مجمع الزوائد ومنبع الفوائد

سیدہ عائشہ صدیقہ رضی اللہ عنہا بیان کرتی ہیں : ایک رات نبی اکرم صلی اللہ علیہ وسلم نے اپنی ازواج کو ایک بات بیان کی ، تو ان ازواج میں سے ایک خاتون نے عرض کی : یا رسول اللہ ! یہ بات ، تو خرافہ کی بات کی طرح کی ہے ۔ نبی اکرم صلی اللہ علیہ وسلم نے دریافت کیا : کیا تم لوگ جانتے ہو ؟ خرافہ کون ہے ؟ خرافہ عذرہ قبیلے سے تعلق رکھنے والا ایک شخص تھا جسے زمانہ جاہلیت میں جنات نے قید کر دیا تھا وہ ایک طویل عرصے تک ان کے درمیان رہا پھر جنات نے اسے واپس انسانوں کی طرف بھیج دیا تو وہ لوگوں کو وہ باتیں بیان کیا کرتا تھا جو اس نے جنات میں عجیب و غریب چیزیں دیکھی تھیں ، تو لوگ یہ کہتے تھے کہ یہ خرافہ کی بات ہے ۔
یہ روایت امام أحمد امام ابویعلیٰ اور امام بزار نے نقل کی ہے ۔

امام طبرانی نے معجم اوسط میں سیدہ عائشہ صدیقہ رضی اللہ عنہا کے حوالے سے یہ بات نقل کی ہے ۔ کہ نبی اکرم صلی اللہ علیہ وسلم نے انہیں ایک بات بیان کی آپ اس وقت سیدہ عائشہ رضی اللہ عنہا کے ساتھ لحاف میں موجود تھے سیدہ عائشہ رضی اللہ عنہا نے عرض کی : یا رسول اللہ ! میرے ماں باپ آپ پر قربان ہوں اگر آپ نے مجھے یہ بات بیان نہ کی ہوتی ، تو میں یہی گمان کرتی کہ یہ خرافہ کی بات ہے ۔ نبی اکرم صلی اللہ علیہ وسلم نے فرمایا : خرافہ کی بات کیا ہوتی ہے ؟ اے عائشہ ! سیدہ عائشہ رضی اللہ عنہا نے بتایا کوئی ایسی چیز کہ جو نہ ہو اس کے بارے میں یہ کہا: جاتا ہے کہ یہ خرافہ کی بات ہے ۔ نبی اکرم صلی اللہ علیہ وسلم نے فرمایا : سب سے سچی بات خرافہ کی بات ہوتی ہے خرافہ بنو عذرہ سے تعلق رکھنے والا ایک شخص تھا جسے جنوں نے قید کر دیا تھا وہ ان کے ساتھ رہا جب وہ کوئی اطلاع چوری چھپے سنتے تھے ، تو وہ اسے بتا دیتے تھے خرافہ لوگوں کو بتا دیتا تھا تو لوگ اس صورت حال کو اسی طرح پاتے تھے جس طرح اس نے بیان کیا ہوتا تھا ۔ امام أحمد کے رجال ثقہ ہیں ان میں سے بعض رجال کے بارے میں ایسا کلام کیا گیا ہے جو قدح کا باعث نہیں ہے ۔ امام طبرانی کی سند میں ایک راوی علی بن ابوسارہ ہے ، اور وہ ضعیف ہے ۔

سیدہ عائشہ صدیقہ رضی اللہ عنہا بیان کرتی ہیں : میں حریرہ لے کر نبی اکرم صلی اللہ علیہ وسلم کی خدمت میں حاضر ہوئی جسے میں نے آپ کے لئے پکایا تھا میں نے سیدہ سودہ رضی اللہ عنہا سے کہا: نبی اکرم صلی اللہ علیہ وسلم اس وقت ان کے پاس موجود تھے آپ بھی کھا لیں انہوں نے انکار کر دیا میں نے کہا: یا تو آپ اسے کھا لیں گی یا میں اسے آپ کے چہرے پر مل دوں گی انہوں نے انکار کر دیا میں نے اپنا ہاتھ حریرہ میں ڈالا اور پھر ان کے چہرے کی طرف بڑھی ، تو نبی اکرم صلی اللہ علیہ وسلم ہنس پڑے اور نبی اکرم صلی اللہ علیہ وسلم نے اپنا ہاتھ ان پر رکھا اور ان سے فرمایا : تم اسے اس کے چہرے پر لگا دو پھر نبی اکرم صلی اللہ علیہ وسلم اس بات پر ہنسنے لگے اسی دوران سیدنا عمر رضی اللہ عنہ گزرے انہوں نے کہا: اے عبداللہ ! اے عبداللہ ! نبی اکرم صلی اللہ علیہ وسلم نے یہ گمان کیا کہ شاید یہ وہ اندر آنا چاہ رہے ہیں ، تو نبی اکرم صلی اللہ علیہ وسلم نے فرمایا : تم دونوں اٹھ کر اپنا چہرہ دھو لو سیدہ عائشہ رضی اللہ عنہا کہتی ہیں : جب سے میں نے دیکھا کہ نبی اکرم صلی اللہ علیہ وسلم سیدنا عمر رضی اللہ عنہ کا لحاظ کرتے ہیں اس کے بعد میں ہمیشہ سیدنا عمر رضی اللہ عنہ کا لحاظ کرتی ہوں ۔
یہ روایت امام ابویعلیٰ نے نقل کی ہے ۔ اور اس کے رجال صحیح کے رجال ہیں صرف محمد بن عمرو بن علقمہ کا معاملہ مختلف ہے ، اور اس کی نقل کردہ حدیث حسن ہے ۔

سیدہ رزینہ رضی اللہ عنہا ، جو نبی اکرم صلی اللہ علیہ وسلم کی کنیز ہیں ، وہ بیان کرتی ہیں : سیدہ سودہ یمانیہ رضی اللہ عنہا سیدہ عائشہ رضی اللہ عنہا سے ملنے کے لئے ان کے ہاں آئیں سیدہ عائشہ رضی اللہ عنہا کے پاس سیدہ حفصہ رضی اللہ عنہا بھی موجود تھیں سیدہ سودہ رضی اللہ عنہا تیار ہو کر آئی تھیں ان کی حالت بڑی عمدہ تھی انہوں نے یمن کی عمدہ چادر پہنی ہوئی تھی اور عمدہ چادر اوڑھی ہوئی تھی اور ان چادروں پر دو نقطے تھے جو صبر اور زعفران کے تھے ، علیلہ نامی راوی خاتون نے کہا: میں نے خواتین کو پایا ہے کہ وہ اس کے ذریعے آراستہ ہوتی ہیں ، سیدہ حفصہ رضی اللہ عنہا نے سیدہ عائشہ رضی اللہ عنہا سے کہا: اے ام المؤمنین ! نبی اکرم صلی اللہ علیہ وسلم تشریف لائیں گے ، اور یہ ہمارے درمیان بنی سنوری بیٹھی ہوئی ہو گی ، تو اُم المؤمنین سیدہ عائشہ رضی اللہ عنہا نے کہا: اے حفصہ ! اللہ سے ڈرو سیدہ حفصہ رضی اللہ عنہا نے کہا: میں اس کی تیاری کو ختم کرواتی ہوں سیدہ عائشہ رضی اللہ عنہا نے دریافت کیا : تم کیا کہو گی اس خاتون کے کانوں میں ثقل تھا ( یعنی شاید اس کی سماعت کمزور تھی ) ۔ سیدہ حفصہ رضی اللہ عنہا نے اس سے کہا: اے سودہ ! کانا ( یعنی دجال ) نکل آیا ہے ۔ انہوں نے کہا: اچھا وہ بہت زیادہ گھبرا گئیں اور پھر وہ اپنے زیور کو اتارنے لگیں انہوں نے دریافت کیا : میں اسے کہاں چھپاؤں سیدہ حفصہ رضی اللہ عنہا نے کہا: تم خیمے میں چلی جاؤ ان لوگوں کا ایک کھجور کے خشک پتوں کا خیمہ تھا ، جس میں وہ چیزیں سنبھال کے رکھا کرتے تھے وہ خاتون گئیں اور اس میں چھپ گئیں اس میں کچرا پڑا ہوا تھا ، مکڑی کے جالے تھے ، پھر نبی اکرم صلی اللہ علیہ وسلم تشریف لے آئے ، تو اس دوران یہ دونوں خواتین ( یعنی سیدہ عائشہ رضی اللہ عنہا اور سیدہ حفصہ رضی اللہ عنہا ) ہنس رہی تھیں اور ہنسنے کی زیادتی کی وجہ سے اُن سے بات نہیں ہو پا رہی تھی ، نبی اکرم صلی اللہ علیہ وسلم نے دریافت کیا : یہ ہنسی کس وجہ سے ہے ؟ آپ نے تین مرتبہ یہ بات دریافت کی ، تو ان دونوں نے اپنے ہاتھ کے ذریعے خیمے کی طرف اشارہ کیا ، نبی اکرم صلی اللہ علیہ وسلم وہاں تشریف لے گئے ، تو وہاں سیدہ سودہ رضی اللہ عنہا کانپ رہی تھیں ، تو نبی اکرم صلی اللہ علیہ وسلم نے فرمایا : اسے سودہ ! تمہیں کیا ہوا ہے ؟ انہوں نے عرض کی : یا رسول اللہ ! کیا کانا ( یعنی دجال ) نکل آیا ہے ؟ نبی اکرم صلی اللہ علیہ وسلم نے فرمایا : وہ نہیں نکلا ، لیکن وہ عنقریب نکل آئے گا ، وہ نہیں نکلا ، لیکن وہ عنقریب نکل آئے گا ، پھر نبی اکرم صلی اللہ علیہ وسلم اندر تشریف لے گئے ، آپ نے انہیں باہر نکالا اور ان سے غبار اور مکڑیوں کے جالے کو صاف کرنا شروع کیا ۔
یہ روایت امام ابویعلیٰ اور امام طبرانی نے نقل کی ہے ۔ تاہم انہوں نے یہ الفاظ نقل کیے ہیں سیدہ حفصہ رضی اللہ عنہا نے سیدہ عائشہ رضی اللہ عنہا سے کہا: نبی اکرم صلی اللہ علیہ وسلم ہمارے پاس تشریف لائیں گے ، تو ہم برے حال میں ہوں گی ۔ ۔ ۔ ۔ ۔ ۔ ۔ ۔ ۔ ۔ اور یہ ہمارے درمیان چمک رہی ہو گی ، اور اس روایت کی سند میں ایسے راوی ہیں جن سے میں واقف نہیں ہوں ۔

سیدہ ام سلمہ رضی اللہ عنہا بیان کرتی ہیں : نبی اکرم صلی اللہ علیہ وسلم اپنی ازواج کے پاس روزانہ صبح کے وقت تشریف لایا کرتے تھے اور انہیں سلام کیا کرتے تھے آپ کی ازواج میں سے ایک خاتون کے پاس شہد موجود تھا جب نبی اکرم صلی اللہ علیہ وسلم ان کے پاس تشریف لے جاتے تھے ، تو وہ کچھ شہد آپ کی خدمت میں پیش کر دیتی تھیں نبی اکرم صلی اللہ علیہ وسلم ان کے پاس ٹھہر جاتے تھے سیدہ عائشہ رضی اللہ عنہا اور سیدہ حفصہ رضی اللہ عنہا کو اس حوالے سے الجھن ہوئی جب نبی اکرم صلی اللہ علیہ وسلم ان دونوں خواتین کے پاس تشریف لائے ، تو ان دونوں نے عرض کی : یا رسول اللہ ! ہمیں آپ سے مغافیر کی بو محسوس ہو رہی ہے ، تو نبی اکرم صلی اللہ علیہ وسلم نے وہ شہد ترک کر دیا ۔
یہ روایت امام ابویعلیٰ نے نقل کی ہے ۔ اس کی سند میں ایک راوی موسیٰ بن یعقوب زمعی ہے ، جسے یحیی بن معین اور دیگر حضرات نے ثقہ قرار دیا ہے علی بن مدینی نے اسے ضعیف کہا: ہے ۔ اس روایت کے بقیہ رجال ثقہ ہیں ۔

عمرو بن حریث بیان کرتے ہیں : زنگی ( یعنی سیاہ فام لوگ ) مدینہ منورہ میں کرتب دکھا رہے تھے سیدہ عائشہ رضی اللہ عنہا نے اپنا کندھا نبی اکرم صلی اللہ علیہ وسلم کے کندھے پر رکھا ہوا تھا ، اور انہیں دیکھ رہی تھیں ۔
یہ روایت امام طبرانی نے نقل کی ہے ۔ اور اس کی سند حسن ہے ۔

سیدہ عائشہ صدیقہ رضی اللہ عنہا بیان کرتی ہیں : میں نے زمانہ جاہلیت میں اپنے والد کے مال کے حوالے سے فخر کا اظہار کیا ، جو ایک ہزار ، ہزار اوقیہ تھا ، تو نبی اکرم صلی اللہ علیہ وسلم نے مجھ سے فرمایا : اے عائشہ ! خاموش ہو جاؤ کیونکہ میں تمہارے لئے اسی طرح ہوں ، جیسے ابوزرع ، اُمِ زرع کے لئے تھا ۔ پھر نبی اکرم صلی اللہ علیہ وسلم نے یہ بیان کرنا شروع کیا : ” زمانہ جاہلیت میں گیارہ خواتین اکھٹی ہوئیں اور انہوں نے یہ طے کیا کہ ہر خاتون اپنے شوہر کے بارے میں بتائے گی اور غلط بیانی نہیں کرے گی ، ایک خاتون سے کہا: گیا : اے فلاں عورت ! تم بتاؤ ، تو اس نے کہا: وہ تہامہ کی رات کی طرح ہے نہ زیادہ ٹھنڈا ، نہ زیادہ گرم ، نہ خوف کا شکار کرنے والا ، نہ افسوس کا شکار کرنے والا ۔ پھر کہا: گیا : اے فلانی ! تم بتاؤ ۔ اس نے کہا: اس کی خوشبو زرنب نام کی بوٹی کی طرح ہے ، اور وہ خرگوش کی طرح ملائم ہے ، میں اس پر غلبہ رکھتی ہوں اور وہ لوگوں پر غلبہ رکھتا ہے ۔ پھر کہا: گیا : اے فلانی ! تم بتاؤ ۔ تو اس نے جواب دیا : میرے علم کے مطابق میرا شوہر بلند ستونوں کا مالک ، بڑے دستر خوان والا ، بہت زیادہ راکھ والا ، اور گھر کے پاس چوپال والا ہے ۔ پھر کہا: گیا : اے فلانی ! تم بتاؤ ۔ تو اس نے بتایا : میں نے مالک کے ساتھ شادی کی جس کے پاس اونٹ ہیں ، جو زیادہ تر گھر کے پاس ( قربان ہونے کے لئے ) رہتے ہیں ، وہ چراہ گاہ میں کم ہی جاتے ہیں اور جب وہ ( کسی مہمان کی آمد پر ) باجوں کی آواز سنتے ہیں تو انہیں یقین ہو جاتا ہے کہ اب وہ ذبح ہو جائیں گے ۔ پھر کہا: گیا : اے فلانی تم بتاؤ ۔ اس نے کہا: میں اپنے شوہر کا ذکر نہیں کروں گی ، کیونکہ اگر میں اس کا ذکر کروں گی تو اس کی ہر بات بیان کر دوں گی ، خفیہ اور علانیہ بات ظاہر کر دوں گی ۔ کوئی بات نہیں چھوڑوں گی ۔ پھر کہا: گیا : اے فلانی تم بتاؤ ۔ اس نے کہا: اللہ کی قسم ! میرے علم کے مطابق جب وہ گھر میں آتا ہے ، تو چیتا ہوتا ہے اور جب باہر جاتا ہے تو شیر ہوتا ہے ۔ اس نے جو عہد کیا ہو اس کے بارے میں اس سے سوال نہیں کیا جاتا ۔ پھر کہا: گیا : اے فلانی تم بتاؤ ۔ اس نے کہا: وہ کمزور اونٹ کا گوشت ہے جو پہاڑی پر رکھا ہوا ہو ۔ نہ وہ اتنا صحت مند ہے کہ اسے منتقل کیا جائے اور نہ ہی اس تک رسائی اتنی آسان ہے کہ پہاڑ پر چڑھا جائے ۔ پھر کہا: گیا : اے فلانی تم بتاؤ ۔ اس نے کہا: اللہ کی قسم ! میرے علم کے مطابق جب وہ کھاتا ہے تو سب کچھ ہڑپ کر جاتا ہے ۔ اور جب پیتا ہے تو سب کچھ ختم کر دیتا ہے ۔ جب جانور ذبح کرتا ہے تو ( اس کا گوشت ختم کر دیتا ہے ) اور جب سوتا ہے تو مد ہوش ہو کے سوتا ہے ۔ وہ ہتھیلی میری طرف نہیں بڑھاتا کہ اسے میری پراگندہ حالی کا پتہ چلے ۔ پھر کہا: گیا : اے فلانی تم بتاؤ ۔ اس نے کہا: میرے شوہر کی کوئی کل سیدھی نہیں ہے اگر میں بولوں سو مجھے طلاق ملتی ہے اور اگر میں خاموش رہوں تو ( جان سولی پر ) لٹکی رہتی ہے ۔ پھر کہا: گیا : اے فلانی تم بتاؤ ۔ اس نے کہا: میرا شوہر نامرد ہے ، وہ احمق ہے ، وہ گفتگو نہیں کر سکتا ، اسے ہر قسم کی بیماری لاحق ہے اور وہ مار پیٹ بھی کرتا ہے ۔ پھر کہا: گیا : اے فلانی تم بتاؤ ۔ اس نے کہا: میں نے ابوزرع کے ساتھ شادی کی اور ابوزرع بھی کیا آدمی تھا ، اس نے زیور سے میرے کان جھکا دیے اور میرے بازؤں کو چربی سے بھر دیا ، اس نے مجھے اپنی مہربانیوں سے اتنا خوش کر دیا کہ میں بھر پور خوش ہو گئی ۔ اس نے مجھے تھوڑی سی بکریوں کے مالک کے ایک چھوٹے سے گھرانے میں پایا تھا اور پھر وہ مجھے ایک ایسے گھر میں لے آیا ، جہاں گھوڑے ، اونٹ ، ہل چلانے والے بیل اور کسان موجود تھے ۔ میں اس کے ہاں جب سوتی تھی تو صبح تک سوئی رہتی تھی اور جب پیتی تھی تو خوب سیر ہو جاتی تھی ۔ جب میں جاتی تھی تو مجھ پر کوئی اعتراض نہیں ہوتا تھا ۔ ابوزرع کا بیٹا بھی کیا چیز ہے ۔ وہ اتنی سی جگہ میں پورا آ جاتا ہے جتنی جگہ پر کوئی نرم و نازک شاخ رکھی جاتی ہے اور بکری کے بچے کا شانہ اس کا پیٹ بھرنے کے لئے کفایت کر جاتا ہے ۔ ابوزرع کی بیٹی ، ابوزرع کی بیٹی بھی کیا چیز ہے ، جو بھرے ہوئے جسم کی مالک ہے ، ماں اور باپ کے لئے زینت کا باعث ہے اور اپنی پڑوسن ( یا سوکن ) کے حق میں سب سے بہتر ہے ۔ ابوزرع کی کنیز ، ابوزرع کی کنیز کے کیا کہنے ، وہ ہماری باتوں کی تفتیش نہیں کرتی اور گھر کی چیز باہر نہیں لے جاتی ۔ ایک مرتبہ ابوزرع میرے پاس سے نکلا ، اس وقت دودھ میں سے مکھن نکالا جا رہا تھا ، وہاں اس نے دو بچوں کی ماں کو دیکھا وہ بچے چیتے کے بچوں کی طرح تھے ۔ ابوزرع نے اس کے ساتھ شادی کر لی اور اس نے مجھے طلاق دیدی ۔ پھر میں نے ایک اور شادی کر لی ۔ میں نے ایک خوش اخلاق نوجوان کے ساتھ شادی کر لی ، جو بہادر بھی تھا اور شہسوار بھی تھا ۔ اس نے مجھے طرح طرح کی نعمتیں عطا کیں اور مختلف قسم کے جانور دیئے ، اور یہ کہا: اے اُم زرع ! انہیں تم استعمال کرو اور اپنے اہل خانہ کو بھی دو ۔ میں نے ان سب چیزوں کو جمع کیا تو وہ سب مل کے ابوزرع کے برتنوں میں سے سب سے چھوٹے برتن کو بھی نہیں بھرتے تھے ۔ سیدہ عائشہ رضی اللہ عنہا نے عرض کی : یا رسول اللہ ! آپ میرے لئے ابوزرع سے بہتر ہیں ۔ ( علامہ ہیثمی فرماتے ہیں : ) میں یہ کہتا ہوں : سیدہ عائشہ رضی اللہ عنہا سے منقول حدیث صحیح میں مذکور ہے ، جو ابوزرع کے بارے میں ہے اور سیدہ عائشہ رضی اللہ عنہا پر موقوف ہے ۔ اس روایت میں صرف یہ الفاظ مرفوع ہیں : ” میں تمہارے لئے یوں ہوں ، جیسے ابوزرع ام زرع کے لئے تھا “ ۔
یہ روایت امام طبرانی نے نقل کی ، اس کے بعض رجال صحیح کے رجال ہیں اور بقیہ رجال کی ابن حبان اور دیگر حضرات نے توثیق کی ہے ، اور بعض کے بارے میں ایسے کلام کیا گیا ہے ، جو قدح کا باعث نہیں ہو گا ۔

سیدہ عائشہ رضی اللہ عنہا صدیقہ بیان کرتی ہیں : نبی اکرم صلی اللہ علیہ وسلم میرے ہاں تشریف لائے اور آپ نے فرمایا : اے عائشہ ! میں تمہارے لئے یوں ہوں ، جیسے ابوزرع ام زرع کے لئے تھا ۔ نبی اکرم صلی اللہ علیہ وسلم نے ارشاد فرمایا : یمن کی ایک بستی میں یمن کا ایک قبیلہ رہتا تھا ۔ وہاں گیارہ خواتین تھیں ، وہ ایک محفل میں اکٹھی ہوئیں ، تو انہوں نے ایک دوسرے سے کہا: آؤ ہم اپنے شوہروں کا ذکر کرتی ہیں اور کوئی غلط بیانی نہیں کریں گی ۔ تو پہلی سے کہا: گیا : تم کلام کرو ۔ اس کے بعد راوی نے پوری حدیث ذکر کی ہے ۔ دوسری نے کہا: وہ عمرہ بنت عمرو تھی ، پھر تیسری سے کہا: گیا : تم کلام کرو ۔ وہ حبا بنت کعب تھی ۔ پھر چوتھی سے کہا: گیا : تم کلام کرو ۔ وہ ہدد بنت ابوہرویہ تھی ۔ پھر پانچویں سے کہا: گیا : تم کلام کرو ۔ وہ کبشہ تھی ۔ پھر چھٹی سے کہا: گیا : تم کلام کرو ۔ وہ ہند تھی ۔ پھر ساتویں سے کہا: گیا : تم کلام کرو ۔ وہ حبا بنت علقمہ تھی ۔ پھر آٹھویں سے کہا: گیا : تم کلام کرو ۔ وہ اسماء بنت عبد تھی ۔ پھر نویں سے کہا: گیا : تم کلام کرو ۔ اس کا نام راوی نے ذکر نہیں کیا ۔ پھر دسویں سے کہا: گیا : تم کلام کرو ۔ وہ کبشہ بنت ارقم تھی ۔ پھر ام زرع سے کہا: گیا : تم کلام کرو ۔ وہ اکحیل بن ساعدہ کی صاحبزادی تھی تو اس نے یہ کہا: ابوزرع ، ابوزرع کے کیا کہنے ؟ اس کے بعد راوی نے پوری حدیث ذکر کی ہے ۔
یہ روایت امام طبرانی نے اپنے استاد عبیدہ بن محمد عمری کے حوالے سے نقل کی ہے ، جس پر امام نسائی رحمہ اللہ نے جھوٹا ہونے کا الزام عائد کیا ہے ۔

سیدہ عائشہ صدیقہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں : زمانہ جاہلیت میں گیارہ خواتین اکٹھی ہوئیں اور انہوں نے یہ طے کیا کہ وہ آپس میں سچ بولیں گی اور اپنے شوہروں کے بارے میں کوئی چیز نہیں چھپائیں گی ۔ پہلی نے کہا: میرا شوہر کمزور اونٹ کا وہ گوشت ہے جو پہاڑ کی چوٹی پہ رکھا ہوا ہے ۔ پہاڑ اتنا آسان نہیں کہ اس پر چڑھا جائے اور گوشت اتنا صحت مند نہیں کہ اسے منتقل کیا جائے ، دوسری نے کہا: میں اپنے شوہر کے بارے میں کچھ نہیں کہوں گی کہ مجھے یہ اندیشہ ہے کہ میں اس کی کوئی بات نہیں چھوڑوں گی ، اور ہر ظاہر اور خفیہ بات بیان کر دوں گی ۔ تیسری نے کہا: میرے شوہر کی کوئی بھی کل سیدھی نہیں ہے ، اگر میں بات کروں تو مجھے طلاق مل جائے اور اگر خاموش رہوں تو ( میری جان سولی پر ) لٹکی رہے ۔ چوتھی نے کہا: میرا شوہر جب کھاتا ہے تو ختم کر دیتا ہے ، جب پیتا ہے تو ختم کر دیتا ہے ، جب لیٹتا ہے تو دھت ہو کر سو جاتا ہے ، وہ اپنا ہاتھ بڑھا کر میری بے چینی کا انداز نہیں لگاتا ۔ پانچویں نے کہا: میرا شوہر نامرد ہے ، احمق ہے ، اسے ہر بیماری لاحق ہے اور پھر بھی وہ مار پیٹ بھی کرتا ہے ۔ چھٹی نے کہا: میرا شوہر تہامہ کی رات کی مانند ہے ۔ نہ گرم نہ ٹھنڈا ، نہ خوف کا شکار کرنے والا ۔ ساتویں نے کہا: میرا شوہر جب گھر میں آئے تو چیتا ہوتا ہے اور جب باہر جائے تو شیر ہوتا ہے ۔ اس نے جو عہد کیا ہو اس کے بارے میں اس سے سوال نہیں کیا جاتا ۔ آٹھویں نے کہا: میرا شوہر چھونے میں خرگوش کی طرح ہے اور خوشبو میں زرنب نامی بوٹی کی طرح ہے ۔ میں اس پر غلبہ رکھتی ہوں اور لوگ اس سے مغلوب ہوتے ہیں ۔ نویں نے کہا: میرا شوہر بلند عمارت اور طویل دستر خوان والا ہے ، اس کی راکھ زیادہ ہوتی ہے اور اس کا گھر چوپال کے قریب ہے ۔ دسویں نے کہا: میرا شوہر مالک ہے اور مالک کے کیا کہنے ۔ مالک اس سے زیادہ بہتر ہے کہ اس کے بارے میں کچھ کہا: جائے ، اس کے پاس اونٹ ہیں جو چراگاہ میں کم جاتے ہیں ، اور باڑے میں زیادہ رہتے ہیں ۔ جب وہ ( مہمان کی آمد پر ) باجوں کی آواز سنتے ہیں تو انہیں یقین ہو جاتا ہے کہ اب انہیں ذبح کر دیا جائے گا ۔ گیارہویں نے کہا: میرا شوہر ابوزرع ہے ۔ اور ابوزرع کے کیا کہنے ۔ اس نے میرے کان زیور سے بھر دیے اور میرے بازو چربی سے بھر دیے ۔ اس نے مجھے اتنا خوش کیا کہ میں یہ بات بھول ہی گئی کہ اس نے مجھے چند بکریوں والے گھرانے میں پایا تھا اور پھر لا کر مجھے ایک ایسے گھر میں رکھ دیا جہاں گھوڑے تھے ، اونٹ تھے ، بیل تھے کسان تھے ۔ اس کے ہاں میں کوئی بات کرتی تھی تو مجھ پر تقید نہیں ہوتی تھی ۔ میں سوتی تھی تو صبح تک سوئی رہتی تھی ۔ کچھ پیتی تھی تو سیر ہو جاتی تھی ۔ ابوزرع کی ماں ، ابوزرع کی ماں کے کیا کہنے ۔ اس کے برتن ہمیشہ بھرے رہتے تھے اور اس کا گھر کشادہ تھا ۔ ابوزرع کا بیٹا ، ابوزرع کے بیٹے کے کیا کہنے ۔ ایک شاخ جتنی جگہ پر وہ پورا آ جاتا تھا اور بکری کے بچے کی دستی اس کا پیٹ بھر دیتی تھی ۔ ابوزرع کی بیٹی ، ابوزرع کی بیٹی کے کیا کہنے ۔ وہ ماں کی فرمانبردار تھی اور باپ کی فرمانبردار تھی اور بھرے ہوئے جسم کی مالک تھی اور اپنی پڑوسن ( یا سوکن ) یا غصے میں اضافہ کرنے کا باعث تھی ۔ ابوزرع کی کنیز ، ابوزرع کی کنیز کے کیا کہنے ۔ وہ ہمارے گھر کی بات باہر نہیں پھیلاتی تھی اور ہمارے گھر کی چیز باہر نہیں لے جاتی اور ہمارے گھر میں کوڑا کرکٹ اکٹھا نہیں ہونے دیتی تھی ۔ ایک دن ابوزرع نکلا ، اس وقت دودھ سے مکھن نکالا جا رہا تھا ، اس کا گزر ایک عورت کے پاس سے ہوا ، جس کے ساتھ اس کے دو بیٹے بھی تھے ۔ وہ دونوں چیتے کے بچوں کی طرح تھے ، اور اس کے پہلو کے پاس دو اناروں کے ساتھ کھیل رہے تھے ۔ تو ابوزرع نے مجھے طلاق دیدی اور اس کے ساتھ شادی کر لی ۔ اس کے بعد میں نے ایک خوش اخلاق نوجوان کے ساتھ شادی کر لی ۔ جو شہسوار بھی تھا اور بہادر بھی تھا ۔ اس نے مجھے طرح طرح کی نعمتیں دیں اور مجھے ہر طرح کی نعمت کا جوڑا عطا کیا اور کہا: اے اُم زرع ! تم بھی کھاؤ اور اپنے اہل خانہ کو بھی دو اس نے مجھے جو کچھ دیا ، اگر میں اس سب کو جمع کروں تو وہ ابوزرع کے سب سے چھوٹے برتن کو بھی نہیں بھرے گا ۔ سیدہ عائشہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : میں تمہارے لئے اسی طرح ہوں ، جیسے ابوزرع ، ام زرع کے لئے تھا ۔ اس روایت کے رجال صحیح کے رجال ہیں ۔ صرف عبداللہ بن أحمد بن حنبل کا معاملہ مختلف ہے ، لیکن وہ ثقہ ، امام اور حجت ہیں ۔

سیدنا عبداللہ بن مسعود رضی اللہ عنہ بیان کرتے ہیں : میں نبی اکرم صلی اللہ علیہ وسلم کے ساتھ بیٹھا ہوا تھا آپ کے ساتھ آپ کے اصحاب بھی تھے اسی دوران ایک عورت آئی جس کا لباس مناسب نہیں تھا حاضرین میں سے ایک صاحب اٹھے اور انہوں نے ایک چادر اس پر ڈال دی اور اس کو اپنے ساتھ چمٹا لیا ۔ نبی اکرم صلی اللہ علیہ وسلم کا چہرہ مبارک متغیر ہو گیا آپ کے اصحاب میں سے کسی نے عرض کی : یہ اس شخص کی بیوی ہے ۔ نبی اکرم صلی اللہ علیہ وسلم نے فرمایا : میرا خیال ہے ایسا نہیں ہے اللہ تعالیٰ نے خواتین پر مزاج کی تیزی لکھ دی ہے ، اور مردوں پر جہاد کو لازم قرار دیا ہے ، جو شخص ان خواتین کے حوالے سے ، صبر سے کام لے گا ، اسے شہید کا اجر ملے گا “ ۔
یہ روایت امام بزار نے اور امام طبرانی نے نقل کی ہے ۔ اس کی سند میں ایک راوی عبید بن صباح ہے ، جسے ابوحاتم نے ضعیف قرار دیا ہے ، اور امام بزار نے اسے ثقہ کہا: ہے ۔ اس روایت کے بقیہ رجال ثقہ ہیں ۔