مجمع الزوائد ومنبع الفوائد

سیدنا یعلی بن مرہ رضی اللہ عنہ اپنے والد کا یہ بیان نقل کرتے ہیں : نبی اکرم صلی اللہ علیہ وسلم نماز سے پہلے ہمارے چہروں پر ہاتھ پھیرتے تھے اور ہمارے لئے برکت کی دعا کرتے تھے ایک دن میں آیا نبی اکرم صلی اللہ علیہ وسلم نے میرے دائیں اور بائیں افراد کے چہروں پر ہاتھ پھیر دیا اور مجھے چھوڑ دیا اس کی وجہ یہ ہوئی کہ میں اپنی بہن کے پاس گیا تھا اس نے میرے چہرے پر تھوڑا زرد رنگ ( یا خلوق نامی خوشبو ) لگا دی تھی مجھے بتایا گیا کہ اللہ کے رسول نے تمہیں اس لئے چھوڑ دیا ہے ، کیونکہ انہوں نے تمہارے چہرے پر ( زرد رنگ ) دیکھا ہے ، میں ایک کنویں کے پاس گیا اور میں اس میں داخل ہو گیا پھر میں نے غسل کیا پھر میں اگلی نماز میں شامل ہوا تو نبی اکرم صلی اللہ علیہ وسلم میرے پاس سے گزرے ، تو آپ نے میرے چہرے پر ہاتھ پھیرا اور میرے لئے برکت کی دعا کی ، اور فرمایا : علاء اپنے بہتر دین کے ساتھ واپس آیا ہے اس نے توبہ کی ہے ، اور آسمان نے بارش نازل کی ہے ۔
( علامہ ہیثمی فرماتے ہیں : ) میں یہ کہتا ہوں
یہ روایت امام ترمذی نے سیدنا یعلی رضی اللہ عنہ کے حوالے سے نقل کی ہے ۔ اور یہاں یہ سیدنا یعلی رضی اللہ عنہ کے حوالے سے ان کے والد سے منقول ہے ۔
یہ روایت امام أحمد نے نقل کی ہے ۔

سیدنا یعلی رضی اللہ عنہ کے حوالے سے ان کی نقل کردہ ایک حدیث میں اس کی مانند الفاظ ہیں ، جو امام ترمذی نے نقل کیے ہیں تا ہم اس میں یہ الفاظ ہیں : ” اے یعلی تم نے خلوق کیوں لگائی ہے کیا تم نے شادی کر لی ہے ؟ میں نے عرض کی : جی نہیں “ ۔ اس روایت کی سند میں ایک راوی یونس بن خباب ہے ، اور وہ ضعیف اور خبیث ہے ۔

ابوحبیبہ ، ایک شخص کے حوالے سے یہ بات نقل کرتے ہیں : وہ بیان کرتے ہیں : میں نبی اکرم صلی اللہ علیہ وسلم کی خدمت میں حاضر ہوا مجھے ایک کام تھا نبی اکرم صلی اللہ علیہ وسلم نے میرے اوپر خلوق لگی ہوئی دیکھی ، تو فرمایا تم جاؤ اور اسے دھو لو میں گیا میں نے اسے دھویا پھر میں واپس آیا تو میں نے عرض کی : میں نے اسے دھو لیا ہے ، تو آپ نے فرمایا : تم جاؤ اور اسے دھو لو میں گیا میں ایک کنویں میں اترا میں نے مٹی لی اور اس کو ڈھونڈ ڈھونڈ کر صاف کیا پھر میں واپس آپ کے پاس آیا تو نبی اکرم صلی اللہ علیہ وسلم نے فرمایا : تمہارا کام ( کیا ہے ؟ ) ۔
یہ روایت امام أحمد نے نقل کی ہے ۔ ابوحبیبہ نامی یہ راوی اگر تو یہ طائی ہے ، تو پھر یہ ثقہ ہے ، اور اگر یہ اس کے علاوہ کوئی اور ہے ، تو پھر میں اس سے واقف نہیں ہوں اس روایت کے بقیہ رجال صحیح کے رجال ہیں ۔

سیدنا یعلی بن امیہ رضی اللہ عنہ بیان کرتے ہیں ۔ نبی اکرم صلی اللہ علیہ وسلم نے میری شادی ایک ایسی خاتون کے ساتھ کروا دی جو کنگھی کرنے والی تھی یا عطر بنانے والی تھی میں نبی اکرم صلی اللہ علیہ وسلم کی خدمت میں حاضر ہوا تو میں نے خلوق لگائی ہوئی تھی ، تو نبی اکرم صلی اللہ علیہ وسلم نے فرمایا : کیا تم اس چیز کو دھو نہیں دو گے ( راوی کو شک ہے شاید یہ الفاظ ہیں : ) کیا تم اس گندگی کو اپنے سے دھو نہیں دو گے میں کنویں کے پاس آیا میں نے اس میں غسل کیا یہاں تک کہ پانی زرد ہو گیا پھر میں نبی اکرم صلی اللہ علیہ وسلم کی خدمت میں حاضر ہوا تو مجھ پر نشان موجود تھا نبی اکرم صلی اللہ علیہ وسلم نے فرمایا : تم جاؤ اور اسے دھوؤ میں گیا اور میں نے اس کو دھویا اور وہ اس وقت تک ختم نہیں ہوا جب تک میں نے اسے مٹی کے ساتھ صاف نہیں کیا ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی خاتون حکیمہ بنت غیلان ہے میں ان دونوں سے واقف نہیں ہوں اس روایت کے بقیہ رجال صحیح کے رجال ہیں ۔

سیدنا عبدالرحمن بن سمرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تین قسم کے لوگوں کے پاس فرشتے نہیں جاتے ہیں جنبی شخص ، کافر شخص اور جس نے زعفران لگایا ہوا ہو “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی زکریا بن یحیی بن ابویوب ضریر ہے ، اور میں اس سے واقف نہیں ہوں اس روایت کے بقیہ رجال صحیح کے رجال ہیں صرف سیدنا عبدالرحمن بن سمرہ رضی اللہ عنہ کے غلام کثیر کا معاملہ مختلف ہے ، اور وہ ثقہ ہے ۔

سیدنا بریدہ رضی اللہ عنہ روایت کرتے ہیں ۔ نبی اکرم صلی اللہ علیہ وسلم نے ارشاد فرمایا : ” تین قسم کے لوگوں کے پاس فرشتے نہیں جاتے ہیں نشے کا شکار شخص ، جنبی شخص ، اور جس شخص نے خلوق لگائی ہوئی ہو “ ۔
یہ روایت امام طبرانی نے نقل کی ہے ۔ اس کی سند میں ایک راوی عبداللہ بن حکیم ہے ، اور وہ ضعیف ہے ۔

سیدنا علی بن ابوطالب رضی اللہ عنہ بیان کرتے ہیں : نبی اکرم صلی اللہ علیہ وسلم کچھ لوگوں کے پاس سے گزرے ان میں ایک ایسا شخص تھا جس نے خلوق لگائی ہوئی تھی نبی اکرم صلی اللہ علیہ وسلم نے ان لوگوں کو سلام کیا اور آپ نے اس شخص سے منہ پھیر لیا اس شخص نے عرض کی : یا رسول اللہ ! آپ نے ان لوگوں کو سلام کیا ہے ، اور مجھ سے منہ پھیر لیا ہے ؟ نبی اکرم صلی اللہ علیہ وسلم نے فرمایا : تمہاری دونوں آنکھوں کے درمیان سرخی ہے ۔
یہ روایت امام طبرانی نے معجم اوسط میں نقل کی ہے ۔ اور اس کے رجال ثقہ ہیں ۔

سیدنا علی رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا تاکہ آپ اس سے بیعت لیں اس پر خلوق کا نشان موجود تھا تو نبی اکرم صلی اللہ علیہ وسلم نے اس سے بیعت لینے سے انکار کر دیا وہ شخص گیا اس نے خلوق کا نشان اپنے سے دھویا پھر وہ آیا تو نبی اکرم صلی اللہ علیہ وسلم نے پھر اس سے بیعت لی ۔
یہ روایت امام بزار نے اپنے استاد عبداللہ بن مثنی تیمی کے حوالے سے نقل کی ہے ۔ اور میں اس سے واقف نہیں ہوں اس روایت کے بقیہ رجال ثقہ ہیں ۔

سیدنا عمارہ رضی اللہ عنہ بیان کرتے ہیں : وہ نبی اکرم صلی اللہ علیہ وسلم کی خدمت میں فتح مکہ کے دن حاضر ہوئے تاکہ نبی اکرم صلی اللہ علیہ وسلم ان سے بیعت لیں ۔ نبی اکرم صلی اللہ علیہ وسلم نے ان کے ہاتھ پر خلوق لگی ہوئی دیکھی ، تو آپ نے اس سے ہاتھ پیچھے کر لیا ایک شخص نے ان سے کہا: تمہاری ماں تمہیں روئے نبی اکرم صلی اللہ علیہ وسلم نے اپنا دست مبارک اس لئے تم سے پیچھے کیا ہے ، کیونکہ اس پر خلوق لگی ہوئی ہے ، تو ان صاحب نے اپنا ہاتھ دھویا پھر وہ نبی اکرم صلی اللہ علیہ وسلم کے پاس آئے ، تو نبی اکرم صلی اللہ علیہ وسلم نے ان سے بیعت لی ۔
یہ روایت امام بزار اور امام طبرانی نے نقل کی ہے ۔ اس کی سند میں ایک راوی حریث بن مطر ہے ، اور وہ متروک ہے ۔

سیدنا انس رضی اللہ عنہ بیان کرتے ہیں : کچھ لوگ نبی اکرم صلی اللہ علیہ وسلم کی خدمت میں حاضر ہوئے تاکہ آپ کی بیعت کریں ان میں ایک ایسا شخص موجود تھا جس کے ہاتھ پر خلوق کا نشان موجود تھا نبی اکرم صلی اللہ علیہ وسلم ان سے بیعت لیتے رہے ، اور اس شخص کو پیچھے کرتے رہے پھر آپ نے ارشاد فرمایا : مردوں کی خوشبو وہ ہے جس کی خوشبو ظاہر ہو اور رنگ پوشیدہ رہے ، اور خواتین کی خوشبو وہ ہے جس کا رنگ ظاہر ہو اور خوشبو پوشیدہ رہے ۔
یہ روایت امام بزار نے نقل کی ہے ۔ اور اس کے رجال صحیح کے رجال ہیں ۔
( علامہ ہیثمی فرماتے ہیں : ) میں یہ کہتا ہوں سیدنا ابوموسی اشعری رضی اللہ عنہ کی نقل کردہ حدیث اس کے بعد خوشبو والے باب میں آئے گی ۔

سیدنا عبادہ بن صامت رضی اللہ عنہ بیان کرتے ہیں : نبی اکرم صلی اللہ علیہ وسلم نے مسجد کے پیچھے والے حصے میں ایک شخص کو ملاحظہ فرمایا جس پر معصفر چادر تھی ، تو آپ نے فرمایا : کیا کوئی شخص میرے اور اس آگ کے درمیان رکاوٹ نہیں بنے گا ، تو ایک شخص نے ایسا کیا ۔
یہ روایت امام طبرانی نے نقل کی ہے ۔ اور اس کے رجال ثقہ ہیں ۔

سیدنا عبداللہ بن جعفر رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کے جسم پر دو ایسے کپڑے دیکھے جو زعفران سے رنگے ہوئے تھے ایک چادر تھی اور ایک عمامہ تھا ۔
یہ روایت امام طبرانی نے معجم اوسط اور معجم صغیر میں نقل کی ہے ۔ امام ابویعلیٰ نے اس کی مانند روایت نقل کی ہے ۔ اس کی سند میں ایک راوی عبداللہ بن مصعب ہے ، اور ضعیف ہے ۔ اس سے پہلے رنگنے سے متعلق احادیث گزر چکی ہیں جو اس کی مانند ہیں ۔

سیدہ ام سلمہ رضی اللہ عنہا بیان کرتی ہیں بعض اوقات نبی اکرم صلی اللہ علیہ وسلم اپنی چادر یا اپنے تہبند پر زعفران یا ورس کے ذریعے رنگ کر لیتے تھے اور پھر انہیں پہن کر تشریف لے جاتے تھے ۔
یہ روایت امام طبرانی نے نقل کی ہے ۔ اس پر پہلے رنگنے سے متعلق باب میں کلام گزر چکا ہے ۔

سیدنا کعب بن عجرہ رضی اللہ عنہ کے غلام انس بن سلمان بیان کرتے ہیں میں اس بات کی گواہی دیتا ہوں کہ میں نے چار ( راوی کو شک ہے شاید یہ الفاظ ہیں : ) پانچ صحابہ کرام کو دیکھا کہ وہ لوگ معصفر پہنتے تھے ان میں ایک سیدنا کعب بن عجرہ رضی اللہ عنہ اور ایک سیدنا انس رضی اللہ عنہ ہیں ۔ ( علامہ ہیثمی فرماتے ہیں : ) میں اس راوی سے واقف نہیں ہوں ۔

فضیل بن کثیر بیان کرتے ہیں : میں نے سیدنا انس بن مالک رضی اللہ عنہ کو دیکھا کہ انہوں نے اپنے پاس موجود برتن میں سے اپنی کلائیوں پر خلوق لگائی ۔
یہ روایت امام طبرانی نے نقل کی ہے ۔ اس کی سند میں ایک راوی ابوساسان ہے ابن عدی نے اس کا ذکر کیا ہے ، اور کوئی ایسی چیز ذکر نہیں کی جو ضعف کو واجب کرے ۔ اس روایت کے بقیہ رجال ثقہ ہیں
یہ روایت انہوں نے ایک اور سند کے ساتھ نقل کی ہے ۔ جس کی سند میں ایک راوی خاتون ام یحیی بنت سعید ہیں میں اس سے واقف نہیں ہوں اس روایت کے بقیہ رجال ثقہ ہیں اور اس کے بعض رجال کے بارے میں کلام کیا گیا ہے ۔