مجمع الزوائد ومنبع الفوائد

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” پریشانی کے حساب سے اللہ تعالیٰ کی طرف سے مدد آتی ہے ، اور آزمائش کی مقدار کے حساب سے اللہ تعالیٰ کی طرف سے صبر آتا ہے “ ۔
یہ روایت امام بزار نے نقل کی ہے ۔ اس کی سند میں ایک راوی طارق بن عمار ہے ۔ امام بخاری رحمہ اللہ کہتے ہیں : اس کی حدیث کی متابعت نہیں کی گئی اس روایت کے بقیہ رجال صحیح کے رجال ہیں ۔

سیدنا عمرو بن امیہ رضی اللہ عنہ بیان کرتے ہیں : بازار میں سیدنا عمر رضی اللہ عنہ ان کے پاس آئے وہ اس وقت ایک چادر کے بارے میں بھاؤ تاؤ کر رہے تھے ۔ سیدنا عمر رضی اللہ عنہ نے دریافت کیا : اے عمرو ! یہ کیا ہے ؟ انہوں نے جواب دیا : یہ ایک چادر ہے ، جسے میں نے خریدا ہے ، اور میں اسے صدقہ کروں گا ۔ سیدنا عمر رضی اللہ عنہ نے ان سے کہا: تم ایسا کر لینا پھر وہ بعد میں ان کے پاس آئے ، اور دریافت کیا : اے عمرو ! اس چادر کا کیا بنا ؟ انہوں نے جواب دیا : میں نے اسے صدقہ کر دیا سیدنا عمر رضی اللہ عنہ نے دریافت کیا : کس کو ؟ انہوں نے جواب دیا : ( اپنی بیوی ) سخیلہ بنت عبیدہ کو سیدنا عمر رضی اللہ عنہ نے فرمایا : کیا تم نے یہ نہیں کہا: تھا کہ تم ، تو اسے صدقہ کرو گے ، تو سیدنا عمرو بن امیہ رضی اللہ عنہ نے جواب دیا : جی ہاں ! لیکن میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” ان خواتین ( یعنی بیویوں ) کو تم جو بھی چیز دیتے ہو وہ تمہارے لئے صدقہ ہو گا “ ۔ راوی کہتے ہیں : تو سیدنا عمر رضی اللہ عنہ نے کہا: اے عمرو ! اللہ کے رسول کی طرف جھوٹی بات منسوب نہ کرو ، تو سیدنا عمرو بن امیہ رضی اللہ عنہ نے کہا: اللہ کی قسم ! میں آپ سے اس وقت تک جدا نہیں ہوؤں گا ، جب تک ہم اُم المؤمنین سیدہ عائشہ رضی اللہ عنہا کے پاس نہیں جاتے ، انہوں نے کہا: اے عمرو ! تم اللہ کے رسول کی طرف جھوٹی بات منسوب نہ کرو ، ان لوگوں نے سیدہ عائشہ رضی اللہ عنہا کے ہاں اندر آنے کی اجازت مانگی سیدنا عمرو بن امیہ رضی اللہ عنہ نے کہا: میں آپ کو اللہ کا واسطہ دے کر یہ دریافت کرتا ہوں کہ کیا آپ نے اللہ کے رسول صلی اللہ علیہ وسلم کو یہ ارشاد فرماتے ہوئے سنا ہے : ” تم لوگ ان خواتین ( یعنی اپنی بیویوں ) کو جو کچھ دیتے ہو ، وہ تمہارے لئے صدقہ ہوتا ہے “ ۔ سیدہ عائشہ رضی اللہ عنہا نے جواب دیا : اے اللہ ! جی ہاں ! اے اللہ ! جی ہاں ، تو سیدنا عمر رضی اللہ عنہ نے ( اپنے آپ کو مخاطب کر کے ) کہا: میں اس کے بارے میں کہاں نا واقف تھا ؟ بازار کے بھاؤ تاؤ نے مجھے غافل رکھا ۔
یہ روایت امام بزار نے نقل کی ہے ۔ امام أحمد نے ان کے حوالے سے
یہ روایت نقل کی ہے : ” آدمی اپنی بیوی کو جو کچھ دیتا ہے وہ صدقہ ہوتی ہے “ ۔ ان دونوں کی سند میں ایک راوی محمد بن ابوحمید ہے ، اور وہ ضعیف ہے ۔

سیدنا عمرو بن امیہ رضی اللہ عنہ بیان کرتے ہیں : سیدنا عثمان بن عفان رضی اللہ عنہ یا شاید سیدنا عبدالرحمن بن عوف رضی اللہ عنہ ( یہ شک بعد والے راوی کو ہے ) کا گزر ایک چادر والے شخص کے پاس سے ہوا انہیں وہ چادر مہنگی لگی پھر سیدنا عمرو بن امیہ رضی اللہ عنہ کا گزر اس کے پاس سے ہوا تو انہوں نے وہ چادر خرید لی اور انہوں نے وہ چادر اپنی بیوی سخیلہ بنت عبیدہ بن حارث بن مطلب کو پہننے کے لئے دیدی بعد میں سیدنا عثمان غنی رضی اللہ عنہ یا سیدنا عبدالرحمن کا گزر ان کے پاس سے ہوا تو انہوں نے دریافت کیا : تم نے جو چادر خریدی تھی اس کا کیا بنا سیدنا عمرو رضی اللہ عنہ نے جواب دیا : میں نے وہ سخیلہ بنت عبیدہ ( یعنی اپنی بیوی ) کو صدقہ کر دی ہے ۔ انہوں نے دریافت کیا : تم اپنی بیوی کے ساتھ جو کچھ کرتے ہو وہ صدقہ ہوتا ہے سیدنا عمرو بن امیہ رضی اللہ عنہ نے جواب دیا : میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے ، ان صاحب نے اس بات کا تذکرہ نبی اکرم صلی اللہ علیہ وسلم کے سامنے کیا جو سیدنا عمرو رضی اللہ عنہ نے بیان کی تھی ، تو نبی اکرم صلی اللہ علیہ وسلم نے فرمایا : عمرو نے ٹھیک بات کہی تھی تم اپنی بیوی کے ساتھ جو کچھ ( بھی بھلائی ) کرو گے وہ ان پر صدقہ ہو گا ۔
یہ روایت امام ابویعلیٰ اور امام طبرانی نے نقل کی ہے ۔ امام طبرانی کے تمام رجال ثقہ ہیں ۔

سیدنا جابر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بندے کے میزان میں جو چیز سب سے پہلے رکھی جائے گی وہ اس کا اپنے اہل خانہ پر کیا ہوا خرچ ہے “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایسا راوی ہے جس سے میں واقف نہیں ہوں ۔

سیدنا عرباض بن ساریہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا : ” جب کوئی شخص اپنی بیوی کو پانی پلاتا ہے ، تو اسے اس کا بھی اجر ملے گا “ راوی کہتے ہیں : میں اپنی بیوی کے پاس آیا اور میں نے اسے پانی پلایا اور اسے وہ بات بیان کی جو میں نے نبی اکرم صلی اللہ علیہ وسلم کی زبانی سنی تھی ۔
یہ روایت امام احد نے نقل کی ہے ۔ اور امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی سفیان بن حسین ہے زہری سے اس کے حدیث نقل کرنے میں ضعف پایا جاتا ہے ، اور
یہ روایت ان میں سے ایک ہے ۔ اس سے پہلے کتاب الزکوۃ کے آخر میں اہل خانہ اور اولاد اور دیگر پر خرچ کرنے سے متعلق روایات گزر چکی ہیں ۔

سیدنا عبداللہ بن عمر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” آدمی کے گناہگار ہونے کے لیئے اتنا ہی کافی ہے کہ وہ ان لوگوں کو ضائع کر دے جن کا خرچ اس ( آدمی ) کے ذمہ ہو“ ۔
یہ روایت امام طبرانی نے اسماعیل بن عیاش کی موسیٰ بن عتبہ سے نقل کردہ روایت کے طور پر نقل کی ہے ۔ اور اسماعیل نے اہل حجاز سے ضعیف روایات نقل کی ہیں ۔

سیدنا کعب بن عجرہ رضی اللہ عنہ بیان کرتے ہیں : نبی اکرم صلی اللہ علیہ وسلم کا گزر میرے پاس سے ہوا نبی اکرم صلی اللہ علیہ وسلم کے اصحاب نے میرے جسم کی مضبوطی اور چاک و چوبند ہونا دیکھا تو یہ کہا: یا رسول اللہ ! کاش یہ اللہ کی راہ میں ہوتا نبی اکرم صلی اللہ علیہ وسلم نے ارشاد فرمایا : اگر یہ اپنے کمسن بچوں کے لئے کمانے کے لئے نکلا ہے ، تو یہ اللہ کی راہ میں ہے اگر یہ اپنے بوڑھے عمر رسیدہ ماں باپ کے لئے کمانے کے لئے نکلا ہے ، تو یہ اللہ کی راہ میں ہے اگر یہ اپنی ذات کے لئے کمانے کے لئے نکلا ہے تاکہ یہ اپنے آپ کو مانگنے سے بچا کے رکھے ، تو یہ اللہ کی راہ میں ہے ، اور اگر یہ ریاکاری اور فخر کے اظہار کے لئے نکلا ہے ، تو پھر یہ شیطان کی راہ ہے “ ۔
یہ روایت امام طبرانی نے تینوں کتابوں میں نقل کی ہے ۔ اور معجم کبیر کے رجال صحیح کے رجال ہیں ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” اپنے ماں باپ کے لئے کمانے والا ، تاکہ انہیں بچا کے رکھے یا انہیں لوگوں سے بے نیاز رکھے وہ اللہ کی راہ میں شمار ہوتا ہے اپنی ذات کے لئے کمانے والا تاکہ اپنے آپ کو ( لوگوں سے ) بے نیاز رکھے یا لوگوں سے ( مانگنے سے ) بچا کے رکھے وہ اللہ کی راہ میں شمار ہوتا ہے ، اور کثرت کے لئے کمانے والا شیطان کی راہ میں ہوتا ہے “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی اسحاق بن سید ہے ، اور وہ ضعیف ہے سیدنا ابوہریرہ رضی اللہ عنہ کی نقل کردہ حدیث نیکی اور صلہ رحمی سے متعلق باب میں آئے گی ، جس میں یہ مذکور ہے کہ اولاد بہن بھائیوں کے لئے کمانے والا بھی اسی طرح ہے ۔

سیدنا عبدالحمید ابوعمرو رضی اللہ عنہ کے بارے میں یہ بات منقول ہے کہ فاطمہ بنت قیس رضی اللہ عنہا ان کی اہلیہ تھیں ان صاحب نے اس خاتون کو طلاق دیدی وہ خاتون نبی اکرم صلی اللہ علیہ وسلم کی خدمت میں حاضر ہوئیں ، تو نبی اکرم صلی اللہ علیہ وسلم نے ارشاد فرمایا : اسے خرچ نہیں ملے گا ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی محمد بن خالد بن عبداللہ ہے ، اور وہ ضعیف ہے ابن حبان نے اسے ثقہ قرار دیا ہے وہ کہتے ہیں : یہ غلطی کر جاتا ہے ( اور دوسرے راویوں کے ) برخلاف روایت نقل کرتا ہے ۔

سیدنا عمر رضی اللہ عنہ اور سیدنا عبداللہ بن مسعود رضی اللہ عنہ فرماتے ہیں : جس عورت کو تین طلاقیں دی گئی ہوں ، اسے ( سابقہ شوہر کی طرف سے ) رہائش اور خرچ ملے گا ۔
یہ روایت امام طبرانی نے نقل کی ہے ۔ اور اس کی سند منقطع ہے ۔

سیدنا عبداللہ بن عمر رضی اللہ عنہا کے بارے میں یہ بات منقول ہے ان سے حاملہ اور بیوہ کے بارے میں دریافت کیا گیا ، تو انہوں نے فرمایا : ہم اسے خرچ دیا کرتے تھے ۔
یہ روایت امام طبرانی نے نقل کی ہے ۔ اور اس کے رجال ثقہ ہیں ۔

سیدنا عبداللہ بن عباس رضی اللہ عنہما بیان کرتے ہیں : ایک شخص نے اپنی بیوی کو طلاق دیدی وہ عورت نبی اکرم صلی اللہ علیہ وسلم کی خدمت میں حاضر ہوئی ، تو نبی اکرم صلی اللہ علیہ وسلم نے ارشاد فرمایا : تمہیں خرچ اور رہائش نہیں ملے گی ۔
یہ روایت امام بزار نے نقل کی ہے ۔ اس کی سند میں ایک راوی ابراہیم بن اسماعیل بن ابوحبیبہ ہے ، اور وہ متروک ہے ۔