مجمع الزوائد ومنبع الفوائد

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے سیدہ عائشہ رضی اللہ عنہا سے فرمایا : جب کھجوریں آ جائیں ، تو مجھے مبارک باد دینا ۔
یہ روایت امام بزار نے نقل کی ہے ۔ اس کی سند میں ایک راوی حسان بن سیاہ ہے ، اور وہ ضعیف ہے ۔

سیدنا علی بن ابوطالب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اپنی پھوپھی کھجور کے درخت کا احترام کرو کیونکہ یہ اس مٹی سے پیدا کی گئی ہے جس مٹی سے سیدنا آدم علیہ السلام کو پیدا کیا گیا اور درختوں میں اس کے علاوہ کوئی اور ایسا نہیں ہے جس کی پیوند کاری کی جاتی ہو “ ۔

نبی اکرم صلی اللہ علیہ وسلم نے ارشاد فرمایا ہے : ” اپنی زچہ خواتین کو تازہ کھجوریں کھلاؤ ، اگر رطب نہ ہوں ، تو تمر کھلاؤ ، کیونکہ درختوں میں کوئی بھی درخت اللہ تعالیٰ کے نزدیک اس درخت سے زیادہ معزز نہیں ہے جس کے نیچے سیدہ مریم بنت عمران رضی اللہ عنہا ٹھہری تھیں “ ۔
یہ روایت امام ابویعلیٰ نے نقل کی ہے ۔ اس کی سند میں ایک راوی مسرور بن سعید ہے ، اور وہ ضعیف ہے ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم کے پاس ایک تھال لایا گیا ، جس میں خشک اور تر کھجوریں تھیں ، تو نبی اکرم صلی اللہ علیہ وسلم نے تر کھجوریں کھانا شروع کیں اور آپ صلی اللہ علیہ وسلم نے ” مذنب “ ( جس میں تازہ ہونے کے آغاز اس کی دم کی طرف سے ہوتا ہے ، اُن ) کو چھوڑ دیا ۔
یہ روایت امام بزار نے اپنے استاد معاذ بن سہل سے نقل کی ہے ۔ میں ان سے واقف نہیں ہوں ۔ اس روایت کے بقیہ رجال صحیح کے رجال ہیں ۔