مجمع الزوائد ومنبع الفوائد

سیدنا عبداللہ بن مسعود رضی اللہ عنہ فرماتے ہیں : نبی اکرم صلی اللہ علیہ وسلم نے ہمیں خطبہ نکاح کی تعلیم دی تھی آپ نے یہ پڑھا : ” بے شک ہر طرح کی حمد ، اللہ تعالیٰ کے لئے مخصوص ہے ہم اس کی حمد بیان کرتے ہیں ، اور ہم اس سے مدد مانگتے ہیں اور ہم اپنی ذات کے شر سے اور اپنے اعمال کی خرابی سے اللہ کی پناہ مانگتے ہیں جسے اللہ تعالیٰ ہدایت عطا کر دے اسے کوئی گمراہ کرنے والا نہیں ہے ، اور جسے وہ گمراہ کر دے اسے کوئی ہدایت دینے والا نہیں ہے ، اور میں اس بات کی گواہی دیتا ہوں کہ اللہ تعالیٰ کے علاوہ اور کوئی معبود نہیں ہے وہی ایک معبود ہے اس کا کوئی شریک نہیں ہے ، اور میں اس بات کی گواہی دیتا ہوں کہ سیدنا محمد صلی اللہ علیہ وسلم اس کے بندے اور اس کے رسول ہیں “ ۔ ابوعبیدہ نامی راوی کہتے ہیں : میں نے سیدنا ابوموسیٰ اشعری رضی اللہ عنہ کی زبانی یہ بات سنی ہے وہ فرماتے ہیں : نبی اکرم صلی اللہ علیہ وسلم یہ فرماتے تھے : ” اگر تم چاہو تو تم اس میں قرآن کی کچھ آیات بھی شامل کر لو ! تم یہ پڑھو : ” تم لوگ اللہ سے ( یوں ) ڈرو جو اس سے ڈرنے کا حق ہے ، اور تم مرتے وقت صرف مسلمان ہی ہونا “ ” اور تم اس اللہ سے ڈرو ! جس کے وسیلے سے تم ایک دوسرے سے مانگتے ہو اور رشتے داری کے حقوقی کا خیال رکھو بے شک اللہ تعالیٰ تمہارا نگہبان ہے “ ۔ ” اور تم لوگ اللہ تعالیٰ سے ڈرو اور سیدھی بات کہو وہ تمہارے اعمال کو درست کر دے گا ، اور تمہارے گناہوں کی مغفرت کر دے گا ، جو شخص اللہ اور اس کے رسول کی اطاعت کرتا ہے ، تو وہ عظیم کامیابی حاصل کر لیتا ہے “ ۔ اما بعد ! پھر تم اپنی حاجت کے بارے میں کلام کرو ۔ ( علامہ ہیثمی فرماتے ہیں : ) میں یہ کہتا ہوں
یہ روایت امام ابوداؤد اور دیگر حضرات نے نقل کی ہے ۔ تا ہم انہوں نے سیدنا ابوموسیٰ اشعری رضی اللہ عنہ کی نقل کردہ روایت نہیں نقل کی ہے ۔
یہ روایت امام ابویعلیٰ نے اور امام طبرانی نے معجم اوسط میں نقل کی ہے ۔ معجم کبیر میں انہوں نے اسے اختصار کے ساتھ نقل کیا ہے اس روایت کے رجال ثقہ ہیں سیدنا ابوموسیٰ اشعری رضی اللہ عنہ سے منقول حدیث متصل ہے ۔ ابوعبیدہ نامی راوی نے اپنے والد سے سماع نہیں کیا ہے ۔