مجمع الزوائد ومنبع الفوائد

سیدہ سہلہ بنت سہیل رضی اللہ عنہا کے بارے میں یہ بات منقول ہے : انہوں نے عرض کی : یا رسول اللہ ! ابوحذیفہ کا غلام سالم ، میرے ہاں آ جاتا ہے ، اس کی داڑھی آ گئی ہے ، نبی اکرم صلی اللہ علیہ وسلم نے فرمایا : تم اسے دودھ پلا دو ! اس خاتون نے عرض کی : میں اسے دودھ کیسے پلاؤں ؟ جبکہ وہ داڑھی والا ہے ، پھر اس خاتون نے اسے دودھ پلا دیا ، تو وہ صاحب اس خاتون کے ہاں آ جایا کرتے تھے ۔
یہ روایت امام أحمد نے نقل کی ہے ، اور امام طبرانی نے تینوں کتابوں میں نقل کی ہے ، امام أحمد کے رجال صحیح کے رجال ہیں ، البتہ تمام راویوں نے اسے قاسم بن محمد کے حوالے سے سیدہ سہلہ رضی اللہ عنہ سے نقل کیا ہے اور مجھے نہیں معلوم ان صاحب نے اس خاتون سے سماع کیا ہے یا نہیں کیا ہے ؟ ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” رضاعت سے وہی حرمت ثابت ہوتی ہے ، جو نسب سے حرمت ثابت ہوتی ہے ، ماموں ، یا چچا ، یا بھانجے وغیرہ کی “ ۔
( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں اختصار کے ساتھ منقول ہے ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔

سیدنا ثوبان رضی اللہ عنہ ، نبی اکرم صلی اللہ علیہ وسلم کا یہ فرمان نقل کرتے ہیں : ” رضاعت سے وہی حرمت ثابت ہوتی ہے ، جو حرمت نسب سے ثابت ہوتی ہے “ ۔
یہ روایت امام طبرانی نے نقل کی ہے اس کی سند میں ایک راوی یزید بن ربیعہ ہے اور وہ متروک ہے ۔

سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” رضاعت سے وہی حرمت ثابت ہوتی ہے ، جو حرمت نسب سے ثابت ہوتی ہے “ ۔
یہ روایت امام طبرانی نے نقل کی ہے اس کی سند میں ایک راوی عفیر بن معدان ہے اور وہ ضعیف ہے ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” رضاعت سے وہی حرمت ثابت ہوتی ہے ، جو نسب سے حرمت ثابت ہوتی ہے “ ۔
یہ روایت امام طبرانی نے معجم اوسط میں نقل کی ہے اور اس کے رجال ثقہ ہیں ۔

ابوجعفر بیان کرتے ہیں : سیدنا کعب بن عجرہ رضی اللہ عنہ سے کہا: گیا : آپ وہ حدیث بیان کیجئے ، جو آپ نے نبی اکرم صلی اللہ علیہ وسلم کی زبانی سنی ہو ، انہوں نے فرمایا : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” رضاعی بھتیجی ، یا رضاعی بھانجی ( کے ساتھ شادی کرنا ) حلال نہیں ہے “ ۔
یہ روایت امام طبرانی نے نقل کی ہے اس کی سند میں ایک راوی جابر جعفی ہے اور وہ ضعیف ہے ، ویسے اس کی توثیق کی گئی ہے ۔

نخعی بیان کرتے ہیں : سیدنا علی رضی اللہ عنہ اور سیدنا عبداللہ بن مسعود رضی اللہ عنہ فرماتے ہیں : رضاعت سے حرمت ثابت ہو جاتی ہے ، خواہ وہ ( رضاعت ) تھوڑی ہو ، یا زیادہ ہو “ ۔
یہ روایت امام طبرانی نے نقل کی ہے اور اس کی سند منقطع ہے ۔

عمرو بن دینار بیان کرتے ہیں : ایک شخص سیدنا عبداللہ بن عمر رضی اللہ عنہما کے پاس آیا اور بولا: ابن زبیر کا یہ کہنا ہے کہ رضاعت جو ایک چسکی یا دو چسکی کی ہو ، وہ حرمت کو ثابت نہیں کرتی ہے ، تو سیدنا عبداللہ بن عمر رضی اللہ عنہما نے فرمایا : اللہ اور اس کے رسول کا فیصلہ ابن زبیر کے فیصلے سے زیادہ بہتر ہے ، رضاعت تھوڑی ہو یا زیادہ ہو ، برابر کی حیثیت رکھتی ہے ۔
یہ روایت امام طبرانی نے نقل کی ہے ، اس کی سند میں ایک راوی ابراہیم بن یزید خوزی ہے اور وہ متروک ہے ۔

سیدنا زبیر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” ایک چسکی ، یا دو چسکیاں ، ایک گھونٹ ، یا دو گھونٹ حرمت ثابت نہیں کرتے ہیں “ ۔
یہ روایت امام ابویعلیٰ نے اور امام طبرانی نے نقل کی ہے ، اس کی سند میں ایک راوی محمد بن دینار طاحی ہے ، جسے ابوزرعہ ، ابوحاتم اور ابن حبان نے ثقہ قرار دیا ہے ، ویسے یہ ضعیف ہے ، اس روایت کے بقیہ رجال ثقہ ہیں ۔

سیدنا مغیرہ بن شعبہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” عنقہ “ حرمت کو ثابت نہیں کرتا “ ہم نے دریافت کیا : عنقہ سے مراد کیا ہے ؟ انہوں نے بتایا : عورت کے ہاں بچہ پیدا ہو ، اُس کی چھاتی میں دودھ آ جائے اور پھر وہ پاس موجود بچی کو ایک یا دو مرتبہ پلا دے ۔
یہ روایت امام طبرانی نے معجم کبیر اور معجم اوسط میں نقل کی ہے اس کے رجال صحیح کے رجال ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ایک یا دو چسکیوں کی رضاعت ، حرمت ثابت نہیں کرتی ہے ، وہ رضاعت حرمت ثابت کرتی ہے ، جو آنتوں کو کھول دے “ ۔
یہ روایت امام بزار نے نقل کی ہے ، اس کی سند میں ایک راوی ابن اسحاق ہے وہ ثقہ ہے ، لیکن وہ تدلیس کرنے والا ہے ، اس روایت کے بقیہ رجال ثقہ ہیں ۔

سیدہ حفصہ رضی اللہ عنہا بیان کرتی ہیں : نبی اکرم صلی اللہ علیہ وسلم رضاعت کے ذریعے حرمت کو اس وقت ثابت قرار دیتے تھے ، جب دس مرتبہ ، یا دس سے زیادہ مرتبہ رضاعت ہوئی ہو ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی واقدی ہے اور وہ ضعیف ہے ، ویسے اس کی توثیق کی گئی ہے ۔

سیدنا علی بن ابوطالب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” دودھ چھڑا لینے کے بعد رضاعت کا حکم ثابت نہیں ہوتا ، بالغ ہو جانے کے بعد یتیمی کا حکم ثابت نہیں ہوتا ، رات تک خاموش رہنے کی کوئی حیثیت نہیں ہے ، اور نکاح کے بعد ہی طلاق دی جا سکتی ہے “ ۔
( علامہ ہیثمی فرماتے ہیں : ) میں یہ کہتا ہوں : امام ابوداؤد نے اس کا کچھ حصہ نقل کیا ہے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی مطرف بن مازن ہے اور وہ ضعیف ہے ۔

ابوعطیہ بیان کرتے ہیں : سیدنا ابوموسیٰ رضی اللہ عنہ کے پاس ایک شخص آیا اور بولا: اس کی بیوی کی چھاتی میں ورم آ گیا ، اس نے اسے چوسنا اور گھونٹ بھرنا شروع کیا ، تو کچھ دودھ اس کے پیٹ میں چلا گیا ، سیدنا ابوموسیٰ اشعری رضی اللہ عنہ نے کہا: میرا خیال ہے اب وہ عورت تمہارے لئے درست ( یعنی حلال ) نہیں رہی ، پھر وہ شخص سیدنا عبداللہ بن مسعود رضی اللہ عنہ کے پاس آیا اور ان سے اس بارے میں دریافت کیا ، تو انہوں نے فرمایا : وہ عورت تم پر حرام نہیں ہوئی ہے وہ رضاعت حرمت کو ثابت کرتی ہے ، جو گوشت پیدا کرتی ہے اور ہڈیاں مضبوط کرتی ہے اور دودھ چھڑا لینے کے بعد رضاعت ثابت نہیں ہوتی ہے ، سیدنا ابوموسی رضی اللہ عنہ کو یہ بات بتائی گئی ، تو انہوں نے فرمایا : تم لوگ مجھ سے اُس وقت تک کوئی مسئلہ نہ پوچھنا ، جب تک اللہ کے رسول کے اصحاب میں سے یہ ہمارے درمیان موجود ہیں ۔
یہ روایت امام طبرانی نے نقل کی ہے اس کی سند میں ایک راوی عبدالرحمن بن عبداللہ مسعودی ہے اور وہ ثقہ ہے ، لیکن وہ اختلاط کا شکار ہو گیا تھا ۔

سیدنا ابوقعیس رضی اللہ عنہ کے بارے میں یہ بات منقول ہے : وہ سیدہ عائشہ رضی اللہ عنہا کے ہاں آئے اور انہوں نے اندر آنے کی اجازت طلب کی ، تو سیدہ عائشہ رضی اللہ عنہا کو انہیں اجازت دینا اچھا نہیں لگا جب نبی اکرم صلی اللہ علیہ وسلم تشریف لائے تو سیدہ عائشہ رضی اللہ عنہا نے عرض کی : یا رسول اللہ ! ابوقعیس میرے ہاں آئے تھے ، میں نے انہیں اجازت دینے سے انکار کر دیا ، نبی اکرم صلی اللہ علیہ وسلم نے فرمایا : وہ تمہارے ہاں آ سکتے ہیں ، وہ تمہارے چچا ہیں ، راوی کہتے ہیں : ابوقعیس ، سیدہ عائشہ رضی اللہ عنہا کے رضاعی چچا تھے ۔
یہ روایت امام طبرانی نے معجم صغیر اور معجم اوسط میں نقل کی ہے ، اس کی سند میں ایک راوی عباد بن منصور ہے اور وہ ثقہ ہے ، ویسے وہ ضعیف ہے ۔

سیدہ عائشہ صدیقہ رضی اللہ عنہا بیان کرتی ہیں : ایک شخص نے نبی اکرم صلی اللہ علیہ وسلم سے سوال کیا : کون سی چیز مجھ سے رضاعت کی مذمتہ ( یعنی اس کی وجہ سے لازم ہونے والے حق ) کو ختم کر سکتی ہے ؟ نبی اکرم صلی اللہ علیہ وسلم نے ارشاد فرمایا : ایک غلام یا کنیز ادا کرنا ۔
یہ روایت امام بزار نے أحمد بن بکار باہلی کے حوالے سے نقل کی ہے ، میں اس سے واقف نہیں ہوں اس روایت کے بقیہ رجال صحیح کے رجال ہیں ۔

سیدنا عبادہ بن صامت رضی اللہ عنہ کے بارے میں یہ بات منقول ہے : انہوں نے عرض کی : یا رسول اللہ ! کون سی چیز مجھ سے رضاعت کی مذمتہ ( یعنی اس کی وجہ سے لازم ہونے والے حق ) کو دور کر سکتی ہے ؟ نبی اکرم صلی اللہ علیہ وسلم نے فرمایا : ایک غلام ، یا کنیز ادا کرنا ۔
یہ روایت امام طبرانی نے نقل کی ہے ، اسحاق بن یحیی نامی راوی نے سیدنا عبادہ رضی اللہ عنہ کا زمانہ نہیں پایا ہے ، اس روایت کے بقیہ رجال ثقہ ہیں ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” احمق عورت سے دودھ نہ پلواؤ “ ۔ یونس بن حبیب کہتے ہیں : ” ورہاء “ کا مطلب احمق عورت ہے ۔
یہ روایت امام طبرانی نے معجم صغیر میں نقل کی ہے اور امام بزار نے نقل کی ہے ، تا ہم انہوں نے یہ الفاظ نقل کیے ہیں : ” احمق عورت سے دودھ نہ پلوانا ، کیونکہ دودھ کے اثرات ہوتے ہیں “ ۔ ان دونوں کی سند ضعیف ہے ۔

سیدنا عمر رضی اللہ عنہ کے بارے میں یہ بات منقول ہے : وہ بیان کرتے ہیں : نبی اکرم صلی اللہ علیہ وسلم نے احمق عورت سے دودھ پلوانے سے منع کیا ہے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عباد بن عبدالصمد ہے اور وہ ضعیف ہے ۔