مجمع الزوائد ومنبع الفوائد

سیدنا ابوحسن رضی اللہ عنہ بیان کرتے ہیں نبی اکرم صلی اللہ علیہ وسلم پوشیدہ نکاح کو ناپسند کرتے تھے ( آپ کو یہ پسند تھا کہ نکاح کے موقعہ پر ) دف بجائی جائے ، اور یہ گایا جائے : ہم تمہارے پاس آئے ہیں ہم تمہارے پاس آئے تم ہمیں خوش آمدید کہو اور ہم تمہیں خوش آمدید کہتے ہیں ۔
یہ روایت امام أحمد کے صاحبزادے نے نقل کی ہے ۔ اس کی سند میں ایک راوی حسین بن عبداللہ بن ضمیرہ ہے ، اور وہ متروک ہے ۔

سیدنا عبداللہ بن زبیر رضی اللہ عنہما بیان کرتے ہیں : نبی اکرم صلی اللہ علیہ وسلم نے ارشاد فرمایا : ” نکاح کا اعلان کرو “ ۔
یہ روایت امام أحمد نے امام بزار نے اور امام طبرانی نے معجم کبیر اور معجم اوسط میں نقل کی ہے ۔ امام أحمد کے رجال ثقہ ہیں ۔

سیدنا جابر رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدہ عائشہ رضی اللہ عنہا سے فرمایا : کیا تم نے لڑکی کی اس کے گھر رخصتی کروا دی ہے ؟ سیدہ عائشہ رضی اللہ عنہا نے جواب دیا : جی ہاں ! نبی اکرم صلی اللہ علیہ وسلم نے فرمایا : تم نے اس کے ساتھ ان کو کیوں نہیں بھیجا جو ( شادی کا ) گانا گاتے اور یہ کہتے ہیں : ہم تمہارے پاس آئے ہیں تم ہمیں خوش آمدید کہو اور ہم تمہیں خوش آمدید کہتے ہیں ، انصار ایسے لوگ ہیں جنہیں گانے میں دلچسپی ہے ۔
یہ روایت امام أحمد اور امام بزار نے نقل کی ہے ۔ اس کی سند میں ایک راوی اجلح کندی ہے ، جسے یحیی بن معین اور دیگر حضرات نے ثقہ قرار دیا ہے اس میں ضعف پایا جاتا ہے اس روایت کے بقیہ رجال ثقہ ہیں ۔

ابولہب کی بیٹی کے شوہر بیان کرتے ہیں : نبی اکرم صلی اللہ علیہ وسلم ہمارے پاس تشریف لائے ، جب ابولہب کی بیٹی کے ساتھ میں نے شادی کی تھی ، تو نبی اکرم صلی اللہ علیہ وسلم نے دریافت کیا : کیا کوئی لہو ( شادی کا گانا ) ہے ۔
یہ روایت امام أحمد نے اور امام طبرانی نے نقل کی ہے ۔ اس کی سند میں ایک راوی معبد بن قیس ہے ، اور میں اس سے واقف نہیں ہوں ۔

سیدہ عائشہ صدیقہ رضی اللہ عنہما بیان کرتی ہیں : نبی اکرم صلی اللہ علیہ وسلم نے دریافت کیا : فلاں لڑکی کا کیا حال ہے ؟ وہ ایک یتیم لڑکی تھی ، جو نبی اکرم صلی اللہ علیہ وسلم کی زیر پرورش تھی میں نے عرض کی : میں نے اس کی اس کے شوہر کے گھر رخصتی کروا دی ہے ۔ نبی اکرم صلی اللہ علیہ وسلم نے فرمایا : تم نے اس کے ساتھ کسی ایسی لڑکی کو کیوں نہیں بھیجا جو دف بجاتی اور گانا گاتی سیدہ عائشہ ہی ہونا نے عرض کی : وہ کیا گاتی ؟ نبی اکرم صلی اللہ علیہ وسلم نے فرمایا : وہ یہ گاتیں : ” ہم تمہارے پاس آئے ہیں ہم تمہارے پاس آئے ہیں تم ہمیں خوش آمدید کہو اور ہم تمہیں خوش آمدید کہتے ہیں ۔ اگر سرخ سونا نہ ہوتا ، تو اُس نے تمہارے ہاں نہیں آنا تھا ، اور اگر صاف گندم نہ ہوتی ، تو تمہاری کنواری لڑکیوں نے صحت مند نہیں ہونا تھا “ ۔
یہ روایت امام طبرانی نے نقل کی ہے ۔ اس کی سند میں ایک راوی رواد بن جراح ہے ، جسے امام أحمد یحیی بن معین اور ابن حبان نے ثقہ قرار دیا ہے ، اور اس میں ضعف پایا جاتا ہے ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم جب مدینہ منورہ تشریف لائے ، تو آغاز میں آپ کا گزر ایک شادی کے پاس سے ہوا جس میں خواتین موجود تھیں اور ان میں سے کوئی ایک یہ گا رہی تھی : ” اور اس شخص نے اس عورت کو ایک دنبہ تحفہ کے طور پر دیا ہے جو باڑے میں ٹھہر گیا ہے ، اور تمہارا شوہر آبادی سے باہر رہتا ہے اور وہ جانتا ہے کہ کل کیا ہو گا“ ۔ تو نبی اکرم صلی اللہ علیہ وسلم نے فرمایا : تم یہ نہ گاؤ ! تم یہ گاؤ : ” ہم تمہارے پاس آئے ہیں ہم تمہارے پاس آئے ہیں تم ہمیں خوش آمدید کہو اور ہم تمہیں خوش آمدید کہتے ہیں “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی مجاشع بن عمرو ہے ، اور وہ کذاب ہے ۔

سیدہ عائشہ رضی اللہ عنہا بیان کرتی ہیں : نبی اکرم صلی اللہ علیہ وسلم انصار کی کچھ خواتین کے پاس سے گزرے جو ایک شادی میں شریک تھیں اور وہ یہ گانا گا رہی تھیں : ” اس مرد نے اس عورت کو ایک دنبہ تحفے کے طور پر دیا ہے جو باڑے میں ٹھہر گیا ہے ، اور تمہارا شوہر آبادی سے باہر رہتا ہے ، اور وہ یہ جانتا ہے کہ کل کیا ہو گا“ ۔ نبی اکرم صلی اللہ علیہ وسلم نے ارشاد فرمایا : کل کیا ہو گا یہ بات صرف اللہ جانتا ہے “ ۔
یہ روایت امام طبرانی نے معجم صغیر اور معجم اوسط میں نقل کی ہے ۔ اور اس کے رجال صحیح کے رجال ہیں ۔

سیدنا سائب بن یزید رضی اللہ عنہ بیان کرتے ہیں : نبی اکرم صلی اللہ علیہ وسلم کی ملاقات کچھ لڑکیوں سے ہوئی جو گانا گا رہی تھیں اور یہ گا رہی تھیں : تم ہمیں خوش آمدید کہو ہم تمہیں خوش آمدید کہیں ۔ نبی اکرم صلی اللہ علیہ وسلم کے پاس ٹھہر گئے آپ نے انہیں بلایا اور فرمایا تم یہ نہ کہو بلکہ تم یہ کہو کہ انہوں نے ہمیں اور تمہیں خوش آمدید کہا: ایک شخص نے عرض کی : یا رسول اللہ ! کیا آپ لوگوں کو اس کی اجازت دیتے ہیں ۔ نبی اکرم صلی اللہ علیہ وسلم نے ارشاد فرمایا : جی ہاں یہ نکاح ہے کوئی پوشیدہ عمل نہیں ہے تم نکاح پر گانا گاؤ ۔
یہ روایت امام طبرانی نے نقل کی ہے ۔ اس کی سند میں ایک راوی یزید بن عبدالملک نوفلی ہے ، اور وہ ضعیف ہے اسے یحیی بن معین نے ایک روایت کے مطابق ثقہ قرار دیا ہے ۔

عبداللہ بن ہبار ، اپنے والد کا یہ بیان نقل کرتے ہیں سیدنا ہبار رضی اللہ عنہ نے اپنی صاحبزادی کی شادی کی ، تو ان کی شادی میں ” کیر “ ( مخصوص آلہ ) اور ” غربال “ ( دف نما ایک برتن ) بجایا گیا ، نبی اکرم صلی اللہ علیہ وسلم نے یہ آواز سنی ، تو دریافت کیا : یہ کس وجہ سے ہے ؟ لوگوں نے بتایا : ہبار نے اپنی صاحبزادی کی شادی کی ہے ، تو اس کی شادی میں ” کیا “ ( مخصوص آلہ ) اور ” غربال “ ( دف نما ایک برتن ) بجایا جا رہا ہے ۔ نبی اکرم صلی اللہ علیہ وسلم نے فرمایا : ” نکاح پر گانا گاؤ ! نکاح پر گانا گاؤ ! یہ نکاح ہے ، کوئی پوشید تعلق نہیں ہے “ ۔
یہ روایت امام طبرانی نے نقل کی ہے ۔ اس کی سند میں ایک راوی محمد بن عبیداللہ عرزمی ہے ، اور وہ ضعیف ہے ۔

سیدنا معاذ بن جبل رضی اللہ عنہ کے بارے میں یہ بات منقول ہے کہ وہ نبی اکرم صلی اللہ علیہ وسلم کے ساتھ انصار سے تعلق رکھنے والے ایک شخص کی شادی میں شریک ہوئے نبی اکرم صلی اللہ علیہ وسلم نے نکاح کا خطبہ پڑھا اور انصاری کی شادی کروا دی پھر آپ نے دعا دی : الفت ہو بھلائی ہو خیر آئے ( پھر آپ نے فرمایا : ) اپنے ساتھی کے سر پر دف بجاؤ لوگوں نے اس کے سرہانے دف بجائی پھر کچھ ٹوکرے آئے جن میں پھل اور میٹھی چیزیں تھیں ، وہ لوگوں کے سامنے رکھی گئیں لیکن لوگ اس سے رک گئے انہوں نے ان کو لوٹا نہیں ۔ نبی اکرم صلی اللہ علیہ وسلم نے فرمایا : بردباری اچھی چیز ہے ، لیکن تم لوگ لوٹتے کیوں نہیں ہو ۔ انہوں نے عرض کی : یا رسول اللہ ! آپ نے ہمیں فلاں ، فلاں دن لوٹنے سے منع کیا تھا ۔ نبی اکرم صلی اللہ علیہ وسلم نے فرمایا : میں نے تمہیں جنگ میں لوٹنے سے منع کیا تھا ولیمے میں لوٹنے سے منع نہیں کیا تھا سیدنا معاذ بن جبل رضی اللہ عنہ کہتے ہیں : اللہ کی قسم ! میں نے نبی اکرم صلی اللہ علیہ وسلم کو دیکھا کہ آپ اس کو کھینچ رہے تھے اور لوگ بھی اس کو کھینچ رہے تھے اس طرح وہ چھین رہے تھے ۔
یہ روایت امام طبرانی نے معجم اوسط اور معجم کبیر میں اس کی مانند نقل کی ہے ۔ تا ہم اس میں ان کے یہ الفاظ ہیں : ” بھلائی ہو برکت ہو الفت ہو نیک نصیب ہو رزق میں گنجائش ہو اللہ تعالیٰ تمہیں برکت نصیب کرے “ ۔ معجم اوسط کی سند میں ایک راوی بشر بن ابراہیم ہے ، اور وہ حدیث ایجاد کرنے والا شخص ہے معجم کبیر کی سند میں ایک راوی حازم ہے جو بنو ہاشم کا غلام ہے اس نے لمازہ سے روایت نقل کی ہے ۔ میں نے کسی کو ان دونوں کے حالات بیان کرتے ہوئے نہیں پایا ہے لمازہ نامی اس راوی نے ثور بن یزید سے روایت نقل کی ہے ۔ اور یہ بعد کے زمانے کا ہے یہ ابن زبار نہیں ہے ، کیونکہ وہ ، تو سیدنا علی بن ابوطالب رضی اللہ عنہ اور ان جیسے افراد سے روایت نقل کرتا ہے معجم کبیر کے بقیہ رجال ثقہ ہیں ۔