مجمع الزوائد ومنبع الفوائد

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے اپنے اصحاب کے درمیان کھجوریں تقسیم کیں ان میں سے کسی نے دو کھجوریں ایک ساتھ کھانا شروع کیں ، تو نبی اکرم صلی اللہ علیہ وسلم نے اس بات سے منع کیا ہے کہ دو کھجوریں ایک ساتھ کھائی جائیں ، البتہ اپنے ساتھیوں کی اجازت کے ساتھ ایسا کیا جا سکتا ہے ۔
یہ روایت امام بزار نے نقل کی ہے ۔ اس کی سند میں ایک راوی عطاء بن سائب ہے جو اختلاط کا شکار ہو گیا تھا اس روایت کے بقیہ رجال صحیح کے رجال ہیں ۔

سیدنا ابوطلحہ رضی اللہ عنہ بیان کرتے ہیں : نبی اکرم صلی اللہ علیہ وسلم نے دو کھجوریں ایک ساتھ کھانے سے منع کیا ہے ۔
یہ روایت امام طبرانی نے نقل کی ہے ۔ اور یہ سماع میں سے ساقط ہے اس کی سند میں ایک راوی عمر بن ردیج ہے ، جسے امام ابوحاتم نے ضعیف قرار دیا ہے ، اور یحیی بن معین نے اسے ثقہ کہا: ہے ۔ اس روایت کے بقیہ رجال ثقہ ہیں ۔

سیدنا بریدہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” میں نے کھجوریں ملا کر کھانے سے منع کیا تھا اب اللہ تعالیٰ نے تم لوگوں کو گنجائش عطا کر دی ہے ، تو تم دو کھجوریں ایک ساتھ کھا لو “ ۔
یہ روایت امام طبرانی نے معجم اوسط میں نقل کی ہے ۔ اور امام بزار نے نقل کی ہے ۔ ان دونوں کی سند میں ایک راوی یزید بن بزیع ہے ، اور وہ ضعیف ہے ۔