مجمع الزوائد ومنبع الفوائد

ابوشیخ ہنائی بیان کرتے ہیں : سیدنا معاویہ رضی اللہ عنہ نے نبی اکرم صلی اللہ علیہ وسلم کے کچھ اصحاب سے فرمایا : آپ یہ بات جانتے ہیں کہ نبی اکرم صلی اللہ علیہ وسلم نے سونے اور چاندی کے برتنوں میں پینے سے منع فرمایا ہے ، اُن حضرات نے جواب دیا : جی ہاں ۔

ایک روایت میں یہ الفاظ ہیں : میں کچھ اصحاب کے درمیان موجود تھا ، سیدنا معاویہ رضی اللہ عنہ نے فرمایا : میں آپ لوگوں کو اللہ کا واسطہ دے کر دریافت کرتا ہوں کہ آپ یہ بات جانتے ہیں کہ نبی اکرم صلی اللہ علیہ وسلم نے چاندی کے برتن میں پینے سے منع کیا ہے ان حضرات نے جواب دیا : اللہ جانتا ہے ، جی ہاں ! سیدنا معاویہ رضی اللہ عنہ نے فرمایا : میں بھی اس بات کی گواہی دیتا ہوں ۔
یہ روایت امام أحمد نے ایک طویل حدیث میں ذکر کی ہے ، امام طبرانی نے اس کا کچھ حصہ نقل کیا ہے ۔ امام أحمد کے رجال صحیح کے رجال ہیں صرف ابوشیخ ہنائی کا معاملہ مختلف ہے ، اور وہ ثقہ ہے ۔

سیدنا عبداللہ بن عباس رضی اللہ عنہما کے بارے میں یہ بات منقول ہے وہ بیان کرتے ہیں : نبی اکرم صلی اللہ علیہ وسلم نے چاندی کے برتن میں پینے سے منع کیا ہے ۔
یہ روایت امام أحمد نے ایک طویل حدیث میں نقل کی ہے ۔ امام طبرانی نے معجم اوسط میں نقل کی ہے ۔ اور یہ الفاظ زائد نقل کیے ہیں : ” نبی اکرم صلی اللہ علیہ وسلم نے اس ریشم سے منع کیا ہے ، جو مکمل ریشم ہو ، اگر اس کا تانا ، یا بانا ریشم کا ہو ، تو پھر اس کو پہننے میں کوئی حرج نہیں ہے “ ۔ ان دونوں کے رجال صحیح کے رجال ہیں ۔

کلثوم بن جبر بیان کرتے ہیں : وہ لوگ واسط القصب میں عبدالاعلیٰ بن عبداللہ بن عامر کے پاس موجود تھے ان کے پاس ایک صاحب موجود تھے جنہیں ابوغادیہ کہا: جاتا تھا انہوں نے پانی مانگا ان کے پاس ایسے برتن میں پانی لایا گیا جس پر چاندی لگی ہوئی تھی ، تو انہوں نے اس ( برتن ) میں پینے سے انکار کر دیا اور یہ بات ذکر کی کہ نبی اکرم صلی اللہ علیہ وسلم نے ۔ ۔ ۔ ۔ ۔ ۔ ۔ ۔ ۔ ۔ اس کے بعد راوی نے پوری حدیث ذکر کی ہے ۔
یہ روایت امام أحمد نے ایک حدیث کے ضمن میں نقل کی ہے اور اس کے رجال صحیح کے رجال ہیں ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک جو شخص سونے یا چاندی کے برتن میں پیتا ہے ، وہ اپنے پیٹ میں جہنم کی آگ ڈالتا ہے “ ۔
یہ روایت امام ابویعلیٰ اور امام طبرانی نے تینوں کتابوں میں نقل کی ہے ۔ اس کی سند میں ایک راوی محمد بن یحیی بن ابوسمینہ ہے ، جسے ابوحاتم ابن حبان اور دیگر حضرات نے ثقہ قرار دیا ہے اس کے بارے میں ایسا کلام کیا گیا ہے جو نقصان دہ نہیں ہے اس روایت کے بقیہ رجال ثقہ ہیں ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص سونے کے برتن میں یا چاندی کے برتن میں پیتا ہے ، تو وہ اپنے پیٹ میں جہنم کی آگ ڈالتا ہے “ ۔
یہ روایت امام طبرانی نے معجم صغیر اور معجم اوسط میں نقل کی ہے ۔ اس کی سند میں ایک راوی علاء بن برد بن سنان ہے ، جسے امام أحمد نے ضعیف قرار دیا ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص ریشم پہنے اور چاندی کے برتن میں پیئے وہ ہم میں سے نہیں ہے ، اور جو شخص کسی عورت کو اس کے شوہر کے خلاف کر دے یا کسی غلام کو اس کے آقاؤں کے خلاف کر دے وہ ہم میں سے نہیں ہے “ ۔
یہ روایت امام طبرانی نے معجم کبیر اور معجم صغیر میں نقل کی ہے ۔ اس کی سند میں ایک راوی ابوطیبہ عبداللہ بن مسلم ہے ، جسے ابن حبان نے ثقہ قرار دیا ہے وہ کہتے ہیں : یہ غلطی بھی کر جاتا ہے ، اور دوسروں کے برخلاف بھی نقل کرتا ہے ، اور اس روایت کے بقیہ رجال ثقہ ہیں ۔

سیدنا علی رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھے اس بات سے منع کیا تھا کہ میں چاندی کے برتن میں کچھ پیؤں ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی جابر بن یزید جعفی ہے ، اور وہ ضعیف ہے ویسے اس کی توثیق کی گئی ہے ۔

سیدہ ام سلمہ رضی اللہ عنہا اور سیدہ حفصہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” جو شخص چاندی کے برتن میں پیتا ہے وہ اپنے پیٹ میں جہنم کی آگ ڈالتا ہے “ ۔ ( علامہ ہیثمی فرماتے ہیں : ) میں یہ کہتا ہوں سیدہ ام سلمہ رضی اللہ عنہما سے منقول حدیث صحیح میں مذکور ہے ۔
یہ روایت امام طبرانی نے نقل کی ہے ۔ اس کی سند میں ایک راوی سلیمان بن عمرو ہے ، اور وہ متروک ہے ۔

سیدنا عبداللہ بن عمرو رضی اللہ عنہ بیان کرتے ہیں : نبی اکرم صلی اللہ علیہ وسلم کی خدمت میں سونے کے برتن میں مشروب لایا گیا ۔ ۔ ۔ ۔ ۔ ۔ ۔ ۔ اس کے بعد راوی نے پوری حدیث ذکر کی ہے ۔
یہ روایت امام طبرانی نے نقل کی ہے ۔ اور اس کے رجال صحیح کے رجال ہیں ۔