مجمع الزوائد ومنبع الفوائد

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم جب کوئی چیز پلاتے تھے ، تو یہ فرماتے تھے : بڑے سے آغاز کرو ( راوی کو شک ہے ، شاید یہ الفاظ ہیں : ) بڑوں سے آغاز کرو ۔
یہ روایت امام ابویعلیٰ اور امام طبرانی نے معجم اوسط میں نقل کی ہے ۔ امام ابویعلیٰ کے رجال صحیح کے رجال ہیں ۔

سیدنا ابوامامہ رضی اللہ عنہ بیان کرتے ہیں : ایک مرتبہ نبی اکرم صلی اللہ علیہ وسلم موجود تھے ، آپ کے ساتھ سیدنا ابوبکر رضی اللہ عنہ سیدنا عمر رضی اللہ عنہ سیدنا ابوعبیدہ بن جراح رضی اللہ عنہ تھے اور کچھ دیگر صحابہ کرام موجود تھے ، اسی دوران ایک پیالہ لایا گیا جس میں مشروب موجود تھا ، نبی اکرم صلی اللہ علیہ وسلم نے وہ پیالہ سیدنا ابوعبیدہ رضی اللہ عنہ کی طرف بڑھایا تو سیدنا ابوعبیدہ رضی اللہ عنہ نے عرض کی : یا رسول اللہ ! آپ اس کے زیادہ حق دار ہیں ۔ نبی اکرم صلی اللہ علیہ وسلم نے فرمایا : تم لے لو سیدنا ابوعبیدہ رضی اللہ عنہ نے اسے لے لیا پینے سے پہلے ایک مرتبہ پھر انہوں نے عرض کی : اے اللہ کے نبی ! آپ لے لیں نبی اکرم صلی اللہ علیہ وسلم نے ارشاد فرمایا : تم پیو ! کیونکہ برکت ہمارے بڑوں کے ساتھ ہوتی ہے ، جو شخص ہمارے چھوٹوں پر رحم نہیں کرتا ، اور بڑوں کا احترام نہیں کرتا ، وہ ہم میں سے نہیں ہے “ ۔
یہ روایت امام طبرانی نے ابوعبدالملک کے حوالے سے قاسم سے نقل کی ہے ، میں ابوعبدالملک نامی راوی سے واقف نہیں ہوں ۔ اس روایت کے بقیہ رجال ثقہ ہیں ، اس کے بعض رجال کے بارے میں ایسا کلام کیا گیا ہے ، جو نقصان دہ نہیں ہے ۔