مجمع الزوائد ومنبع الفوائد

سیدنا عبدالله بن بسر ، اپنے والد سیدنا بسر رضی اللہ عنہ کا یہ بیان نقل کرتے ہیں : نبی اکرم صلی اللہ علیہ وسلم ان لوگوں کے پاس تشریف لائے آپ خچر پر سوار تھے ، ہم اسے شامی گدھا کہتے تھے ، نبی اکرم صلی اللہ علیہ وسلم ان لوگوں کے پاس تشریف لائے ، آپ کے ساتھ آپ کے اصحاب بھی تھے میری والدہ اُٹھیں انہوں نے نبی اکرم صلی اللہ علیہ وسلم کے لئے ایک چٹائی بچھا دی ، جو گھر میں موجود تھی وہ اس چٹائی کو نبی اکرم صلی اللہ علیہ وسلم کے لئے سنبھال کے رکھتی تھیں ، نبی اکرم صلی اللہ علیہ وسلم اس پر تشریف فرما ہوتے ، تو اس چٹائی سے خوشبو آتی تھی ۔ سیدنا عبداللہ بن بسر رضی اللہ عنہ بیان کرتے ہیں : میرے والد سیدنا بسر رضی اللہ عنہ نے کھجوریں ان حضرات کے سامنے رکھیں ، تاکہ وہ ان کو کھانا شروع کریں اور انہوں نے میری والدہ کو یہ ہدایت کی کہ وہ ان لوگوں کے جشیش تیار کر دیں ۔ سیدنا عبداللہ رضی اللہ عنہ کہتے ہیں : اپنی والدہ اور والد کے لئے خدمت کا کام میں ہی کیا کرتا تھا ، میرے والد نبی اکرم صلی اللہ علیہ وسلم اور آپ کے اصحاب کے پاس کھڑے ہو گئے ، جب میری والدہ جشیش بنا کے فارغ ہوئیں ، تو میں اسے اٹھا کر لایا اور ان حضرات کے سامنے رکھ دیا ، ان حضرات نے اسے کھایا ، پھر میرے والد نے انہیں فضیخ ( نامی مشروب ) پلایا ، نبی اکرم صلی اللہ علیہ وسلم نے اسے پی لیا ، پھر اس شخص کو پینے کے لئے دیا جو آپ کے پاس موجود تھا ، جب اس میں موجود مشروب ختم ہو گیا ، تو میں نے وہ پیالہ پکڑ لیا ، پھر میں نے اسے دوبارہ بھرا پھر وہ لے کر نبی اکرم صلی اللہ علیہ وسلم کے پاس آیا ، تو نبی اکرم صلی اللہ علیہ وسلم نے ارشاد فرمایا : تم اس شخص کو دو ، جس تک پیالہ پہنچا تھا ، جب نبی اکرم صلی اللہ علیہ وسلم کھانے سے فارغ ہوئے ، تو آپ نے ہمیں دعا دیتے ہوئے یہ کہا: ” اے اللہ ! تو ان کی مغفرت کر دے ، ان پر رحم کر اور ان کے رزق میں ان کے لئے برکت رکھ دے “ ۔ تو اس کے بعد ، ہم اللہ تعالیٰ کی طرف سے ، مسلسل رزق میں گنجائش دیکھتے آ رہے ہیں ۔ ( علامہ ہیثمی فرماتے ہیں : ) میں یہ کہتا ہوں : ” صحیح “ میں اس کا کچھ حصہ ، سیدنا عبداللہ بن بسر رضی اللہ عنہ کے حوالے سے منقول ہے ، اور یہ روایت اُن کے والد کے حوالے سے منقول ہے ۔
یہ روایت امام طبرانی نے نقل کی ہے ، اس کی سند میں ایک راوی ایسا ہے جس کا نام بیان نہیں کیا گیا ہے ، اس کے بقیہ رجال کی نقل کردہ حدیث حسن یا صحیح ہوتی ہے ۔

سیدنا عبدالله بن بسر رضی اللہ عنہ بیان کرتے ہیں : نبی اکرم صلی اللہ علیہ وسلم ہمارے پاس تشریف لائے ، میری دادی نے آپ کی خدمت میں کھجوریں پیش کیں ، جو انہوں نے نبی اکرم صلی اللہ علیہ وسلم کے لئے تیار کی تھیں اور آپ کے لئے کھانا پکایا تھا ، ہم نے ان حضرات کو پینے کے لئے بھی دیا ، جب پیالے میں موجود شروب ختم ہو گیا ، تو میں ایک اور پیالہ لے کے آیا ، میں ہی خدمت گزار تھا ، نبی اکرم صلی اللہ علیہ وسلم نے فرمایا : پیالہ اُس شخص کو دو ! جو پہلے آخری شخص تک پہنچا تھا ۔ ( علامہ ہیثمی فرماتے ہیں : ) میں یہ کہتا ہوں : ” صحیح “ میں ان کے حوالے سے ایک اور حدیث منقول ہے ، جو اس کے علاوہ ہے ۔
یہ روایت امام أحمد نے نقل کی ہے ، اس کی سند میں ایک راوی ایسا ہے ، جس کا نام بیان نہیں کیا گیا ہے ، اس روایت کے بقیہ رجال ثقہ ہیں ۔