مجمع الزوائد ومنبع الفوائد

سیدہ صفیہ بنت حیی رضی اللہ عنہا بیان کرتی ہیں : نبی اکرم صلی اللہ علیہ وسلم اپنی ازواج کو ساتھ لے کر حج کے لئے تشریف لے گئے راستے میں ایک جگہ پر ایک شخص اترا اور اس نے ان خواتین کے اونٹوں کو لے کے چلنا شروع کیا وہ تیزی سے چلنے لگا ، تو نبی اکرم صلی اللہ علیہ وسلم نے فرمایا : آرام سے تم آبگینوں کو لے کے جا رہے ہو یعنی خواتین کو لے کے جا رہے ہو وہ لوگ چلتے ہوئے جا رہے تھے اسی دوران سیدہ صفیہ بنت حیی رضی اللہ عنہا کا اونٹ بیٹھ گیا حالانکہ ان کا اونٹ سب سے اچھا تھا وہ رونے لگی نبی اکرم صلی اللہ علیہ وسلم تشریف لائے آپ کو اس بارے میں بتایا گیا تو نبی اکرم صلی اللہ علیہ وسلم اپنے دست مبارک کے ذریعے ان کے آنسو پونچھنے لگے لیکن ان کے رونے میں اضافہ ہو گیا نبی اکرم صلی اللہ علیہ وسلم انہیں منع کر رہے تھے جب ان کا رونا زیادہ ہو گیا تو نبی اکرم صلی اللہ علیہ وسلم نے انہیں ڈانٹا اور لوگوں کو یہ حکم دیا کہ وہ پڑاؤ کر لیں لوگوں نے پڑاؤ کر لیا حالانکہ نبی اکرم صلی اللہ علیہ وسلم کا پڑاؤ کرنے کا ارادہ نہیں تھا سیدہ صفیہ رضی اللہ عنہا بیان کرتی ہیں : لوگوں نے پڑاؤ کر لیا وہ میری باری کا مخصوص دن تھا جب لوگوں نے پڑاؤ کر لیا تو نبی اکرم صلی اللہ علیہ وسلم کے لئے خیمہ لگایا گیا نبی اکرم صلی اللہ علیہ وسلم اس میں تشریف لے گئے سیدہ صفیہ رضی اللہ عنہا کہتی ہیں : مجھے سمجھ نہیں آ رہی تھی کہ میں کیسے نبی اکرم صلی اللہ علیہ وسلم کا سامنا کروں مجھے یہ اندیشہ تھا کہ شاید آپ کو مجھ پر غصہ ہو گا میں سیدہ عائشہ رضی اللہ عنہا کے پاس گئی اور میں نے ان سے کہا: تم یہ بات جانتی ہو کہ میں نبی اکرم صلی اللہ علیہ وسلم کے ساتھ اپنے مخصوص دن کو کبھی بھی کسی بھی چیز کے عوض میں نہیں دے سکتی لیکن میں اپنا مخصوص دن تمہیں دیتی ہوں ۔ اس شرط پر کہ تم اللہ کے رسول کو مجھ سے راضی کروا دو ! سیدہ عائشہ رضی اللہ عنہا نے کہا: ٹھیک ہے پھر سیدہ عائشہ رضی اللہ عنہا نے اپنی چادر اوڑھی اس پر زعفران لگایا ہوا تھا انہوں نے اس پر پانی چھڑکا تاکہ اس کی خوشبو آنا شروع ہو جائے پھر انہوں نے عمدہ لباس پہنا اور نبی اکرم صلی اللہ علیہ وسلم کی خدمت میں تشریف لے گئیں انہوں نے خیمے کا کنارہ اٹھایا تو نبی اکرم صلی اللہ علیہ وسلم نے ان سے فرمایا : تمہیں کیا ہوا ہے آج تمہارا مخصوص دن نہیں ہے ۔ انہوں نے عرض کی : یہ اللہ تعالیٰ کا فضل ہے ، جسے وہ چاہتا ہے اسے عطا کر دیتا ہے ۔ نبی اکرم صلی اللہ علیہ وسلم نے دوپہر اپنی اہلیہ کے ساتھ گزاری جب روانگی کا وقت ہوا تو نبی اکرم صلی اللہ علیہ وسلم نے سیدہ زینب بنت جحش رضی اللہ عنہا سے کہا: اے زینب ! تم ایک اونٹ اپنی بہن صفیہ کو دیدو اس خاتون کے پاس سب سے زیادہ سواریاں تھیں انہوں نے کہا: کیا میں آپ کی یہودی عورت کو دیدوں ، نبی اکرم صلی اللہ علیہ وسلم نے جب ان کی یہ بات زبانی سنی ، تو آپ غصے میں آ گئے ، اور آپ نے ان کے ساتھ لاتعلقی اختیار کر لی اور آپ نے ان کے ساتھ کوئی بات چیت نہیں کی یہاں تک کہ آپ مکہ آ گئے سفر کے ایام کے دوران منی کے ایام میں آپ نے ان سے کوئی بات نہیں کی یہاں تک کہ آپ مدینہ منورہ آ گئے پھر محرم بھی گزر گیا صفر بھی گزر گیا لیکن آپ ان کے پاس تشریف نہیں لائے ، اور آپ نے انہیں باری میں سے حصہ بھی نہیں دیا یہاں تک کہ وہ آپ کی طرف سے مایوس ہو گئیں جب ربیع الاول کا مہینہ آیا تو نبی اکرم صلی اللہ علیہ وسلم ان کے پاس تشریف لے گئے انہوں نے آپ کا سایہ دیکھا تو بولیں یہ ، تو کسی مرد کا سایہ ہے ۔ نبی اکرم صلی اللہ علیہ وسلم تو میرے ہاں تشریف لاتے نہیں ہیں ، تو پھر یہ کون ہے ، جب نبی اکرم صلی اللہ علیہ وسلم اندر تشریف لائے ، تو جب انہوں نے دیکھا تو عرض کی : یا رسول اللہ ! مجھے سمجھ نہیں آ رہی کہ آپ میرے ہاں تشریف لائے ہیں ، تو میں کیا کروں ان کی ایک کنیز تھیں جسے انہوں نے سنبھال کے رکھا ہوا تھا انہوں نے عرض کی : وہ کنیز آپ کی ہوئی پھر آپ سیدہ زینب رضی اللہ عنہا کے پلنگ کی طرف تشریف لے گئے جسے اٹھا لیا گیا تھا آپ نے اپنے دست مبارک کے ذریعے اسے بچھایا اور پھر اپنی اہلیہ کے ساتھ وظیفہ زوجیت ادا کیا اور آپ ان سے راضی ہو گئے ۔
یہ روایت امام أحمد نے نقل کی ہے ۔ اس کی سند میں ایک راوی سمیہ نامی خاتون ہیں امام ابوداؤد نے اور دیگر حضرات نے اس کے حوالے سے روایات نقل کی ہیں کسی نے بھی اس خاتون کو ضعیف قرار نہیں دیا ہے اس روایت کے بقیہ رجال ثقہ ہیں ۔

سیدہ عائشہ صدیقہ رضی اللہ عنہا بیان کرتی ہیں : سیدہ صفیہ رضی اللہ عنہا نے نبی اکرم صلی اللہ علیہ وسلم کی خدمت میں کھانا بھیجا جو انہوں نے نبی اکرم صلی اللہ علیہ وسلم کے لئے تیار کیا تھا ۔ نبی اکرم صلی اللہ علیہ وسلم اس وقت میرے ہاں موجود تھے جب میں نے کنیز کو دیکھا تو مجھے غصہ آ گیا جب وہ کنیز میرے سامنے آئی ، تو میں نے پیالے پر ہاتھ مار کر اسے پھینک دیا سیدہ عائشہ رضی اللہ عنہا کہتی ہیں ، پھر میں نے نبی اکرم صلی اللہ علیہ وسلم کو دیکھا تو مجھے آپ کے چہرے پر غصے کا اندازہ ہو گیا میں نے عرض کی : میں اللہ کے رسول کی پناہ مانگتی ہوں ۔ اس بات سے کہ آپ مجھ پر لعنت کریں ۔ میں یہ کہتا ہوں : امام ابوداؤد اور دیگر حضرات نے اسے اختصار کے ساتھ نقل کیا ہے ۔
یہ روایت امام أحمد نے نقل کی ہے ۔ اور اس کے رجال ثقہ ہیں ۔

سیدہ عائشہ صدیقہ رضی اللہ عنہا بیان کرتی ہیں : سیدہ ام سلمہ رضی اللہ عنہا ہمارے پاس موجود تھیں نبی اکرم صلی اللہ علیہ وسلم رات کے آغاز کے وقت تشریف لائے ، سیدہ عائشہ رضی اللہ عنہا بیان کرتی ہیں : مجھے ایک چیز یاد آئی جو آپ نے اپنے دست مبارک کے ذریعے بنائی تھی سیدہ ام سلمہ ” کو اس کا پتہ نہیں چلنا چاہیے تھا ، میں نے اشارے کنائے میں آپ کی توجہ اس طرف مبذول کروانا چاہی ، تو آپ کو ( میرے مدعا کی ) سمجھ آ گئی ، سیدہ ام سلمہ رضی اللہ عنہا نے کہا: کیا اس وقت اس طرح ہو رہا ہے ؟ کیا ہم میں سے کوئی ایک آپ کے پاس صرف اس وقت ہو سکتی ہے ، جب آپ تنہا ہوں ، سیدہ ام سلمہ رضی اللہ عنہا نے سیدہ عائشہ رضی اللہ عنہا کو برا کہنا شروع کیا نبی اکرم صلی اللہ علیہ وسلم انہیں منع کرنے لگے لیکن وہ نہیں مانی نبی اکرم صلی اللہ علیہ وسلم نے فرمایا : تم بھی اسے جواب دو سیدہ عائشہ رضی اللہ عنہا نے انہیں برا کہنا شروع کیا یہاں تک کہ وہ ان پر غالب آ گئیں ۔ سیدہ ام سلمہ رضی اللہ عنہا سیدنا علی رضی اللہ عنہ اور سیدہ فاطمہ رضی اللہ عنہا کے پاس چلی گئیں اور یہ کہا: عائشہ نے انہیں برا کہا: ہے ، اور تم لوگوں کے بارے میں یہ کہا: ہے ، اور وہ کہا: ہے سیدنا علی رضی اللہ عنہ نے سیدہ فاطمہ رضی اللہ عنہا سے کہا: تم نبی اکرم صلی اللہ علیہ وسلم کی خدمت میں جاؤ اور آپ کی خدمت میں عرض کرو کہ سیدہ عائشہ رضی اللہ عنہا نے ہمارے بارے میں یہ کہا: ہے ، اور یہ کہا: ہے میں نبی اکرم صلی اللہ علیہ وسلم کی خدمت میں حاضر ہوئی اور آپ کے سامنے وہ بات ذکر کی ، تو نبی اکرم صلی اللہ علیہ وسلم نے سیدہ فاطمہ رضی اللہ عنہا سے فرمایا : رب کعبہ کی قسم ! اوہ تمہارے باپ کی محبوب شخصیت ہے سیدہ فاطمہ رضی اللہ عنہا سیدنا علی رضی اللہ عنہ کے پاس واپس گئیں اور سیدنا علی رضی اللہ عنہ کے سامنے وہ بات ذکر کی جو نبی اکرم صلی اللہ علیہ وسلم نے انہیں ارشاد فرمائی تھی ، تو انہوں نے کہا: کیا تمہارے لیے یہ کافی نہیں ہے کہ سیدہ عائشہ رضی اللہ عنہا نے ہمارے بارے میں یہ کہا: اور وہ کہا: ، لیکن جب فاطمہ نبی اکرم صلی اللہ علیہ وسلم کے پاس گئیں تو آپ نے یہ فرمایا : رب کعبہ کی قسم ! یہ تمہارے باپ کی محبوب شخصیت ہے ۔
( علامہ ہیثمی فرماتے ہیں : ) میں یہ کہتا ہوں : یہ روایت امام ابوداؤد نے نقل کی ہے ۔ تاہم انہوں نے اس میں سیدہ ام سلمہ رضی اللہ عنہا کی جگہ سیدہ زینب بنت جحش رضی اللہ عنہا کا ذکر کیا ہے ، اور ان کی روایت کی اس روایت سے زیادہ مختصر ہے ، اور باقی اللہ زیادہ بہتر جانتا ہے ۔
یہ روایت امام أحمد نے نقل کی ہے ۔ اس کی سند میں ایک راوی علی بن زید ہے ، اور اس میں ضعف پایا جاتا ہے ، اور اس کی نقل کردہ حدیث حسن ہے ۔

سیدہ عائشہ صدیقہ رضی اللہ عنہا بیان کرتی ہیں : میرا سامان کم تھا ، اور وہ ایک تگڑے اونٹ پر تھا ، اور سیدہ صفیہ رضی اللہ عنہا کا سامان زیادہ تھا ، اور وہ ایک سست اور کمزور اونٹ پر تھا جس کی وجہ سے دیگر سواروں کو چلنے میں مشکل ہو رہی تھی نبی اکرم صلی اللہ علیہ وسلم نے فرمایا : تم عائشہ کا سامان منتقل کر کے صفیہ کے اونٹ پر رکھ دو اور صفیہ کا سامان منتقل کر کے عائشہ کے اونٹ پر رکھ دو تاکہ سوار چلتے رہیں سیدہ عائشہ رضی اللہ عنہا کہتی ہیں : جب میں نے یہ بات دیکھی ، تو میں نے کہا: اے اللہ کے بندو ! یہ یہودی عورت ہمارے مقابلے میں اللہ کے رسول پر غالب آ گئی ہے سیدہ عائشہ رضی اللہ عنہا کہتی ہیں : نبی اکرم صلی اللہ علیہ وسلم نے فرمایا : اے ام عبداللہ ! تمہارا سامان ہلکا ہے ، اور صفیہ کا سامان وزنی ہے جس کی وجہ سے سواروں کو چلنے میں دشواری پیش آ رہی ہے ، تو ہم نے اس کا سامان تمہارے اونٹ پر منتقل کر دیا ہے ، اور تمہارا سامان اس کے اونٹ پر منتقل کر دیا ہے سیدہ عائشہ رضی اللہ عنہا کہتی ہیں : میں نے کہا: کیا آپ کا یہ کہنا نہیں ہے کہ آپ اللہ کے رسول ہیں ۔ سیدہ عائشہ رضی اللہ عنہا فرماتی ہیں ، تو نبی اکرم صلی اللہ علیہ وسلم مسکرا دیے آپ نے ارشاد فرمایا : اے ام عبداللہ ! کیا تمہیں اس بارے میں شک ہے ؟ سیدہ عائشہ رضی اللہ عنہا کہتی ہیں : میں نے دریافت کیا : کیا آپ یہ نہیں کہتے ہیں : کہ آپ اللہ کے رسول ہیں ، تو آپ عدل سے کام کیوں نہیں لیتے ہیں سیدنا ابوبکر رضی اللہ عنہ نے مجھے سنا ان کے مزاج میں تیزی تھی وہ میری طرف آئے ، اور انہوں نے میرے چہرے پر طمنچہ مارا نبی اکرم صلی اللہ علیہ وسلم نے فرمایا : اے ابوبکر ! ٹھہر جاؤ انہوں نے عرض کی : یا رسول اللہ ! اس نے جو کہا: ، کیا آپ نے وہ سنا نہیں ہے ؟ نبی اکرم صلی اللہ علیہ وسلم نے فرمایا : مزاج کی تیزی کے وقت وادی کے اوپری اور نشیبی حصے کا فرق دکھائی نہیں دیتا ( یعنی غصے کے عالم میں کچھ سمجھ نہیں آتا ) ۔
یہ روایت امام ابویعلیٰ نے نقل کی ہے ۔ اس کی سند میں ایک راوی محمد بن اسحاق ہے ، اور وہ مدلس ہے ، اور ایک راوی سلمہ بن فضل ہے ، جسے ایک جماعت نے ثقہ قرار دیا ہے ، جن میں یحیی بن معین ابن حبان اور ابوحاتم شامل ہیں جبکہ ایک جماعت نے اسے ضعیف کہا: ہے ۔ اس روایت کے بقیہ رجال صحیح کے رجال ہیں
یہ روایت ابوشیخ بن حبان نے کتاب الامثال میں نقل کی ہے ۔ اور اس کی سند میں اسامہ بن زید لیثی کے علاوہ اور کوئی راوی نہیں ہے ، اور وہ صحیح کے رجال میں سے ہیں اور اس میں ضعف پایا جاتا ہے اس روایت کے بقیہ رجال ثقہ ہیں ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم سفر کر رہے تھے ہم آپ کے ساتھ تھے سیدہ صفیہ رضی اللہ عنہا کا اونٹ بیمار ہو گیا ۔ سیدہ زینب رضی اللہ عنہا کے ساتھ ایک اضافی سواری بھی تھی نبی اکرم صلی اللہ علیہ وسلم نے ان سے فرمایا : صفیہ کا اونٹ بیمار ہو گیا ہے اگر تم اپنا اونٹ اسے دیدو ( تو یہ مناسب ہو گا ) انہوں نے عرض کی : کیا میں اس یہودی عورت کو دیدوں ، تو نبی اکرم صلی اللہ علیہ وسلم غصے میں آ گئے ، اور آپ نے ذوالج کے مہینے کے بقیہ دن محرم کا مہینہ اور صفر کا مہینہ اور ربیع الاول کے مہینے کے کچھ دن ان سے لاتعلقی اختیار کیے رکھی یہاں تک کہ اس خاتون نے اپنا سامان اور بستر اٹھا دیا انہوں نے یہ گمان کیا کہ شاید اب نبی اکرم صلی اللہ علیہ وسلم ان کے ہاں تشریف نہیں لائیں گے ایک دن وہ دوپہر کے وقت بیٹھی ہوئی تھیں اسی دوران انہوں نے آپ کا سایہ دیکھا کہ آپ تشریف لا رہے ہیں ، تو انہوں نے دوبارہ پلنگ بچھایا اور سامان رکھ دیا ۔ ( علامہ ہیثمی فرماتے ہیں : ) میں یہ کہتا ہوں
یہ روایت امام ابوداؤد نے اختصار کے ساتھ نقل کی ہے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی خاتون سمیہ ہیں امام ابوداؤد اور دیگر حضرات نے ان سے روایت نقل کی ہے ۔ کسی نے ان پر جرح نہیں کی ہے اس روایت کے بقیہ رجال ثقہ ہیں ۔