مجمع الزوائد ومنبع الفوائد

سیدنا عبداللہ بن سلام رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو دیکھا آپ نے جو کی روٹی کا ٹکڑا پکڑا پھر آپ نے ایک کھجور پکڑی اور آپ نے فرمایا : یہ اس کا سالن ہے ۔
یہ روایت امام ابویعلیٰ نے نقل کی ہے ۔ اس کی سند میں ایک راوی یحیی بن العلاء ہے اور وہ ضعیف ہے ۔

سیدنا زید بن ثابت رضی اللہ عنہ بیان کرتے ہیں : نبی اکرم صلی اللہ علیہ وسلم کھجور کے ساتھ روٹی کھا لیتے تھے اور یہ فرماتے تھے یہ اس کا سالن ہے ۔
یہ روایت امام طبرانی نے معجم صغیر میں نقل کی ہے ۔ اس کی سند میں ایک راوی محمد بن کثیر بن مروان ہے ، اور وہ ضعیف ہے ۔

سیدہ عائشہ صدیقہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں : ” اے عائشہ ! یہ اس کا سالن ہے “ ( راوی کہتے ہیں : یعنی کھجور اور روٹی کے بارے میں آپ نے یہ بات ارشاد فرمائی ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی ہارون بن محمد ابوطیب ہے ، اور وہ کذاب ہے ۔