مجمع الزوائد ومنبع الفوائد

سیدہ ام سلمہ رضی اللہ عنہا بیان کرتی ہیں : میری ایک بیٹی بیمار ہو گئی میں نے اس کے لئے ایک پیالے میں نبیذ تیار کی نبی اکرم صلی اللہ علیہ وسلم گھر تشریف لائے ، تو اس نبیذ میں جوش آ رہا تھا ، نبی اکرم صلی اللہ علیہ وسلم نے دریافت کیا : یہ کیا ہے ؟ میں نے عرض کی : میری بیٹی بیمار ہو گئی ہے میں نے اس کے لئے نبیذ تیار کی ہے ۔ نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ نے حرام چیز میں ، تمہاری شفاء نہیں رکھی ہے “ ۔
یہ روایت امام ابویعلیٰ نے اور امام طبرانی نے نقل کی ہے ۔ تاہم انہوں نے پیالے کی جگہ لفظ کوزہ نقل کیا ہے امام ابویعلیٰ کے رجال صحیح کے رجال ہیں ، صرف حسان بن مخارق کا معاملہ مختلف ہے ، اور ابن حبان نے اسے ثقہ قرار دیا ہے ۔

سیده ام درداء رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں : ” بے شک اللہ تعالیٰ نے بیماری اور دواء کو پیدا کیا ہے ، تو تم لوگ دواء استعمال کرو ! لیکن تم کسی حرام چیز کو دواء کے طور پر استعمال نہ کرنا “ ۔
یہ روایت امام طبرانی نے نقل کی ہے اور اس کے رجال ثقہ ہیں ۔

ابووائل بیان کرتے ہیں : ہم میں سے ایک شخص بیمار ہو گیا ، اس کے لئے نشہ آور چیز ( دوا کے طور پر ) تجویز کی گئی ، ہم سیدنا عبداللہ رضی اللہ عنہ کے پاس آئے ، ہم نے اس بارے میں دریافت کیا ، تو انہوں نے فرمایا : بے شک اللہ تعالیٰ نے تمہاری شفاء اُس چیز میں نہیں رکھی ہے ، جو اس نے تم پر حرام قرار دی ہے ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔