مجمع الزوائد ومنبع الفوائد

عامر بن عبداللہ بن زبیر بیان کرتے ہیں : سیدنا عمر بن خطاب رضی اللہ عنہ جب غصے میں ہوا کرتے تھے ، تو اپنی مونچھ مروڑا کرتے تھے اور گہرے سانس لیتے تھے ۔
یہ روایت امام طبرانی نے نقل کی ہے ۔ اور اس کے رجال صحیح کے رجال ہیں صرف عبداللہ بن أحمد کا معاملہ مختلف ہے وہ ثقہ اور مامون ہے البتہ عامر بن عبداللہ بن زبیر نے سیدنا عمر رضی اللہ عنہ اللہ کا زمانہ نہیں پایا ہے ۔

حسان بیان کرتے ہیں : ابوہاشم بن عتبہ کی مونچھیں تھیں جنہیں وہ گردن تک لے جا سکتے تھے میں نے ان سے کہا: آپ کی مونچھوں کا کیا معاملہ ہے ؟ جبکہ نبی اکرم صلی اللہ علیہ وسلم کے حوالے سے یہ حکم منقول ہے کہ مونچھیں چھوٹی رکھنی چاہئیں ، تو انہوں نے جواب دیا : میں نے مونچھیں چھوٹی رکھی ہوئی تھیں نبی اکرم صلی اللہ علیہ وسلم نے اپنا دست مبارک مونچھوں کی جگہ پر پھیرا اور فرمایا تم نے مونچھیں کب تراشی تھیں ؟ میں نے عرض کی : ابھی تھوڑی دیر پہلے ، نبی اکرم صلی اللہ علیہ وسلم نے فرمایا : اب تم انہیں اس وقت تک نہ تراشنا جب تک تمہاری مجھ سے ملاقات نہیں ہوتی پھر نبی اکرم صلی اللہ علیہ وسلم کی مجھ سے ملاقات سے پہلے ہی آپ کا وصال ہو گیا تو میں انہیں نہیں تراشوں گا یہاں تک کہ آپ سے جا ملوں ۔
یہ روایت امام طبرانی نے نقل کی ہے ۔ اس کی سند میں ایک راوی ولید بن سلمہ اردنی ہے ، اور وہ کذاب ہے ۔

سیدہ ام عیاش رضی اللہ عنہا بیان کرتی ہیں ۔ نبی اکرم صلی اللہ علیہ وسلم مونچھیں پست رکھا کرتے تھے ۔
یہ روایت امام طبرانی نے نقل کی ہے ۔ اس کی سند میں ایک راوی عبدالکریم بن روح ہے ، اور وہ متروک ہے ۔

سیدنا عبید رضی اللہ عنہ بیان کرتے ہیں : نبی اکرم صلی اللہ علیہ وسلم نے مونچھیں پست رکھنے کا حکم دیا ہے ۔
یہ روایت امام طبرانی نے نقل کی ہے ۔ اور اس کے رجال صحیح کے رجال ہیں ۔

سیدنا عبداللہ بن عمر رضی اللہ عنہما روایت کرتے ہیں ۔ نبی اکرم صلی اللہ علیہ وسلم نے ارشاد فرمایا : ” ان کو تراش لو اور اسے چھوڑ دو “ نبی اکرم صلی اللہ علیہ وسلم کی مراد یہ تھی کہ نچلے ہونٹ کے نیچے والے حصے کو تراش لو اور داڑھی کو چھوڑ دو ۔
( علامہ ہیثمی فرماتے ہیں : ) میں یہ کہتا ہوں
یہ روایت صحیح میں مذکور ہے تا ہم اس میں نچلے ہونٹ کے نیچے والے حصے کو تراشنے کا حکم نہیں ہے ۔
یہ روایت امام طبرانی نے نقل کی ہے ۔ اس کی سند میں ایک راوی سوید بن ابوفاختہ ہے ، اور وہ متروک ہے ۔

سیدنا ابوہریرہ رضی اللہ عنہ روایت کرتے ہیں ۔ نبی اکرم صلی اللہ علیہ وسلم نے ارشاد فرمایا : ” مشرکین مونچھیں بڑی رکھتے ہیں اور داڑھی چھوٹی رکھتے ہیں ، تو تم ان کے خلاف کرو تم داڑھی بڑھاؤ اور مونچھیں چھوٹی کرواؤ “ ۔
یہ روایت امام بزار نے دو اسناد کے ساتھ نقل کی ہے ۔ جن میں سے ایک راوی عمرو بن ابوسلمہ ہے ، جسے یحیی بن معین اور دیگر حضرات نے ثقہ قرار دیا ہے شعبہ اور دیگر حضرات نے اسے ضعیف قرار دیا ہے اس روایت کے بقیہ رجال ثقہ ہیں ۔

سیدنا انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : مجوسیوں کے برخلاف کرو مونچھیں تراشو اور داڑھیاں بڑھاؤ ۔
یہ روایت امام بزار نے نقل کی ہے ۔ اس کی سند میں ایک راوی حسن بن ابوجعفر ہے وہ ضعیف اور متروک ہے ۔ اس موضوع سے متعلق کچھ احادیث بعد میں بھی آئیں گی اگر اللہ نے چاہا ۔

عثمان بن عبیداللہ بن ابورافع بیان کرتے ہیں : انہوں نے سیدنا ابوسعید خدری رضی اللہ عنہ سیدنا جابر بن عبداللہ رضی اللہ عنہ سیدنا عبداللہ بن عمرو رضی اللہ عنہ سیدنا سلمہ بن اکوع رضی اللہ عنہ سیدنا ابواسید بدری رضی اللہ عنہ سیدنا رافع بن خدیج رضی اللہ عنہ اور سیدنا انس بن مالک رضی اللہ عنہ کو دیکھا ہے کہ یہ حضرات مونچھیں اتنی چھوٹی کر لیتے تھے کہ مونڈوانے کی مانند ہو جاتا تھا ، اور داڑھی بڑھا کے رکھتے تھے یہ حضرات بغلوں سے بال نوچ لیتے تھے ایک روایت میں یہ الفاظ ہیں : یہ ناخن تراش لیتے تھے ۔
یہ روایت امام طبرانی نے نقل کی ہے ۔ عثمان نامی اس راوی سے میں واقف نہیں ہوں اس کی اسناد میں سے ایک کے بقیہ رجال صحیح کے رجال ہیں ۔

سیدہ عائشہ صدیقہ رضی اللہ عنہا بیان کرتی ہیں ۔ نبی اکرم صلی اللہ علیہ وسلم نے ایک شخص کو ملاحظہ فرمایا جس کی مونچھیں بڑی تھیں ، تو آپ نے فرمایا : میرے پاس قینچی اور مسواک لے کے آؤ تو نبی اکرم صلی اللہ علیہ وسلم نے مسواک اس کے ہونٹوں کے کنارے پر رکھی اور جو اس سے آگے بال آ رہے تھے انہیں کاٹ دیا ۔
یہ روایت امام بزار نے نقل کی ہے ۔ اس کی سند میں ایک راوی عبدالرحمن بن مسہر ہے ، اور وہ کذاب ہے ۔

سیدنا جابر رضی اللہ عنہ بیان کرتے ہیں : نبی اکرم صلی اللہ علیہ وسلم نے مونچھوں کو کاٹ دینے ( شاید مونڈ دینا مراد ہے ) سے منع کیا ہے ۔
یہ روایت امام طبرانی نے معجم اوسط میں مقدام بن داؤد کے حوالے سے نقل کی ہے ۔ اور وہ ضعیف ہے ۔

سیدنا حکم بن عمیر یمانی رضی اللہ عنہ روایت کرتے ہیں ۔ نبی اکرم صلی اللہ علیہ وسلم نے ارشاد فرمایا : ” مونچھیں ہونٹوں تک چھوٹی رکھو “ ۔
یہ روایت امام طبرانی نے نقل کی ہے ۔ اس کی سند میں ایک راوی عیسیٰ بن ابراہیم بن طہمان ہے ، اور وہ متروک ہے -

سیدنا عبدالله بن بسر رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو دیکھا ہے کہ آپ صلی اللہ علیہ وسلم نے اپنی مونچھوں کو اطراف میں بڑا کیا ہوا تھا ۔
یہ روایت امام طبرانی نے نقل کی ہے ۔ اس کی سند میں ایک راوی یعقوب بن محمد زہری ہے ، اور وہ ضعیف ہے ویسے اس کی ، توثیق کی گئی ہے ، اور ایک راوی منصور بن اسماعیل ہے عقیلی نے اسے ضعیف قرار دیا ہے اس روایت کے بقیہ رجال ثقہ ہیں ۔

شرحبیل بن مسلم بیان کرتے ہیں : میں نے پانچ صحابہ کرام کو دیکھا کہ وہ اپنی مونچھیں چھوٹی رکھتے تھے اور داڑھیاں بڑھا کے رکھتے تھے ( وہ حضرات یہ ہیں : ) سیدنا ابوامامہ باہلی رضی اللہ عنہ سیدنا حجاج بن عامر ثمالی رضی اللہ عنہ سیدنا مقدام بن معدیکرب رضی اللہ عنہ سیدنا عبدالله بن بسر رضی اللہ عنہ اور سیدنا عتبہ بن عبد سلمی رضی اللہ عنہ یہ حضرات ہونٹوں تک مونچھیں چھوٹی رکھتے تھے ۔
یہ روایت امام طبرانی نے نقل کی ہے ۔ اور اس کی سند عمدہ ہے ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” آدمی کی سعادت مندی میں یہ چیز بھی شامل ہے کہ اس کی داڑھی ہلکی ہو “ ۔
یہ روایت امام طبرانی نے نقل کی ہے ۔ اس کی سند میں ایک راوی یوسف بن غرق ہے ازدی کہتے ہیں : وہ کذاب ہے ۔