مجمع الزوائد ومنبع الفوائد

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب کسی شخص کے سامنے کھانا رکھا جائے ، اور اس میں پاؤں میں جوتے پہنے ہوئے ہوں ، تو اس کو جوتے اتار دینے چاہئیں کیونکہ یہ چیز پاؤں کے لئے زیادہ آرام کا باعث ہو گی “ ۔
یہ روایت امام بزار نے اور امام ابویعلیٰ نے نقل کی ہے ۔ اور امام طبرانی نے معجم اوسط میں نقل کی ہے ۔ اور ان کے الفاظ یہ ہیں ( جو اگلی روایت میں ہیں ) ۔

جب تم کھانا کھاؤ تو اپنے جوتے اتار دو کیونکہ یہ تمہارے پاؤں کے لئے زیادہ آرام کا باعث ہو گا “ ۔ امام طبرانی کے رجال ثقہ ہیں ، البتہ عقبہ بن خالد سکونی کا معاملہ مختلف ہے میں نے ان کے بارے میں ایسی کوئی روایت نہیں پائی کہ انہوں نے محمد بن حارث سے سماع کیا ہو ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” کھانے سے پہلے اور اس کے بعد وضو کرنا ان چیزوں میں سے ہے جو غربت کو ختم کر دیتے ہیں اور یہ مرسلین کی سنت میں سے ہے “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی نہشل بن سعید ہے ، اور وہ متروک ہے ۔