مجمع الزوائد ومنبع الفوائد

ابن اعبد بیان کرتے ہیں : سیدنا علی بن ابوطالب رضی اللہ عنہ نے مجھ سے فرمایا : اے ابن اعبد ! کیا تم جانتے ہو کھانے کا حق کیا ہے ؟ میں نے کہا: اے ابن ابوطالب ! اس کا حق کیا ہے ؟ انہوں نے فرمایا : تم یہ پڑھو : ” اللہ تعالیٰ کے نام سے برکت حاصل کرتے ہوئے اے اللہ ! جو تو نے ہمیں رزق عطا کیا ہے اس میں ہمارے لئے برکت رکھ دے “ پھر انہوں نے فرمایا : کیا تم جانتے ہو کہ جب تم اس سے فارغ ہو جاؤ تو اس کا شکر کیا ہے ؟ میں نے دریافت کیا : اس کا شکر کیا ہے ؟ تو انہوں نے فرمایا : تم یہ پڑھو : ” ہر طرح کی حمد اللہ تعالیٰ کے لئے مخصوص ہے جس نے ہمیں کھلایا اور جس نے ہمیں پلایا “ ۔
یہ روایت عبداللہ بن أحمد نے نقل کی ہے ۔ انہوں نے اسے طویل روایت کے طور پر نقل کیا ہے ابن اعبد کے بارے میں ابن مدینی نے یہ کہا: ہے یہ معروف نہیں ہے اس روایت کے بقیہ رجال ثقہ ہیں ۔

ایک خاتون بیان کرتی ہیں : نبی اکرم صلی اللہ علیہ وسلم کے پاس ” وطہ “ ( کھجور ، گھی اور پنیر سے بنا ہوا مخصوص قسم کا کھانا ) لایا گیا ، ایک دیہاتی نے اس میں سے تین تھے لیے ، تو نبی اکرم صلی اللہ علیہ وسلم نے ارشاد فرمایا : ” اگر اس نے ” بسم اللہ “ پڑھ لی ہوتی ، تو یہ کھانا تمہارے لئے گنجائش والا ہوتا ( یا تمہیں پورا ہو جاتا ) “ ۔ نبی اکرم صلی اللہ علیہ وسلم نے ارشاد فرمایا : جب کوئی شخص کھانے پر اللہ کا نام لینا بھول جائے ، تو جب اسے یاد آئے ، تو اسے یہ پڑھنا چاہیے : ” اس کے آغاز میں اور اس کے آخر میں اللہ کے نام سے برکت حاصل کرتے ہوئے “ ۔
یہ روایت امام ابویعلیٰ نے نقل کی ہے ۔ اور اس کے رجال ثقہ ہیں ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بعض اوقات کسی شخص کا کھانا رکھا جاتا ہے ، اور اس کا کھانا اٹھائے جانے سے پہلے اس کی مغفرت ہو جاتی ہے عرض کی گئی : یا رسول اللہ ! وہ کیسے ؟ نبی اکرم صلی اللہ علیہ وسلم نے فرمایا : جب کھانا رکھا جاتا ہے ، تو وہ بسم اللہ پڑھتا ہے ، اور جب اسے اٹھایا جاتا ہے ، تو وہ الحمدللہ پڑھتا ہے “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عبدالوارث ہے جو سیدنا انس رضی اللہ عنہ کا غلام ہے اور وہ ضعیف ہے ، اور ایک راوی عبید بن اسحاق عطار ہے جمہور نے اسے ضعیف قرار دیا ہے ۔

سیدنا عبداللہ بن مسعود رضی اللہ عنہ بیان کرتے ہیں : مسلمان کے ساتھ رہنے والا شیطان ، کافر کے ساتھ رہنے والے شیطان سے ملتا ہے ، تو مومن کے ساتھ رہنے والا شیطان کمزور غبار آلود اور مریل نظر آتا ہے ، تو کافر کے ساتھ رہنے والا شیطان اس سے پوچھتا ہے تمہارا ستیاناس ہو تم کیوں ہلاکت کا شکار ہو رہے ہو ؟ تو مومن کے ساتھ رہنے والا شیطان کہتا ہے اللہ کی قسم ! میں اس کے ساتھ کسی چیز تک نہیں پہنچ سکتا ہے ، جب وہ کھانا کھاتا ہے ، تو اللہ کا نام لے لیتا ہے ، جب پیتا ہے ، تو اللہ کا نام لے لیتا ہے ، جب اپنے گھر میں داخل ہوتا ہے ، تو اللہ کا نام ذکر کر لیتا ہے ، تو دوسرا شیطان کہتا ہے ، لیکن میں ، تو اپنے ساتھ والے شخص کا کھانا بھی کھا لیتا ہوں ، اور اس کا مشروب بھی پی لیتا ہوں ، اور اس کے بستر پر بھی سو جاتا ہوں ، تو وہ صحت مند ہوتا ہے ، اور یہ مریل ہوتا ہے “ ۔
یہ روایت امام طبرانی نے موقوف روایت کے طور پر نقل کی ہے ۔ اور اس کے رجال صحیح کے رجال ہیں ۔

سیدنا عبداللہ بن بشر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اس ذات کی قسم ! جس کے دست قدرت میں میری جان ہے تمہارے لئے فارس اور روم فتح کر دیے جائیں گے ، اور تم پر دنیا کو انڈیل دیا جائے گا ، اور تمہارے لیے روٹی اور گوشت بکثرت ہو جائیں گے یہاں تک کہ اس میں سے زیادہ تر اللہ تعالیٰ کا نام ذکر نہیں کیا جائے گا“
یہ روایت امام طبرانی نے نقل کی ہے ۔ اس کی سند میں ایک راوی یحیی بن سعید عطار حمصی ہے ، جسے محمد بن مصفی نے ثقہ قرار دیا ہے اور جمہور نے اسے ضعیف کہا: ہے ۔

نبی اکرم صلی اللہ علیہ وسلم کی کنیز سیدہ سلمی رضی اللہ عنہا بیان کرتی ہیں : انہوں نے نبی اکرم صلی اللہ علیہ وسلم کے لئے خزیرہ تیار کیا انہوں نے اسے نبی اکرم صلی اللہ علیہ وسلم کے سامنے پیش کیا نبی اکرم صلی اللہ علیہ وسلم نے اسے کھایا آپ کے ساتھ آپ کے اصحاب سے تعلق رکھنے والے کچھ اصحاب بھی تھے اس میں سے تھوڑا سا باقی بچ گیا ایک دیہاتی نبی اکرم صلی اللہ علیہ وسلم کے پاس سے گزرا نبی اکرم صلی اللہ علیہ وسلم نے اسے بلایا اور دیہاتی نے وہ سارا اپنے ہاتھ میں پکڑ لیا تو نبی اکرم صلی اللہ علیہ وسلم نے اس سے فرمایا اسے رکھو پھر آپ نے فرمایا : پہلے اللہ کا نام لو اور اپنے قریب والے حصے کی طرف سے کھاو تم سیر ہو جاؤ گے ، تو وہ اس کے حوالے سے سیر ہو گیا اور پھر بھی وہ ( کھانا ) بچ گیا ۔
یہ روایت امام طبرانی نے نقل کی ہے ۔ اور اس کے رجال ثقہ ہیں ۔

سیدنا حمزہ بن عمرو اسلمی رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کے ساتھ کھانا کھایا تو نبی اکرم صلی اللہ علیہ وسلم نے فرمایا : تم اپنے دائیں ہاتھ سے اور اپنے آگے سے کھاؤ اور اللہ کا نام ذکر کر لو ۔
یہ روایت امام طبرانی نے نقل کی ہے ۔ اور اس کے رجال ثقہ ہیں ، البتہ طبرانی نے اس کے بعد منجاب بن حارث کے حوالے سے یہ بات نقل کی ہے ۔ جو اس کے راویوں میں سے ایک ہیں کہ اس روایت میں غلطی پائی جاتی ہے ۔

سیدنا ابوایوب انصاری رضی اللہ عنہ بیان کرتے ہیں : ایک دن ہم نبی اکرم صلی اللہ علیہ وسلم کے پاس موجود تھے آپ نے کھانا منگوایا میں نے ایسا کوئی کھانا نہیں دیکھا جو آغاز میں اس سے زیادہ برکت والا ہو جو ہم نے پہلے کھا لیا تھا ، اور اختتام کے حوالے سے سب سے کم برکت والا ہو ہم نے عرض کی : یا رسول اللہ ! اس کی وجہ کیا ہے ؟ نبی اکرم صلی اللہ علیہ وسلم نے ارشاد فرمایا : اس کی وجہ یہ ہے کہ جب ہم نے ( آغاز میں ) کھانا کھایا تھا تو ہم نے اللہ کا نام ذکر کر دیا تھا پھر اس کے بعد ایک شخص آ کر بیٹھا اور اس نے اس میں سے کھایا اور اس نے بسم اللہ نہیں پڑھی تھی ، تو شیطان نے اس کے ساتھ کھا لیا “ ۔
یہ روایت امام أحمد نے نقل کی ہے ۔ اس کی سند میں ایک راوی راشد بن جندل اور ایک راوی حبیب بن اوس ہے یہ دونوں ایک ہی راوی ہیں ، اس کی سند کے بقیہ رجال صحیح کے رجال ہیں صرف ابن لہیعہ کا معاملہ مختلف ہے ، اور اس کی نقل کردہ حدیث حسن ہے ۔

سیدنا جابر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص کھانے کے آغاز میں اللہ کا نام ذکر کرنا بھول جائے ، تو وہ اس کے آخر میں اللہ کا نام ذکر کرے اور سورت اخلاص پڑھ لے “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی حمزہ بن ابوحمزہ نصیبی ہے ، اور وہ متروک ہے ۔

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص کھانے کے آغاز میں اللہ کا نام ذکر کرنا بھول جائے ، تو جب اسے یاد آئے ، تو اسے یہ پڑھنا چاہیے اللہ تعالیٰ کے نام سے برکت حاصل کرتے ہوئے اس کے آغاز میں اور اس کے آخر میں “ تو وہ نئے سرے سے کھانا کھانا شروع ہو جائے گا ، اور اس خبیث چیز کو روک دے گا جس نے اس سے پہلے اس کھانے میں سے وصول کیا تھا “ ۔
یہ روایت امام طبرانی نے معجم اوسط اور معجم کبیر میں نقل کی ہے ۔ اور اس کے رجال ثقہ ہیں ۔