مجمع الزوائد ومنبع الفوائد

سیدنا عبداللہ بن عمرو رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بے شک اللہ تعالیٰ اس شخص سے محبت کرتا ہے جو تمر ( کھجوروں ) سے محبت کرتا ہے “ ۔
یہ روایت امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی ابراہیم بن ابوحیہ ہے ، اور وہ متروک ہے ۔

سیدنا عبداللہ بن اسود رضی اللہ عنہ بیان کرتے ہیں : ہم لوگ سدوس قبیلے کے وفد کے ہمراہ نبی اکرم صلی اللہ علیہ وسلم کے پاس موجود تھے ہم نے آپ کی خدمت میں تمر ( کھجوریں ) پیش کیں ہم نے ایک دستر خوان پر رکھ کے نبی اکرم صلی اللہ علیہ وسلم کو پیش کیں ، تو نبی اکرم صلی اللہ علیہ وسلم نے مٹھی بھر کھجوریں لیں سیدنا انس رضی اللہ عنہ نے دریافت کیا : یہ کون سی ہیں یا یہ کون سی ہیں ، تو ہم نے ان کے نام بیان کرنا شروع کیے یہاں تک کہ ہم نے تمر کا ذکر کیا ، تو ہم نے کہا: یہ جذامی ہے ، تو نبی اکرم صلی اللہ علیہ وسلم نے فرمایا : اللہ تعالیٰ جذامی میں برکت دے اور اس باغ میں برکت دے جس میں سے یہ نکلی ہے ( یہاں باغ کے لئے ایک روایت میں لفظ مختلف نقل ہوا ہے ) ۔
یہ روایت امام بزار نے نقل کی ہے ۔ اور امام طبرانی نے اس کی مانند نقل کی ہے ۔ اس میں راویوں کی ایک جماعت ایسی ہے ، جن سے علائی واقف نہیں ہے ، اور میں بھی ان سے واقف نہیں ہوں ۔

سیدنا انس بن مالک رضی اللہ عنہ بیان کرتے ہیں : عبدالقیس قبیلے کا وفد نبی اکرم صلی اللہ علیہ وسلم کی خدمت میں حاضر ہوا وہ لوگ نبی اکرم صلی اللہ علیہ وسلم کے پاس بیٹھے ہوئے تھے ۔ اسی دوران نبی اکرم صلی اللہ علیہ وسلم ان کی طرف متوجہ ہوئے آپ نے ان سے ارشاد فرمایا : ایک قسم کی کھجور وہ ہے ، جسے تم یہ نام دیتے ہو ایک قسم کی کھجور وہ ہے ، جسے تم یہ نام دیتے ہو یہاں تک کہ نبی اکرم صلی اللہ علیہ وسلم نے ان لوگوں کی کھجوروں کی تمام قسموں کو شمار کروا دیا تو حاضرین میں سے ایک شخص نے آپ کی خدمت میں عرض کی : یا رسول اللہ ! میرے ماں باپ آپ پر قربان ہوں اگرچہ میں حجر کے علاقے کے درمیان میں پیدا ہوا ہوں لیکن مجھے اس وقت تک کھجوروں کی ان قسموں کے بارے میں آپ سے زیادہ علم نہیں ہے میں اس بات کی گواہی دیتا ہوں کہ آپ اللہ کے رسول ہیں ۔ نبی اکرم صلی اللہ علیہ وسلم نے ارشاد فرمایا : جب تم لوگ میرے پاس آ کر بیٹھے ، تو تمہاری زمین میرے سامنے پیش کی گئی میں نے اس کے قریبی حصے سے لے کے دور تک کے حصے کو دیکھ لیا تمہاری کھجوروں میں سب سے بہتر برنی ہے جو بیماری کو رخصت کر دیتی ہے ، اور اس میں بیماری نہیں ہوتی “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عبید بن واقد قیسی ہے ، اور وہ ضعیف ہے ۔

سیدنا ابوسعید خدری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تمہاری کھجوروں میں سب سے بہتر ” برنی “ ہے جو بیماری کو ختم کر دیتی ہے ، اور اس میں بیماری نہیں ہوتی “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی سعید بن سوید ہے ، اور وہ ضعیف ہے ۔

سیدنا ہرماس رضی اللہ عنہ بیان کرتے ہیں : میری قوم کے ایک شخص نے نبی اکرم صلی اللہ علیہ وسلم کی خدمت میں تحفے کے طور پر کھجوریں پیش کیں نبی اکرم صلی اللہ علیہ وسلم نے دریافت کیا : یہ کون سی قسم کی کھجوریں ہیں ؟ اس نے عرض کی : جذامی ہیں ۔ نبی اکرم صلی اللہ علیہ وسلم نے فرمایا : اے اللہ ! جذامی میں برکت رکھ دے ۔
یہ روایت امام طبرانی نے نقل کی ہے ۔ اس کی سند میں ایک راوی عثمان بن فائد ہے ، اور وہ ضعیف ہے ۔