مجمع الزوائد ومنبع الفوائد

سیدنا عبداللہ بن عمر رضی اللہ عنہما بیان کرتے ہیں : ایک شخص سیدنا عمر رضی اللہ عنہ کے پاس آیا اور بولا: میں نے اپنی بیوی کو اس کے حیض کے دوران طلاق بتہ دیدی ہے سیدنا عمر رضی اللہ عنہ نے فرمایا : تم نے اپنے پروردگار کی نافرمانی کی ہے ، اور تم اپنی بیوی سے جدا ہو گئے ہو اس شخص نے کہا: لیکن نبی اکرم صلی اللہ علیہ وسلم نے ، تو سیدنا عبداللہ بن عمر کو اپنی بیوی سے رجوع کرنے کی ہدایت کی تھی جب انہوں نے اپنی بیوی سے علیحدگی اختیار کی تھی ، تو سیدنا عمر رضی اللہ عنہ نے فرمایا : اللہ کے رسول نے اسے اس طلاق کی صورت میں رجوع کی ہدایت کی تھی ، جو طلاق باقی رہ گئی تھی لیکن تمہارے لئے ، تو اتنی طلاق باقی ہی نہیں رہی جس کی بنیاد پر تم اپنی بیوی سے رجوع کر سکو ۔
یہ روایت امام طبرانی نے معجم اوسط میں نقل کی ہے ۔ اور اس کے رجال صحیح کے رجال ہیں صرف اسماعیل بن ابراہیم ترجمانی کا معاملہ مختلف ہے ، اور وہ ثقہ ہے ۔

سیدنا عبداللہ بن عمر رضی اللہ عنہما بیان کرتے ہیں : انہوں نے اپنی بیوی کو اس کے حیض کے دوران ایک طلاق دیدی پھر انہوں نے اس کے بعد باقی کی دو طلاقیں دو قروء کے دوران دینے کا ارادہ کیا جو باقی رہ گئی تھیں اس بات کی اطلاع نبی اکرم صلی اللہ علیہ وسلم کو ملی ، تو آپ نے ارشاد فرمایا : اے ابن عمر ! کیا اللہ تعالیٰ نے اس طرح کرنے کا حکم دیا ہے تم نے سنت کی خلاف ورزی کی ہے سنت یہ ہے کہ جب طہر کا آغاز ہو ، تو تم ہر قرء میں ایک طلاق دو پھر نبی اکرم صلی اللہ علیہ وسلم نے مجھے حکم دیا میں نے اس عورت سے رجوع کر لیا پھر آپ نے ارشاد فرمایا ، پھر جب اسے حیض آئے پھر جب یہ پاک ہو جائے ، تو اس وقت تم اسے طلاق دیدینا یا اپنے ساتھ روک لینا میں نے عرض کی : یا رسول اللہ ! اگر میں نے اسے تین طلاقیں دیدی ہوتیں ، تو کیا میرے لئے اس سے رجوع کا حق ہونا تھا ؟ نبی اکرم صلی اللہ علیہ وسلم نے فرمایا : اس صورت میں اس نے تم سے جدا ہو جانا تھا ، اور یہ چیز معصیت ہوئی تھی ۔ ( علامہ ہیثمی فرماتے ہیں : ) میں یہ کہتا ہوں سیدنا عبداللہ بن عمر رضی اللہ عنہما سے منقول ایک حدیث صحیح میں مذکور ہے ، لیکن وہ اس سباق کے بغیر ہے ۔
یہ روایت امام طبرانی نے نقل کی ہے ۔ اس کی سند میں ایک راوی علی بن سعید رازی ہے ۔ امام دارقطنی رحمہ اللہ کہتے ہیں : یہ اتنے پائے کہ نہیں ہے دیگر حضرات نے اس کی بڑائی کا اعتراف کیا ہے اس روایت کے بقیہ رجال ثقہ ہیں ۔

ابوزبیر بیان کرتے ہیں : میں نے سیدنا جابر رضی اللہ عنہ سے ایسے شخص کے بارے میں دریافت کیا : جو اپنی بیوی کو اس وقت طلاق دیدیتا ہے ، جب اس کی بیوی حیض کی حالت میں ہوتی ہے ، تو انہوں نے بتایا سیدنا عبداللہ بن عمر رضی اللہ عنہما نے اپنی بیوی کو اس کے حیض کے دوران طلاق دیدی سیدنا عمر رضی اللہ عنہ نبی اکرم صلی اللہ علیہ وسلم کی خدمت میں حاضر ہوئے ، اور آپ کو اس بارے میں بتایا تو نبی اکرم صلی اللہ علیہ وسلم نے ارشاد فرمایا : اسے چاہیے کہ وہ اس عورت سے رجوع کر لے کیونکہ وہ عورت ابھی اس کی بیوی ہے ۔
یہ روایت امام أحمد نے نقل کی ہے ۔ اور اس کے رجال صحیح کے رجال ہیں صرف ابن لہیعہ کا معاملہ مختلف ہے ، اور اس کی نقل کردہ حدیث حسن ہے ۔

سیدنا ابوموسی اشعری رضی اللہ عنہ بیان کرتے ہیں : نبی اکرم صلی اللہ علیہ وسلم نے فرمایا : اپنی بیوی سے یہ کہنا : میں نے تمہیں طلاق دی میں نے تم سے رجوع کر لیا ( اس طرح کے کلمات استعمال کرنا ) مسلمانوں کا طلاق دینے کا طریقہ نہیں ہے تم لوگ عورت کو اس کے ظہر کے آغاز میں طلاق دو ۔
یہ روایت امام طبرانی نے معجم اوسط میں نقل کی ہے ۔ یہ الفاظ ان کے ہیں اور معجم کبیر میں بھی نقل کی ہے ۔ تا ہم انہوں نے یہ کہا: ہے کہ یہ حمید بن عبدالرحمن خمیری کے حوالے سے منقول ہے وہ بیان کرتے ہیں : سیدنا ابوموسی اشعری رضی اللہ عنہ کو یہ اطلاع ملی کہ نبی اکرم نے اشعر قبیلے کے لوگوں پر ناراضگی کا اظہار کیا ہے ۔ انہوں نے عرض کی : یا رسول اللہ ! مجھے یہ بات پتہ چلی ہے کہ آپ نے اشعر قبیلے کے لوگوں پر ناراضگی کا اظہار کیا ہے ۔ نبی اکرم صلی اللہ علیہ وسلم نے فرمایا جی ہاں اس کی وجہ یہ ہے کہ ان میں سے کوئی ایک شخص یہ کہتا ہے کہ میں نے نکاح کر لیا میں نے طلاق دیدی ۔ ۔ ۔ ۔ ۔ ۔ ۔ ۔ ۔ اس کے بعد راوی نے حسب سابق روایت ذکر کی ہے ، اور اس کے رجال ثقہ ہیں ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” طلاق صرف عدت کے لئے ہوتی ہے ، اور غلام آزاد کرنا صرف اللہ کی رضا کے لئے ہوتا ہے “ ۔
یہ روایت امام طبرانی نے نقل کی ہے ۔ اس کی سند میں ایک راوی أحمد بن سعید بن فرقد ہے ، اور وہ ضعیف ہے ۔

سیدنا عبداللہ بن مسعود رضی اللہ عنہ فرماتے ہیں : تم ان عورتوں کو ان کی عدت کے لئے طلاق دو سیدنا عبداللہ رضی اللہ عنہ فرماتے ہیں : اس سے مراد طہر میں صحبت کیے بغیر طلاق دینا ہے ۔
یہ روایت امام طبرانی نے نقل کی ہے ۔ اس کی سند میں ایک راوی اسحاق بن ابراہیم عبدی ہے ، اور میں اس سے واقف نہیں ہوں ۔