مجمع الزوائد ومنبع الفوائد

شراحیل بیان کرتے ہیں : میں نے سیدنا عبداللہ بن عمر رضی اللہ عنہما سے کہا: آپ ایسے شخص کے بارے میں کیا کہتے ہیں ؟ جو انگوروں کا گچھہ لے کر اسے نچوڑ کر اسے پی لیتا ہے ، تو انہوں نے فرمایا : اس میں کوئی حرج نہیں ہے ، جب وہ اسے پی لیتا ہے ۔ انہوں نے فرمایا : اس کو پینا حلال ہے ، اور اس کو فروخت کرنا حلال ہے ۔
یہ روایت امام أحمد نے ایک طویل حدیث میں ذکر کی ہے ، جس کی سند میں ایک راوی ابن بکیل اور ایک راوی طیاف ہے ، میں ان دونوں سے واقف نہیں ہوں ، اس روایت کے بقیہ رجال ثقہ ہیں ۔

سیدنا صحار بن صخر عبدی رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم کی خدمت میں عرض کی : ہم ایک ایسی جگہ پر رہتے ہیں ، جہاں روٹیاں اور سبزیاں زیادہ ہوتی ہیں ، ہم اس پر نبیذ پی لیتے ہیں ، نبی اکرم صلی اللہ علیہ وسلم نے ارشاد فرمایا : تم اس میں سے وہ چیز پیو ، جو عقل اور مال کو رخصت نہ کرے ۔
یہ روایت امام طبرانی نے نقل کی ہے ، اس کی سند میں ایک راوی رشدین بن سعد ہے ، جسے جمہور نے ضعیف قرار دیا ہے ، اور ایک راوی منصور بن ابومنصور ہے جو مجہول ہے ۔

سیدنا عبداللہ بن ابوشخیر رضی اللہ عنہ بیان کرتے ہیں : نبی اکرم صلی اللہ علیہ وسلم نے مشروبات سے منع کیا ، عرض کی گئی : اس کے بغیر چارہ نہیں ہے ۔ نبی اکرم صلی اللہ علیہ وسلم نے فرمایا : تم وہ چیز پیؤ ، جو تمہاری سمجھ داری کو بے وقوفی میں تبدیل نہ کرے اور تمہارے اموال کو رخصت نہ کرے ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ، صرف حسین بن مہدی کا معاملہ مختلف ہے ، اور وہ ثقہ ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم کے پاس نبیذ لائی گئی ، تو آپ صلی اللہ علیہ وسلم نے اس میں سے پی لیا ۔
یہ روایت امام طبرانی نے نقل کی ہے ، اس کی سند میں ایک راوی ہود بن عطاء ہے ، اور وہ ضعیف ہے ۔

سیدنا مطلب بن ابووداعہ رضی اللہ عنہ بیان کرتے ہیں : نبی اکرم صلی اللہ علیہ وسلم کے پاس ایک نبیذ کا برتن لایا گیا ، آپ نے اس میں پانی ڈالا ، یہاں تک کہ جب وہ ( پانی ) گر گیا ، تو آپ نے اس میں سے پی لیا ۔
یہ روایت امام طبرانی نے اپنے استاد عباس بن فضل اسفاطی سے نقل کی ہے ، میں ان سے واقف نہیں ہوں ، اس روایت کے بقیہ رجال صحیح کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم تین دن سے زیادہ ( رکھی ہوئی ) نبیذ نہیں پیتے تھے ۔
یہ روایت امام طبرانی نے نقل کی ہے اور اس کے رجال ثقہ ہیں ۔

سیدنا فضل بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم کے لئے رات کے وقت نبیذ تیار کی جاتی تھی ، آپ اگلے دن صبح اسے پی لیتے تھے ، اگلے دن اور اس کی رات کو پی لیتے تھے ، آپ صلی اللہ علیہ وسلم تیرے دن کی رات تک اس کو پی لیتے تھے ، پھر اس کے بعد رک جاتے تھے ( یعنی اس کے بعد وہ نبیذ استعمال نہیں کرتے تھے ) ۔
یہ روایت امام طبرانی نے نقل کی ہے ، اس کی سند میں ایک راوی جون بن بشیر ہے ، اور وہ مجہول ہے ۔

سیدنا مطلب بن ابوداعہ رضی اللہ عنہ بیان کرتے ہیں : ایک گرم دن میں ، نبی اکرم صلی اللہ علیہ وسلم گھر تشریف لائے ، آپ کو پیاس لگی ہوئی تھی آپ نے پینے کے لئے کچھ مانگا ، ایک صاحب نے عرض کی : یا رسول اللہ ! ہمارے پاس کشمش کا مشروب ہے ، آپ نے فرمایا : ٹھیک ہے ان صاحب نے اپنے گھر پیغام بھیجا اور وہاں سے ایک بڑا پیالہ لے آئے ، جب نبی اکرم صلی اللہ علیہ وسلم نے اسے اپنے منہ کے قریب کیا ، تو آپ کو اس میں سے تیز بو محسوس ہوئی ، آپ نے اسے ناپسند کیا اور اسے واپس کر دیا ۔
یہ روایت امام طبرانی نے نقل کی ہے ، اس کی سند میں ایک راوی محمد بن سائب کلبی ہے ، اور وہ ضعیف ہے ۔

سیدنا صحار بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” اے صحار ! تم اپنے مشروب کو پاکیزہ رکھو اور اپنے پڑوسی کو بھی پلاؤ “ ۔
یہ روایت امام طبرانی نے نقل کی ہے ، اس کی سند میں ایک راوی مصعب بن مثنی ہے ، جسے امام ذہبی نے مجہول قرار دیا ہے ۔

سید ام معبد رضی اللہ عنہ ، جو قرظہ کی کنیز ہیں ، وہ بیان کرتی ہیں : میں نبی اکرم صلی اللہ علیہ وسلم کے اصحاب کو ( مشروب ) پلایا کرتی تھی ، ان میں سیدنا زید بن ارقم رضی اللہ عنہ اور سیدنا معاذ بن جبل رضی اللہ عنہ بھی تھے ۔
یہ روایت امام طبرانی نے نقل کی ہے ، اس کی سند میں ایک راوی یحیی حمانی ہے ، اور وہ ضعیف ہے ۔

سعید بن شعبہ بن حجاج بیان کرتے ہیں : میرے والد نے مجھے اپنے والد کے حوالے سے یہ بات نقل کی ہے ، وہ بیان کرتے ہیں : میں نے سیدنا انس بن مالک رضی اللہ عنہ کو طلاء پیتے ہوئے دیکھا ہے ۔
یہ روایت امام طبرانی نے نقل کی ہے ، سعید نامی اس شخص سے ، اور اس کے اوپر والے راوی سے ، میں واقف نہیں ہوں ۔

اسحاق بن عبداللہ بن ابوطلحہ بیان کرتے ہیں : سیدنا انس بن مالک رضی اللہ عنہ کی نبیذ میٹھی ہوتی تھی ، جس سے ہونٹ چپچپا جاتے تھے ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

ثمامہ بن عبداللہ بن انس بیان کرتے ہیں : میں اپنے دادا سیدنا انس بن مالک رضی اللہ عنہ کے ساتھ بیس سال رہا ہوں ، میں نے انہیں کبھی بھی نبیذ پیتے ہوئے نہیں دیکھا ۔
یہ روایت امام طبرانی نے نقل کی ہے ، اس کے رجال صحیح کے رجال ہیں ، صرف عبداللہ بن أحمد اور ابراہیم بن حجاج شامی کا معاملہ مختلف ہے ، اور یہ دونوں ثقہ ہیں ۔