مجمع الزوائد ومنبع الفوائد

سعد بن معبد بیان کرتے ہیں : یحنس اور صفیہ یہ خمس میں سے تھے اس عورت نے بچے کو جنم دیا زنا کرنے والے ایک شخص نے اور یحنس نے اس بچے کے بارے میں دعوی کر دیا ان دونوں نے اپنا مقدمہ سیدنا عثمان غنی رضی اللہ عنہ کے سامنے پیش کیا سیدنا عثمان رضی اللہ عنہ نے ان دونوں کو سیدنا علی بن ابوطالب رضی اللہ عنہ کے حوالے کر دیا ۔ سیدنا علی رضی اللہ عنہ نے فرمایا : میں اس کے بارے میں اللہ کے رسول صلی اللہ علیہ وسلم کے مطابق فیصلہ دوں گا ( اور وہ یہ ہے : ) ” بچہ فراش والے کو ملے گا ، اور زنا کرنے والے کو محرومی ملے گی “ پھر انہوں نے اسے پچاس کوڑے لگائے ۔
یہ روایت امام أحمد اور امام بزار نے نقل کی ہے ۔ اس کی سند میں ایک راوی حجاج بن ارطاۃ ہے ، اور وہ مدلس ہے ۔ امام أحمد کے بقیہ رجال ثقہ ہیں ۔

سیدنا سعد بن ابی وقاص رضی اللہ عنہ بیان کرتے ہیں : نبی اکرم صلی اللہ علیہ وسلم نے یہ فیصلہ دیا ہے : بچہ فراش والے کو ملے گا ۔
یہ روایت امام بزار نے نقل کی ہے ۔ اس کی سند میں ایک راوی عبدالعزیز بن عمران ہے ، اور وہ متروک ہے ۔

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” بچہ فراش والے کو ملے گا ، اور زنا کرنے والے کو محرومی ملے گی “ ۔
یہ روایت امام بزار نے نقل کی ہے ۔ اس کی سند میں ایک راوی سنان بن حارث ہے جس سے میں واقف نہیں ہوں ۔ اس روایت کے بقیہ رجال ثقہ ہیں ۔

حسن بصری بیان کرتے ہیں : مجھ تک یہ روایت پہنچی ہے کہ نبی اکرم صلی اللہ علیہ وسلم نے یہ فیصلہ دیا ہے بچہ فراش والے کو ملے گا ، اور زنا کرنے والے کے منہ میں پتھر ہوں گے ۔
یہ روایت امام أحمد نے مرسل روایت کے طور پر نقل کی ہے ۔ اور اس کے رجال صحیح کے رجال ہیں ۔

زمعہ کی صاحبزادی بیان کرتی ہیں : میں نبی اکرم صلی اللہ علیہ وسلم کی خدمت میں حاضر ہوئی میں نے عرض کی : میرے والد کا انتقال ہو گیا ہے انہوں نے اپنی اُم ولد چھوڑی ہے ہم اس عورت کے بارے میں یہ سمجھتے ہیں اس عورت کے کسی شخص کے ساتھ تعلقات ہیں اس عورت نے ایک بچے کو جنم دیا تو اس کا بچہ اس شخص کے ساتھ مشابہت رکھتا ہے جس کے بارے میں ہمارا گمان تھا اس کے ساتھ اس کے تعلقات ہیں راوی کہتے ہیں : تو نبی اکرم صلی اللہ علیہ وسلم نے اس خاتون سے کہا: تم اس لڑکے سے پردہ کرو وہ تمہارا بھائی نہیں ہے ، البتہ اسے وارثت ملے گی ۔
یہ روایت امام أحمد نے نقل کی ہے ۔ اس میں تابعی کا نام ذکر نہیں کیا گیا ہے اس روایت کے بقیہ رجال ثقہ ہیں ۔

سیدہ زینب اسدیہ رضی اللہ عنہا بیان کرتی ہیں : میں نبی اکرم صلی اللہ علیہ وسلم کی خدمت میں حاضر ہوئی میں نے عرض کی : یا رسول اللہ ! میرے والد کا انتقال ہو گیا ہے ۔ انہوں نے ایک کنیز چھوڑی تھی جس نے ایک بچے کو جنم دیا ہم اس کنیز پر تہمت عائد کرتے ہیں ۔ نبی اکرم صلی اللہ علیہ وسلم نے فرمایا : اسے میرے پاس لے کے آؤ جب وہ لوگ اس بچے کو لے کے آئے ، اور نبی اکرم صلی اللہ علیہ وسلم نے اس کی طرف دیکھا تو نبی اکرم صلی اللہ علیہ وسلم نے اس عورت سے فرمایا : اس بچے کو وراثت ملے گی لیکن تم اس سے پردہ کرنا ۔
یہ روایت امام طبرانی نے نقل کی ہے ۔ اس کی سند میں ایک راوی قاسم بن محمد بن ابوشیبہ ہے ، اور وہ ضعیف ہے ۔

محمد بن اسحاق بیان کرتے ہیں : نصر بن حجاج بن علاط سلمی نے سیدنا خالد بن ولید کے غلام عبداللہ بن رباح کے بارے میں دعوی کر دیا تو سیدنا خالد بن ولید رضی اللہ عنہ کے صاحبزادے عبدالرحمن اٹھے اور بولے : یہ میرا غلام ہے جو میرے والد کے فراش پر پیدا ہوا ہے نصر بن حجاج نے کہا: یہ میرے بھائی نے اس کے بارے میں مجھے تلقین کی تھی راوی کہتے ہیں : جب ان دونوں کا جھگڑا زیادہ ہو گیا تو یہ اس کو ساتھ لے کر سیدنا معاویہ رضی اللہ عنہ کے پاس گئے جن کے سر کے نیچے ایک پتھر موجود تھا ، اُن دونوں نے اپنا اپنا دعویٰ پیش کیا ، تو سیدنا معاویہ رضی اللہ عنہ نے بتایا کہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” بچہ فراش والے کو ملتا ہے ، اور زنا کرنے والے کو محرومی ملتی ہے “ ۔ اس پر نصر بن حجاج نے کہا: اے معاویہ ! پھر زیاد کے بارے میں آپ نے یہ فیصلہ کیوں نہیں دیا ؟ سیدنا معاویہ رضی اللہ عنہ نے کہا: اللہ کے رسول کا فیصلہ ، معاویہ کے فیصلے سے بہتر ہے عبداللہ بن رباح نے نسر بن حجاج کے دعوے کا کوئی جواب نہیں دیا تو نصر نے یہ اشعار کہے : ” اے ابوخالد ! میرے مال جتنا ( مال ) وراثت کے طور پر لے لو ، اور مجھے میرا بھائی دیدو ، جو آزمائشوں کے وقت گواہ ہے ، اے ابوخالد میرا مال عمدہ ہے ، اور میرا منصب بہترین ہے اور ایسی رگیں ہیں جو تمہیں آگے چل کر ہلاتی رہیں گی ، اے ابوخالد تم ہماری بیٹیوں کو مخزوم کی کنیزیں نہ بنوا دینا ، ورنہ وہ پریشان ( یا غصہ ) ہو جائیں گی ، اے ابوخالد ! اگر تم ابن خالد سے ڈرتے ہو ، تو حجاج نے خالد کو بھگایا نہیں ہے ، اے ابوخالد ! نہ تو ہم آگ ہیں اور نہ ہی وہ ( ایسے ) باغات ہیں ، جن میں ٹھہرے ہوئے چشمے نظر آتے ہوں“ ۔
یہ روایت امام ابویعلیٰ نے نقل کی ہے ۔ اور اس کی سند منقطع ہے ، اور اس کے رجال ثقہ ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے ارشاد فرمایا : ” بچہ فراش والے کو ملے گا ، اور زنا کرنے والے کو محرومی ملے گی “ ۔
یہ روایت امام طبرانی نے نقل کی ہے ۔ اس کی سند میں ایک راوی یحیی بن عباد سعدی ہے ، اور وہ ضعیف ہے داؤد بن شبیب کہتے ہیں : وہ نیک لوگوں میں سے تھے اس روایت کے بقیہ رجال ثقہ ہیں ۔

سیدنا براء بن عازب رضی اللہ عنہ اور سیدنا زید بن ارقم رضی اللہ عنہ بیان کرتے ہیں : غدیر خم کے دن ہم نبی اکرم صلی اللہ علیہ وسلم کے ساتھ تھے ہم آپ کے سر سے درخت کی ٹہنیاں ہٹا رہے تھے ۔ نبی اکرم صلی اللہ علیہ وسلم نے ارشاد فرمایا : ” بے شک میرے لئے ، اور میرے اہل بیت کے لئے صدقہ حلال نہیں ہے اللہ تعالیٰ اس شخص پر لعنت کرے جو اپنے باپ کے علاوہ کسی اور کی طرف خود کو منسوب کرتا ہے ، اور اللہ تعالیٰ اس شخص پر بھی لعنت کرے جو اپنے آزاد کرنے والے آقا کی بجائے کسی اور کی طرف خود کو منسوب کرتا ہے بچہ فراش والے کو ملے گا ، اور زنا کرنے والے کو محرومی ملے گی اور وارث کے لئے وصیت نہیں ہو گی “ ۔
یہ روایت امام طبرانی نے نقل کی ہے ۔ اس کی سند میں ایک راوی موسیٰ بن عثمان حضرمی ہے ، اور وہ ضعیف ہے ۔

سیدنا امام حسین بن علی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بچہ فراش والے کو ملے گا “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی ضرار بن صرد ہے ، اور وہ ضعیف ہے ۔

سیدنا عبداللہ بن زبیر رضی اللہ عنہما بیان کرتے ہیں : نبی اکرم صلی اللہ علیہ وسلم نے زمعہ کی کنیز کے بیٹے کو وراثت دی تھی کیونکہ وہ زمعہ کے فراش پر پیدا ہوا تھا ۔ ( علامہ ہیثمی فرماتے ہیں : ) میں یہ کہتا ہوں
یہ روایت امام نسائی رحمہ اللہ نے اختصار کے ساتھ نقل کی ہے ۔
یہ روایت امام طبرانی نے معجم اوسط میں نقل کی ہے ۔ اور اس کے رجال ثقہ ہیں ۔

سیدنا عبادہ بن صامت رضی اللہ عنہ بیان کرتے ہیں : نبی اکرم صلی اللہ علیہ وسلم کے فیصلے میں یہ بات بھی شامل ہے کہ بچہ فراش والے کو ملے گا ، اور زنا کرنے والے کو محرومی ملے گی ۔
یہ روایت امام طبرانی نے اور امام أحمد نے ایک طویل حدیث میں نقل کی ہے ۔ اور اس کی سند منقطع ہے ۔

سیدنا ابومسعود رضی اللہ عنہ بیان کرتے ہیں : میں حج اکبر کے دن نبی اکرم صلی اللہ علیہ وسلم کے سامنے موجود تھا آپ کی اونٹنی کا جھاگ میرے اوپر گر رہا تھا میں نے آپ کو یہ ارشاد فرماتے ہوئے سنا : ” ہر حق دار کو اس کا حق ادا کر دو بچہ فراش والے کو ملے گا ، اور زنا کرنے والے کو محرومی ملے گی جو شخص اپنے آقا کی بجائے کسی اور کی طرف نسبت ولاء قائم کرے یا اپنے باپ کے علاوہ کسی اور کی طرف نسبت کا دعوی کرے اس پر اللہ تعالی فرشتوں اور انسانوں سب کی لعنت ہو گی اس کی کوئی فرض یا نفل عبادت قبول نہیں ہو گی “ ۔
یہ روایت امام طبرانی نے نقل کی ہے ۔ اور اس کی سند میں ایسا راوی ہے جو معروف نہیں ہے ۔

سیدنا واثلہ بن اسقع رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بچہ فراش والے کو ملے گا زنا کرنے والے کو محرومی ملے گی عورت کو اس بات کا اختیار نہیں ہے کہ وہ اپنے مال میں سے کچھ بھی خرچ کرے البتہ اپنے شوہر کی اجازت کے ساتھ وہ ایسا کر سکتی ہے “ ۔
یہ روایت امام طبرانی نے نقل کی ہے ۔ اس کی سند میں ایک راوی جناح ہے جو ولید کا غلام ہے ، اور وہ ضعیف ہے ۔

ابووائل بیان کرتے ہیں : سیدنا عبداللہ بن حذافہ رضی اللہ عنہ نے عرض کی : یا رسول اللہ ! میرا باپ کون ہے ؟ نبی اکرم صلی اللہ علیہ وسلم نے ارشاد فرمایا : تمہارا باپ حذافہ ہے بچہ فراش والے کو ملے گا ، اور زنا کرنے والے کو محرومی ملے گی انہوں نے عرض کی : اگر آپ نے میرے نسب کی نسبت کسی حبشی شخص کی طرف کی ہوتی ، تو میں نے اس کے پیچھے چلے جانا تھا بعد میں ان کی والدہ نے کہا: تم نے مجھے نشانہ بنایا تھا انہوں نے کہا: میں یہ چاہتا تھا کہ میں اطمینان حاصل کر لوں ۔
یہ روایت امام طبرانی نے نقل کی ہے ۔
یہ روایت مرسل ہے ، اور اس کے رجال ثقہ ہیں ۔