مجمع الزوائد ومنبع الفوائد

سیدنا سعد بن ابی وقاص رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” اگر کوئی شخص مدینہ کے دونوں کناروں کے درمیان موجود عجوہ کھجوروں میں سے سات کھجوریں ، نہار منہ کھا لے ، تو اس دن میں ، شام ہونے تک وہ چیز اسے نقصان نہیں پہنچائے گی “ ۔ فلیح نامی راوی کہتے ہیں : میرا خیال ہے روایت میں یہ الفاظ ہیں : آپ نے فرمایا : ” اگر کوئی شخص شام کے وقت انہیں کھا لے ، تو صبح ہونے تک کوئی چیز اس کو نقصان نہیں پہنچائے گی “ ۔ سیدنا عمر بن عبدالعزیز نے کہا: اے عامر ! آپ اس بات کا جائزہ لیں کہ آپ نبی اکرم صلی اللہ علیہ وسلم کے حوالے سے کیا حدیث بیان کر رہے ہیں انہوں نے کہا: میں اس بات کی گواہی دیتا ہوں کہ میں نے سیدنا سعد رضی اللہ عنہ کی طرف جھوٹی بات منسوب نہیں کی ہے ، اور نہ ہی سیدنا سعد رضی اللہ عنہ نے نبی اکرم صلی اللہ علیہ وسلم کی طرف جھوٹی بات منسوب کی ہے ۔ ( علامہ ہیثمی فرماتے ہیں : ) میں یہ کہتا ہوں صحیح میں اس روایت کا کچھ حصہ منقول ہے جو اس سیاق کے بغیر ہے ، اور اس میں یہ الفاظ ہیں : ” اسے کوئی زہر یا جادو نقصان نہیں پہنچائے گا “ جبکہ یہاں یہ الفاظ ہیں : ” اسے کوئی چیز نقصان نہیں پہنچائے گی “ ۔
یہ روایت امام أحمد نے نقل کی ہے ۔ اور اس کے رجال صحیح کے رجال ہیں ۔

سیدہ عائشہ صدیقہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں : ” جو شخص صبح کے وقت ( مدینہ منورہ کے ) بالائی حصے کی کھجوروں میں سے سات عجوہ کھجوریں کھا لے اسے شام ہونے تک کوئی زہر یا جادو نقصان نہیں پہنچائے گا “ ۔ ( علامہ ہیثمی فرماتے ہیں : ) میں یہ کہتا ہوں صحیح میں سیدہ عائشہ رضی اللہ عنہا کے حوالے سے
یہ روایت مذکور ہے : ” عالیہ ( یعنی بالائی علاقے ) کی ، عجوہ کھجور ، صبح کے آغاز میں شفاء ہے “ ۔
یہ روایت امام طبرانی نے معجم صغیر میں نقل کی ہے ۔ اس کی سند میں ایک راوی صدقہ بن عبداللہ سمین ہے ، جسے جمہور نے ضعیف قرار دیا ہے دحیم اور ابوحاتم نے اسے ثقہ قرار دیا ہے ، اور ایک راوی منبہ بن عثمان لخمی ہے میں اس سے واقف نہیں ہوں ۔