثقہ قرار دیا ہے اس روایت کے بقیہ رجال ثقہ ہیں ۔

سیدنا سہل بن سعد رضی اللہ عنہ بیان کرتے ہیں : انصار کے درمیان جھگڑا ہو گیا نبی اکرم صلی اللہ علیہ وسلم ان کے درمیان صلح کرانے کے لئے تشریف لے گئے ، جب آپ واپس آئے ، تو نماز کھڑی ہو چکی تھی اور سیدنا ابوبکر رضی اللہ عنہ لوگوں کو نماز پڑھا رہے تھے ، تو نبی اکرم صلی اللہ علیہ وسلم نے سیدنا ابوبکر رضی اللہ عنہ کے پیچھے نماز ادا کی ۔
یہ روایت امام طبرانی نے نقل کی ہے ۔
یہ روایت صحیح میں مذکور ہے تاہم اس میں یہ الفاظ نہیں ہیں : ” نبی اکرم صلی اللہ علیہ وسلم نے سیدنا ابوبکر رضی اللہ عنہ کے پیچھے نماز ادا کی “ ۔ امام طبرانی کی سند میں ایک راوی عبداللہ بن جعفر بن نجیح ہے ، اور وہ انتہائی ضعیف ہے ۔

سیدنا انس رضی اللہ عنہ بیان کرتے ہیں : جب نبی اکرم صلی اللہ علیہ وسلم اس بیماری میں مبتلاء ہوئے جس میں آپ کا وصال ہو گیا تھا تو اسی دوران سیدنا بلال رضی اللہ عنہ آپ کو بلانے کے لئے آئے دو مرتبہ کے بعد نبی اکرم صلی اللہ علیہ وسلم نے ارشاد فرمایا : اے بلال ! تم نے دو مرتبہ تبلیغ کر دی ہے جو شخص چاہے وہ نماز ادا کر لے اور جو شخص چاہے وہ ترک کر دے سیدنا بلال رضی اللہ عنہ پھر آپ کے پاس آئے انہوں نے عرض کی : یا رسول اللہ ! میرے ماں باپ آپ پر قربان ہوں نماز کون پڑھائے ؟ نبی اکرم صلی اللہ علیہ وسلم نے فرمایا : ابوبکر سے کہو کہ لوگوں کو نماز پڑھائے ، جب سیدنا ابوبکر رضی اللہ عنہ آگے بڑھے ، تو نبی اکرم صلی اللہ علیہ وسلم کے سامنے سے پردہ ہٹایا گیا راوی کہتے ہیں : ہم نے نبی اکرم صلی اللہ علیہ وسلم کی طرف دیکھا تو آپ کا چہرہ مبارک ) سفید چاندی کی طرح محسوس ہو رہا تھا آپ کے جسم پر چادر موجود تھی سیدنا ابوبکر رضی اللہ عنہ پیچھے ہٹنے لگے ۔ انہوں نے یہ گمان کیا کہ شاید آپ تشریف لانے لگے ہیں ۔ نبی اکرم صلی اللہ علیہ وسلم نے سیدنا ابوبکر رضی اللہ عنہ کو اشارہ کیا کہ وہ کھڑے رہیں اور نماز پڑھائیں ، تو سیدنا ابوبکر رضی اللہ عنہ نے لوگوں کو نماز پڑھائی اس کے بعد ہم نے نبی اکرم صلی اللہ علیہ وسلم کو نہیں دیکھا ۔
یہ روایت امام أحمد نے نقل کی ہے ۔ اس کی سند میں ایک راوی سفیان بن حسین ہے ، اور وہ زہری کے بارے میں ضعیف ہے ، اور یہ حدیث ان روایات میں سے جو اس نے زہری کے حوالے سے نقل کی ہیں ۔

سیدنا بریده رضی اللہ عنہ بیان کرتے ہیں : نبی اکرم صلی اللہ علیہ وسلم بیمار ہو گئے آپ نے ارشاد فرمایا : ابوبکر سے کہو کہ وہ لوگوں کو نماز پڑھائے سیدہ عائشہ رضی اللہ عنہا نے عرض کی : یا رسول اللہ ! میرے والد ایک نرم دل شخص ہیں ۔ نبی اکرم صلی اللہ علیہ وسلم نے فرمایا : ابوبکر سے کہو کہ وہ لوگوں کو نماز پڑھائے تم سیدنا یوسف علیہ السلام والی خواتین کی طرح ہو پھر سیدنا ابوبکر رضی اللہ عنہ نے لوگوں کو نماز پڑھائی اور نبی اکرم صلی اللہ علیہ وسلم زندہ تھے ( یعنی نبی اکرم صلی اللہ علیہ وسلم کی حیات میں سیدنا ابوبکر رضی اللہ عنہ نے لوگوں کو نماز پڑھائی ) ۔
یہ روایت امام أحمد نے نقل کی ہے ۔ اور اس کے رجال صحیح کے رجال ہیں ۔

سیدنا سالم بن عبید رضی اللہ عنہ جو اصحاب صفہ میں سے ہیں وہ بیان کرتے ہیں : نبی اکرم صلی اللہ علیہ وسلم کی بیماری کے دوران آپ پر بے ہوشی طاری ہوئی آپ کو ہوش آیا تو آپ نے دریافت کیا : نماز کا وقت ہو گیا ہے ؟ ہم نے عرض کی : جی ہاں نبی اکرم صلی اللہ علیہ وسلم نے فرمایا : بلال سے کہو کہ وہ اذان دے اور ابوبکر کو کہو کہ وہ لوگوں کو نماز پڑھا دے سیدہ عائشہ رضی اللہ عنہا کہتی ہیں : میرے والد ایک نرم دل شخص ہیں اگر آپ ان کی بجائے کسی اور کو نماز پڑھانے کی ہدایت کریں ، تو یہ مناسب ہو گا پھر نبی اکرم صلی اللہ علیہ وسلم پر بے ہوشی طاری ہوئی ، جب آپ کو ہوش آیا ، تو نبی اکرم صلی اللہ علیہ وسلم نے ارشاد فرمایا کیا نماز کا وقت ہو گیا ہے میں نے عرض کی : جی ہاں نبی اکرم صلی اللہ علیہ وسلم نے فرمایا : بلال سے کہو کہ وہ اذان دے اور ابوبکر سے کہو کہ وہ لوگوں کو نماز پڑھائے سیدہ عائشہ رضی اللہ عنہا نے عرض کی : میرے والد ایک نرم دل شخص ہیں اگر آپ ان کی بجائے کسی اور کو نماز پڑھانے کا حکم دیدیں ، تو یہ مناسب ہو گا پھر نبی اکرم صلی اللہ علیہ وسلم پر بے ہوشی طاری ہو گئی پھر جب نبی اکرم صلی اللہ علیہ وسلم کو ہوش آیا ، تو نبی اکرم صلی اللہ علیہ وسلم نے ارشاد فرمایا کیا نماز قائم ہو چکی ہے ہم نے عرض کی : جی ہاں نبی اکرم صلی اللہ علیہ وسلم نے فرمایا : میرے پاس کسی شخص کو لے کے آؤ جس سے میں ٹیک لگاؤں سیدنا بریدہ رضی اللہ عنہ اور ایک شخص آپ کے پاس آئے ، تو آپ نے ان دونوں پر ٹیک لگائی اور آپ مسجد میں تشریف لے آئے ، جب آپ مسجد میں داخل ہوئے ، تو سیدنا ابوبکر رضی اللہ عنہ لوگوں کو نماز پڑھا رہے تھے ۔ سیدنا ابوبکر رضی اللہ عنہ پیچھے ہٹنے لگے ، تو نبی اکرم صلی اللہ علیہ وسلم نے انہیں منع کر دیا آپ کو سیدنا ابوبکر رضی اللہ عنہ کے پہلو میں بٹھا دیا گیا یہاں تک کہ وہ نماز پڑھ کر فارغ ہوئے پھر جب نبی اکرم صلی اللہ علیہ وسلم کا وصال ہو گیا تو سیدنا عمر رضی اللہ عنہ نے یہ کہا: میں کسی شخص کو یہ کہتے ہوئے نہ سنوں کہ اللہ کے رسول کا انتقال ہو گیا ہے اگر میں نے کسی کو سنا تو اسے تلوار مار دوں گا ۔ سیدنا ابوبکر رضی اللہ عنہ میری کلائی پکڑ کر آئے انہوں نے میرے ساتھ ٹیک لگائی ہوئی تھی وہ چلتے ہوئے آئے انہوں نے کہا: تم لوگ گنجائش کرو تم لوگ ان کے لئے گنجائش کرو پھر وہ نبی اکرم صلی اللہ علیہ وسلم پر جھک گئے آپ کو چھوا اور بولے : آپ کا وصال ہو گیا ہے ، اور لوگ بھی مر جائیں گے لوگوں نے کہا: اے اللہ کے رسول کے ساتھی ! کیا اللہ کے رسول کا انتقال ہو گیا ہے ؟ سیدنا ابوبکر رضی اللہ عنہ نے جواب دیا : جی ہاں ، تو لوگوں کو پتہ چل گیا کہ جیسے یہ کہہ رہے ہیں ویسا ہی ہے لوگوں نے کہا: اے اللہ کے رسول کے ساتھی ! کیا ہم اللہ کے رسول کی نماز جنازہ ادا کریں ؟ انہوں نے جواب دیا : جی ہاں ! لوگوں نے کہا: ہم آپ کی نماز جنازہ کیسے ادا کریں ؟ انہوں نے فرمایا : کچھ لوگ اندر آئیں وہ تکبیر کہیں دعا کریں اور درود پڑھیں وہ باہر چلے جائیں یہاں تک کہ سب لوگ فارغ ہو جائیں لوگوں نے کہا: اے اللہ کے رسول کے ساتھی ! کیا اللہ کے رسول کو دفن کیا جائے گا ؟ سیدنا ابوبکر رضی اللہ عنہ نے جواب دیا : جی ہاں لوگوں نے دریافت کیا : انہیں کہاں دفن کیا جائے گا ۔ سیدنا ابوبکر رضی اللہ عنہ نے بتایا اسی جگہ جہاں ان کا انتقال ہوا ہے ، کیونکہ اللہ تعالیٰ نے انہیں پاکیزہ جگہ پر ہی وفات دی ہے ، تو لوگوں کو یہ پتہ چل گیا کہ ویسا ہی ہو گا جیسے انہوں نے بیان کیا ہے پھر سیدنا ابوبکر رضی اللہ عنہ کھڑے ہوئے ، اور انہوں نے کہا: تمہارے آقا تمہارے پاس ہیں پھر سیدنا ابوبکر رضی اللہ عنہ نے لوگوں کو حکم دیا کہ وہ نبی اکرم صلی اللہ علیہ وسلم کو غسل دیں وہ چلے گئے مہاجرین مشورہ کرنے کے لئے اکٹھے ہوئے ان لوگوں نے کہا: تم لوگ ہمارے ساتھ انصاری بھائیوں کی طرف چلو کیونکہ اس معاملہ میں ان کا بھی حصہ ہو گا وہ لوگ گئے انصار سے تعلق رکھنے والے ایک شخص نے کہا: ایک امیر ہم میں سے ہو گا ، اور ایک امیر تم میں سے ہو گا ۔ سیدنا عمر رضی اللہ عنہ نے سیدنا ابوبکر کا ہاتھ پکڑا اور بولے : تم لوگ مجھے بتاؤ کہ کس شخص میں یہ تین خصوصیات ہیں وہ دو افراد میں سے ایک ہو کہ جب وہ دونوں غار میں تھے ، تو وہ دونوں کون تھے جس نے اپنے ساتھی سے کہا: تم غمگین نہ ہو تو وہ ساتھی کون تھا ( اور یہ بھی فرمایا : ) بے شک اللہ تعالیٰ ہمارے ساتھ ہے پھر سیدنا ابوبکر رضی اللہ عنہ کا ہاتھ انہوں نے پکڑا اور لوگوں سے فرمایا ان کی بیعت کرو تو لوگوں نے سیدنا ابوبکر رضی اللہ عنہ کی عمدہ طریقے سے بیعت کر لی ۔ علامہ ہیثمی فرماتے ہیں : ) میں یہ کہتا ہوں امام ابن ماجہ نے اس روایت کا کچھ حصہ نقل کیا ہے ۔
یہ روایت امام طبرانی نے نقل کی ہے ۔ اور اس کے رجال ثقہ ہیں ۔

سیدنا عبداللہ بن مسعود رضی اللہ عنہ بیان کرتے ہیں : جب نبی اکرم صلی اللہ علیہ وسلم کا وصال ہو گیا تو انصار نے کہا: ایک امیر ہم میں سے ہو گا ، اور ایک امیر تم میں سے ہو گا ۔ سیدنا عمر رضی اللہ عنہ ان کے پاس آئے ، اور بولے : کیا تم لوگ یہ بات نہیں جانتے ہو کہ نبی اکرم صلی اللہ علیہ وسلم نے سیدنا ابوبکر رضی اللہ عنہ کو یہ حکم دیا تھا کہ وہ لوگوں کی امامت کریں ، تو تم میں سے کون اس بات سے خوش ہو گا کہ وہ سیدنا ابوبکر رضی اللہ عنہ سے آگے بڑھ جائے ؟ ان لوگوں نے کہا: ہم اس بات سے اللہ کی پناہ مانگتے ہیں کہ ہم سیدنا ابوبکر رضی اللہ عنہ سے آگے بڑھیں ۔
یہ روایت امام أحمد اور امام ابویعلیٰ نے نقل کی ہے ۔ اس کی سند میں ایک راوی عاصم بن ابونجود ہے ، اور وہ ثقہ ہے اس میں ضعف پایا جاتا ہے اس روایت کے بقیہ رجال صحیح کے رجال ہیں ۔

ابوبختری بیان کرتے ہیں : سیدنا عمر رضی اللہ عنہ نے سیدنا ابوعبیدہ رضی اللہ عنہ سے کہا: آپ اپنا ہاتھ آگے بڑھائیں تاکہ میں آپ کی بیعت کر لوں کیونکہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” یہ اس امت کا امین ہے “ ۔ تو سیدنا ابوعبیدہ رضی اللہ عنہ نے کہا: میں ایسے شخص سے آگے نہیں بڑھوں گا جسے اللہ کے رسول نے یہ حکم دیا تھا کہ وہ ہماری امامت کرے اور وہ اللہ کے رسول کے وصال تک ہماری امامت کرتا رہا ۔
یہ روایت امام أحمد نے نقل کی ہے ۔ اور اس کے رجال صحیح کے رجال ہیں ، البتہ ابوبختری نامی راوی نے سیدنا عمر رضی اللہ عنہ سے سماع نہیں کیا ہے ۔

سیدنا ابوسعید خدری رضی اللہ عنہ بیان کرتے ہیں : جب نبی اکرم صلی اللہ علیہ وسلم کا وصال ہوا تو انصار کے خطیب کھڑے ہوئے اور بولے : اے مہاجرین کے گروہ ! اللہ کے رسول جب بھی تم میں سے کسی شخص کو کہیں بھیجتے تھے ، تو اس کے ساتھ ہم میں سے کسی شخص کو بھی بھیجتے تھے ، تو ہم یہ سمجھتے ہیں کہ اس معاملے کے نگران دو آدمی بنیں گے ایک فرد ہم میں سے ہو گا ، اور ایک فرد تم میں سے ہو گا ، تو سیدنا زید بن ثابت رضی اللہ عنہ کھڑے ہوئے ، اور بولے : بے شک اللہ کے رسول کا تعلق مہاجرین سے تھا ، اور ہم اللہ کے رسول کے مددگار ہیں ، تو جو شخص آپ کا قائم مقام ہو گا ، تو ہم اس کے بھی مددگار ہوں گے ، تو سیدنا ابوبکر رضی اللہ عنہ نے فرمایا : اے انصار کے گروہ ! اللہ تعالیٰ تمہیں جزائے خیر عطا کرے اور تمہارے کہنے والے کو ثابت قدم رکھے اللہ کی قسم ! اگر تم اس کے علاوہ کوئی اور بات کہتے تو ہم نے تمہارے ساتھ مصالحت نہیں کرنی تھی ۔
یہ روایت امام طبرانی اور امام أحمد نے نقل کی ہے ۔ اور اس کے رجال صحیح کے رجال ہیں ۔

عیسیٰ بن عطیہ بیان کرتے ہیں : سیدنا ابوبکر رضی اللہ عنہ کی بیعت کر لی گئی ، تو اس کے اگلے دن وہ کھڑے ہوئے انہوں نے لوگوں کو خطبہ دیتے ہوئے ارشاد فرمایا : اے لوگو ! میں تمہاری رائے تمہیں واپس کر دیتا ہوں میں تم میں سے سب سے بہتر نہیں ہوں تم اپنے میں سے سب سے بہتر شخص کی بیعت کر لو تو لوگ ان کے سامنے ہو گئے ، اور بولے : اے اللہ کے رسول کے خلیفہ ! اللہ کی قسم ! آپ ہم میں سب سے بہتر ہیں سیدنا ابوبکر رضی اللہ عنہ نے فرمایا : اے لوگو ! دوسرے لوگ اسلام میں رضامندی کے ساتھ یا زبردستی داخل ہو گئے ہیں ، تو یہ اللہ تعالیٰ کے مہمان اور اس کے پڑوسی ہیں اگر تم سے ہو سکے ، تو تم اس چیز کا دھیان رکھنا کہ اللہ تعالیٰ اپنے ذمہ کے حوالے سے تم سے کوئی حساب نہ لے ، میرے ساتھ ایک شیطان ہوتا ہے جو میرے پاس آ جاتا ہے ، جب تم مجھے دیکھو تو مجھے جواب دو میں تمہارے ساتھ صرف باتیں نہیں بناؤں گا ، اے لوگو ! اپنے علماء ( یا شاید عمال ، یعنی ریاستی اہل کاروں ) کی کوتاہیوں کا خیال رکھو ، کیونکہ جس گوشت کی نشو و نما حرام پر ہوئی ہو ، اس کے لئے یہ مناسب نہیں ہے کہ وہ جنت میں جائے ، خبردار ! تم اپنے مددگاروں کے ذریعے میری دیکھ بھال کرنا اگر میں ٹھیک رہوں ، تو تم میری پیروی کرنا اور اگر میں بھٹک جاؤں ، تو مجھے سیدھا کر دینا اگر میں اللہ کی اطاعت کروں ، تو تم میری اطاعت کرنا اور اگر میں اللہ کی نافرمانی کروں ، تو تم میری نافرمانی کرنا ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عیسیٰ بن سلیمان ہے ، اور وہ ضعیف ہے ، اور ایک راوی عیسیٰ بن عطیہ ہے جس سے میں واقف نہیں ہوں ۔

قیس بن ابوحازم بیان کرتے ہیں : میں سیدنا ابوبکر رضی اللہ عنہ کے پاس بیٹھا ہوا تھا جو اللہ کے رسول کے خلیفہ تھے ، یہ نبی اکرم صلی اللہ علیہ وسلم کے وصال کے ایک ماہ بعد کی بات ہے اس کے بعد راوی نے پورا واقعہ ذکر کیا ہے جس میں یہ ہے کہ لوگوں کے درمیان اعلان کیا گیا نماز اکٹھا کرنے والی ہے یہ مسلمانوں میں پہلی نماز تھی جس کے لئے لوگوں میں یہ اعلان کیا گیا کہ نماز اکٹھا کرنے والی ہے لوگ اکٹھے ہو گئے سیدنا ابوبکر رضی اللہ عنہ منبر پر چڑھے وہ ایک ایسی چیز تھی ، جو ان کے لئے تیار کی گئی تھی جس پر وہ کھڑے ہو کر خطبہ دیتے یہ اسلام میں پہلا خطبہ تھا انہوں نے اللہ تعالیٰ کی حمد و ثناء بیان کرنے کے بعد ارشاد فرمایا : اے لوگو ! میری یہ خواہش ہے کہ یہ کام میری بجائے کوئی اور کر لے اگر تم اپنے نبی کی سنت کے حوالے سے میری گرفت کرتے ہو تو میں اس کی طاقت نہیں رکھتا کیونکہ نبی اکرم صلی اللہ علیہ وسلم شیطان سے محفوظ تھے پھر یہ ہے کہ آپ صلی اللہ علیہ وسلم پر آسمان سے وحی بھی نازل ہوتی تھی ۔
یہ روایت امام أحمد نے نقل کی ہے ۔ اس کی سند میں ایک راوی عیسیٰ بن مسیب بجلی ہے ، اور وہ ضعیف ہے ۔

ابن ابوملیکہ بیان کرتے ہیں : سیدنا ابوبکر رضی اللہ عنہ سے کہا: گیا : اے اللہ کے خلیفہ ! تو انہوں نے فرمایا : میں اللہ کے رسول کا خلیفہ ہوں ، اور میں اس بات سے راضی ہوں میں اس بات سے راضی ہوں ۔
یہ روایت امام أحمد نے نقل کی ہے ۔ اور اس کے رجال صحیح کے رجال ہیں ، البتہ ابن ابوملیکہ نے سیدنا ابوبکر صدیق رضی اللہ عنہ کا زمانہ نہیں پایا ہے ۔

قیس بن ابوحازم بیان کرتے ہیں : میں نے سیدنا عمر رضی اللہ عنہ کو دیکھا ان کے ہاتھ میں کھجور کی شاخ تھی اور وہ لوگوں کو بٹھا رہے تھے اور یہ کہہ رہے تھے : اللہ کے رسول کے خلیفہ کی بات سنو اور فرمانبرداری کرو ! سیدنا ابوبکر رضی اللہ عنہ کا غلام آیا جس کا نام سدید تھا وہ ایک صحیفہ لے کے آیا وہ اس نے لوگوں کے سامنے پڑھا اور کہا: سیدنا ابوبکر رضی اللہ عنہ فرما رہے ہیں : اس صحیفے میں جس کا نام مذکور ہے تم نے اس کی بات سننی ہے ، اور اطاعت کرنی ہے اللہ کی قسم ! میں نے تم لوگوں کے بارے میں کوئی کوتاہی نہیں کی ، قیس بن ابوحازم بیان کرتے ہیں : اس کے بعد میں نے سیدنا عمر رضی اللہ عنہ کو منبر پر دیکھا ۔
یہ روایت امام أحمد نے نقل کی ہے ۔ اور اس کے رجال صحیح کے رجال ہیں ۔

سیدہ عائشہ صدیقہ رضی اللہ عنہا بیان کرتی ہیں میں نبی اکرم صلی اللہ علیہ وسلم کے پاس موجود تھی آپ نے ارشاد فرمایا : اے عائشہ ! کاش ہمارے پاس کوئی ایسا فرد ہوتا جو ہمارے ساتھ بات چیت کرتا میں نے عرض کی : یا رسول اللہ ! کیا میں سیدنا ابوبکر رضی اللہ عنہ کو پیغام بھیجوا دوں ؟ نبی اکرم صلی اللہ علیہ وسلم خاموش رہے پھر نبی اکرم صلی اللہ علیہ وسلم نے فرمایا : کاش ہمارے پاس کوئی فرد ہوتا جو ہمارے ساتھ بات چیت کرتا سیدہ عائشہ رضی اللہ عنہا کہتی ہیں : میں نے عرض کی : یا رسول اللہ ! کیا میں سیدنا عمر رضی اللہ عنہ کو پیغام نہ بھیجوا دوں ؟ سیدہ عائشہ رضی اللہ عنہا کہتی ہیں : پھر نبی اکرم صلی اللہ علیہ وسلم نے ملازم کو بلوایا اور اس کے ساتھ سرگوشی میں کوئی بات چیت کی وہ چلا گیا سیدہ عائشہ رضی اللہ عنہا کہتی ہیں : پھر سیدنا عثمان رضی اللہ عنہ نے اندر آنے کی اجازت مانگی نبی اکرم صلی اللہ علیہ وسلم نے انہیں اجازت دیدی وہ اندر آ گئے نبی اکرم صلی اللہ علیہ وسلم نے خاصی دیر تک پست آواز میں ان کے ساتھ بات چیت کی پھر آپ نے فرمایا : اے عثمان ! اللہ تعالیٰ تمہیں ایک قمیص پہنائے گا منافقین اسے اتروانے کا ارادہ کریں گے ، تو تم اسے نہ اتارنا اس میں کوئی کرامت نہیں ہے یہ بات آپ نے دو مرتبہ یا شاید تین مرتبہ ارشاد فرمائی
۔ ( علامہ ہیثمی فرماتے ہیں : ) میں یہ کہتا ہوں : یہ روایت امام ابن ماجہ نے اختصار کے ساتھ نقل کی ہے ۔
یہ روایت امام أحمد نے نقل کی ہے ۔ اس کی سند میں ایک راوی فرج بن فضالہ ہے جس کی ، توثیق کی گئی ہے اس میں ضعف پایا جاتا ہے اس روایت کے بقیہ رجال صحیح کے رجال ہیں ۔

زید بن اسلم بیان کرتے ہیں : سیدنا عمر رضی اللہ عنہ نے ان چھ افراد کے بارے میں یہ فرمایا : جب نبی اکرم صلی اللہ علیہ وسلم دنیا سے تشریف لے گئے تھے ، تو آپ ان سے راضی تھے آپ صلی اللہ علیہ وسلم نے فرمایا : عبدالرحمن بن عوف رضی اللہ عنہ جس کی بیعت کر لے تم اس کی بیعت کر لینا اگر کوئی انکار کرے ، تو اس کی گردن اڑا دینا ۔
( علامہ ہیثمی فرماتے ہیں : ) میں یہ کہتا ہوں صحیح میں اس روایت کا ابتدائی حصہ منقول ہے ۔
یہ روایت امام طبرانی نے معجم اوسط میں نقل کی ہے ۔ زید نامی راوی نے سیدنا عمر رضی اللہ عنہ کا زمانہ نہیں پایا ہے اس کے بیٹے عبداللہ کو معن بن عیسیٰ اور دیگر حضرات نے ثقہ قرار دیا ہے ، اور جمہور نے اسے ضعیف کہا: ہے ۔

ابووائل بیان کرتے ہیں : میں نے سیدنا عبدالرحمن بن عوف رضی اللہ عنہ سے کہا: آپ لوگوں نے کیسے سیدنا عثمان رضی اللہ عنہ کی بیعت کر لی اور سیدنا علی رضی اللہ عنہ کو چھوڑ دیا ؟ انہوں نے فرمایا : میرا کیا قصور ہے ؟ میں نے علی سے آغاز کیا اور میں نے کہا: میں آپ کی اس شرط پر بیعت کروں گا کہ آپ اللہ کی کتاب اس کے رسول کی سنت اور سیدنا ابوبکر رضی اللہ عنہ اور سیدنا عمر رضی اللہ عنہ کے طریقے پر عمل پیرا رہیں گے ، تو انہوں نے کہا: جہاں تک مجھ سے ہو سکے گا ( میں عمل کروں گا ) سیدنا عبدالرحمن رضی اللہ عنہ کہتے ہیں : پھر میں نے اسی بات کی پیشکش سیدنا عثمان رضی اللہ عنہ کو کی ، تو انہوں نے اسے قبول کر لیا ( یعنی یہ کہا: میں ایسا ہی کروں گا ) ۔
یہ روایت عبداللہ بن أحمد نے نقل کی ہے ۔ اس کی سند میں ایک راوی سفیان بن وکیع ہے ، اور وہ انتہائی ضعیف ہے ۔

فضالہ بن ابوفضالہ بیان کرتے ہیں : سیدنا ابوفضالہ رضی اللہ عنہ کا شمار اہل بدر میں ہوتا ہے وہ بیان کرتے ہیں : میں اپنے والد ( سیدنا ابوفضالہ رضی اللہ عنہ ) کے ساتھ سیدنا علی بن ابوطالب رضی اللہ عنہ کی عیادت کرنے کے لئے گیا یہ ان کی اس بیماری کے دوران کی بات ہے جو شدید ہو چکی تھی میرے والد نے ان سے کہا: اس جگہ پر آپ کی دیکھ بھال کون کرے گا ، اگر آپ کا انتقال ہو گیا تو جہینہ قبیلے کے بدوہی آپ کی دیکھ بھال کریں گے وہ آپ کو اٹھا کر مدینہ منورہ لے جائیں گے لیکن اگر آپ کا وصال مدینہ میں ہوا تو آپ کے ساتھی آپ کی دیکھ بھال کریں گے اور آپ کی نماز جنازہ ادا کریں گے ، تو سیدنا علی رضی اللہ عنہ نے فرمایا : نبی اکرم صلی اللہ علیہ وسلم نے مجھ سے عہد لیا تھا کہ میں اس وقت تک نہیں مروں گا ، جب تک میں امیر نہیں بن جاتا اور پھر اس کو ( سیدنا علی رضی اللہ عنہ نے اپنی داڑھی کی طرف اشارہ کر کے یہ بات ارشاد فرمائی ) اس سے ( یعنی سیدنا علی رضی اللہ عنہ نے اپنے سر کی طرف اشارہ کر کے یہ بات ارشاد فرمائی یعنی میری داڑھی کو میرے سر کے خون سے ) رنگین کر دیا جائے گا ( راوی کہتے ہیں : ) ( بعد میں سیدنا علی رضی اللہ عنہ بھی شہید ہوئے ، اور سیدنا ابوفضالہ رضی اللہ عنہ بھی جنگ صفین کے موقع پر سیدنا علی رضی اللہ عنہ کی طرف سے لڑتے ہوئے شہید ہوئے تھے ۔
یہ روایت امام أحمد نے نقل کی ہے ۔ اس کی سند میں ایک راوی عبداللہ بن محمد بن عقیل ہے ۔ یہ راوی حسن الحدیث ہے اس روایت کے بقیہ رجال ثقہ ہیں ۔