مجمع الزوائد ومنبع الفوائد

نضلہ بن طریف بیان کرتے ہیں : ان میں سے ایک شخص کا نام اعشی تھا اس کا نام عبداللہ بن اعور تھا اس کی ایک بیوی تھی جس کا نام معاذہ تھا وہ شخص رجب کے مہینے میں حجر سے اپنے اہل خانہ کے لئے سامان لانے کے لئے نکلا اس کی غیر موجودگی میں اس کی بیوی بھاگ گئی وہ اس کی نافرمانی کرتے ہوئے بھاگ گئی تھی اس نے ان لوگوں میں سے ایک شخص کی پناہ لے لی جس کا نام مطرف بن بہصل بن کعب بن قمیشع بن دلف بن اہصم بن عبدالله بن حرماز تھا تو اس شخص نے اسے اپنی پشت کے پیچھے کر لیا جب اعشی واپس آیا اور اس نے اپنی عورت کو اس گھر میں نہیں پایا اور اسے یہ بات پتہ چلی کہ اس عورت نے اس کی نافرمانی کی ہے ، اور مطرف بن بہصل کی پناہ لی ہے ، تو وہ شخص مطرف کے پاس آیا اور بولا: میری بیوی معاذہ تمہارے پاس ہے تم اسے میرے حوالے کر دو اس نے کہا: میرے پاس نہیں ہے اگر میرے پاس ہوتی بھی ، تو میں نے اسے تمہارے حوالے نہیں کرنا تھا راوی کہتے ہیں : مطرف اس کے مقابلے میں زیادہ صاحب حیثیت تھا وہ شخص وہاں سے نکلا اور نبی اکرم صلی اللہ علیہ وسلم کی خدمت میں آپ کی پناہ مانگی اور یہ اشعار پڑھے : ” اے لوگوں کے سردار ، اور عربوں کے آقا ، میں آپ کے سامنے ایک زیادتی ( یا اپنی بیوی کی ) شکایت کرنا چاہتا ہوں ، جو اپنی کچھار کے سائے میں موجود تاریک رات جیسی ، بھیڑیے کی مادہ کی طرح ہے ، میں رجب کے مہینے میں اناج حاصل کرنے کے لیے نکلا تھا ، تو اس نے میری غیر موجودگی میں زیادتی کی اور بھاگ گئی ، اس نے عہد کی خلاف ورزی کی اور روپوش ہو گئی ، اور اس نے مجھے اس صورتحال کا شکار کر دیا جس طرح ” عیص “ نامی درخت ہوتا ہے جس کے پتے اتر جاتے ہیں ، ( یہ عورتیں ) مغلوب شخص کے لیے غالب آنے والی سب سے بری چیز ہیں “ ۔ اس وقت نبی اکرم صلی اللہ علیہ وسلم نے یہ فرمایا : ( یعنی یہ الفاظ دہرائے : ) ” ( یہ عورتیں ) مغلوب شخص کے لیے ، غالب آنے والی سب سے بری چیز ہیں “ ۔ اس نے نبی اکرم صلی اللہ علیہ وسلم کے سامنے اپنی بیوی کی شکایت کی اور اس نے بیوی کے طرز عمل کے بارے میں بتایا اور یہ بھی بتایا کہ وہ ان میں سے ایک شخص کے پاس ہے جس کا نام مطرف بن بہصل ہے ، تو نبی اکرم صلی اللہ علیہ وسلم نے اس شخص کے لئے مطرف کے نام ایک خط لکھا کہ اس شخص کی بیوی معاذہ ہے تم اس عورت کو اس کے حوالے کر دو اس شخص کے پاس نبی اکرم صلی اللہ علیہ وسلم کا مکتوب آیا وہ اس شخص کے سامنے پڑھا گیا تو اس نے اس عورت سے کہا: اے معاذہ ! یہ نبی اکرم صلی اللہ علیہ وسلم کا مکتوب تمہارے بارے میں آ گیا ہے اب میں تمہیں اس شخص کے حوالے کر دوں گا اس عورت نے کہا: پھر تم اس شخص سے عہد اور میثاق لینا اور نبی اکرم صلی اللہ علیہ وسلم کا ذمہ لینا کہ وہ میرے اس عمل پر مجھے کوئی سزا نہیں دے گا اس شخص نے اس عورت کے لئے اس بارے میں عہد لیا اور پھر مطرف نے اس عورت کو اس شخص کے حوالے کر دیا تو اس شخص نے یہ اشعار پڑھے : ” آپ کی زندگی کی قسم ہے معاذہ کے ساتھ میری محبت ایسی نہیں ہے ، کہ کوئی شخص یا زمانے کا گزرنا ، یا جو برائی اس نے کی ہے وہ اس ( محبت ) کو ختم کر دے ، جبکہ بھٹکے ہوئے لوگوں نے ، میرے بعد اس کو سرگوشی میں بات کر کے بہکا دیا تھا “
یہ روایت عبداللہ بن أحمد اور طبرانی نے نقل کی ہے ، اور اس کی سند میں راویوں کی ایک جماعت ایسی ہے ، جن سے میں واقف نہیں ہوں ۔

سیدنا اعشی مازنی رضی اللہ عنہ بیان کرتے ہیں : میں نبی اکرم صلی اللہ علیہ وسلم کی خدمت میں حاضر ہوا اور میں نے آپ کو یہ اشعار سنائے : ” اے لوگوں کے سردار ، اور عربوں کے آقا ، میں نے ایک زیادتی کا سامنا کیا ہے ، میں رجب کے مہینے میں اناج حاصل کرنے کے لیے نکلا تھا ، تو اس نے میری غیر موجودگی میں زیادتی کی اور بھاگ گئی ، اس نے عہد کی خلاف ورزی کی اور روپوش ہو گئی “ ( یہ عورتیں ) مغلوب شخص کے لیے غالب آنے والی سب سے بری چیز ہیں “ ۔ راوی کہتے ہیں : تو اس موقع پر نبی اکرم صلی اللہ علیہ وسلم نے یہ کہنا شروع کیا ، ( یعنی یہ الفاظ ، دہرائے : ) ” ( یہ عورتیں ) مغلوب شخص کے لیے ، غالب آنے والی سب سے بری چیز ہیں “ ۔
یہ روایت أحمد بن عبداللہ نے نقل کی ہے ۔ اور اس کے رجال ثقہ ہیں ۔