مجمع الزوائد ومنبع الفوائد

سیدنا علی بن ابوطالب رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جذام زدہ لوگوں کی طرف مسلسل نہ دیکھو اور جب تم ان کے ساتھ بات چیت کرو ، تو تمہارے اور ان کے درمیان نیزے جتنا فاصلہ ہونا چاہیے “ ۔
یہ روایت عبداللہ بن أحمد نے نقل کی ہے ، اس کی سند میں ایک راوی فرج بن فضالہ ہے ، جسے امام أحمد اور دیگر حضرات نے ثقہ قرار دیا ہے ۔ امام نسائی رحمہ اللہ اور دیگر حضرات نے اسے ضعیف کہا: ہے ۔ اس روایت کے بقیہ رجال ثقہ ہیں ، اگر اس کی سند میں کوئی راوی ساقط نہ ہو ۔

سیدنا امام حسین بن علی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جذام زدہ شخص کی طرف مسلسل نہ دیکھو ! جب تم ان کے ساتھ بات چیت کرو ، تو تمہارے اور ان کے درمیان ایک نیزے جتنا فاصلہ ہونا چاہیے “ ۔
یہ روایت امام ابویعلیٰ اور امام طبرانی نے نقل کی ہے ، امام ابویعلیٰ کی سند میں ایک راوی فرج بن فضالہ ہے ، جسے امام أحمد اور دیگر حضرات نے ثقہ قرار دیا ہے ، امام نسائی رحمہ اللہ اور دیگر حضرات نے اسے ضعیف کہا: ہے ، اس روایت کے بقیہ رجال ثقہ ہیں ، امام طبرانی کی سند میں ایک راوی یحیی حمانی ہے ، اور وہ ضعیف ہے اس روایت کے بقیہ رجال ثقہ ہیں ۔

سیدنا معاذ بن جبل رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جذام لوگوں کی طرف مسلسل نہ دیکھو ! “ ۔
یہ روایت امام طبرانی نے معجم کبیر میں نقل کی ہے ۔ اور معجم اوسط میں اس کی مانند نقل کی ہے ۔ انہوں نے اسے اپنے استاد ولید بن حماد ملی کے حوالے سے نقل کیا ہے ، اور میں اس سے واقف نہیں ہوں ۔ اس روایت کے بقیہ رجال ثقہ ہیں ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” جذام زدہ لوگوں کی طرف مسلسل نہ دیکھو “ ۔
یہ روایت امام طبرانی نے نقل کی ہے ۔ اس کی سند میں ایک راوی ابن لہیعہ ہے اس کی نقل کردہ حدیث حسن ہے اس روایت کے بقیہ رجال ثقہ ہیں ۔

سیدہ عائشہ صدیقہ رضی اللہ عنہما نبی اکرم صلی اللہ علیہ وسلم کا یہ فرمان نقل کرتی ہیں : ” ناک میں بالوں کا اُگنا ، جذام سے امان ( کا باعث ) ہے “ ۔
یہ روایت امام ابویعلیٰ نے اور امام بزار نے نقل کی ہے اور امام طبرانی نے معجم اوسط میں نقل کی ہے ، اس کی سند میں ایک راوی ابوربیع سمان ہے ، اور وہ ضعیف ہے ۔