مجمع الزوائد ومنبع الفوائد

سیدہ عائشہ صدیقہ رضی اللہ عنہا ، جو نبی اکرم صلی اللہ علیہ وسلم کی زوجہ محترمہ ہیں ، وہ بیان کرتی ہیں : خویلہ بنت حکیم بن امیہ بن حارثہ بن اوقص سلمیہ میرے ہاں آئیں وہ سیدنا عثمان بن مظعون رضی اللہ عنہ کی اہلیہ تھیں نبی اکرم صلی اللہ علیہ وسلم نے ان کی حالت کو خراب دیکھا تو مجھ سے کہا: اے عائشہ ! خویلہ کی حالت کیوں خراب ہے ؟ سیدہ عائشہ رضی اللہ عنہا کہتی ہیں : میں نے عرض کی : یا رسول اللہ ! یہ ایک ایسی عورت ہیں جس کا شوہر دن کے وقت روزہ رکھ لیتا ہے ، اور رات کو نفل پڑھتا رہتا ہے ، تو یہ اس طرح ہی ہے جس طرح اس کا شوہر ہے اس نے اپنے آپ کو چھوڑ دیا ہے ، اور خود کو ضائع کر رہی ہے سیدہ عائشہ رضی اللہ عنہا بیان کرتی ہیں : نبی اکرم صلی اللہ علیہ وسلم نے سیدنا عثمان بن مظعون رضی اللہ عنہ کو پیغام بھیج کر بلوایا وہ آپ کے پاس آئے ، تو نبی اکرم صلی اللہ علیہ وسلم نے فرمایا : اے عثمان ! کیا تم میری سنت سے منہ موڑ رہے ہو اس نے عرض کی : جی نہیں اللہ کی قسم ! یا رسول اللہ ! میں ، تو آپ کی سنت کی پیروی کرنا چاہتا ہوں نبی اکرم صلی اللہ علیہ وسلم نے فرمایا ، پھر میں ( رات کے وقت ) سو بھی جاتا ہوں ، اور نفل بھی پڑھتا ہوں ، اور میں ( دن کے وقت ، نفلی ) روزہ رکھ بھی لیتا ہوں ، اور چھوڑ بھی دیتا ہوں ، اور میں نے عورتوں کے ساتھ نکاح بھی کیا ہوا ہے اے عثمان تم اللہ سے ڈرو تمہاری بیوی کا تم پر حق ہے تمہارے مہمان کا تم پر حق ہے تمہاری جان کا تم پر حق ہے تم ( نفلی ) روزہ رکھ بھی لیا کرو اور چھوڑ بھی دیا کرو اور تم ( رات کے وقت ) نفل پڑھ بھی لیا کرو اور سو بھی جایا کرو ۔
( علامہ ہیثمی فرماتے ہیں : میں یہ کہتاہوں امام ابوداؤد نے اس روایت کا ایک حصہ نقل کیا ہے ۔
یہ روایت امام أحمد نے نقل کی ہے ۔ امام بزار نے اس کی مانند نقل کی ہے ۔ انہوں نے یہ الفاظ نقل کیے ہیں : نبی اکرم صلی اللہ علیہ وسلم نے فرمایا : ” اے عثمان ! تمہارے لئے میرے طریقے میں بہترین نمونہ ہے میں تم سب سے زیادہ اللہ تعالیٰ سے ڈرنے والا ہوں اور اس کی حدود کی سب سے زیادہ حفاظت کرنے والا میں ہوں “ ۔

ایک روایت جو امام أحمد سے منقول ہے اس میں یہ الفاظ ہیں : رہبانیت ہم پر لازم قرار نہیں دی گئی ہے تم سب سے زیادہ اللہ تعالیٰ سے ڈرنے والا اور اس کی حدود کی سب سے زیادہ حفاظت کرنے والا ” میں “ ہوں“ ۔ امام أحمد کی ایک روایت میں یہ الفاظ ہیں : سیدہ عائشہ صدیقہ رضی اللہ عنہا بیان کرتی ہیں : سیدنا عثمان بن مظعون رضی اللہ عنہ کی اہلیہ پہلے خضاب لگایا کرتی تھیں اور خوشبو لگایا کرتی تھیں پھر انہوں نے اسے ترک کر دیا پھر وہ ایک مرتبہ میرے پاس آئیں ، تو میں نے کہا: کیا آپ کے میاں موجود ہیں یا گئے ہوئے ہیں انہوں نے کہا: موجود ہیں لیکن غیر موجود کی مانند ہیں میں نے ان سے دریافت کیا : آپ کو کیا ہوا ہے ۔ انہوں نے کہا: عثمان کو دنیا کی طلب نہیں ہے اسے عورتوں میں دلچسپی نہیں ہے سیدہ عائشہ رضی اللہ عنہا کہتی ہیں : نبی اکرم صلی اللہ علیہ وسلم میرے ہاں تشریف لائے ، تو میں نے نبی اکرم صلی اللہ علیہ وسلم کو اس بارے میں بتایا نبی اکرم صلی اللہ علیہ وسلم کی سیدنا عثمان رضی اللہ عنہ سے ملاقات ہوئی ، تو آپ نے فرمایا : اے عثمان ! کیا تم اس چیز پر ایمان رکھتے ہو جس پر ہم ایمان رکھتے ہیں انہوں نے عرض کی : جی ہاں یا رسول اللہ ! نبی اکرم صلی اللہ علیہ وسلم نے ارشاد فرمایا ، پھر تم ہمارے اسوہ کی پیروی کیوں نہیں کرتے ۔ امام أحمد کی سند کے رجال ثقہ ہیں ، البتہ ایک روایت ” تم سب سے زیادہ ڈرنے والا “ اس کو امام أحمد نے مسند روایت کے طور پر نقل کیا ہے ، اور امام بزار نے موصول روایت کے طور پر نقل کیا ہے جو ثقہ راویوں کے حوالے سے منقول ہے ۔

مسندِ أحمد کی ایک روایت میں سیدہ عائشہ رضی اللہ عنہا سے مروی ہے ، وہ بیان کرتی ہیں کہ : سیدنا عثمان بن مظعون رضی اللہ عنہ کی اہلیہ (خُولہ بنتِ حکیم) خضاب (مہندی) لگایا کرتی تھیں اور خوشبو استعمال کیا کرتی تھیں ، پھر انہوں نے یہ سب چھوڑ دیا ۔ چنانچہ وہ میرے پاس آئیں تو میں نے ان سے پوچھا: (کیا تمہارا شوہر) گھر پر موجود ہے یا سفر میں (غائب) ہے ؟ انہوں نے کہا: وہ موجود ہو کر بھی غائب ہی کی طرح ہیں ۔ میں نے ان سے پوچھا: تمہیں کیا ہوا ؟ انہوں نے کہا: عثمان نہ دنیا کی خواہش رکھتے ہیں اور نہ عورتوں میں رغبت رکھتے ہیں ۔ سیدہ عائشہ رضی اللہ عنہا فرماتی ہیں : پھر رسول اللہ صلی اللہ علیہ وسلم میرے پاس تشریف لائے تو میں نے آپ صلی اللہ علیہ وسلم کو اس کی خبر دی ۔ چنانچہ آپ صلی اللہ علیہ وسلم سیدنا عثمان رضی اللہ عنہ سے ملے اور فرمایا : ” اے عثمان ! کیا تم اس بات پر ایمان رکھتے ہو جس پر ہم ایمان لاتے ہیں ؟ “ انہوں نے عرض کیا : جی ہاں ، اے اللہ کے رسول ! آپ صلی اللہ علیہ وسلم نے فرمایا : ” تو پھر تمہارے لیے ہمارے طریقہِ کار میں اسوہ (پیروی) کیوں نہیں ہے ؟ “ ۔
امام أحمد کی اسناد کے تمام راوی ثقہ ہیں ، سوائے اس کے کہ ” «إِنَّ أَخْشَاكُمْ» “ یعنی تم میں سے سب سے زیادہ اللہ سے ڈرنے والے والی سند کو امام أحمد نے مسند کیا ہے اور امام بزار نے اسے ثقہ راویوں کے ساتھ موصولاً روایت کیا ہے ۔

سیدنا ابوموسیٰ اشعری رضی اللہ عنہ بیان کرتے ہیں : سیدنا عثمان بن مظعون رضی اللہ عنہ کی اہلیہ نبی اکرم صلی اللہ علیہ وسلم کی ازواج کے پاس آئیں ان ازواج نے انہیں دیکھا کہ ان کی حالت خراب ہے ۔ انہوں نے دریافت کیا ، تمہیں کیا ہوا ہے قریش میں کوئی بھی شخص تمہارے شوہر سے زیادہ خوشحال نہیں ہے اس خاتون نے کہا: میرا ان کے ساتھ کوئی واسطہ ہی نہیں ہے وہ دن کے وقت روزہ رکھ لیتے ہیں اور رات کے وقت نفل پڑھتے رہتے ہیں ۔ نبی اکرم صلی اللہ علیہ وسلم گھر تشریف لائے ، تو ازواج نے آپ کے سامنے یہ بات ذکر کی نبی اکرم صلی اللہ علیہ وسلم کی سیدنا عثمان رضی اللہ عنہ سے ملاقات ہوئی ، تو آپ نے فرمایا : اے عثمان ! کیا تمہارے لئے میرے طریقے میں نمونہ نہیں ہے ۔ انہوں نے عرض کی : یا رسول اللہ ! کیا ہوا ہے میرے ماں باپ آپ پر قربان ہوں نبی اکرم صلی اللہ علیہ وسلم نے فرمایا : تم رات کو نفل پڑھتے رہتے ہو دن کو روزہ رکھ لیتے ہو ؟ تمہاری بیوی کا بھی تم پر حق ہے تمہارے جسم کا بھی تم پر حق ہے تم نماز بھی پڑھا کرو اور سو بھی جایا کرو روزہ بھی رکھا کرو اور روزہ ترک بھی کر دیا کرو ۔ راوی بیان کرتے ہیں : اس کے بعد وہ خاتون ان ازواج کے پاس آئیں ، تو انہوں نے عطر لگایا ہوا تھا یوں جیسے وہ دلہن ہوں ان ازواج نے ان سے دریافت کیا : اب کیا ہوا ہے ، تو انہوں نے بتایا ہمیں بھی وہ چیز نصیب ہوئی ہے جو لوگوں کو ملتی ہے ۔
یہ روایت امام ابویعلیٰ نے اور امام طبرانی نے مختلف اسانید کے ساتھ نقل کی ہے ۔ امام طبرانی کی بعض اسانید کے رجال ثقہ ہیں ۔

سیدنا ابوامامہ رضی اللہ عنہ بیان کرتے ہیں : سیدنا عثمان بن مظعون رضی اللہ عنہ کی اہلیہ خوبصورت عورت تھیں وہ عطر لگاتی تھیں وہ اپنے شوہر کے لئے عمدہ لباس اور تیار ہونے کو پسند کرتی تھیں ، ایک مرتبہ سیدہ عائشہ رضی اللہ عنہا نے انہیں دیکھا کہ ان کی حالت خراب ہے ، تو دریافت کیا : آپ کی یہ حالت کیوں ہو گئی انہوں نے بتایا کہ نبی اکرم صلی اللہ علیہ وسلم کے کچھ اصحاب جن میں سیدنا علی بن ابوطالب رضی اللہ عنہ سیدنا عبداللہ بن رواحہ رضی اللہ عنہ اور سیدنا عثمان بن مظعون رضی اللہ عنہ شامل ہیں ان حضرات نے عبادت کے لئے تخلیہ اختیار کر لیا ہے عورتوں سے علیحدگی اختیار کر لی ہے گوشت کھانا چھوڑ دیا ہے یہ دن کو روزہ رکھتے ہیں اور رات کو نفل پڑھتے رہتے ہیں ، تو مجھے یہ بات اچھی نہیں لگی کہ میں انہیں وہ حالت دکھاؤں کہ وہ اس چیز کو چھوڑ دیں جس کے لئے انہوں نے خلوت اختیار کی ہے ، اور میری طرف آ جائیں جب نبی اکرم صلی اللہ علیہ وسلم گھر تشریف لائے ، تو سیدہ عائشہ رضی اللہ عنہا نے آپ کو اس بارے میں بتایا نبی اکرم صلی اللہ علیہ وسلم نے جوتا پہنا آپ نے شہادت کی انگلی اور دوسری انگلی کے ذریعے اسے اٹھایا اور پھر تیزی سے ان افراد کی طرف چلے گئے آپ ان حضرات کے پاس تشریف لے گئے ان سے ان کی حالت کے بارے میں دریافت کیا ، تو انہوں نے عرض کی : ہم نے بھلائی کا ارادہ کیا ہے ۔ نبی اکرم صلی اللہ علیہ وسلم نے فرمایا : مجھے نرم اور سیدھے دین کے ہمراہ مبعوث کیا گیا ہے مجھے نو ایجاد شدہ رہبانیت کے ہمراہ مبعوث نہیں کیا گیا ہے کچھ لوگوں نے رہبانیت کو ایجاد کیا تھا وہ ان پر لازم قرار دیدی گئی ، تو انہوں نے پھر اس کا اس طرح خیال نہیں رکھا جو اس کا خیال رکھنا چاہیے تھا خبردار تم لوگ گوشت کھاؤ عورتوں کے پاس جاؤ ( نفلی ) روزہ رکھو اور چھوڑ بھی دو اور ( نفل ) نماز پڑھو اور سو بھی جایا کرو مجھے اسی بات کا حکم دیا گیا ہے “ ۔
یہ روایت امام طبرانی نے نقل کی ہے ۔ اس کی سند میں ایک راوی عفیر بن معدان ہے ، اور وہ ضعیف ہے ۔ اس سے پہلے علم سے متعلق باب میں اس روایت کی ایک سند گزر چکی ہے ۔

سیدنا مقدام بن معدیکرب رضی اللہ عنہ بیان کرتے ہیں : نبی اکرم صلی اللہ علیہ وسلم لوگوں کے درمیان کھڑے ہوئے آپ نے اللہ تعالیٰ کی حمد و ثناء بیان کی پھر آپ نے ارشاد فرمایا : بے شک اللہ تعالیٰ نے تمہیں خواتین کے بارے میں بھلائی کا حکم دیا ہے بے شک اللہ تعالیٰ نے تمہیں خواتین کے بارے میں بھلائی کا حکم دیا ہے وہ تمہاری مائیں ہیں تمہاری بیٹیاں ہیں تمہاری خالائیں ہیں ، اہل کتاب سے تعلق رکھنے والا ایک شخص ایک عورت کے ساتھ شادی کرتا ہے ، اس عورت کے ہاتھ دھاگے سے متعلق نہیں ہوتے ، لیکن ان دونوں ( میاں بیوی ) میں سے کوئی بھی دوسرے سے بے رغبت نہیں ہوتا “ ۔
( علامہ ہیثمی فرماتے ہیں : ) میں یہ کہتا ہوں امام ابن ماجہ نے ان کے حوالے سے یہ روایت نقل کی ہے : ” بے شک اللہ تعالیٰ نے تمہیں تمہاری ماؤں کے بارے میں حکم دیا ہے بے شک اللہ تعالیٰ نے تمہیں تمہارے باپوں کے بارے میں حکم دیا ہے بے شک اللہ تعالیٰ نے تمہیں درجہ بدرجہ قریبی عزیزوں کے بارے میں حکم دیا ہے “ ۔ اس میں صرف یہ الفاظ ہیں ۔
یہ روایت امام طبرانی نے نقل کی ہے ۔ اور اس کے رجال ثقہ ہیں تاہم یحیی بن جابر نے سیدنا مقدام رضی اللہ عنہ سے سماع نہیں کیا ہے باقی اللہ بہتر جانتا ہے ۔

سیدنا ابوہریره رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ایمان کے اعتبار سے سب سے زیادہ کامل وہ شخص ہے جو اخلاق کے اعتبار سے سب سے اچھا ہو اور اپنی بیوی کے لئے سب سے بہتر ہو “ ۔
یہ روایت امام أحمد نے نقل کی ہے ۔ اس کی سند میں ایک راوی محمد بن عمرو ہے اس کی نقل کردہ حدیث حسن ہے اس روایت کے بقیہ رجال صحیح کے رجال ہیں ۔
یہ روایت امام ابوداؤد نے نقل کی ہے ۔ صرف یہ الفاظ نقل نہیں کیے ہیں : ” جو اپنی بیوی کے لئے سب سے بہتر ہو “ ۔

سیدنا ابوکبشہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا : ” تم میں سب سے بہتر وہ ہے جو اپنی بیوی کے لئے سب سے بہتر ہو“ ۔
یہ روایت امام طبرانی نے نقل کی ہے ۔ اس کی سند میں ایک راوی عمر بن رؤبہ ہے ، جسے ابن حبان اور دیگر حضرات نے ثقہ قرار دیا ہے ، اور ایک جماعت نے اسے ضعیف کہا: ہے ۔

سیدنا معاویہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم میں زیادہ بہتر وہ ہے جو اپنی بیوی کے حق میں زیادہ بہتر ہو “ ۔
یہ روایت امام طبرانی نے نقل کی ہے ۔ اس کی سند میں ایک راوی علی بن عاصم بن صہیب ہے اس کی بکثرت غلطیوں اور اس کی سرکشی کی وجہ سے اسے منکر قرار دیا گیا ہے ۔

سیدنا عبدالرحمن بن عوف رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم میں زیادہ بہتر وہ ہے جو اپنی بیوی کے حق میں زیادہ بہتر ہو اور میں اپنی بیویوں کے حق میں سب سے بہتر ہوں“ ۔
یہ روایت امام بزار نے نقل کی ہے ۔ اس کی سند میں ایک راوی مصعب بن مصعب ہے ، اور وہ ضعیف ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تم میں زیادہ بہتر وہ ہے جو اپنی بیویوں کے حق میں زیادہ بہتر ہو “ ۔
یہ روایت امام بزار نے نقل کی ہے ۔ اس کی سند میں ایک راوی محمد بن عمرو بن علقمہ ہے جس کی توثیق کی گئی ہے ، اور اس میں ضعف پایا جاتا ہے اس روایت کے بقیہ رجال ثقہ ہیں ۔

سیدنا زبیر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ایسا ہوتا ہے کہ کوئی شخص اپنی بیوی کو یوں مارتا ہے جس طرح کنیز کو مارا جاتا ہے خبردار ! تم میں زیادہ بہتر وہ ہے جو اپنی بیوی کے حق میں زیادہ بہتر ہو “ ۔
یہ روایت امام بزار نے اپنے استاد ذکریا بن یحیی بن ایوب ضریر سے نقل کی ہے ۔ میں اس سے واقف نہیں ہوں ۔ اس روایت کے بقیہ رجال صحیح کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے خواتین کی پٹائی کرنے کی اجازت دی آپ نے رات کے وقت بلند آوازیں سنیں ، تو ارشاد فرمایا : میں نے آوازیں سنی تھیں لوگوں نے عرض کی : یا رسول اللہ ! آپ نے خواتین کی پٹائی کرنے کی اجازت دی تھی نبی اکرم صلی اللہ علیہ وسلم نے فرمایا : تم میں زیادہ بہتر وہ ہے جو اپنی بیوی کے حق میں زیادہ بہتر ہو اور میں اپنی بیویوں کے حق میں سب سے زیادہ بہتر ہوں “ ۔ ( علامہ ہیثمی فرماتے ہیں : ) میں یہ کہتا ہوں امام ابن ماجہ نے اس روایت کا کچھ حصہ نقل کیا ہے ۔
یہ روایت امام بزار نے نقل کی ہے ۔ اس کی سند میں ایک راوی جعفر بن یحیی بن ثوبان ہے وہ مستور ہے اس روایت کے بقیہ رجال ثقہ ہیں امام ابوداؤد نے جعفر نامی اس راوی کے حوالے سے روایت نقل کی ہے ۔ اور اس کے بارے میں خاموشی اختیار کی ہے اس کی نقل کردہ حدیث حسن ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” تم میں زیادہ بہتر وہ ہے جو اپنی بیوی کے حق میں زیادہ بہتر ہو “ ۔
یہ روایت امام بزار نے اپنے استاد عثمان بن عمر سے نقل کی ہے ۔ میں اس سے واقف نہیں ہوں ۔ اس روایت کے بقیہ رجال صحیح کے رجال ہیں ۔

نعیم بن قعنب بیان کرتے ہیں : میں ربذہ کی طرف گیا وہاں سیدنا ابوذر غفاری رضی اللہ عنہ موجود تھے وہ تشریف لائے انہوں نے کسی چیز کے بارے میں اپنی بیوی کے ساتھ بات چیت کی ان کی بیوی نے انہیں پلٹ کر جواب دیا انہوں نے اپنی بات دہرائی ، تو اس عورت نے بھی جواب دہرا دیا تو سیدنا ابوذر غفاری رضی اللہ عنہ نے کہا: تم خواتین اس چیز سے بڑھ کے نہیں ہو جو نبی اکرم صلی اللہ علیہ وسلم نے ارشاد فرمائی ہے : ” عورت پسلی کی مانند ہے اگر تم اسے ٹھیک کرنا چاہو گے ، تو وہ ٹوٹ جائے گی ، جبکہ اس میں کفایت ( یعنی بنیادی ضرورت کی تکمیل ) بھی ہو گی اور ٹیڑھا پن بھی ہو گا “ ۔
یہ روایت امام أحمد اور امام بزار نے نقل کی ہے ۔ اور اس کے رجال صحیح کے رجال ہیں ، صرف نعیم بن قعنب کا معاملہ مختلف ہے ، اور وہ ثقہ ہے ۔

سیدہ عائشہ صدیقہ رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں : ” عورت پسلی کی مانند ہے اگر تم اسے ٹھیک کرنا چاہو گے ، تو اسے توڑ دو گے اس کے ٹیڑھے پن سمیت اس سے نفع حاصل کیا جا سکتا ہے “ ۔
یہ روایت امام أحمد نے اور امام طبرانی نے معجم اوسط میں نقل کی ہے ۔ اور امام بزار نے نقل کی ہے ۔ امام بزار کے رجال صحیح کے رجال ہیں ۔

ایک صاحب بیان کرتے ہیں : میں نے سیدنا سمرہ رضی اللہ عنہ کو بصرہ میں خطبہ دینے کے دوران یہ بات بیان کرتے ہوئے سنا وہ کہتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” عورت کو پسلی سے پیدا کیا گیا ہے اگر تم پہلی کو سیدھا کرنا چاہو گے تو اسے ، توڑ دو گے ، تو تم اس کا خیال رکھو ، ( اسی طرح ) تم اس کے ساتھ رہ پاؤ گے “ ۔
یہ روایت امام أحمد اور امام بزار نے دو اسناد کے ساتھ نقل کی ہے ۔ ان میں سے ایک کے رجال صحیح کے رجال ہیں ان میں سے ایک کا نام ابورجاء عطاردی بیان کیا گیا ہے ۔ امام طبرانی نے اسے معجم کبیر اور معجم اوسط میں نقل کیا ہے ۔ امام أحمد کی سند میں ایک راوی ایسا ہے جس کا نام بیان نہیں کیا گیا ہے اس کے بقیہ رجال صحیح کے رجال ہیں امام طبرانی کی سند میں مستور راوی ہیں اور ایسے راوی جن کی شناخت نہیں ہو سکی ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” عورت تمہارے لئے کسی صورت میں سیدھی نہیں ہو سکتی یہ پسلی کی مانند ہے اگر تم اسے ٹھیک کرنا چاہو گے ، تو تم اسے ، توڑ دو گے ، اور اگر تم اسے یوں چھوڑ دو گے ، تو اس کے ذریعے نفع حاصل کرو گے ، جب کہ اس کے اندر ٹیڑھا پن موجود ہو “ ۔ ایک روایت میں یہ الفاظ ہیں : ” اسے توڑنے سے مراد اسے طلاق دینا ہے “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی سوید بن عبدالعزیز ہے ، جسے دحیم اور ہشیم نے ثقہ قرار دیا ہے جمہور نے اسے ضعیف کہا: ہے ۔ اس روایت کے بقیہ رجال ثقہ ہیں ۔

ایک بزرگ اپنے والد کا یہ بیان نقل کرتے ہیں سیدنا جریر بن عبداللہ رضی اللہ عنہ نے سیدنا عمر رضی اللہ عنہ سے شکایت کی کہ خواتین کی طرف سے انہیں ( ناگوار صورت حال کا سامنا کرنا پڑتا ہے ) تو سیدنا عمر رضی اللہ عنہ نے فرمایا : یہ صورت حال تو ہم بھی پاتے ہیں بعض اوقات میں کسی کام کے سلسلے میں نکلنے لگتا ہوں تو وہ عورت ( یعنی میری بیوی ) یہ کہتی ہے : آپ بنوفلاں کی لڑکیاں دیکھنے کے لئے جا رہے ہیں سیدنا عبداللہ بن مسعود رضی اللہ عنہ نے اس موقع پر ان سے کہا: کیا آپ تک یہ بات نہیں پہنچی ہے کہ سیدنا ابراہیم نے اللہ تعالیٰ سے سیدہ سارہ رضی اللہ عنہا کے مزاج کی تیزی کی شکایت کی ، تو ان سے کہا: گیا کہ اسے پسلی سے پیدا کیا گیا ہے ، تو تم اس کی اس چیز سمیت اس کے ساتھ گزارہ کرو جب تک اس کے دین کے بارے میں تمہیں کوئی غلط چیز نظر نہیں آتی ، تو سیدنا عمر رضی اللہ عنہ نے فرمایا : تمہاری پسلیوں کے درمیان بہت زیادہ علم بھرا گیا ہے ۔
یہ روایت امام طبرانی نے نقل کی ہے ۔ اس کی سند میں دو راوی ایسے ہیں جن کے نام بیان نہیں کیے گئے ہیں ۔ اس روایت کے بقیہ رجال صحیح کے رجال ہیں ۔