مجمع الزوائد ومنبع الفوائد

عمرو بن امیہ بیان کرتے ہیں : میں نے کچھ افراد کو نبی اکرم صلی اللہ علیہ وسلم کے حوالے سے یہ بیان کرتے ہوئے سنا کہ جب کسی کنیز کو آزاد کر دیا جائے ، تو اسے اختیار ہو گا ، جب تک اس کا شوہر اس کے ساتھ صحبت نہیں کرتا اگر وہ چاہے گی ، تو شوہر سے علیحدگی اختیار کر لے گی اگر شوہر نے اس کے ساتھ صحبت کر لی ، تو پھر عورت کے لئے اختیار نہیں رہے گا پھر وہ شوہر سے علیحدگی اختیار نہیں کر سکے گی ۔
یہ روایت امام أحمد نے اسی طرح متصل روایت کے طور پر نقل کی ہے ۔ اور ایک سند کے حوالے سے مرسل روایت کے طور پر نقل کی ہے ۔ متصل روایت کی سند میں ایک راوی فضل بن عمرو بن امیہ ہے ، اور وہ مستور ہے ، اور ایک راوی ابن لہیعہ ہے جس کی نقل کردہ حدیث حسن ہوتی ہے اس روایت کے بقیہ رجال ثقہ ہیں ۔

سیدنا عبداللہ بن عباس رضی اللہ عنہما بیان کرتے ہیں : سیدہ بریرہ رضی اللہ عنہا کے شوہر ایک غلام تھے جن کا نام مغیث تھا سیدنا عبداللہ بن عباس رضی اللہ عنہما بیان کرتے ہیں : میں نے انہیں دیکھا کہ وہ مدینہ منورہ کی گلیوں میں اس خاتون کے پیچھے جا رہے تھے اور ان کی آنکھوں سے آنسو جاری تھے ۔ سیدنا عبداللہ بن عباس رضی اللہ عنہما فرماتے ہیں : نبی اکرم صلی اللہ علیہ وسلم نے اس خاتون کے بارے میں چار فیصلے دیے تھے آپ نے یہ فیصلہ دیا تھا کہ ولاء کا حق آزاد کرنے والے کو ملتا ہے آپ نے اس خاتون کو اختیار دیا تھا ، اور اسے یہ ہدایت کی تھی کہ وہ آزاد عورت کی مانند عدت گزارے گی سیدنا عبداللہ بن عباس رضی اللہ عنہما بیان کرتے ہیں : کہ ایک مرتبہ اس خاتون کو صدقہ کے طور پر کوئی چیز دی گئی اس نے اس چیز میں سے کچھ سیدہ عائشہ رضی اللہ عنہا کو تحفے کے طور پر دیدیا سیدہ عائشہ رضی اللہ عنہا نے اس بات کا تذکرہ نبی اکرم صلی اللہ علیہ وسلم سے کیا ، تو نبی اکرم صلی اللہ علیہ وسلم نے ارشاد فرمایا : یہ اس کے لئے صدقہ تھا ، اور ہمارے لئے ہدیہ کے طور پر ہے ۔ ( علامہ ہیثمی فرماتے ہیں : ) میں یہ کہتا ہوں صحیح میں اس کا کچھ حصہ مذکور ہے ۔
یہ روایت امام أحمد نے اور امام طبرانی نے معجم اوسط میں اس کی مانند نقل کی ہے ۔ امام أحمد کے رجال صحیح کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں : سیدہ عائشہ رضی اللہ عنہا نے یہ ارادہ کیا کہ سیدہ بریرہ رضی اللہ عنہا کو خرید کر اسے آزاد کر دیں ، تو اس کے آقاؤں نے کہا: جی نہیں آپ کو ولاء کا حق ہمارے لئے رہنے دینا ہو گا سیدہ عائشہ رضی اللہ عنہا نے اس بات کا تذکرہ نبی اکرم صلی اللہ علیہ وسلم سے کیا ، تو نبی اکرم صلی اللہ علیہ وسلم نے فرمایا : تم اسے خرید کر اسے آزاد کر دو نبی اکرم صلی اللہ علیہ وسلم نے ارشاد فرمایا : لوگوں کا کیا معاملہ ہے وہ ایسی شرائط طے کرتے ہیں جن کی اجازت اللہ کی کتاب میں نہیں ہے جو شخص کوئی ایسی شرط طے کرے جس کی اجازت اللہ کی کتاب میں نہ ہو ، تو وہ ( شرط ) باطل ( یعنی کالعدم ) شمار ہو گی ۔ راوی بیان کرتے ہیں : وہ خاتون ایک غلام کی بیوی تھی جن کا نام مغیث تھا وہ بنومغیرہ کے غلام تھے ۔ نبی اکرم صلی اللہ علیہ وسلم نے اس خاتون کو اختیار دیا تھا ۔ راوی بیان کرتے ہیں : سیدنا عبداللہ بن عباس رضی اللہ عنہما نے یہ بات بیان کی ہے کہ نبی اکرم صلی اللہ علیہ وسلم نے اس خاتون کی عدت آزاد عورت کی عدت کی مانند قرار دی تھی ۔ ( علامہ ہیثمی فرماتے ہیں : ) میں یہ کہتا ہوں صحیح میں اس روایت کا کچھ حصہ منقول ہے ۔
یہ روایت امام طبرانی نے معجم اوسط میں نقل کی ہے ۔ اور اس کی سند میں ایک راوی محمد بن جامع عطار ہے ، اور وہ ضعیف ہے ۔

ابن جریج بیان کرتے ہیں : مجھے یہ بات بتائی گئی ہے کہ سیدنا عبداللہ بن مسعود رضی اللہ عنہ فرماتے ہیں : اگر کنیز کسی غلام کی بیوی ہو اور اسے آزاد کر دیا جائے ، اور کنیز کو یہ علم نہ ہو کہ اس کو علیحدگی کا اختیار کا ہے ، اور پھر وہ ( علیحدگی کو ) اختیار نہ کرے یہاں تک کہ اس کے شوہر کو آزاد کر دیا جائے یا اس کا شوہر انتقال کر جائے یا وہ کنیز انتقال کر جائے ( تو ان تمام صورتوں میں ) وہ دونوں ایک دوسرے کے وارث بنیں گے ۔
یہ روایت امام طبرانی نے نقل کی ہے ۔ اور اس کی سند منقطع ہے ، اور اس کے رجال صحیح کے رجال ہیں باقی اللہ تعالیٰ درست بات کے بارے میں زیادہ بہتر جانتا ہے وہ کرم کرنے والا ہے بہت عطا کرنے والا ہے گردنوں کو آزاد کروانے والا ہے دروازوں کو کھولنے والا ہے ۔

سیدنا عبداللہ بن مسعود رضی اللہ عنہ کنیز کے بارے میں یہ فرماتے ہیں : اگر اسے فروخت کر دیا جائے ، اور اس کا شوہر موجود ہو ، تو وہ فرماتے ہیں : اس کو فروخت کرنا اس کی طلاق شمار ہو گا ۔
یہ روایت امام طبرانی نے نقل کی ہے ۔ اور اس کے رجال صحیح کے رجال ہیں ، البتہ ابراہیم نامی راوی نے سیدنا عبداللہ بن مسعود رضی اللہ عنہ سے سماع نہیں کیا ہے ۔